ལྷག་བསམ་གཞེན་སྐུལ།
འཕགས་མཆོག་འཇིག་རྟེན་མགོན་པོ་ཕྱག་ན་པདྨོས་བོད་ལྗོངས་འདི་ཉིད་བདག་གིར་བཞེད་དེ་གང་ལ་གང་མཚོན་གྱི་སྤྲུལ་པའི་གར་གྱི་རྣམ་པར་རོལ་ཞིང་། ལྷག་པར་༸གོང་ས་སྐྱབས་མགོན་སྐུ་ཕྲེང་བཅུ་བཞི་པ་ཆེན་པོས་དགུང་གྲངས་བཅུ་དྲུག་ནས་ད་ལྟའི་བར་སྐུ་ངལ་ཁྱད་བསད་ཀྱིས་བོད་ལྗོངས་དམངས་གཙོའི་ལམ་བཟང་སྲ་བརྟན་ཆ་ལག་ཡོངས་སུ་ཚང་པའི་གཞི་རྩ་ཚུགས་ཏེ། བོད་ཆོལ་ཁ་གསུམ་གྱི་མི་རིགས་ཡོངས་རྫོགས་རྡོག་རྩ་ཆིག་སྒྲིལ་ཐོག བོད་རྩ་དོན་རང་དབང་ཐོག་ལ་རང་རང་ལུས་སྲོག་ཡན་ཆད་ཡོད་ཚད་བློས་བཏང་སྟེ། རྒྱལ་གཅེས་སེམས་ཤུགས་ཀྱི་བདེན་པའི་མེ་ལྕེ་ཕྱོགས་ཀུན་ཏུ་རབ་ཏུ་འཕྲོ་ཞིང་། རྒྱ་གར་གྱིས་མཚོན་འཛམ་གླིང་གང་ས་ནས་རང་རེའི་རྩ་དོན་ལ་རྒྱབ་སྐྱོར་ཇེ་མང་འགྲོ་བཞིན་པའི་སྐབས་འདིར། ཚོགས་པ་དང་སྒེར་རེ་ཟུང་ནས་དོན་མེད་དཀྲོག་རྐྱེན་དགྲ་དགའ་གཉེན་སྡུག་བཟོས་ཏེ། སྤྱིའི་རྩ་དོན་ལ་གནོད་གཞིའི་འཆལ་གཏམ་འདྲ་མིན་སྣ་ཚོགས་ཐོན་པ་འདིས་༸གོང་ས་སྐྱབས་མགོན་ཆེན་པོར་ཐུགས་ཕམ་བཟོས་ཡོད་སྟབས། བསམ་ཡུལ་ལས་འདས་པའི་མ་རབས་ཐ་ཆད་ཀྱི་སྤྱོད་ངན་འདིའི་དམིགས་ཡུལ་དང་། སྒེར་སོ་སོའི་ཁེ་ཕན་ཅི་ཡིན་བོད་རིགས་སྤྱི་བོ་གནམ་བསྟན་ཡོངས་ནས་བསམ་ཞིབ་བྱེད་དགོས་པ་ཞིག་ཆགས་ཡོད།
བོད་རིགས་རྣམས་ཐོག་མར་རྒྱ་གར་ལ་འབྱོར་སྐབས། ཕྱི་ལོ་ ༡༩༦༠ ལོར་གནས་མཆོག་རྡོ་རྗེ་གདན་དུ་བོད་ཆོལ་ཁ་གསུམ་རྡོག་རྩ་གཅིག་སྒྲིལ་ཐོག་ནས། ༸གོང་ས་སྐྱབས་མགོན་ཆེན་པོའི་ལམ་སྟོན་ཐོག་ཤར་བསྐྱོད་ཀྱིས་ཅི་གསུང་བཀའ་སྒྲུབ་ཞུ་རྒྱུའི་མནའ་གན་མཐུ་བོ་ཆེ་སོགས་རིམ་པར་འབུལ་ལམ་ཞུས་ཡོད་པ་ཚང་མའི་བློ་ངག་ལྟར་ལས་གསལ་བཤད་ཞུ་མི་དགོས་པ་རེད། ༸གོང་ས་སྐུ་ཕྲེང་བཅུ་གསུམ་པ་ཆེན་པོའི་སྐབས་སུའང་རྒྱ་ཕྱོགས་ཨ་བཱན་སོགས་ནས་སྐུ་ངལ་ཚད་མེད་བཟོས་ཡོད་ཀྱང་། ཐབས་ཤེས་གང་ཡོད་གནང་འབྲས་ཐ་མར་བོད་རང་བཙན་གསལ་བསྒྲགས་གནང་སྟེ། སྐུ་ཚེ་རིང་དུ་བཞུགས་རྒྱུའི་དགོངས་བཞེད་རྒྱ་ཆེར་ཐོག་རྒྱལ་ཁབ་སྲ་བརྟན་དང་། ས་མཚམས་སུའང་ཕ་རོལ་མགོ་ནོན་ངེས་སྲུང་དམག་ཚགས་ཚུད་ཡོང་ཐབས་ཀྱི་དགོངས་བཞེད་རྒྱ་ཆེར་ཡོད་ཀྱང་། དགོངས་བཞེད་ཇི་བཞིན་མ་འགྲུབ་པར་ཆུ་སྤྲེལ་ལོར་ཞལ་གདམ་བཀའ་སློབ་ཡོངས་ལ་ཁྱབ་འགྲེལ་མཛད་དེ་དགུང་གྲངས་ལྔ་བཅུ་ང་བརྒྱད་སྟེང་དགོངས་པ་ཞི་དབྱིངས་སུ་མནལ་ཚུལ་བསྟན་པ་དེ་བྱུང་བ་རེད། རང་རེའི་ཐོག་ཏུ་མྱོང་བྱ་མི་བཟོད་པ་ཇི་བྱུང་རྣམས་ཞལ་གདམ་ནང་དུ་ཞིབ་ཕྲ་འཁོད་ཡོད།
ཚང་མའི་བློ་ངག་ལྟར་༸གོང་ས་བཅུ་གསུམ་པ་ཆེན་པོ་དགོངས་པ་ཞི་དབྱིངས་སུ་མནལ་ཚུལ་བཞེས་ནས། བར་སྐབས་བོད་ཀྱི་ཆབ་སྲིད་ཐ་ཞན་དུ་གྱུར་པའི་སྐབས་སུ་ཅི་བྱ་གཏོལ་མེད་ཀྱི་དུས་དེར། ལྷ་མི་ཡོངས་ནས་༸གོང་ས་སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་དགུང་གྲངས་བཅུ་དྲུག་ལས་ཕེབས་མེད་ཀྱང་། འ་ཆད་འུ་ཐུག་གིས་བོད་ཀྱི་ཆབ་སྲིད་ཀྱི་ཐུགས་འགན་བཞེས་བྱ་ཡོང་པའི་ཕྱག་འཚལ་གསོལ་འདེབས་ཞུ་ནན་བྱས་ཡོད། མགོན་པོ་གང་ཉིད་ཀྱིས་སྔོན་གྱི་ཐུགས་བསྐྱེད་བདག་གིར་བཞེས་ཏེ་དགུང་གྲངས་བཅུ་དྲུག་ནས། ད་ཆ་དགུང་གྲངས་བདུན་ཅུ་དོན་དྲུག་བར་བཀའ་དྲིན་ཇི་ལྟར་བསྐྱངས་ཡོད་པ་ལོང་པས་ལྟས་ཀྱང་ཁམ་གསུམ་དཔེ་ལྟར། བཀའ་དྲིན་བསམ་ཤེས་མེད་པར་འདྲེ་ངན་ཁོག་ཞུགས་ལྟ་བུས་སྐུ་ཕྱཱ་དང་། བོད་རྩ་དོན་ལ་གནོད་གཞི་དཀྲོག་རྐྱེན་ཕུང་སྦྱོར་འདི་རིགས་༸རྒྱལ་བའི་སྐུ་ཕྱཱར་བློས་འགན་བཟོད་མིན་ལ་སོང་། བོད་མི་སེར་སྐྱ་ཚང་མས་ཡིད་གཟབ་བྱེད་དགོས་པ་ཞིག་ཆགས་ཡོད།
༸སྤྱན་རས་གཟིགས་ཀྱི་རྣམ་སྤྲུལ་སྐུ་ཕྲེང་རིམ་པས་བཀའ་དྲིན་ལ་བརྟེན་ནས་བོད་རྒྱལ་ཁབ་འདི་ཉིད་གསོན་པོར་གནས་ཡོད་པ་ལས་མིང་མེད་བཟོད་ཐུབ་མེད། ༸གོང་ས་ཆེན་པོའི་བཀའ་དགོངས་ཇི་བཞིན་བསྒྲུབ་ན་བོད་ཀྱི་བདེན་མཐའ་གསལ་རྒྱུའི་ཡིད་ཆེས་གཙང་མ་ཡོད། བོད་མི་རིགས་ཐོག་ལ་ཤ་ཞེན་ཡོད་མཁན་ཞིག་ཡིན་ན། དོན་མེད་དཀྲོག་གཏམ་རང་དོན་ཁོག་བཅུག་གིས་སྤྱིའི་སྒྲིག་འཛུགས་ལ་གནོད་གཞིའི་དོན་མེད་འཆལ་གཏམ་འདི་རིགས་མཚམས་འཇོག་གིས་བོད་གཞིས་ལུས་རྣམས་ཀྱི་རེ་བའི་མིག་འབུར་དང་། གཞོན་སྐྱེས་ཡན་གྱི་གཅེས་ལུས་འཕང་མེད་མེར་བསྲེགས་བཏང་བའི་ཐ་ཚིག་ལ་བསམ་བཞེས་ཀྱིས་རྩ་དོན་ཐོག་འཁུར་མཉམ་བསྐྱེད་ཀྱི་དོན་ངོ་མ་ལག་ལེན་དུ་འཁེལ་བ་བྱ་རྒྱུ་གལ་ཆེ། ༸གོང་ས་སྐྱབས་མགོན་ཆེན་པོས་ལ་དྭགས་བཀའ་སློབ་ཞལ་གསལ། བསམ་བློ་ཏན་ཏན་མ་བཏང་ན་རྗེས་སུ་འགྱོད་པ་སྐྱེ་དུས་ཕྱི་དྲགས་པ་ཡིན་ཞེས་གསུངས།
མངོན་པར་བསྟོད་དོ།།བཀའ་བཞིན་ཞུའོ།།
ཅུང་བློ་ཡུལ་མ་ཚིམས་པའི་ཆ་ཞིག་ཡོད་པ་ནི། ཆབ་སྲིད་ཀྱི་དགོས་མཁོའི་དབང་གིས་ཡིན་ཀྱང་སྲིད་དེ་ཁ་གསལ་བོ་དེ་ཙམ་མེད་པ་དེ་རེད། དངོས་ཡོད་ཁ་གསལ་ཏེ་དཔེར་ན་ཚོགས་པ་འདི་དང་མི་སྒེར་འདི་ལྟ་བུ་ཞེས་མཚན་གཞི་རེ་སྨྲས་ཏེ་གསུངས་ཡོད་ན་ཅི་མ་རུང་ཨང་། འོན་ཀྱང་མགོ་བདེ་དྲན་འཕྲུལ་དང་རང་ཁེ་གྲགས་སྙན་ཁོ་ནའི་འཁོར་ལོ་སྐོར་བཞིན་པའི་ང་ཚོའི་སྤྱི་ཚོགས་འདིའི་ནང་འདི་ལྟ་བུའི་བཀའ་གསུངས་ཤིག་གནང་བ་ཡང་ཐལ་མོ་སྙིང་ཁར་སྦྱོར་འོས་པ་ཞིག་གོ །
༄་། །མཁས་མང་བྱེ་བའི་དབུས་ན་ལྷུན་པོ་སྟུགས།
མཁན་ཟུར་ནོར་གྱི་བང་མཛོད་དེ་བས་སྟུགས།
ཀུན་མཁྱེན་པདྨོར་བསྟོད་པ་གང་ཉིད་ཙམ།
ང་ཡི་ཙིཏྟའི་ཡུལ་ནས་བཀུར་བར་ཞུ།།།།།