.JPG)
མདང་ནུབ་བླ་བྲང་བསང་ཁོག་ཞང་ཐོག་ཏུ་བོད་རིགས་ན་གཞོན་རང་ལོ་ ༡༨ ཡིན་པ་དངུལ་རྭའི་སངས་རྒྱས་བཀྲ་ཤིས་ལགས་ཀྱིས་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་སྟེ་སྐུ་གྲོངས་ཡོད་འདུག
ས་རཱ་མཐོ་སློབ་ཏུ་སློབ་གཉེར་གནང་བཞིན་པའི་གྲྭ་འཇམ་དབྱངས་སྦྱིན་པ་ལགས་ཀྱིས་གནས་ཚུལ་བཏང་འབྱོར་ལ། ཁ་སང་ཕྱི་ཚེས་ ༢༧ ཉིན་གྱི་བོད་ནང་གི་དགོང་མོའི་ཆུ་ཚོད་ ༡༡ ཡས་མས་སྟེང་བོད་མདོ་སྨད་བླ་བྲང་བསང་ཆུ་རྫོང་བསང་ཁོག་ཞང་ཐོག་ཏུ། རང་ལོ་ ༡༨ ཡིན་པའི་བསང་ཁོག་དངུལ་རྭའི་རྒྱལ་གཅེས་དཔའ་བོ་སངས་རྒྱས་བཀྲ་ཤིས་ལགས་ཀྱིས་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་སྟེ་སྐུ་གྲོངས་ཡོད་འདུག
ཉིན་དེར་ཁོང་དང་གྲོགས་པོ་འགས་སྦག་སྦག་བཞོན་ནས་བསང་ཁོག་ཞང་ཐོག་ཏུ་བསླེབས་ཡོད་པ་དང་། མེར་བསྲེགས་མ་བཏང་བའི་སྔོན་ཏག་ཏག་ལ་ཁོང་གིས་ཕ་སྤུན་གྱི་བུ་སྤུན་ཚེ་བྷེ་ཟེར་བར་ཁ་པར་འབྱོར་ཏེ། “ ཨ་རོགས། ངས་དེ་རིང་བོད་དོན་ཆེད་དུ་རང་ལུས་མེར་བསྲེགས་གཏོང་རྒྱུ་ཡིན” ཞེས་ལན་བསྐྱེལ་ཡོད་འདུག སྐབས་དེར་ཚེ་བྷེས་ “ཨ་རོགས། ཨ་རོགས། དེ་ལྟར་མ་བྱེད། ཅུང་བསྒུག་དང” ཅེས་པ་ཙམ་ལས་བཤད་ཁོམ་མ་བྱུང་བར་ཁ་པར་སྒོ་བརྒྱབ་ཡོད་འདུག དེའི་རྗེས་ཁ་པར་ཅི་ཙམ་བཏང་ཡང་ཁ་པར་སྒོ་གཏན་ཏུ་བརྒྱབ་ཡོད་འདུག
.JPG)
ནང་མི་སྐོར་ཞིག་གང་མགྱོགས་བསང་ཁག་ཞང་ཐོག་ཏུ་ཕྱིན་སྐབས། སངས་རྒྱས་བཀྲ་ཤིས་ལགས་ཀྱིས་སྐུ་ལུས་མེར་བསྲེགས་བཏང་ཚར་ཡོད་འདུག་ལ། ཉེ་འཁོར་གྱི་མི་ཚོས་བརྗོད་ན། མེར་བསྲེགས་སྐབས་ཁོང་གིས་ “༸རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས། ༸པཎ་ཆེན་སྣང་བ་མཐའ་ཡས་གཙོ་བྱས་པའི་ཆབ་སྲིད་བཙོན་པ་རྣམས་ཀློད་གྲོལ་གཏོང་དགོས” ཞེས་སྐད་འབོད་གནང་ཡོད་འདུག དེ་ནས་ཉེ་འཁོར་གྱི་མི་ཚོ་དང་ལྷན་དུ་ཁོང་གི་སྐུ་ཕུང་བསང་ཁོག་ཞང་ཐོག་ཏུ་ཁོང་ཚང་ལ་ཁང་པ་གསར་པ་ཞིག་ཡོད་པ་དེར་གདན་ཞུ་གནང་ཡོད་འདུག
ཐེངས་འདིར་སངས་རྒྱས་བཀྲ་ཤིས་ལགས་ཀྱིས་རང་ལུས་མེར་བསྲེགས་གནང་ཡུལ་དེ་ནི། དེ་སྔོན་དཔའ་བོ་ཐུབ་དབང་སྐྱབས་ཀྱིས་རང་ལུས་མེར་བསྲེགས་གནང་ཡུལ་གྱི་ཉེ་འཁྲིས་ཡིན་འདུག་ལ། སངས་རྒྱས་བཀྲ་ཤིས་ལགས་ཀྱི་ཕ་མིང་ལ་ནམ་ཁོ་དང་མའི་མིང་ལ་སྒྲོལ་མ་འཚོ་ཟེར་གྱི་ཡོད་པ་དང་། སྤུན་ཆེ་བའི་མིང་ལ་འཕགས་པ་ཚེ་རིང་དང་། ཨ་ཅེ་ཡི་མིང་ལ་ཚེ་རིང་སྒྲོལ་མ། ནུ་བོའི་མིང་ལ་སྐལ་བཟང་ཚེ་རིང་བཅས་འབོད་ཀྱི་ཡོད་ལ། རྒྱལ་གཅེས་དཔའ་བོ་ཁོང་ཕྱི་ཟླ་ ༡༢ ཚེས་ ༡ ཉིན་སྐུ་ཕུང་ཞུགས་འབུལ་བྱས་ཡོད་འདུག དེ་སྔོན་ཁོང་བསང་ཁོག་སློབ་ཆུང་ནང་ལོ་བཞི་ཙམ་རིང་སློབ་གཉེར་གནང་ཡོད་ཀྱང་གནས་སྟངས་ཀྱི་དབང་གིས་རྗེས་སུ་ཁྱིམ་དུ་ལོག་སྟེ་ཕྱུགས་རྫི་བྱས་ཏེ་སྡོད་དགོས་བྱུང་ཡོད་འདུག ཁོང་ནམ་རྒྱུན་ཕ་མའི་ཁ་ལ་ཉན་པོ་བྱེད་མཁན་གྱི་བུ་ཡ་རབས་སྤྱོད་བཟང་ཞིག་ཡིན་འདུག
དོན་ངོ་མ་བོད་མི་ཚོས་རང་དབང་གི་ཆེད་དུ་རང་ལུས་མེར་བསྲེག་བཞིན་ཡོད་པ་རེད་ལ། རྒྱལ་བ་རིན་པོ་ཆེ་བོད་ལ་གདན་དྲངས་དགོས་པ་འདི་ནི་རང་དབང་དེའི་ཆ་ཤས་ཤིག་རེད། ཁོང་ཚོས་མེར་སྲེག་རིམ་བཞིན་རྒྱལ་བ་རིན་པོ་ཆེ་བོས་པ་ནི་བྱིས་པའི་ཨ་མ་འབོད་པའི་ངང་ཚུལ་རེད།།
ཡིན་ན་ཡང་བཙན་བྱོལ་བ་དག་གི་ངོས་ནས། བོད་མི་དམངས་རང་དབང་གི་ཆེད་དུ་ལས་འགུལ་སྤེལ་དགོས་ལ། རང་ལུས་མེར་སྲེག་མཁན་དག་གི་དགོངས་པ་ཡང་དེས་རྫོགས་ཀྱི་རེད། ཁོང་ཚོའི་ཆེད་དུ་སྨོན་ལམ་མཆོད་འབུལ་ལས་དེ་བཟང་བ་རེད།
ཡིན་ན་ཡང་། བཙན་བྱོལ་བོད་མིའི་སྒྲིག་འཛུགས་ཀྱི་ངོས་ནས་ཁོང་ཚོར་སྨོན་ལམ་དང་མཆོད་འབུལ་ཙམ་ལས་ཅི་ཡང་མེད་ན་དེ་ནི་བློ་གཏད་ས་ནས་སྙིང་ཕུག་པ་ལས་ཅི་ཞིག་ཡིན་ཨང་།།
གོང་གི་གནས་ཚུལ་སྐོར་ལ་ཞིབ་ཏུ་སྒྱུས་ལོན་གནང་འདོད་ཡོད་རིགས་ཚོས་ཁ་པར་ཨང་ ༩༨༨༢༣༨༨༢༣༤ འདི་ལ་འབྲེལ་བ་གནང་རོགས།