ཕྱི་ཚེས་ ༢༣ ཉིན་བདེན་པའི་མེ་ལྕེ་སྐོར་བསྐྱོད་དེ། ཨོ་སི་ཊོ་ལི་ཡའི་རྒྱལ་ས་ཝིན་དུ་འབྱོར་ཐོག ཡུ་རོབ་རྒྱལ་ཁབ་ཁག་ནང་སྐོར་བསྐྱོད་གནང་ཡོད་འདུག
འདི་ཟླའི་ཚེས་ ༢༣ ཉིན་བོད་མི་མང་སྤྱི་འཐུས་ལྷན་ཚོགས་ཀྱིས་སྣེ་ཁྲིད་པའི་བདེན་པའི་མེ་ལྕེ་སྐོར་བསྐྱོད་དེ། དབུས་ཡུ་རོབ་ཀྱི་རྒྱལ་ཁབ་ཨོ་སི་ཊོ་ལི་ཡའི་རྒྱལ་ས་ཝིན་ནང་འབྱོར་ཡོད་པ་དང་། སྐབས་དེར་ཁུལ་དེའི་བོད་རིགས་མཐུན་ཚོགས་དང་བོད་དོན་རྒྱབ་སྐྱོར་ཚོགས་པ་གཉིས་ཀྱི་མཉམ་རུབ་གོ་སྒྲིག་འོག སྔ་དྲོ་ཆུ་ཚོད་ ༩ དང་ཕྱེད་ཀའི་ཐོག་ཚོགས་པ་ཁག་གཉིས་ཀྱི་སྐུ་ཚབ་རྣམ་པ་དང་། ས་གནས་མཐོ་རིམ་དཔོན་རིགས་དང་མི་སྣ་ཆེ་ཁགབོད་མི་དང་ཡུལ་མི་རྒྱབ་སྐྱོར་བ་བརྒྱ་ལྷག་མཉམ་ཞུགས་གནང་ཡོད་པ་རེད།
ལས་འགུལ་གྱི་ཐོག་མར་ཨོ་སི་ཊོ་ལི་ཡའི་རྒྱལ་སའི་གྲོས་ཚོགས་ཀྱི་ཚོགས་ཁང་མདུན་དུ་བདེན་པའི་མེ་ལྕེའི་རྒྱབ་ལྗོངས་ངོ་སྤྲོད་དང་། ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་དང་། ཨོ་སི་ཊོ་ལི་ཡའི་མཐོ་རིམ་དཔོན་རིགས་དང་མི་སྣ། བོད་རིགས་མཐུན་ཚོགས་དང་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སོགས་ཀྱིས། བོད་ནང་གི་ཛ་དྲག་གནས་སྟངས་དང་འབྲེལ་བའི་སྐོར་ནས་གཏམ་བཤད་གནང་རྗེས། རྒྱ་ནག་གཞུང་ཚབ་ཁང་གི་མདུན་ནས་གྲོང་ཁྱེར་དབུས་ཀྱི་མཆོད་ཁང་ཆེན་མོའི་བར་བདེན་པའི་མེ་ལྕེ་སྐོར་བསྐྱོད་ཀྱི་གོམ་བགྲོད་གནང་ཡོད་འདུག
སྐབས་དེར་ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་ཀྱིས། བདེན་པའི་མེ་ལྕེ་སྐོར་སྐྱོད་ལས་འགུལ་གྱི་དམིགས་ཡུལ་གཙོ་བོ་ནི། ད་ལྟའི་བོད་ནང་གི་ཛ་དྲག་གི་གནས་སྟངས་ངོ་སྤྲོད་དང་། གཞིས་བཞུགས་བོད་མི་རྣམས་ད་ལྟའི་ཛ་དྲག་གནས་སྟངས་འདི་ལས་སྐྱོབ་ཆེད་ཡིན་པ་དང་། དེ་བཞིན། ད་རེབ་ཀྱི་བདེན་པའི་མེ་ལྕེ་ཡུ་རོབ་ནང་སྐོར་བསྐྱོད་སྐབས། ཡུལ་མི་དང་གཞུང་། བོད་དོན་རྒྱབ་སྐྱོར་ཚོགས་པ། ལྷག་པར་ས་གནས་གང་སར་བོད་རིགས་མཐུན་ཚོགས་ཀྱིས་གོ་སྒྲིག་དང་རྒྱབ་སྐྱོར་ཤུགས་ཆེ་གནང་ཡོད་སྐོར་བརྗོད་ཡོད་འདུག
གནས་ཚུལ་མཁོ་གཏོང་བས་བརྗོད་པ་ལྟར་ན། ཟླ་འདིའི་ཚེས་ ༢༤ ཉིན་གྲོང་ཁྱེར་ལིན་ཛི་དང་། ཚེས་ ༢༥ ཉིན་གྲོང་ཁྱེར་སལ་ཙེ་སྦུག་ནང་སྐོར་བསྐྱོད་གནང་གྲུབ་རྗེས། རིམ་པས་འཇར་མན་དང་ཨི་ཊ་ལི། སུད་སི་བཅས་ཀྱི་ནང་བདེན་པའི་མེ་ལྕེ་སྐོར་བསྐྱོད་གནང་རྒྱུ་ཡིན་པ་དང་། མཐའ་མའི་མཇུག་བསྡུའི་མཛད་སྒོ་སི་པན་རྒྱལ་ཁབ་ནང་འཚོག་རྒྱུ་ཡིན་པ་རེད།
༢༠༡༢།༡ཨ།༢༢ཚེས་ཉིན་ཅེག་རྒྱལ་ཁབ་ནས། ཧང་གྷ་རིའི་རྒྱལ་ས་བུ་རྡ་པེས་ཊེ་ལ་བོད་མིའི་ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་སོགས་ཀྱིས་བདེན་པའི་མེ་ལྕེ་དེ་འདིར་འཁོད་མི་མངས་འཐུས་མི་ཅིག་ལ་རྩིས་སྤྲོད་ལ་ཕེབས་གཏན་འཁེལ་བ་ལྟར་ང་ཚོ་བོད་རིགས་ཡོད་ཚད་དང་བོད་ཀྱི་གྲོགས་པོ་ཚོས་ཀྱང་ཕེབས་བསུ་དགའ་སྤོབས་ཆེན་པོའི་ངང་ནས་སྒུག་ནས་བསྡད་ཡོད་ལགས། གསར་འགྱུར་གྱི་ཚུལ་དུ།
སྤྱི་ཚེས་༢༢གཅིག་དང་ཕྱེད་ཀའི་ཐོག ཡུ་རོབ་བདེན་པའི་མེ་ལྕེ་དེ་ཡུ་རོབ་སྤྱི་འཐུས་སྐུ་ཞབས་ཐུབ་བསྟན་དབང་ཆེན་ལགས་དང་། ཁོང་གི་ཕྱག་རོགས་མོ་ཊའི་བདག་པོ་སི་པེན་གྱི་མི་རིགས་ཡིན་པ་སྐུ་ཞབས་ཅ་བིའམ་ཁ་ཡར་བེ་ལགས་རྣམ་གཉིས་ནས། ཅེག་རྒྱལ་ཁབ་ནས་བདེན་པའི་མེ་ལྕེ་གདན་དྲངས་པས་ན།
ང་ཚོ་རང་རིགས་བོད་རིགས་དང་ཧང་གྷ་རི་པ། སོག་པོ་དང་རྒྱ་གར་སོགས་མི་སྣ་བཅོ་ལྔ་ལྷག་གིས་དགའ་སྤོབས་ཆེན་པོས་ཕེབས་བསུ་དང་། རྒྱབ་སྐྱོར་མཚན་རྟགས་བསྡུ་རུབ་དང་། ལྷན་ཚོགས་ཀུན་ལ་རིས་མེད་ཆོས་ཚོགས་ནས་གསོལ་ཇ་ཞལ་ལག་འབུལ་བཞེས་དང་།
ཚེས་༢༣ཞོགས་པ་ཚུ་ཚོད་བདུན་དང་ཕྱེད་ཀའི་ཐོག་ཕེབས་བསྐྱལ་གང་གཟབ་དང་སྦྲག་ཁྱིམ་མཚེས་རྒྱལ་ཁབ་ཨས་ཊོ་རི་ཡའི་རྒྱལ་ས་ཝེ་ནའི་ཕྱོགས་སུ་ཆིབས་འཁོར་བསྒྱུར་གནང་བའི་གནས་ཚུལ་རག་བསྡུས་ཙམ་དུ་ཀརྡོས་ཕུལ།