བོད་ཀྱི་གཞོན་ནུ་ལྷན་ཚོགས་ལ་བསྲིངས་པའི་འཕྲིན།

བཀུར་འོས་གཞོན་ནུ་ལྷན་རྒྱས་ལགས།

ཁྱེད་ཅག་གིས་རང་མི་རིགས་ཀྱི་བདེན་དོན་དང་རང་དབང་སླར་གསོའི་ཆེད་དུ་དཀའ་སྡུག་གང་ཞིག་འཕྲད་ཀྱང་། ལོ་རྒྱུས་ཀྱི་ཁུར་བོ་ཕྲག་ཏུ་བླངས་དེ་སྤོབས་སེམས་ཀྱིས་མགོ་བོ་མཐོ་པོ་དེ་ཞུམ་མེད་དཔའ་ངར་གྱིས་ཕྱུག་པའི་ཆོད་སེམས་འགྱུར་བ་མེད་པ་ནི། གངས་ཅན་པའི་སྒེར་ཚུགས་ཀྱི་རིན་ཐང་ཡིན་པས་ངས་ཁྱེད་ཅག་ལ་སྙིང་ཐག་པ་ནས་བཀའ་དྲིན་མི་ཉུང་བ་ཞུ་རྒྱུ་ཡིན། ད་དུང་ལོ་འདིར་ཁྱེད་ཅག་གིས་རང་སྲོག་དང་བསྡོངས་བའི་རླབས་ཆེ་བའི་ལས་འགུལ་གང་མང་ཞིག་མཐོང་མཐོང་རིག་རིག་ཏུ་ཐ་ན་འཚམས་འདྲི་ཞིག་ཀྱང་བྱེད་མ་ཐུབ་པ་དེ་ཡང་།  སྒྲིག་འཛུགས་ཤིག་དང་ཡང་ན་བྱ་བའི་བྲེལ་འཚུབ་ཀྱི་དབང་གིས་ལན་ཟེར་ན་དེ་བས་ཀྱང་ངོ་ཚ་ཞིག་ཡིན་པས་གུ་ཡངས་གནང་རོགས།

སྤྱིར་ཡིན་ན། ང་ཚོ་རང་ཡུལ་དུ་ཁ་བྲལ་དོན་ཡང་རང་དབང་སླར་གསོ་དང་གཞིས་བྱེས་མཉམ་འཛོམས་ཀྱི་ཆེད་དུ་གདའ་ནའང་།  མི་བུ་གང་མང་ཞིག་གིས་འུ་ཅག་གི་མི་རབས་འདིའི་ཡིད་སྐྱོའི་གནས་བབ་ལ་ཁ་ཡ་མི་བྱེད་པར་སྡོད་ཟས་རག་ཙམ་གྱིས་ཡིད་ཚིམས་པའི་ཞི་དུལ་དེ་མཐོང་དུས་ཁྱེད་ཅག་ལ་རང་བཞིན་གྱིས་གུས་བཀུར་ཞིག་བསླེབས་ཡོད།

ཡིན་ན་ཡང་། གནའ་མིས་སྡོམ་ཚིག་ཞིག་ཏུ། གཉིད་མང་དྲགས་ན་མགོ་ན། ཆང་འཐུང་དྲགས་ན་ལམ་མེད་ཅེས་པར་ལྟར། ཁྱེད་ཅག་གིས་མང་ཚོགས་ཀྱི་ཁ་ཕྱོགས་དང་མི་མཐུན་པའི་གཤོག་པ་བརྐྱངས་དྲགས་ན། གཞོན་ནུའི་འབྱུང་འགྱུར་ལ་དོ་ཕོག་འགྲོ་ཉེན་ཆེ་བའི་མི་གཞིའི་མནོ་བསམ་སྨག་རུབ་ཏུ་ནམ་ཡང་ལྷུང་མི་ཉན། གང་ལ་ཟེར་ན། བོད་ཀྱི་གཞོན་ནུ་ལྷན་ཚོགས་ནི་བོད་ཕྱི་ནང་ཀུན་གྱིས་རེ་བའི་མིག་དང་ཁོག་པའི་སྙིང་ཡིན་པས། མཆོག་གསུམ་ལ་དད་འདུན་ཆེ་བའི་སྒང་བ་བོད་པའི་ཡིད་ཆེས་དང་དད་པ་དཀྲུག་མི་ཉན།

ཡང་གཅིག་བཤད་ན། ཁྱེད་ཅག་ཆབ་སྲིད་ཀྱི་འགན་འཁུར་མཁན་ཞིག་ཡིན་ན་མ་མཐའ་རང་གི་སྤྱི་ཚོགས་ཀྱི་གོམ་སྟབས་གང་འཁོར་དང་། མཐའ་འཁོབ་ཀྱི་སྲིད་གཞུང་དག་གིས་སྲིད་ཇུས་ཀྱི་སྐུད་སྣེ་གང་ལ་བསྐོན་ཡོད་མེད་ཤེས་དགོས་པ་གནད་ཀྱི་དོན་སྙིང་རེད། ལྷག་པར་དུ་རྒྱ་གར་གྱིས་བོད་རྒྱའི་ཐོག་ལ་སྲིད་ཇུས་འཁོར་ཕྱོགས་དེ་བས་ཀྱང་ངེས་དགོས་པའི་ནང་གི་དགོས་པ་ཞིག་རེད་འདོད། རྒྱ་གར་གྱི་སྲིད་ཇུས་ཧ་མ་གོ་པར། ང་ཚོར་རྒྱུ་འབྲས་བློ་མིག་གསལ། སྒེར་ཚུགས་ཀྱི་མི་གཞི་ལྡན་ཞེས། འུར་བརྒྱབ་ན་འབྱུང་འགྱུར་གྱི་ལམ་བུ་སུའི་ལག་ལ་ཡོད་མེད་སྐད་ཆ་དོབ་དོབ་མ་རེད། དེའི་ཕྱིར། ཡར་མར་གྱི་ལབ་བརྡོལ་ཚང་མར་ཨ་ལན་དགོས་པ་མ་སྣང་། ཁྱེད་ཅག་འཕག་འཚག་བྱེད་པའི་འབྱུང་འགྱུར་གྱི་རིན་ཐང་རང་བཙན་རེད། རང་བཙན་ཞེས་པའི་ཚིག་འབྲུ་གཉིས་བཟུང་བ་ཙམ་གྱིས་འུ་ཅག་གི་བཙན་པོའི་སྙིང་སྟོབས་མངོན་ཐུབ་པ་རེད།

དེ་མིན། ཕྱི་ལོ་ ༢༠༡༡ པའི་ནང་༸གོང་ས་མཆོག་གིས་སྐུ་དབང་རྩིས་སྤྲོད་བྱས་པ་ནས་བཟུང་དེ་རིང་བར་དུ་ཚོགས་སྒེར་གང་མང་ཞིག་གིས་ངར་ཤུགས་དང་བཅས་གླེང་གཞི་ཞིག་ལྷག་པ་ནི་བོད་གཞུང་ཞེས་པའི་ཐ་སྙད་འདི་ཡིན། བོད་གཞུང་ཞེས་པའི་ཐ་སྙད་འདིས་ཐོག་ལ་རྩོད་གླེང་བྱེད་དོན་ཡང་། དྲང་ཕྱོགས་ཤིག་དང་སྤྱི་གཞུང་ལ་དོ་ཁུར་བྱེད་པའི་མི་གཞིའི་སྙིང་སྟོབས་ཤིག་ཡིན་པས་གུས་བཀུར་བྱེད་འོས་པ་ཞིག་རེད། འོན་ཀྱང་། ཕྱོགས་གཞན་ཞིག་ནས་བཤད་ན། བོད་གཞུང་ཞེས་པའི་ཐ་སྙད་འདིར་འུར་ཟིང་སྟངས་ལ་གཞིགས་ན། ཚོགས་སྒེར་གང་མང་ཞིག་གིས་འཐབ་རྩོད་ཀྱི་ངོ་གདོང་གི་ཚོར་བ་ཙམ་ལས། མི་གཞིའི་བསམ་བློས་ལག་ལེན་གྱི་འཐབ་རྩོད་དེ་ཙམ་མེད་པར་ཕྱོགས་མང་པོ་ནས་ར་ཕྲོད་ཀྱིན་འདུག ངོ་གདོང་གི་ཚོར་བ་ཙམ་ལ་བརྟེན་ནས་བྱ་བཞག་བསྒྲུབ་ན་རྒྱལ་ཁབ་ཅིག་གིས་འཐབ་རྩོད་ཕར་ཞོག་ཁྱིམ་ཚང་ཞིག་གི་འབྱུང་འགྱུར་ལའང་ཚོད་འཛིན་བྱེད་མི་ཐུབ།

༸གོང་ས་མཆོག་གིས་བོད་གཞུང་ཞེས་པའི་ཚིག་འབྲུ་གཉིས་རང་སོ་བཞག་ན།  དུས་ཡུན་མི་དགོས་པ་དཀའ་ངལ་ཞིག་ཡོང་རྒྱུ་ཡིན་པ་མྱོང་བ་ལ་སྦྱར་ནས་ལྗང་མྱུག་གི་གཏན་ཚིག་གང་མང་ཞིག་དྲངས་ཡང་། ད་དུང་འུར་ལངས་བྱེད་པ་ནི་ཡིད་ཆེས་བློ་ཁེལ་མ་ཐུབ་པའི་རྣམ་པ་མི་ལེགས་པ་ཞིག་རེད་འདོད། སྤྱིར་ཡིན་ན། ང་ཚོ་ཚང་མ་ཉོན་མོངས་རྒྱུད་ལྡན་གྱི་མི་བུ་ཤ་སྟག་ཡིན་སྟབས་ལས་བྱ་མཐའ་དག་དགེ་མཚན་ལྡན་པའི་ཡར་ངོ་ཁོ་ན་ཡོང་མི་སྲིད། དེའི་ཕྱིར། སྐབས་རེ་དོན་སྙིང་བྲལ་བའི་ལས་ལ་འཇུག་སྲིད་ཀྱང་། ང་ཚོའི་༸གོང་ས་མཆོག་ལ་ཡིད་ཆེས་བློས་ཁེལ་བྱ་དགོས། ང་ཚོའི་༸གོང་ས་མཆོག་ལ་ཡིད་ཆེས་བློ་ཁེལ་བྱ་དགོས་ཟེར་དོན་ཡང་བོད་པའི་ཆིག་སྒྲིལ་དང་འཐབ་རྩོད་དེ་རྒྱུན་གནས་ཡོང་ཆེད་ཡིན། ༸གོང་ས་མཆོག་བླ་མ་དང་སངས་རྒྱས་ཡིན་པའི་རྒྱུ་མཚན་བཤད་ཀྱིན་མེད། ཁོང་གིས་མི་ལོ་དྲུག་ཅུའི་རིང་གི་འཐབ་རྩོད་ཀྱི་མྱོང་བ་གཞིར་བཞག་ཐོག་མ་འོང་འབྱུང་འགྱུར་གྱི་བཀོད་སྒྲིག་ལ་ཡི་རངས་དང་རྟེན་འབྲེལ་ཞུ་དགོས།

༸གོང་ས་མཆོག་གིས་བོད་མིའི་སྒྲིག་འཛུགས་ཞེས་འདོགས་དོན་ཡང་བོད་གཞུང་ཞེས་པའི་ཚིག་འབྲུ་གཉིས་ལ་མ་གུས་དང་མ་དགའ་བ་མ་རེད། སྲིད་གཞུང་ཞིག་གིས་རྣོ་ངར་ལ་བརྟེན་ནས་ཐབས་ཤེས་མེད་པའི་ཐབས་ཤིག་རེད།༼ བོད་གཞུང་ངམ་སྲིད་གཞུང་ཞིག་ཡོང་ཐབས་ལ་༸གོང་ས་མཆོག་གིས་འབད་བརྩོན་ཅི་འདྲ་ཞིག་གནང་མིན་ཕྱི་ཡུལ་དུ་རང་དབང་ཞེས་པའི་༸རྒྱལ་བའི་མཛད་རྣམ་ལ་གཟིགས་ན་ཤེས་ངེས༽ཡིན་ཡང་། འུ་ཅག་གི་ཚོགས་སྒེར་དག་གི་སྒང་ལ་སྲིད་ཇུས་གང་མང་ཞིག་གིས་གནད་རྩ་བསླེབས་མེད་སྟབས་འུར་ཟིང་སློང་གིན་འདུག

མ་གཞི་བཙན་བྱོལ་སྤྱི་ཚོགས་འདི་ཧ་ཅང་གི་འཁྲིགས་པོ་ཞིག་རེད། གང་ཡིན་ཟེར་ན། ཟེར་སྒྲོས་དང་ཧོལ་རྒྱུག་ལ་བརྟེན་ནས་རྒྱུ་འབྲས་བློ་མིག་ལ་བརྩི་བཀུར་མི་བྱེད་པའི་གཅོང་ནད་དེ། རང་མི་རིགས་ཀྱི་ཐུན་མིན་གོམས་གཤིས་ཤིག་ཏུ་གནས་པའི་འགོག་ཐབས་དཀའ་བའི་ནད་གཞི་ཞིག་ཆགས་སྟབས་ལས་སླ་མོ་མ་རེད།

ཡིན་ནའང་། ཉེ་སྔོན་ཨི་ཊ་ལིས་དང་ལ་དྭགས་སོགས་ནས་གསུངས་པའི་བཀའ་སློབ་དག བོད་ཀྱི་གཞོན་ནུ་ལྷན་ཚོགས་ཀྱི་འདས་མ་ད་གསུམ་གྱི་མདུན་ལམ་ལ་འབྲེལ་བ་དམ་ཟབ་ཡོད་པས། རྒྱ་ཡན་དུ་མི་འགྲོ་བ་ཁ་ཚ་དགོས་གཏུགས་གིས་མནོ་བསམ་མངར་མོའི་དཔྱོད་ཤེས་དགོས་པ་དུས་ཐོག་གི་ཆར་བ་རང་ཡིན་པས། དབུས་ས་ལྷན་འཛོམ་གྱིས་དགོངས་པ་དག་སངས་ཀྱི་སླད་དུ་ཅི་ཞིག་བྱ་དགོས་མིན་སངས་རྒྱས་ལ་ཀ་ཁ་མི་དགོས་ནའང་། འ་འུར་ཟང་ཟིང་མེད་པའི་དབེན་གནས་ཤིག་ཏུ་འདུག་ཚོད་མིན་པར་སང་ཉིན་ལས་དེ་རིང་ཤེས་ན་གཞན་གྱིས་གོ་སྐབས་ཀྱི་མདའ་མོ་འཕེན་ཐབས་མེད་པའི་ལམ་བུ་ཉག་གཅིག་རེད།

མ་གཞི་གཞོན་ནུ་ལྷན་ཚོགས་ཀྱིས་རྒྱལ་བའི་སྐུ་ཕྱྭའི་སྐོར་ལ་སྔངས་འཚབ་ཅི་འདྲ་ཡོད་མིན་ང་ལ་ཡིད་ཆེས་རྣལ་མ་ཐོབ་ནའང་།  རྡ་སའི་གུ་དོག་པའི་སྲང་ལམ་བར་གྱི་འཁོན་འཛིན་པ་དག་དང་། གྲྭ་སའི་རྒྱུ་འབྲས་བློ་མིག་ལ་ཁ་ཡ་མི་བྱེད་པའི་སྒེར་གཙོ་པ་དག་གིས་དམ་འཛིན་གྱི་ཐག་སྣེ་ལྷོད་མི་སྲིད་པའི་ཁར། རང་ཕྱོགས་ཀྱི་བློ་དང་མཐུན་པའི་བཀའ་སློབ་དུམ་བུ་ཞིག་དམངས་ཚོགས་ཁྲོད་དུ་གཏོར་ཟིན་པས་གནས་སྐབས་སུ་བདེན་ལུགས་གསལ་རྗེན་དུ་བསྟན་ཀྱང་སྙིགས་རོ་ཙམ་དུ་གདའ་ན། ད་ནི་རང་གིས་འགན་ནུས་གང་ཡོད་ཀྱིས་མི་མང་ལ་གསལ་བཤད་བྱ་དགོས་པ་གཞོན་ནུའི་འབྱུང་འགྱུར་གྱི་ལམ་ཀ་གཙང་བཟོ་ཞིག་རེད་འདོད།

                    རྔ་བ་བརྒྱད་གསུམ་གཅིག་དྲུག་ནས། ༢༠༡༢ ༡༡ ༠༢ ཉིན།