བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༡༠༤༦ སྟེང་གི་རྩོམ་སྒྲིག་པའི་གཏམ།
སྙིང་ཉེ་བའི་བོད་ཀྱི་དུས་བབ་ཀྱི་ཀློག་པ་པོ་རྣམ་པ། ཐོག་མར་ཁམས་བདེའི་འཚམས་འདྲི་ཞུ། འདས་བའི་ལོ་ངོ་བཅུ་ཙམ་གྱི་རིང་ལ་བོད་ཀྱི་དུས་བབ་ཀྱི་རྩོམ་སྒྲིག་པའི་གཏམ་སྤེལ་མེད། འོན་ཀྱང་། དུས་བབ་ཚགས་ཤོག་དང་། དུས་བབ་དྲ་ཚིགས་གཉིས་ཀྱི་གསོན་ཤུགས་སྔར་ལས་རྒྱས་ཏེ་རི་རྒྱལ་ལྷུན་པོ་བཞིན་བརྟན་པོར་གནས་ཡོད་པས། ད་ལོ་བོད་ཀྱི་དུས་བབ་གསར་ཁང་ཚུགས་ནས་ལོ་ངོ་ཧྲིལ་པོ་སུམ་ཅུ་འཁོར་གྱི་ཡོད། སྟེས་དབང་ཞིག་གིས་འདི་ལོའི་ཕྱི་ཟླ ༨ ཚེས ༡ ཉིན་ནས་བཟུང་དུས་བབ་རྩོམ་སྒྲིག་པའི་འགན་འཁྲི་དེ་བདག་གི་ཕྲག་སྟེང་དུ་བབས། རྩོམ་སྒྲིག་པ་ཞིག་ལ་མཚོན་ན། གསར་འགྱུར་རྩོམ་སྒྲིག་གི་ལས་འགན་གྱི་སྟེང་དུ་ལས་འགན་གཞན་ཞིག་ཡོད་པ་ནི་རྩོམ་སྒྲིག་པའི་གཏམ་སྤེལ་རྒྱུ་དེ་རེད། འདི་ནི་ལས་འགན་ཞིག་རེད་ལ། ཐོང་ཐང་ཞིག་ཀྱང་རེད། ངས་ཐོབ་ཐང་འདི་ལེན་ན་འདོད།
ཡང་གཅིག་བཤད་ན། མང་གཙོའི་སྤྱི་ཚོགས་ཁྲོད་ཐོབ་ཐང་དང་འབྲལ་མེད་དུ་གནས་པ་ནི་འགན་འཁྲི་ཡིན་པས། ངས་བཟློག་མེད་ཀྱི་འགན་འཁྲི་འདི་རང་ནུས་ཅི་ལྕོགས་ཀྱིས་དང་དུ་ལེན། སྤྱིར་གཏམ་ལ་བཤད་རེས་དང་ཉན་རེས་ཟེར་བ་ཞིག་ཡོད་ཀྱང་། དེང་གི་དུས་སུ་ཤོད་མཁན་མང་ཡང་ཉན་མཁན་ཉུང་ཉུང་རེད། ཉན་མཁན་ཡོད་ནའང་སོ་སོས་ཉན་ན་འདོད་པའི་གཏམ་ཁོ་ནར་ཉན་མཁན་ཇེ་མང་རེད། དེ་ལས་ཀྱང་ཚབས་ཆེ་བ་ཞིག་ནི། གཏམ་འདི་དང་དེ་བཤད་ན་འགྲིག་གི་མ་རེད་ཅེས་གཏམ་གྱི་སྒོ་མོ་མ་ཕྱེས་གོང་ནས་ཉན་གྱི་མིན་ཟེར་བ་དེ་འདྲ་ཡོང་གི་ཡོད།
ཉིན་ཤས་གོང་བལ་ཡུལ་གཞུང་གིས་རྒྱལ་སྤྱིའི་བོད་རིག་པའི་ཚོགས་ཆེན་ཐེངས་བཅུ་བདུན་པ་བལ་ཡུལ་དུ་འཚོགས་མི་ཆོག་པའི་བཀའ་རྒྱ་བཏང་བ་རེད། བོད་ཀྱི་ལོ་རྒྱུས་དང་། བོད་བརྒྱུད་ནང་བསྟན། བོད་ཀྱི་རིག་གཞུང་། ཐ་ན་མཐོ་སྒང་བོད་མིའི་འཚོ་བ་རོལ་སྟངས་སོགས་བརྗོད་གཞི་འདྲ་མིན་ཐོག་ཉམས་ཞིབ་གནང་མཁན་བོད་རིག་པ་བ་བདུན་བརྒྱ་ཙམ་གྱིས་ལོ་ངོ་བཞི་ཙམ་གྱི་རིང་ངང་སྒུག་བྱས་པའི་ཚོགས་ཆེན་འདི་བཀག་སྡོམ་བྱེད་དོན་ནི། ཚོགས་ཆེན་འདིའི་སྟེང་དུ་རྒྱ་ནག་གཞུང་གིས་གོ་འདོད་མེད་པའི་གཏམ་ཞིག་བཤད་མི་ཡོང་ངམ་སྙམ་པའི་དངངས་འཚབ་དང་། ཉན་ན་མི་སྙན་པའི་དྲང་བདེན་གྱི་གཏམ་ཞིག་བཤད་མི་ཡོང་ངམ་སྙམ་པའི་བློ་འཚབ། གཏམ་གྱི་ཟ་ཟུར་ནས་ཕོག་ཐུག་རེ་གཏོང་མི་ཡོང་ངམ་སྙམ་པའི་ཞེད་སྣང་གི་སེམས་ཁ་གཅུན་མ་ཐུབ་པའི་རྐྱེན་གྱིས་རེད་སྙམ། དེས་ན་ང་ཚོས་གོ་སྐབས་དམ་འཛིན་བྱས་ནས་གཞན་གྱིས་གོ་ན་འདོད་པའི་གཏམ་ཁོ་ན་མིན་པར་གོ་ན་མི་འདོད་པའི་གཏམ་ཡང་བཤད་དགོས།
ད་སྐབས་བོད་ཡིག་དང་བོད་སྐད་ཀྱི་བཀོལ་རྒྱ་ཇེ་ཆུང་དང་བཀོལ་མཁན་ཇེ་ཉུང་ཡིན་པ་དང་།བོད་དང་འབྲེལ་བའི་གཏམ་བཤད་ཀྱི་ཁོར་ཡུག་ཇེ་དོག་རེད། འདི་ལོའི་ཕྱི་ཟླ་༧ ཚེས་ ༡ ཉིན་ནས་བཟུང་རྒྱ་ནག་གཞུང་གིས་ལག་བསྟར་བྱེད་མགོ་ཚུགས་པའི་མི་རིགས་མཐུན་སྒྲིལ་ཡར་སྐུལ་གྱི་བཅའ་ཁྲིམས་ཞེས་པའི་ཁྱབ་ཚད་ཀྱི་དབང་དུ་བཏང་ན། ཁྱེད་རང་གནས་དུས་གང་དུ་ཡོད་མེད་ལ་མ་ལྟོས་པར་ཁྱེད་ཀྱི་སྨྲ་ལྕེ་ལ་ཚོད་འཛིན་བྱེད་ཀྱི་ཡིན་ཟེར་བ་དེ་གནད་འགག་ཅིག་རེད་སྙམ།
གུས་པས་བཤད་འདོད་པའི་གཏམ་དེ་མུ་མཐུད་བཤད་ཀྱི་ཡིན། དེ་ཡང་བོད་ཀྱི་དུས་བབ་ཀྱི་ཀློག་པ་པོ་རྣམས་ཀྱི་རྣ་རྩ་རུ་སྐྱེལ་བའི་འབད་པ་བྱེད་ངེས་ཡིན། ཁ་དྲོ་བཀྲ་ཤིས།
