ཁྱིམ་ཚང་རེས་ལོ་རེར་རླངས་རྫ་ ༦ ལས་ལེན་ཆོག་གི་མ་རེད།

རྒྱ་གར་གཞུང་གིས་འདི་ལོའི་ཕྱི་ཟླ་ ༩ པའི་ཚེས་ ༡༨ ཉིན་ནས་ཁྱིམ་ཚང་རེའི་ལོ་རེར་རླངས་རྫ་ ༦ ལས་བླངས་མི་ཆོག་པ་དང་། གལ་སྲིད། རླངས་རྫ་དྲུག་ལས་ལྷག་བེད་སྤྱོད་གཏོང་མཁན་ཚོས་རླངས་རྫ་རེར་ཧིན་སྒོར་ ༩༧༥ སྤྲོད་དགོས་པའི་སྒྲིག་གཞི་གསར་པ་ཞིག་བཟོས་ཡོད་འདུག

ཕྱི་ལོ་ ༢༠༠༦ ལོ་ནས་བཟུང་རྒྱ་གར་གཞུང་གིས་མི་མང་གི་དཀའ་ངལ་ལ་གཟིགས་ཏེ། ལོ་རེར་ཁྱིམ་ཚང་རེས་རླངས་རྫ་ (gas cylinder ) ༡༢ དང་རླངས་རྫ་རེར་ཧིན་སྒོར་ ༣༧༥ བྱས་ཏེ་མཁོ་གཏོང་བྱས་ཡོད་ཀྱང་། འདི་ལོའི་ཕྱི་ཟླ་ ༩ ཚེས་ ༡༨ ཉིན་ནས་བཟུང་སྒྲིག་གཞིར་འགྱུར་བ་བཏང་སྟེ། ཁྱིམ་ཚང་རེའི་ལོ་རེར་ཧིན་སྒོར་ ༤༤༥ ཡིན་པའི་རླངས་རྫ་ ༦ ལེན་རྒྱུ་དང་། གལ་སྲིད། དེའི་ཡན་བླངས་པ་ཡིན་ན་རླངས་རྫ་རེར་ཧིན་སྒོར་ ༩༧༥ དང་། དེབ་མེད་པའི་རིགས་དང་ཚོགས་པ་ཁག་གིས་རླངས་རྫ་རེར་ཧིན་སྒོར་ ༡༢༧༥ བཅས་སྤྲོད་དགོས་པའི་སྒྲིག་གཞི་གཏན་འབེབས་བྱས་འདུག གནས་སྟངས་དེའི་དབང་གིས་རྒྱ་གར་ནང་གནས་སྡོད་བོད་མི་མང་པོ་ཞིག་ལ་སོལ་རླངས་ (Gas) དེབ་ཡོད་མེད་དང་དེབ་རྙིང་མིང་བརྗེ་བསྒྱུར་སོགས་ཀྱི་ཐད་དཀའ་ངལ་འཕྲད་ཀྱི་ཡོད་སྟབས། གསར་འགོད་པས་བོད་མིའི་སྒྲིག་འཛུཊ་རྡོ་ཞུན་རླངས་རྫས་ལས་ཁུངས་ཀྱི་འགན་འཛིན་འཇམ་དབྱངས་ནོར་བུ་ལགས་སུ། སོལ་རླངས་ཀྱི་དཀའ་ངལ་དེའི་འབྱུང་རྐྱེན་དང་བོད་མི་ཚོའི་དཀའ་སེལ་ཐབས་སོགས་ཀྱི་སྐོར་ལ་བཅར་འདྲི་བྱས་པ་ཡིན།

འགན་འཛིན་འཇམས་དབྱངས་ནོར་བུ་ལགས་ཀྱིས་བརྗོད་པ་ལྟར་ན། ཉེ་ལམ་བཞུགས་སྒར་བོད་མིིའི་སྒྲིག་འཛུགས་རྡོ་ཞུན་རླངས་རྫ་ལས་ཁུངས་ཀྱིས་བོད་མི་ཚོས་སོལ་རླངས་དེབ་གསར་བ་ཐོ་འགོད་དང་བརྗེ་བསྒྱུར་གྱི་ལས་ཀ་བྱེད་བཞིན་པ་དེ་ནི། ཉེ་ཆར་རྒྱ་གར་གཞུང་གིས་སོལ་རླངས་སྒྲིག་གཞིར་འགྱུར་བ་བཏང་བའི་རྗེས་སུ་བཀོད་ཁྱབ་བཏང་བ་ལྟར།  ཕྱི་ཟླ་ ༡༡ པའི་ཚེས་མགོ་ནས་ཉིན་ ༡༥ རིང་དེབ་གསར་བ་བཟོ་མཁན་དང་མིང་བསྒྱུར་བཅོས་སོགས་ཀྱི་ལས་ཀ་བྱེད་ཀྱི་ཡོད་པ་ཞིག་ཡིན་འདུག་ལ།  དེབ་གསར་བ་བཟོ་དགོས་པའི་རིགས་ལ་མཚོན་ན།  རྒྱ་གར་ཁྲིམས་ཁང་གི་  (Stamp paper) ཧིན་སྒོར་ ༢༠ ཅན་གྱི་རང་ངོས་ཀྱི་ཁས་ལེན་དམ་ཡིག་ (Affidavit) དང་།  དོ་བདག་རང་གི་སྐྱབས་བཅོལ་ལག་དེབ་ (RC) གྱི་ངོ་བཤུས། བདེ་དོན་ལས་ཁུངས་ཀྱི་ཁོར་ཡུག་ལག་དེབ་ཀྱི་ངོ་བཤུས། གལ་སྲིད་ཚོགས་པ་ཁག་ཏུ་ལས་ཀ་བྱེད་མཁན་ཡིན་ན། ཚོགས་པ་ཁག་གི་རྒྱབ་གཉེར་ཡི་གེ། དེ་བཞིན། པར་གཉིས་དང་ཧིན་སྒོར་ ༣༥༠༠ སྤྲད་པ་ཡིན་ན། རྗེས་སུ་དེབ་གསར་བ་དང་ལྷན་དུ་སོལ་རླངས་ཐབ་ཀ་(gas cooker )དང་རླངས་རྫ་བཅས་ཆ་ཚང་རག་གི་ཡོད་འདུག  

མི་འདས་གྲོངས་སུ་ཕྱིན་པའི་རིགས་དང་སྔོན་མའི་སོལ་རླངས་དེབ་རྙིང་ཐོག་མི་གཞན་གྱི་མིང་ཡོད་པའི་རིགས་ཀྱིས། མི་སྔོན་མ་དེའི་སྐྱེས་ཚེས་དང་སྐྱབས་བཅོལ་ལག་དེབ་ (RC) ངོ་བཤུས་བཅས་དང་། དོ་བདག་རང་གི་སྐྱབས་བཅོལ་ལག་དེབ་ཀྱི་ངོ་བཤུས། ལས་ཁུངས་ཀྱི་འགེངས་ཤོག་བསྐངས་རྗེས་དེའི་སྟེང་པར་གཅིག་དང་།  དེབ་རྙིང་པའི་སྟེང་དོ་བདག་གི་པར་གཅིག  ཧིན་སྒོར་ ༢༠ ཅན་གྱི་རང་ངོས་ཀྱི་ཁས་ལེན་དམ་ཡིག་ (Affidavit) བཅས་སྤྲད་ཚེ་དེབ་སྐྱེལ་བྱེད་ཀྱི་ཡོད་འདུག   སོལ་རླངས་དེབ་དོ་བདག་རང་གི་མིང་ཐོག་ཏུ་ཡོད་མཁན་གྱིས། སྐྱབས་བཅོལ་ལག་དེབ་ (RC) དོ་བདག་རང་གི་པར་གཉིས། བདེ་དོན་ལས་ཁུངས་ཀྱི་ཁོར་ཡུག་ལག་དེབ་ཀྱི་ངོ་བཤུས་དང་། རྒྱ་གར་ཁྲིམས་ཁང་གི་ཧིན་སྒོར་ ༢༠ ཅན་གྱི་རང་ངོས་ཁས་ལེན་དམ་ཡིག་བཅས་དགོས་ཀྱི་ཡོད་འདུག

གསར་འགོད་པས་ཁོང་ལ་བོད་མི་ས་གནས་གཞན་དུ་གནས་སྤོར་བྱ་དགོས་བྱུང་ཚེ་དེབ་དེ་བེད་སྤྱོད་ཡོད་མེད་དང་། མི་མང་གི་ངོས་ནས་དོ་སྣང་བྱ་དགོས་པའི་རིགས་གང་དང་གང་ཡོད་མེད་དྲིས་པར་ཁོང་གིས། “ ད་རེས་ཀྱི་ལས་ཀ་འདི་བརྒྱུད་དེ་བོད་མི་སུ་ཡིན་ཡང་དོ་བདག་རང་གི་སྐྱབས་བཅོལ་ལག་དེབ་ཐོག་སོལ་རླངས་དེབ་བཟོས་པ་ཡིན་ན། ཟླ་ ༣ འགོར་རྗེས་རྒྱ་གར་རྒྱལ་ཡོངས་ཀྱི་ས་གནས་གང་དུ་གནས་སྤོར་བྱ་དགོས་བྱུང་ཡང་། སོལ་རླངས་ལས་ཁུངས་དུ་སྐྱབས་བཅོལ་ལག་ཁྱེར་དང་དེབ་འཁུར་སོང་སྟེ་ཐོི་འགོད་བྱས་རྗེས་རླངས་རྫ་ལེན་ཆོག་གི་རེད། འདི་ངེས་པར་དུ་ཤེས་དགོས་པ་རེད། དེ་མིན། ངྷ་རམ་ས་ལར་མཚོན་ན། འདི་ནས་འགྲོ་མཁན་མང་ཆེ་བ་ཕྱི་རྒྱལ་དང་བོད་ནང་ལོག་འགྲོ་མཁན་རེད། ཡག་ཤོས་བོད་མི་དེའི་རིགས་ལ་སོལ་རླངས་དེབ་ཡོད་པ་ཡིན་ན། རང་ཉིད་ཀྱི་དེབ་མི་གཞན་མ་སྤྲད་པར་ལས་ཁུངས་ལ་སྤྲད་དེ་སྒོ་རྒྱག་འཇུག་རྒྱུ་དང་། དེ་མིན་རང་ཉིད་ཀྱི་སྤུན་མཆེད་དང་གྲོགས་པོ་སོགས་མཉམ་དུ་ལས་ཁུངས་ལ་ཡོང་སྟེ། མི་གཞན་དེའི་མིང་ཐོག་ལ་བསྒྱུར་རྒྱུ་གལ་ཆེན་པོ་རེད། དེ་མིན་རང་དགར་མི་གཞན་ལ་སྤྲད་པ་ཡིན་ན་ཕན་ཐོགས་ཀྱི་ཡོད་པ་མ་རེད་ལ། མ་འོངས་པར་བོད་མི་ཚོས་དོ་སྣང་བྱ་དགོས་པ་གཙོ་བོ། ཁྱིམ་ཚང་གཅིག་གིས་སོལ་རླངས་ཀྱི་དེབ་གཅིག་བེད་སྤྱོད་གཏོང་རྒྱུ་ཧ་ཅང་གལ་ཆེན་པོ་རེད། གལ་སྲིད། ཁྱིམ་ཚང་གཅིག་གིས་མི་གཉིས་དང་གསུམ་གྱིས་སོལ་རླངས་དེབ་རེ་རེ་བེད་སྤྱོད་བྱེད་པ་ཡིན་ན་ཁྲིམས་འགལ་ཆགས་ཀྱི་ཡོད་སྟབས། དེའི་ཐད་ཚང་མས་དོ་སྣང་བྱ་དགོས་ཀྱི་འདུག ”ཅེས་བརྗོད་བྱུང་།

ཁོང་གིས་རྒྱ་གར་ནང་སོལ་རླངས་ཀྱི་རིན་གོང་འཕར་བའི་སྤྱི་ཚོགས་རྒྱབ་ལྗོངས་སྐོར་ངོ་སྤྲོད་གནང་པ་ལྟར་ན།  ༡༩༦༩ ལོར་རྒྱ་གར་དང་པ་ཀི་སི་ཐན་བར་དམག་འཁྲུག་མ་བྱུང་སྔོན་དུ་སྣུམ་རིགས་མང་ཆེ་བ་མི་སྒེར་གྱིས་བཟུང་ཡོད་ཀྱང་། ཕྱིས་སུ་ཕུཊ་བརྟན་པ་དང་མི་མང་གི་དཀའ་ངལ་སེལ་ཐུབ་ལ་དམིགས་ཏེ།  སོལ་རླངས་བཟོ་གྲྭ་གཙོས་པའི་སྣུམ་གྱི་བཟོ་གྲྭ་ཁག་གཞུང་ངོས་ནས་བདག་པོ་བརྒྱབ་པ་དང་། རིམ་པས་འཛམ་གླིང་ནང་སོལ་རླངས་རིགས་དཀོན་པོ་ཆགས་པར་བརྟེན། འདས་པའི་ལོ་ངོ་མང་སྔོན་ནས་རྒྱ་གར་གཞུང་ངོས་ནས་རྒྱལ་ཡོངས་སོལ་རླངས་ཀྱི་བརྒྱ་ཆའི་ ༣༠% ཐོན་སྐྱེད་བྱེད་བཞིན་ཙམ་མ་གཏོགས། བརྒྱ་ཆའི་  ༧༠% ཕྱིའི་རྒྱལ་ཁབ་ཁག་ནས་ཉོ་དགོས་བྱུང་ཡོད་ལ།  སྔོན་མ་རླངས་རྫ་རེར་ཧིན་སྒོར་ ༡༥༠ ནས་ ༢༥༠ བར་ཡིན་པའི་སྐབས་སུ། སྣུམ་བྷེ་རེལ་ (Oil Barrel) གཅིག་ལ་ཨ་སྒོར་ ༦༠ ལྷག་ཡིན་ཡང་།  ད་ཆར་སྣུམ་བྷེ་རེལ་གཅིག་ལ་ཨ་སྒོར་ ༡༡༠ ཆགས་ཡོད་པ་དང་། ལྷག་པར་དུ་ ༢༠༠༠ ལོ་ནས་བཟུང་རྒྱ་དཀར་ནག་གཉིས་འཛམ་གླིང་ནང་སོལ་རླངས་བེད་སྤྱོད་གཏོང་མཁན་རྒྱལ་ཁབ་ཆེ་ཤོས་གཉིས་ཆགས་ཏེ། སྣུམ་ཕྱི་ལོགས་ནས་ཉོ་དགོས་ཆགས་པ་སོགས་ཀྱི་དབང་གིས་སོལ་རླངས་མཁོ་སྤྲོད་ཐད་དཀའ་ངལ་འཕྲད་ཡོད་ཀྱང་། རྒྱ་གར་གཞུང་གིས་མི་མང་གི་བདེ་སྡུག་ལ་གཞིགས་ཏེ་ད་ལྟའི་བར་དམིགས་བསལ་རིན་གོང་མ་སྤར་བར་ལྷག་ཡོད་ཀྱང་། སོལ་རླངས་རིན་གོང་མ་སྤར་བ་དེས་རྒྱ་གར་གྱི་དཔལ་འབྱོར་སྒྲོམ་གཞིར་ཤུགས་རྐྱེན་ཐེབས་པ་དང་། ཉེ་སྔོན་གཞུང་གི་དཔལ་འབྱོར་གྱི་སྒྲོམ་གཞིར་འགྱུར་བ་ཐེབས་པ་སོགས་ཀྱིས། འདི་ལོའི་ཕྱི་ཟླ་ ༩ ཚེས་ ༡༨ ནས་ཁྱིམ་ཚང་གཅིག་ལ་ལོ་གཅིག་ནང་རླངས་རྫ་ ༦ ལས་སྤྲོད་མི་ཆོག་པ་གཏན་འབེབས་བྱས་པ་ཞིག་ཡིན་འདུག  ཡིན་ནའང་། རྒྱ་གར་གྱི་གྷང་གྷི་རེ་སི་ཚོགས་པ་མངའ་ཁོངས་ས་ཁུལ་དུ་རླངས་རྫ་ ༣ ཐོལ་བ་སྤྲོད་ཀྱི་ཡོད་འདུག

བཞུགས་སྒར་དུ་ཡོད་པའི་བོད་མིའི་སྒྲིག་འཛུགས་རྡོ་ཞུན་རླངས་རྫས་ལས་ཁུངས་དེ་ནི།  ༡༩༩༡ ལོར་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་རོགས་རམ་འོག་གསར་འཛུགས་གནང་བ་ཞིག་ཡིན་འདུག་ལ། ད་ལྟའི་བར་བཞུགས་སྒར་ཉེ་འཁྲིས་རྒྱུད་སྟོད་དང་ནོར་གླིང་། ས་རཱ། མེག་ལོར་བཅས་ཀྱི་མི་མང་གི་ཆེད་རྒྱ་གར་དང་མཉམ་འབྲེལ་ཐོག་གཟའ་ཟླ་བར་གཙུག་ལག་ཁང་དང་། གཟའ་མིག་དམར་ལ་རྗོ་གྷེ་པཱ་རཱ།  གཟའ་ལྷག་པར་ཟློས་གར་ལམ། གཟའ་ཕུར་བུ་ལ་ནོར་གླིང་དང་བོད་ཁྱིམ། གཟའ་པ་སངས་ལ་གངས་སྐྱིད་དང་སྨན་རྩིས་ཁང་བཅས་སུ་རླངས་རྫ་བགོ་འགྲེམས་བྱེད་ཀྱི་ཡོད་པ་མ་ཟད། ལས་ཁུངས་འདིར་ལས་བྱེད་ ༡༦ ཡོད་པ་ལས་བོད་པའི་ལས་བྱེད་ ༤ དང་རྒྱ་གར་ལས་བྱེད་ ༢ བཅས་མི་ ༦ གཏན་སྡོད་ཀྱིས་སོལ་རླངས་དེབ་སྐྱེལ་སོགས་ཀྱི་ལས་ཀ་བྱེད་ཀྱི་ཡོད་འདུག  ཟླ་འདིའི་ཕྱི་ཚེས་ ༡༥ བར་གཟའ་ཉི་མ་ལས་གུང་གསེང་མེད་པའི་ཐོག་དགོང་དྲོའི་ཆུ་ཚོད་ ༦ བར་ཐོ་འགོད་དེབ་སྐྱེལ་ཀྱི་ལས་ཀ་བྱེད་ཀྱི་ཡོད་འདུག

གསར་འགོད་པ། དོན་གོ