ལོ་རྒྱུས་ཀྱིས་དམར་འདེད་བྱེད་ངེས།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༥༧༦ སྟེང་གི་རྩོམ་སྒྲིག་པའི་གཏམ།

འཛམ་གླིང་རིལ་མོ་འདིའི་སྒང་དམག་དོན་དང་དཔལ་འབྱོར་གང་ཐད་ནས། མིང་དོན་གཉིས་ལྡན་སྟོབས་ཆེན་ཞིག་ཡོད་པ་ནི་ཨ་རི་ཡིན། དེར་བརྟེན།  འཛམ་གླིང་གི་མི་མང་པོ་ཞིག་གིས་ཨ་རིར་རྣ་ཅོག་ཀྲོང་ངེར་ཉན་ཡོད།  ང་ཚོ་བཙན་བྱོལ་བོད་པ་ཚོའི་ཁ་ནང་མིག་ནང་ལྷུང་ཞིང་། སྐྱ་སེར་རྒན་གཞོན་བྱིས་པ་ཡོངས་ཀྱིས་རྐང་པ་རྐྱོང་ས་དང་སྨོན་ལམ་རྒྱག་སའང་ཨ་རི་ཆགས་ཡོད། ཡིན་ནའང་།  ཨ་རིའི་མི་མང་གི་སྙིང་སྟོབས་དང་མིག་རྒྱང་ལ་དཔེ་ལྟ་དང་སློབ་སྦྱོང་བྱེད་མཁན་འུ་ཅག་བཙན་བྱོལ་བོད་པའི་ཁྲོད་ག་ཚོད་ཅིག་ཡོད་དམ།

        ཉེ་ཆར་ཨ་རིའི་རྒྱལ་ཁབ་གསང་བའི་སྡེ་ཁག་གིས་འབྱུང་འགྱུར་གྱི་ལོ་ ༡༨ ལ་རིག་འདེད་ཚོད་དཔག་བྱས་ཏེ། ད་ལྟའི་ཚན་རྩལ་གསར་པ་དང་ཉམས་ཆག་ཏུ་འགྲོ་བཞིན་པའི་རྒྱུ་ཆའི་ཐོན་ཁུངས་དང་། འཕེལ་ཤུགས་མྱུར་བའི་འཛམ་གླིང་གི་མི་འབོར་བཅས་ཀྱིས། མ་འོངས་པར་འཛམ་གླིང་གི་སྲིད་འབྱོར་རིག་གསུམ་གྱི་སྟོབས་ཤུགས་སྙོམས་སྒྲིག་ལ་གཞི་རྩའི་འགྱུར་ལྡོག་འབྱུང་རྒྱུ་ཡིན་པ་མ་ཟད། སའི་གོ་ལའི་སྟེང་གི་ད་ལྟའི་མི་རབས་འདི་ནི་འགྲོ་བ་མིའི་ལོ་རྒྱུས་ཀྱི་འགག་རྩའི་དཀྱོགས་མཚམས་ཤིག་ལ་བསླེབས་ཡོད་ལ། མ་འོངས་པར་བགྲོད་སྲིད་པའི་ལམ་ཕྱོགས་ཀྱང་གདམ་ག་རང་བཞིན་ཅན་གྱི་འཛམ་གླིང་གཞན་ཞིག་ཡིན་སྲིད་པའི་ངོས་འཛིན་བྱས་ཡོད།

        དེ་དག་ལ་བརྟེན་ཨ་རིའི་སྲིད་འཛིན་ཨོ་བྷ་མས་ཀྱང་མགྲིན་པ་བསྲིངས་ཏེ་བྱང་གི་ཨ་རི་ཤར་གྱི་ཨེ་ཤ་ཡར་ལོག་རྒྱུ་ཡིན་སྐོར་སྐད་གསང་མཐོན་པོས་བསྒྲགས་ཡོད་ལ། ཤར་གྱི་རྒྱ་དམར་པོས་ཀྱང་རང་གི་ཁ་སྒོ་སྲུང་ཐབས་སུ་དམག་འཐབ་གྲུ་གཟིངས་མཚོ་ལ་ཞུགས་པ་མ་ཟད། རང་གི་མཐུན་གྲོགས་བྱང་ཀོ་རི་ཡའི་བྲང་གཞུང་གཡར་ཏེ།  སོ་སོའི་ན་ཟུག་གི་འཕག་འཚག་མཐུན་གྲོགས་རྒྱལ་ཁབ་ཀྱི་མེ་ཤུགས་འཕུར་མདའ་རུ་བསྒྱུར་ཏེ་འཛམ་གླིང་གི་མཁའ་དབྱིངས་སུ་སྤུར་བ་དེས།  འཛམ་གླིང་གི་རྒྱལ་ཁབ་ཆེ་མ་ཆུང་གསུམ་གྱི་སྡོམ་ཐག་ལྟ་བུའི་རྒྱལ་ཚོགས་ཀྱི་སྒྲིག་གཞི་དེ་ཁད་ཀྱིས་གཏོར་བར་བརྟེན། ཉི་ཧོང་གིས་ཀྱང་གནའ་བོའི་དཔའ་ཉམས་སླར་གསོ་དགོས་པའི་མདུན་ལྗོངས་མཐོང་སྟེ། འབྱུང་འགྱུར་རྡུལ་མཚོན་ཞིབ་འཇུག་ལ་གོམ་ཁ་བསྒྱུར་དགོས་པའི་སྐད་ཤུགས་འབྱིན་མགོ་བརྩམས་པ་འདིས།  ཨེ་ཤ་ཡ་ནི་དངོས་གནས་སྲིད་འབྱོར་རིག་གསུམ་གང་ཐད་ནས་ཡོམ་ཡོམ་འདར་གྱིན་པའི་སྣང་བ་ཞིག་འགོག་མེད་དུ་སྤྲོད་ཀྱིན་ཡོད།

        དེ་བཞིན། གཞིས་བཞུགས་བོད་མི་ཚོས་ཀྱང་དཔུང་མེད་ཀྱང་ལག་པས་ར་ར་ཟེར་བའི་དཔེ་ལྟར།  བོད་ཁམས་མེ་རུ་སྦར་ཏེ་གནའ་བོའི་བཙན་པོའི་དཔའ་སྙིང་གི་གཟི་ཉམས་དེ་འཛམ་གླིང་སྣེ་གསུམ་པར་གྲགས་པའི་ས་སྒང་འདིར་ཤུགས་ཀྱིས་གྱེར་བཞིན་ཡོད། མི་རིགས་དང་རྒྱལ་ཁབ་གང་གི་འདས་པའི་འཐབ་རྩོད་ཀྱི་ལོ་རྒྱུས་ལ་བལྟས་ཀྱང་རུང་། མི་མང་གི་ངོས་ནས་བླ་ན་མེད་པའི་དཔའ་སྙིང་འདི་ཙམ་ཞིག་ལས་གཞན་གང་ཡང་བསྒྲུབ་རྒྱུ་ལྷག་མེད། ཡིན་ནའང་། བོད་མི་རིགས་ཀྱི་མགྲིན་པ་དང་མིག་ཟུང་ལ་ཁས་མཆེ་བའི་བཙན་བྱོལ་བ་རྣམས་ཀྱི་སྙིང་གི་འཕར་ལྡིང་དང་དབུགས་ཀྱི་རྒྱུ་བ་ཇེ་ལྷོད་དུ་འགྱུར་བཞིན་ཡོད།

        སྤྱིར་འཐབ་རྩོད་ལ་ཞུགས་པའི་མི་རིགས་གང་དེའི་མིག་རྒྱང་རིང་པོའི་ཐབས་ཤེས་དང་། བརྟན་ཞིང་བརླིང་པའི་སྣེ་ཁྲིད་ཀྱི་ལས་དག་ནི། མི་རབས་རིམ་བརྒྱུད་ལ་མི་རིགས་གང་དེའི་སྒལ་གཞུང་དུ། བཞུགས་ཁྲི་ཐོག་དང་ཕོ་གཞུང་ཐོག་ཡིན་པའི་ལས་འབྲས་ཟ་མཁན་གྱི་ཆབ་སྲིད་པ་དག་གི་ཕྲག་སྟེང་ན་ཡོད་སྟབས། དེའི་ཕྱོགས་ཀྱི་འཐུས་ཤོར་དང་ནག་ཉེས་མཐའ་དག་ཀྱང་ནམ་ཞིག་གི་ཚེ་ན་ལོ་རྒྱུས་ཀྱིས་དམར་འདེད་བྱེད་ངེས་ཡིན་ལ།  དེ་དུས།  ལས་འབྲས་དཀར་ནག་གི་རྡེའུ་མང་ཉུང་ཡང་ལྷང་ལ་འབུད་ངེས་ཡིན།