བསྟན་འཛིན་ཟླ་བ།
ཟླ་འདིའི་ཚེས་ ༨ ནས་ ༡༤ བར་པེ་ཅིན་དུ་རྒྱ་ནག་གི་ཚོགས་ཆེན་བཅོ་བརྒྱད་པ་ཟེར་བ་དེ་དམ་དྲག་ཤིན་ཏུ་ཆེན་པོའི་འོག་ཚོགས་སོང་ལ། མི་མང་གི་འཐུས་མི་ཡིན་ཟེར་བའི་ཚོགས་ཞུགས་པའང་ཉིས་སྟོང་ལྷག་ཡོད་རབས་བཤད་སོང། དེའི་གྲས་སུ་རྒྱ་གཞུང་གིས་བཅད་བགོས་བྱས་པའི་བོད་རང་སྐྱོང་ལྗོངས་ཟེར་བའི་བོད་རིགས་ཀྱི་འཐུས་མི་ཁ་ཤས་ཀྱང་པེ་ཅིན་ལ་ལག་པ་རྐྱོང་དུ་ཕྱིན་ཡོད། ཐུ་བྷོད་བཙན་པོའི་རྒྱལ་ཁབ་ཀྱི་ཕ་ཤུལ་གྱི་བུ་ཟེར་ན་འདྲ། རྒྱ་ནག་གི་དབང་བསྒྱུར་འོག་གི་མནར་གཅོད་མྱོང་བཞིན་པའི་མི་རིགས་ཟེར་ནའང་འདྲ། གང་ལྟར་ཁོང་ཚོ་ཡང་བོད་མི་ཞིག་ཡིན་པའི་ཆ་ནས་བརྩེ་བ་དང་དུང་བ་ལོས་ཡོད་མོད། འོན་ཀྱང་རྒྱལ་སྤྱིའི་གསར་ལམ་ཁག་ཏུ་ཐོན་པའི་གནམ་བདེ་སྒོ་མོ་ཆེའི་ཐང་ཆེན་གྱི་ཁོང་ཚོའི་གདོང་གི་འཛུམ་དང་ལུས་ཀྱི་ལྭ། ཕེབས་པའི་རྣམ་འགྱུར་སོགས་ཡིད་ལ་འཐད་པ་ཞིག་བྱུང་མ་སོང་། ཁོང་ཚོ་ལའང་དབང་ཆ་མེད་པ་དང་གདམ་ག་མེད་པ་ནི་ལོས་ཤེས་པ་མ་ཟད། བསམ་ཤེས་ཀྱང་བྱེད་ཐུབ་ཀྱི་འདུག་མོད། རྒྱ་གཞུང་གིས་བོད་མི་མང་གི་ཚབ་མཚོན་དུ་སྒྲོ་འདོགས་བྱེད་བཞིན་པའི་སྐད་ཆ་འདི་ཚོར་ཁོང་ཚོའི་ངོས་ནས་ཀྱང་འགན་མ་ཁུར་ན་ཁོང་ཚོ་ཙམ་མ་ཟད། ཁོང་ཚོའི་བུ་རབས་ཚ་རྒྱུད་ཚུན་ཆད་ལོ་རྒྱུས་ཀྱི་ཉེས་ཅན་པ་མི་ཆགས་པའི་ངེས་པ་མི་སྣང་སྙམ། དེ་ནི་ཆེས་འཇིགས་སུ་རུང་བ་ཞིག་སྟེ། རང་གི་གྲོད་ཁོག་གི་དོན་དུ་རང་གི་བུ་རབས་ཚ་རྒྱུད་ཚུན་ཆད་ནག་པོ་བཟོ་ཡི་ཡོད་པ་མིན་ནམ།
གང་ལྟར་དགག་བྱ་དང་དགོས་པར་བརྟེན་ནས་རྒྱ་གུང་ཁྲན་གྱི་ཁ་ལ་ཉན་ཞོར་ཉན་ཞོར་རང་ཉིད་བོད་མི་ཞིག་ཡིན་པའི་འགན་ཁུར་ཞོར་ལ་ཁུར་ཞོར་བྱས་ན་དེ་ནི་ཅིས་ཀྱང་གདམ་ག་ཞིག་ཡིན་ནའང། བོད་མི་མང་དང་འབྲེལ་བ་མེད་ཅིང་བོད་མི་མང་གི་རེ་འདོད་མི་ཤེས་པའི་བོད་ཀྱི་སྐུ་ཚབ་ཅིག་གང་ནས་ཡོང་བ་ཡིན་ནམ། ད་ལྟ་བོད་ཆོལ་ཁ་གསུམ་ཟེར་བའི་ཁྱོན་ཆེན་པོ་འདི་ན་བཙན་པོའི་སྙིང་སྟོབས་ཀྱི་ཟིལ་ཤུགས་ཅན་ཚོས་གཅེས་པའི་ལུས་སྲོག་མེ་རུ་བསྲེགས་ནས་བོད་དོན་ཐད་ཀྱི་དགོས་འདུན་འདོན་གྱི་ཡོད་ཅིང་། ཕྱི་ནང་གི་རིག་པའི་གཞུང་ལ་འཇུག་པ་རྒྱས་པའི་བློ་གྲོས་ཅན་ཚོས་རྒྱ་གཞུང་ལ་བོད་མིའི་དཀའ་སྡུག་སྐོར་ཀྱི་སྙན་ཞུ་འབུལ་གྱི་ཡོད། དེ་བཞིན་དུ་མི་མང་དཀྱུས་མ་ཚོས་ཀྱང་མ་ཎི་འུར་འདོན་དང་མཆོད་མེ་སྟོང་ཚར་སོགས་ཀྱིས་གདུང་སེམས་མཉམ་བསྐྱེད་བྱེད་ཀྱི་ཡོད་ལ། ཐ་ན་རྒྱ་གཞུང་གི་ལས་བྱེད་འཁུར་མཁན་གྱི་བོད་པ་ཚོས་ཀྱང་གདོང་པ་ཤོར་བ་དང་། གོས་ནག་པོ་གྱོན་པ་སོགས་ཀྱི་ལམ་ནས་རང་གི་བསམ་འདུན་མཚོན་པར་བྱེད་ཀྱི་ཡོད། འོན་ཀྱང་ད་རེས་ཀྱི་བོད་ཀྱི་སྐུ་ཚབ་ཏུ་བཤད་པ་འདི་ཚོས་ལུས་ལ་གཟབ་འཆོར་སྤྲས་ནས་པེ་ཅིན་དུ་ཕེབས་བྱུང་ལ། གདོང་པ་འཛུམ་གྱིས་ཁེངས་ནས་རྒྱལ་སྤྱིའི་གསར་ལམ་ཁག་ཏུ་ཐོན་སོང་། འདིའི་ཅི་ཞིག་མཚོན་གྱི་ཡོད་དམ། གསར་འགོད་པར་སྐད་ཆ་བཤད་དགོས་པ་དེ་ཚོའི་སྐོར་ལ་ང་ལ་དམིགས་བསལ་གྱི་བསམ་ཚུལ་ཞུ་འདོད་མི་འདུག རྒྱུ་མཚན་ནི་ཁོང་ཚོ་མི་འདོད་ནའང་རྒྱ་གཞུང་གི་བཀོད་སྒྲིག་ལྟར་བྱེད་དགོས་ངེས་རེད་སྙམ།
མི་རིགས་འདིའི་མ་ཡུམ་ལྟ་བུའི་རླབས་ཆེན་གྱི་སྐྱེས་བུ་དེ་ཕྱིར་ཕུད་བཏང་བ་ནས། མི་གྲངས་བདུན་ཅུ་ལྷག་གིས་རང་ལུས་མེ་སྲེག་བྱས་ནས་དགོས་འདུན་བཏོན་པའི་དེ་རིང་གི་བར་གྱི་དཀའ་སྡུག་གི་ནམ་ཟླ་རིང་མོ་དྲན་ངོགས་ལ་ཐེངས་གཅིག་བླངས་ན། ད་གཟོད་མི་རིགས་འདིའི་སྐུ་ཚབ་མཚོན་པའི་མི་ཞིག་ཡིན་ཕྱིན། གདོང་པ་འཛུམ་གྱིས་ཁེངས་ཤིང་ལུས་ལ་གཟབ་འཆོར་སྤྲས་ནས་གསར་འགོད་པའི་མདུན་དུ་ཐོན་པའི་བློ་ཁོག་ཡོད་མི་སྲིད། རྒྱུ་མཚན་ནི་ཤེས་ལྡན་ཞིག་ཡིན་ཕྱིན་ཤ་མི་ཚ་ནའང་ངོ་ཚ་དགོས་ཀྱི་རེད་ཟེར་བའི་བོད་པའི་གཏམ་དཔེ་དེ་ཚོར་འདང་རྒྱག་ངེས་རེད། དེ་ལྟར་བསམ་ན་ཁྲེལ་དང་ངོ་ཚ་བོར་བའི་རྒྱ་གཞུང་འདིས་མི་འདིའི་རིགས་འདི་རྐང་བཙུགས་ནས་རུས་པའི་ནང་ན་རྐང་མེད་པའི་བོད་མི་ཞིག་ཏུ་སྒྱུར་གྱི་ཡོད་པ་འདྲ་ལ། རྒྱ་གཞུང་གི་ཅི་གསུངས་བཀའ་སྒྲུབ་བྱེད་མཁན་གྱི་བླ་བཙོང་བ་ཞིག་ཏུ་སྒྲུབ་ཀྱི་ཡོད་པ་འདྲ། དེ་བས་མི་འདི་ཚོས་གལ་སྲིད་རྒྱ་གཞུང་ལ་བློ་གཏོད་བཅོལ་གྱི་ཡོད་ན་དེ་ནི་རེ་བ་རྐུབ་ལ་བརྒྱབ་ན་བྱིན་རླབས་སྐྱག་པ་ལས་མེད་ཅེས་པའི་གཏམ་དཔེ་འདིས་ཉིན་ཞིག་ཁ་གྲག་ངེས་རེད་སྙམ།
གང་ལྟར་ཁོང་ཚོའི་སྐོར་ལ་རྒྱུས་མངའ་གང་འཚམ་ཡོད་པའི་མི་ཞིག་གིས་ང་ལ་འདི་ལྟར་བཤད་བྱུང་། དེང་སང་རང་སྐྱོང་ལྗོངས་ཀྱི་མགོ་འཁྲིད་བོད་རིགས་ཚོའི་གྲས་སུ་མི་ཚད་ལྡན་ཞིག་ཕལ་ཆེར་སླེབས་ཀྱི་མི་འདུག མང་ཆེ་ཤོས་ཤེས་ཡོན་མེད་མཁན་དང་། གུང་ཁྲན་ཏང་གི་ཁ་ལ་ཉན་མཁན་གྱི་གྲས་རེད། དེར་བརྟེན་ཁོ་ཚོས་བོད་ཀྱི་མ་འོངས་པ་ཧ་གོ་ཡི་ཡོད་པ་མ་རེད་ལ། བོད་ཀྱི་སྐུ་ཚབ་ཀྱང་མཚོན་ཐུབ་ཀྱི་ཡོད་པ་མ་རེད། ཉེ་ཆར་རང་སྟོད་ལུང་བདེ་ཆེན་རྫོང་དང་། ཆུ་ཤུལ་རྫོང་སོགས་ཀྱི་མགོ་འཁྲིད་ལྔ་ཙམ་ལས་གནས་ནས་ཕབ་འདུག ཁོང་ཚོ་ཚང་མ་བོད་རིགས་རེད། བོད་ལ་ཤ་ཞེན་ཅན་ཞིག་ཡིན་ཕྱིན་མེད་པ་བཟོ་ཡི་ཡོད་པ་རེད།
ངས་གྲོགས་པོ་འདིའི་སྐད་ཆ་དང་པེ་ཅིན་གྱི་བོད་པའི་འཐུས་མི་ཡིན་ཟེར་མཁན་ཚོའི་རྣམ་འགྱུར་དེ་མཐོང་ནས་རྩོམ་ཡིག་འདི་བྲིས་པ་ཡིན་ནའང། འཐུས་མི་ཟེར་མཁན་ཁོང་ཚོར་དམའ་འབེབས་བྱས་པ་དང་མཐོང་ཆུང་བྱས་པ་རྩ་བ་ནས་མིན། ཁོང་ཚོའི་གྲས་ནའང་ཕྱི་ཚུལ་ཙམ་མ་གཏོགས་མི་རིགས་ཀྱི་ལས་དོན་རླབས་ཆེན་གནང་མཁན་དེ་འདྲ་ཡོད་སྲིད་ལ། མ་མཐའ་ཡང་བོད་རིགས་ཤིག་ཡིན་པའི་དུང་ཞེན་གཙང་མ་ཡོད་པ་ཡིན། ཡིན་ནའང་མི་ཚང་མའི་ཤེས་ཡོན་གྱི་གནས་ཚད་འདྲ་མཉམ་མིན་པར་བརྟེན་ཁོང་ཚོའི་ཁྲོད་དུའང་ཤེས་ཡོན་གྱིས་མ་འདང་བར་ཞབས་འདྲེན་ཞུ་མཁན་ཡང་ཡོད་སྲིད་པ་འདྲ། དེ་བས་དེ་ཚོར་དྲན་སྐུལ་ཞིག་དང་བརྡ་ལན་ཞིག་ཏུ་ཕུལ་བ་ཡིན། ད་ནི་རྒྱ་གུང་ཁྲན་ལ་བློ་སྙིང་བྲང་གསུམ་གཏད་ནས་སྡིག་པ་མིག་བཙུམས་མ་བྱས་ན་དགའ་བ་འདྲ། ཉིན་ཞིག་འགྱོད་པ་ནམ་མཁར་མི་ཤོང་བ་ཞིག་དང་ཉེས་པ་བཀྲུས་ན་མི་འདག་པ་ཞིག་འཁོར་བ་འདྲ། རྒྱུ་མཚན་ནི་བོད་མི་རིགས་ཀྱི་སྙིང་སྟོབས་འདི་རྒྱ་གུང་ཁྲན་གྱིས་འཇོམས་ཐུབ་པ་ཞིག་གཏན་ནས་རེད་མི་འདུག འདི་ནི་དུང་བའི་བརྡ་རྟགས་ཡིན། སེམས་ཀྱི་སྐད་ཆ་ཡིན།
་་་་ རྒྱ་གཞུང་གིས་བོད་མི་མང་གི་ཚབ་མཚོན་དུ་སྒྲོ་འདོགས་བྱེད་བཞིན་པའི་སྐད་ཆ་འདི་ཚོར་ཁོང་ཚོའི་ངོས་ནས་ཀྱང་འགན་མ་ཁུར་ན་ཁོང་ཚོ་ཙམ་མ་ཟད།
ཁོང་ཚོའི་བུ་རབས་ཚ་རྒྱུད་ཚུན་ཆད་ལོ་རྒྱུས་ཀྱི་ཉེས་ཅན་པ་མི་ཆགས་པའི་ངེས་པ་མི་སྣང་སྙམ། དེ་ནི་ཆེས་འཇིགས་སུ་རུང་བ་ཞིག་སྟེ། རང་གི་གྲོད་ཁོག་གི་དོན་དུ་རང་གི་བུ་རབས་ཚ་རྒྱུད་ཚུན་ཆད་ནག་པོ་བཟོ་ཡི་ཡོད་པ་མིན་ནམ། ་་་་ཟེར།
ཡང་།
་་་་་་ ད་ནི་རྒྱ་གུང་ཁྲན་ལ་བློ་སྙིང་བྲང་གསུམ་གཏད་ནས་སྡིག་པ་མིག་བཙུམས་མ་བྱས་ན་དགའ་བ་འདྲ། ཉིན་ཞིག་འགྱོད་པ་ནམ་མཁར་མི་ཤོང་བ་ཞིག་དང་ཉེས་པ་བཀྲུས་ན་མི་འདག་པ་ཞིག་འཁོར་བ་འདྲ།
རྒྱུ་མཚན་ནི་བོད་མི་རིགས་ཀྱི་སྙིང་སྟོབས་འདི་རྒྱ་གུང་ཁྲན་གྱིས་འཇོམས་ཐུབ་པ་ཞིག་གཏན་ནས་རེད་མི་འདུག འདི་ནི་དུང་བའི་བརྡ་རྟགས་ཡིན། སེམས་ཀྱི་སྐད་ཆ་ཡིན། ཟེར།