ཤ་ཁྲག་རུས་གསུམ་འཚིག་པའི་གཏམ་རྒྱུད་དེར།།
མ་ཎི་དབྱངས་ལ་གྱེར་བའི་རྗེས་འཇུག་གིས།།
སྲོལ་རྒྱུན་དུར་མཆོད་བྱེད་པར་འཐད་ནའང་།།
འདས་པོའི་ཁ་ཆེམས་བྱ་བ་རིང་དུ་ལུས།།
རང་སྲེག་ཞི་རྒོལ་བྱ་བའི་ཐོབ་འབྲས་དེར།།
འཚེ་མེད་སྟོབས་ཤུགས་གྲུབ་འབྲས་སོན་དགོས་ན།།
ཕྱི་ནང་མཉམ་རུབ་གྱེན་ལངས་མ་བྱས་ཚེ།།
བསྐལ་བའི་མཐའ་ལ་ཐུག་ཀྱང་རེ་འབྲས་དཀའ།།
གཞིས་ནས་ཞི་བའི་མེ་ལྕེ་འབར་བ་དེར།།
བྱེས་ནས་རྒྱབ་ལངས་སྐད་འབོད་མིང་ཙམ་གྱིས།།
འདས་པོའི་རྣམ་ཤེས་བདེ་བར་གཟིམ་དཀའ་ཞིང་།།
བོད་མིའི་མངོན་འདོད་རང་དབང་ལོན་ཐབས་མེད།།
ཞི་བའི་མེ་ལྕེ་དྲག་པོ་འབར་སྟངས་དེས།།
ཕྱི་སྡོད་བོད་མིའི་སེམས་པ་རྨས་གྱུར་ནས།།
བདེན་དོན་བོད་ལ་ཕྱོགས་ནས་འབད་ཐུབ་ཚེ།།
མུན་པའི་སྒོ་མོ་འོད་ཀྱིས་འབྱེད་ངེས་ཡིན།།
བྲིས་དང་སྤེལ་བའི་ལས་ལ་ཞུགས་དོན་ནི།།
རང་གི་ཁ་དང་རྒྱབ་ཀྱི་གོས་དོན་མིན།།
སེམས་དང་བསམ་པ་འཐག་པའི་སྐུད་པ་ཡིས།།
རལ་བའི་གོས་ཧྲལ་བཙེམ་འདོད་བློ་ཡིས་བཟུང་།།
ལྷ་དང་སྲུང་མ་འཐབ་པའི་གཡུལ་ས་དེར།།
མི་དང་མི་རིགས་འཁྲུག་པའི་བར་གསེང་དུ།།
བདེན་པའི་བརྡ་དག་དྲང་མོའི་མདའ་མོ་འདི།།
རྫུན་པའི་ཨུ་ཁུང་བརྡོལ་བའི་ཆེད་དུ་འཕངས།།
ཚུར་ལ་མདའ་མདུང་གཏོད་པའི་སྲིད་གཞུང་ལ།།
ཕར་ལ་མེ་ཏོག་འཕེན་པ་འཚེ་མེད་ལུགས།།
ཀུན་གྱི་མིག་ལ་མཛེས་པ་དཀའ་ན་ཡང་།།
དྲག་པོའི་དམག་ལས་རྒྱལ་ཐབས་འདི་ཉིད་ཡིན།།
རྩུབ་མོའི་ཚིག་གིས་ཚུར་ལ་གཟས་གྱུར་ཀྱང་།།
འཇམ་པོའི་ངག་གིས་བསུ་བ་ཞི་བའི་བྱེད།།
ལག་ལེན་བདེན་པར་ཞུགས་པའི་སྙིང་སྟོབས་ནི།།
ཞི་བའི་འཐབ་རྩོད་ཀུན་ལས་འཕགས་པ་ཡིན།།
ང་ཡིས་ལུས་པོ་བཙོན་དུ་བཅུག་ན་ཡང་།།
སེམས་པ་བཙོན་ཁང་རྭ་ལས་མངོན་བརྒལ་ཏེ།།
གངས་ཅན་ཁ་བའི་ཞིང་གི་བདེ་སྡུག་ཆེད།།
ཉིན་མཚན་མེད་པར་བསམ་གཞིགས་ཀློང་དུ་ཡོད།།
འགད་དང་རྫས་ཀྱི་དྲག་བརྡུང་ལས་འགུལ་དང་།།
མུན་པའི་ལམ་ཆེན་གཤགས་པའི་སྒྲོན་མེ་གཉིས།།
ཞི་དང་དྲག་པོའི་གཡུལ་ས་སྐྱུར་མོའི་ལྗོངས།།
མི་རིང་ལྷིང་འཇགས་ཡོང་བར་སྨོན་ལམ་འདེབས།།
དེང་སང་བོད་ནང་གི་ཞི་བའི་སྒྲོན་མེ་ཡི་གྲངས་ཚད་བརྒྱད་བཅུ་ལས་བརྒལ་བའི་ཡིད་སྐྱོའི་གསར་འགྱུར་ལ་བལྟས་རྗེས། རང་གི་རིགས་ལ་ཞི་བའི་འཐབ་རྩོད་ཀྱི་སེམས་ཤུགས་ཕྱོགས་གཉིས་ནས་མཆེད་པར་སྐུལ་ལྕགས་དང་འདས་པོ་དག་ལ་རྗེས་དྲན་གྱི་ཚུལ་དུ།། ས་ཡ་དྲུག་གི་བུ་གླིང་ཚ་ཚེ་བརྟན་རྡོ་རྗེ་སུ་འབོད་པའི་བལ་ཡུལ་བཙོན་ཁང་ནས། དྲུང་ཡིག་དོན་ལྡན་ནས།
