ངྷ་སའི་མི་མང་གི་ངོ་རྒོལ།

༧གོང་ས་མཆོག་ལ་འཛམ་གླིང་ཞི་བདེ་གཟེངས་རྟགས་ཐོབ་པའི་ཉིན་མོ་དང་། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དུས་ཆེན་ཉིས་འཛོམས་ཀྱི་ཉི་མོ་དང་བསྟུན། བཞུགས་སྒར་ནས་ཀཱ་ཅཱ་རཱི་བར་མི་མང་གི་སྐད་འབོད་གོམ་བགྲོད་ཅིག་གནང་སོང་།

ཁ་སང་ཉིན་དགུང་ཆུ་ཚོད་ ༡༢ སྟེང་ཚོགས་པ་དྲུག་གི་སྣེ་ཁྲིད་འོག རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་དང་བསྟུན་རང་ལུས་མེར་བསྲེགས་གནང་མཁན་བོད་ཚོར་གདུང་སེམས་མཉམ་སྐྱེད་ཆེད། ངྷ་སའི་ཉེ་འཁོར་གྱི་དགོན་སྡེ་ཁག་གི་གྲྭ་བཙུན་དང་སློབ་གྲྭ་ཁག་གི་སློབ་ཕྲུག མི་མང་བཅས་ལྷན་འཛོམས་ཀྱིས་ལག་ཏུ་བོད་ཀྱི་རྒྱལ་དར་དང་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་འདྲ་པར། བོད་མིའི་སྐྱིད་སྡུག་མཉམ་མྱོང་བཀོད་པའི་འཕྲེད་དར་སོགས་སྒྲེང་བཞིན། གཙུག་ལག་ཁང་ནས་ཀཱ་ཅཱ་རཱི་བར་སྐད་འབོད་གོམ་བགྲོད་བྱས་ཡོད།

ཐེངས་འདིའི་སྐད་བོད་གོམ་བགྲོད་ནི་དབུས་བུད་མེད་ལྷན་ཚོགས་དང་ངྷ་ས་ས་གནས་བུད་མེད་ལྷན་ཚོགས། བོད་རྒྱལ་ཡོངས་མང་གཙོ་ཚོགས་པ། བོད་ཀྱི་དགུ་བཅུ་གསུམ་ལས་འགུལ་ཚོགས་པ། བོད་རང་བཙན་སློབ་ཕྲུག་ཚོགས་པ། ངྷ་ས་ས་གནས་གཞོན་ནུ་བཅས་ཀྱིས་གོ་སྒྲིག་བྱས་ཡོད་ཅིང་། ཚོགས་པ་དྲུག་གི་འགྲེམས་སྤེལ་ཡིག་ཆའི་ནང་། རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོར་བོད་དང་བོད་དོན་རྒྱལ་སྐྱོར་པ་ཡོངས་ནས། འདི་ལོའི་ནོ་བྷེལ་ཞི་བདེ་གཟེངས་རྟགས་ཐོབ་མཁན་ཡུ་རོབ་མཐུན་ཚོགས་གཙོས་རྒྱལ་སྤྱིའི་མགོ་ཁྲིད་ཚོ་མཉམ་རུབ་ཐོག་བོད་ཀྱི་དཀའ་ངལ་ཐད་ཁ་ཡོད་ལག་ཡོད་ཀྱི་ལས་འགུལ་ཞིག་ངེས་པར་དུ་སྤེལ་དགོས་པའི་རེ་སྐུལ་ཞུས་འདུག

ཡིག་ཆེ་དེར་མུ་མཐུད་དོན། ༢༠༠༩ ཟླ་ ༢ ནས་འདི་ལོའི་ཕྱི་ཟླ་ ༡༢ ཚེས་ ༩ པར་བོད་མི་ ༩༥ རང་ལུས་མེར་བསྲེགས་གནང་ཡོད་པ། ལྷག་པར་དུ་འདི་ལོའི་ཕྱི་ཟླ་ ༡༡ གཅིག་པུའི་ནང་བོད་མི་གཞོན་སྐྱེས་ ༢༨ ཀྱིས་རང་ལུས་མེར་བསྲེགས་གནང་པའི་ཛ་དྲག་གི་གནས་བབ་ཐད། རྒྱལ་སྤྱིའི་གཞུང་སྒེར་ཚང་མ་མཉམ་རུམ་ཐོག་ལས་འགུལ་སྤེལ་རྒྱུའི་རེ་སྐུལ་ཞུས་འདུལ་ལ། གནད་དོན་དེའི་ཐད་བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་དགེ་ལེགས་འཇམ་དབྱངས་ཀྱིས། རྒྱལ་སྤྱིའི་སྲིད་གཞུང་ཁག་གིས་བོད་མིའི་རང་སྲེག་ལས་འགུལ་མཚམས་འཇིག་རྒྱུར་རེ་བ་བརྒྱབས་པ་ཙམ་གྱི་འགྲིག་གི་མེད་པ་དང་། བཙན་བྱོལ་གཞུང་མང་གཉིས་ཀྱིས་རྒྱ་ནག་གི་མཁྲེགས་འཛིན་སྱིད་ཇུས་དེ་མཚམས་མ་བཞག་པར་དུ་སེམས་ཐག་གཙང་བཅད་ཀྱི་ཞི་རྒོལ་འདི་བཞིན་མུ་མཐུད་གནང་རྒྱུ་ཡིན་པར་གྲ་སྒྲིག་ཨང་གསར་དགོས་པར་བརྗོད་ཡོད།

ཚོགས་པ་དྲུག་གི་བསྒྲགས་གཏམ་ནང་ཕྱི་ཟླ་ ༡༡ ཚེས་ ༢༦ ཉིན་བོད་ནང་གི་ས་གནས་དབང་འཛིན་ཚན་པ་ཁག་གིས་རང་ལུས་མེར་བསྲེགས་ཐད་རྒོལ་གཏམ་གྱི་ཡིག་ཆ་སྣ་ཚོམས་འགྲེམས་བསྒྲགས་བྱས་པ། མདོ་སྨད་ཆབ་ཆ་ཁུལ་གྱི་སློབ་ཕྲུག་གི་ཁྲོལ་སྐོར་ལ་དྲག་གནོན་རྡུང་རྡེག་བཏང་པར་ངོ་རྒོལ་ཡོད་སྐོར་བཀོད་འདུག་ལ། དོན་རྐྱེན་དེའི་ཐད་བོད་རང་བཙན་སློབ་ཕྲུག་ཚོགས་པའི་ལས་འགུལ་འགན་འཛིན་བསྟན་འཛིན་འཇིགས་བྲལ་གྱིས། “བོད་ནང་གི་བོད་མི་ཚོས་འཇིགས་ཞིམ་མེད་པར་སྐད་གསེང་མཐོན་པས་རང་དབང་དང་། འགྲོ་བ་མིའི་ཐོབ་ཐང་གི་དགོས་འདུན་བཏོན་ཏེ་དཀའ་ལས་རྒྱག་བཞིན་པར་ང་ཚོས་འགྲོ་བ་མིའི་ཐོབ་ཐང་གི་ཉིན་མི་འདིར། ཡུལ་ལུང་སོ་སོའི་སྲིད་གཞུང་ཁག་མཉམ་རུམ་གྱིས་བོད་དོན་དཀའ་རྙོག་སེམ་ཆེད་དོན་ཕན་ལྡན་པའི་ནུས་པ་འདོན་ཐབས་དང་། རྒྱ་དམར་གཞུང་ལ་གནོན་ཤུགས་སྤྲོད་རོགས་”ཞེས་འབོད་སྐུལ་ཞུས་སོང་།

ཡང་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཞོན་ཀླུ་མཁར་བྱམས་ཀྱིས་ཐེངས་འདིའི་སྐད་འབོད་གོམ་བགྲོད་ཀྱི་ངོ་རྒོལ་ལས་འགུལ་དང་སྦྲགས་ཏེ། ད་ཆར་བོད་ནང་འགྲོ་བཞིན་པའི་རང་ལུས་མེར་བསྲེགས་ནི་ཚང་མས་དངོས་སུ་མཐོང་ཡུལ་དུ་གྱུར་པའི་དཀའ་ངལ་ཞིག་ཡིན་ཡང་། རང་ལུས་མེར་བསྲེགས་དང་འབྲེལ་བའི་དཀའ་ངལ་མང་པོ་ཞིག་མཐོང་ཡུལ་ན་མེད་པར་མེར་བསྲེགས་དོན་རྐྱེན་གྱི་རྒྱབ་ཏུ་བཀབ་ནས་ཡོད་སྟབས། མི་རྣམས་ཀྱིས་མེར་བསྲེགས་ལ་དོ་སྣང་བྱེད་རྒྱུ་དང་ཆབ་ཅིག མེར་བསྲེགས་ཀྱི་རྒྱབ་ན་ཡོད་པའི་དཀའ་ངལ་རིགས་ཚོར་རྟོགས་ཐུབ་རྒྱུ་གལ་ཆེན་པོ་ཡིན་སྐོར་བརྗོད་ཡོད།

དེ་བཞིན་བོད་ནང་གི་རང་ལུས་མེར་བསྲེགས་ཐད། ངྷ་ས་ས་གནས་གཞོན་ནུའི་དྲུང་ཆེ་བཀྲ་ཤིས་ལགས་ཀྱིས་རྒྱ་ནག་གི་བཙན་དབང་འོག་གི་བོད་མིའི་རང་ལུས་མེར་བསྲེགས་ཀྱིས་ལས་འགུལ་དེས། རྒྱ་ནག་གཞུང་གཅིག་པུ་མིན་པར་རང་དབང་ལུང་པར་ཡོད་པའི་བཙན་བྱོལ་བོད་མི་ཚོ་དང་། རང་དབང་ལ་དགའ་བའི་འཛམ་གླིང་མི་མང་དང་རྒྱལ་ཁབ་ཁག་ལའང་འབོད་སྐུལ་བྱེད་ཀྱི་ཡོད་པ་ཞིག་ཡིན་སྟབས། རང་དབང་ལུང་པར་ཡོད་མཁན་ཚོས་ཁོང་རྣམ་པའི་འབོད་སྒྲ་དེ་འཛམ་གླིང་མི་མང་ལ་ཐོས་པར་བྱས་ཏེ། ཁོང་ཚོའི་མངོན་འདོད་འགྲུབ་པར་བྱ་དགོས་པར་བརྗོད་སོང་།

གཞན་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དང་བསྟུན། བུད་མེད་ལྷན་ཚོགས་དབུས་ས་གཉིས་ཀྱིས་རྒྱལ་སྤྱིའི་འགྲོ་བ་མིའི་ཐོབ་ཐང་སྡེ་ཙན་དང་། བྱང་ཆིངས་སྒྲིག་འཛུགས་(ཎ་ཊོ)། ཡུ་རོབ་མཐུན་ཚོགས་བཅས་ལ་སྙན་ཞུ་ཕུལ་ཏེ་བོད་ནང་གི་ཛ་དྲག་གནས་བབ་ལ་དོ་ཁུར་བྱ་དགོས་པའི་འབོད་སྐུལ་ཞུས་ཡོད་འདུག་ལ། བུད་མེད་ལྷན་ཚོགས་ཀྱི་ཚོགས་གཙོ་བཀྲ་ཤིས་སྒྲོལ་མ་ལགས་ཀྱིས་བརྗོད་པ་ལྟར་ན། སྙན་ཞུ་དེའི་ནང་རྒྱལ་སྤྱིའི་རང་དབང་ཅན་གྱི་རྟོག་ཞིབ་མི་སྣ་འཕྲད་དུ་བོད་ནང་གཏོང་དགོས་པ། ཆ་རྐྱེན་གང་ཡང་མེད་པའི་ཐོག་རྒྱལ་སྤྱིའི་ཞི་བདེ་དམག་དཔུང་བོད་རྒྱུ་སོགས་དང་། རྒྱ་ནག་གི་དྲག་གནོན་སྲིད་ཇུས་མཚམས་འཇོག་རྒྱུར་གནོན་ཤུགས་སྤྲོད་དགོས་པ་སོགས་གསལ་ཡོད་འདུག

དེ་བཞིན་སྐད་འབོད་གོམ་བགྲོད་ཀྱི་མཇུག་སྡོམ་ཐོག ངྷ་ཤོད་ཤེས་ཡོན་མཐོ་སློབ་ཁང་གི་དགེ་རྒན་ཆེ་མོ་བྷ་ཌོ་ལཱ་ལགས་ཀྱིས་བོད་པའི་རང་བཙན་འཐབ་རྩོད་ལ་མཐའ་གཅིག་ཏུ་རྒྱབ་སྐྱོར་ཡོད་སྐོར། འདས་པའི་ལོ་ངོ་ ༥༠ ལྷག་གི་རིང་བོད་པའི་འཐབ་རྩོད་མུ་མཐུད་གསོན་གནས་ཐུབ་པ་ནི་བོད་པ་ཚོའི་གཟི་བརྗིད་ཅིག་ཡིནཚུལ། བོད་པ་ཚོ་ཐོག་མར་བཙན་བྱོལ་དུ་འབྱོར་སྐབས་རྒྱ་གར་གཞུང་མང་གཉིས་ཀྱི་རྒྱབ་སྐྱོར་ཤུགས་ཆེན་པོ་ཡོད་ཀྱང་། རིམ་བཞིན་ཉམས་རྒུད་དུ་ཕྱིན་ཡོད་སྐོར། དེང་སྐབས་བོད་པའི་གཞོན་སྐྱེས་ཚོས་བོད་དོན་འཐབ་རྩོད་བྱེད་སྐབས། རྒྱ་གར་གྱི་གཞོན་སྐྱེས་ཚོ་དང་མཉམ་འབྲེལ་བྱ་རྒྱུ་ཧ་ཅང་གལ་ཆེན་པོ་ཡིན་སྐོར་སོགས་བརྗོད་སོང་།

གསར་འགོད་པ། བནྡེ་སྐྱབས།