དོན་འགྲུབ་དབང་ཆེན་ལ་གཟེངས་རྟཊ།

འདི་ལོའི་ཕྱི་ཟླ་ ༩ བའི་ཚེས་ ༡༣ ཉིན་ཨ་རིའི་གྲོང་ཁྱེར་ནེའུ་ཡོག་ཏུ་རྟེན་གཞི་བྱས་པའི་རྒྱལ་སྤྱིའི་གསར་འགོད་རང་དབང་སྲུང་སྐྱོབ་ཚོགས་པས་ (Committee to Protect Journalist) ། ༢༠༡༢ ལོའི་རྒྱལ་སྤྱིའི་གསར་འགོད་རང་དབང་གི་གཟེངས་རྟགས་ (International Press Freedom Awards) ད་ལྟ་རྒྱའི་བཙོན་འོག་ཏུ་ཡོད་པའི་བོད་མི་དོན་འགྲུབ་དབང་ཆེན་ལཊ་གཙོས་པའི་གསར་འགོད་པ་བཞིའི་མིང་ཁྱབ་བསྒྲགས་བྱས་ཡོད་པ་ལྟར། ཟླ་འདིའི་ཕྱི་ཚེས་ ༢༠ ཉིན་རྒྱལ་སྤྱིའི་གསར་འགོད་རང་དབང་སྲུང་སྐྱོབ་ཚོགས་པས་གོ་སྒྲིག་བྱས་པའི་རྒྱལ་སྤྱིའི་གསར་འགོད་རང་དབང་གི་གཟེངས་རྟགས་ཐེངས་ ༢༢ པའི་མཛད་སྒོའི་ཐོག དོན་འགྲུབ་དབང་ཆེན་ལགས་ཀྱི་བཟའ་ཟླ་ལྷ་མོ་མཚོས་ཁོང་གི་བཟའ་ཟླའི་ཚབ་བྱས་ཏེ་གཟེངས་རྟགས་འབུལ་བཞེས་གནང་ཡོད་འདུག

རྒྱལ་སྤྱིའི་རང་དབང་སྲུང་སྐྱོབ་ཚོགས་པས་གསར་འགོད་རང་དབང་གི་གཟེངས་རྟགས་དེ་ནི། འཛམ་གླིང་ནང་གསར་འགོད་ཀྱི་ལས་ཀའི་ངོ་བོའི་ཐོག་སྡུག་སྦྱོང་མནར་གཅོད་དང་བཙོན་འཇུག  འཇིགས་སྐུལ། ཉེན་བརྡ་འབྱོར་བ་སོགས་ཀྱི་རིགས་བྱུང་བའི་གསར་འགོད་པར་སྤྲོད་ཀྱིན་ཡོད་པ་ཞིག་ཡིན་འདུག་ལ།  འདི་ལོ་བོད་མི་དོན་འགྲུབ་དབང་ཆེན་ལགས་དང་བྷིར་ཛལ་ནས་ཡིན་པ་མའུ་རེ་ཀོོ་ནེཀ་ (Mauri Konig) ། ཁཱ་ཛ་ཀི་སི་ཐན་ནས་ཡིན་པ་ཨ་ཛེམ་ཇོན་(Azimjon Askarow)། ལེ་བྷི་རེ་ཡའི་མའེ་ཨ་ཛན་གྷོ་(Mae Azango) བཅས་མི་བཞིར་ཕུལ་ཡོད་ཀྱང་།  ཐེངས་འདིའི་གཟེངས་རྟགས་འབུལ་འབུལ་བཞེས་ཀྱི་མཛད་སྒོའི་ཐོག བྷིར་ཛལ་ནས་ཡིན་པ་མའུ་རེ་ཀོོ་ནེཀ་དང་ལེ་བྷི་རེ་ཡའི་མའེ་ཨ་ཛན་གྷོ་གཉིས་ལས། ཁཱ་ཛ་ཀི་སི་ཐན་ནང་དཔོན་རིགས་ཚོའི་ལྐོག་ཟ་རུལ་སུངས་དང་སྡུག་སྤྱོད་སྐོར་ཕྱིར་བསྒྲགས་བྱས་ཏེ་ཚེ་བཙོན་གྱི་ཁྲིམས་ཐག་བཅད་ཡོད་པའི་གསར་འགོད་པ་ཨ་ཛེམ་ཇོན་དང་། རྒྱ་ནག་གི་དབང་སྒྱུར་འོག་ཡོད་པའི་བོད་མི་ཚོའི་དཀའ་སྡུག་དང་མངོན་འདོད་གློག་བརྙན་དུ་ཕབ་ལེན་བྱས་ཏེ་ལོ་ ༦ ཁྲིམས་ཆད་བཅོན་འཇུག་བྱས་ཡོད་པའི་བོད་མི་དོན་འགྲུབ་དབང་ཆེན་གཉིས་གཟེངས་རྟགས་འབུལ་བཞེས་ཀྱི་མཛད་སྒོར་མཉམ་ཞུགས་གནང་མ་ཐུབ་པར་སོ་སོའི་ནང་མི་སོགས་ཀྱི་གཟེངས་རྟགས་འབུལ་བཞེས་གནང་དགོས་བྱུང་ཡོད་འདུག

ཉེ་ཆར་གསར་འགོད་རང་དབང་གཟེངས་རྟགས་ཐོབ་མཁན་གྱི་མིང་བྱང་ཁྱབ་བསྒྲགས་སྐབས། རྒྱལ་སྤྱིའི་གསར་འགོད་རང་དབང་སྲུང་སྐྱོབ་ཚོགས་པའི་ཚོགས་གཙོ་ཇོལ་སེ་མོན་ (Joel Simon) གྱིས། གསར་འགོད་པ་ཁོང་རྣམ་པས་བདེན་པའི་ཆེད་དུ་རླབས་ཆེན་གྱི་ལས་དོན་བསྒྲུབས་པ་དེས་ཁོང་ཚོ་ལ་བློ་སྟོབས་བསྩལ་ཡོད་པ་དང་། ད་ལྟའི་ཆར་ཁོང་ཚོའི་ཁྲོད་ཀྱི་ཨ་ཛེམ་ཇོན་དང་དོན་འགྲུབ་དབང་ཆེན་གཉིས་འཇུ་བཟུང་བཙོན་འཇུག་བྱས་ཡོད་སྟབས། རྒྱལ་སྤྱིའི་གསར་འགོད་རང་དབང་སྲུང་སྐྱོབ་ཚོགས་པས་ཁོང་གཉིས་ལ་རང་དབང་མ་ཐོབ་བར་མུ་མཐུད་ལས་འགུལ་འདྲ་མིན་སྤེལ་རྒྱུ་ཡིན་པའི་གཏམ་བཤད་སོགས་སྤེལ་ཡོད།