རྒྱ་གཞུང་གིས་བོད་མིའི་སྐད་ཡིག་དང་རིག་གཞུང་རྩ་བརླག་གཏོང་ཆེད་ལྷ་སའི་སློབ་གྲྭ་ཁག་ཏུ་བོད་སྐད་ཡིག་སློབ་ཁྲིད་ཉུང་དུ་བཏང་ཡོད་པ་མ་ཟད། ལྷ་སའི་ས་གནས་གང་སར་གློག་གི་བརྙན་ཆས་བཙུགས་པ་དང་དམག་མི་འགྲེམས་འཇོག་གིས་ལྷ་ས་ལྒང་ཕུག་ལྟར་རིལ་རིལ་བཟོས་འདུག་ཅེས་བོད་ནས་འབྱོར་བའི་བོད་མི་ཞིག་གིས་བརྗོད་བྱུང་།
ཉེ་ལམ་གསར་འགོད་པས་དེ་སྔོན་ལྷ་སའི་མཐོ་འབྲིང་གསུམ་པའི་ནང་སློབ་གཉེར་བྱས་ཤིང་། ད་ལྟ་བཞུགས་སྒར་དབུས་སྣེ་ལེན་ཁང་དུ་འབྱོར་ཡོད་པའི་བོད་མི་ལྷག་པ་དོན་གྲུབ་དང་ཐུག་འཕྲད་ཀྱིས། ལྷ་སའི་བོད་རིགས་གཞོན་སྐྱེས་ཚོའི་བོད་མི་རིགས་ཀྱི་རིག་གཞུང་དང་སྐད་ཡིག་ལ་དོ་སྣང་དང་རྒྱུད་འཛིན་གྱི་གནས་སྟངས། ལྷ་སར་གནས་སྡོད་བོད་མིའི་དཀའ་ངལ་སོགས་ཀྱི་ཐད་རྒྱུས་ལོན་བྱས་པ་ཡིན། ལྷག་པ་ལགས་ཀྱིས་བརྗོད་ན། ཁོང་ནི་ལྷ་སའི་སེ་ར་དགོན་པའི་ཉེ་འཁྲིས་སུ་སྐྱེས་ཤིང་དེར་གནས་སྡོད་བྱེད་མཁན་ཞིག་ཡིན་པ་མ་ཟད། ཆུང་བའི་དུས་ནས་ལྷ་སར་སློབ་ཆུང་དང་སློབ་འབྲིང་བཅས་འགྲིམས་ཏེ། ཉེ་སྔོན་བར་ལྷ་སའི་མཐོ་འབྲིང་གསུམ་པའི་ནང་སློབ་སྦྱོང་བྱས་ཡོད་འདུག་ལ། ཁོང་འགྲོ་སའི་སློབ་གྲྭ་དེར་བོད་པའི་འཛིན་གྲྭ་ ༡༠ དང་རྒྱའི་འཛིན་གྲྭ་ ༣ བཅས་ཁྱོན་འཛིན་གྲྭ་ ༡༣ ཡོད་ཀྱང་། ཉེ་བའི་ལོ་ཤས་རིང་ནས་བཟུང་རྒྱ་གཞུང་གིས་སློབ་གྲྭའི་ནང་ལྷ་ས་ཁུལ་དང་མལ་གྲོལ་གུང་དཀར། སྟག་རྩེ། སྟོད་ལུང་། འཕན་པོ། གཞིས་ཀ་རྩེ་བཅས་ལྷ་སའི་ཐེམ་ཐོ་ཡོད་པའི་མི་མང་དང་ལས་བྱེད། རྒྱ་རིགས་ལས་བྱེད་བཅས་ཀྱི་ཕྲུ་གུ་ལས། ལྷ་སའི་ཐེམ་ཐོ་མེད་པའི་ཁམས་དང་ཨ་མདོའི་ཕྱོགས་ཀྱི་བོད་མི་ཚོང་པའི་བྱིས་པ་གཅིག་ཀྱང་བསྡུ་མི་ཆོག་པར་བཟོས་ཏེ། ཡུལ་ཕྱོགས་དེ་གཉིས་ཀྱི་ལྷ་སར་གནས་སྡོད་མཁན་བོད་པ་ཚོའི་ཕྲུ་གུ་སློབ་འཇུག་ཐད་དཀའ་ངལ་འཕྲད་ཀྱི་ཡོད་འདུག
དགེ་སློབ་ ༣༠༠༠ ཡས་མས་ཡོད་པའི་འཛིན་རིམ་བཅུ་གཉིས་བར་གྱི་སློབ་གྲྭ་དེར་བོད་ཡིག་དགེ་རྒན་ཡག་པོ་ཁག་ཅིག་ཡོད་སྟབས། ལྷ་སའི་ཉེ་ཁུལ་གྱི་སློབ་གྲྭའི་ཁྲོད་བོད་ཡིག་ཡག་ཤོས་སུ་ངོས་འཛིན་བྱེད་ཀྱི་ཡོད་ཀྱང་། སློབ་གྲྭའི་ནང་ནམ་རྒྱུན་བོད་ཡིག་སློབ་ཁྲིད་དེ་སྐད་ཡིག་གཉིས་པར་བཞག་ཏེ་སློབ་ཁྲིད་བྱེད་པ་དང་། ནམ་རྒྱུན་བོད་སྐད་ཡིག་གི་ལམ་ནས་རྩོམ་ཡིག་འགྲན་བསྡུར་དང་སྙན་ངག་གྱེར་འདོན་སོགས་བྱ་འགུལ་ཉུང་བ། སློབ་གྲྭའི་དཔེ་མཛོད་སོགས་སུ་རྒྱལ་གཅེས་སློབ་གསོ་དང་འབྲེལ་བའི་ཀློག་དེབ་དང་ལོ་རྒྱུས། རྣམ་ཐར། ལྷ་མོའི་འཁྲབ་གཞུང་སོགས་ཀློག་དེབ་རྣམ་གྲངས་ཁག་ཅིག་ལས་མེད་པ། སློབ་གྲྭ་སྤྱི་ཡོངས་སུ་བོད་རིགས་སློབ་མ་མང་པོ་ཡོད་ཀྱང་། སློབ་གྲྭའི་ནང་དགེ་སློབ་གཉིས་ཀྱིས་རྒྱ་སྐད་དང་རྒྱ་ཡིག་ལ་དོ་སྣང་ཆེན་པོ་ཡིན་པ་བཅས་ལ་བརྟེན། བོད་པའི་སློབ་མ་མང་ཆེ་བར་བོད་ཡིག་ལ་དོ་སྣང་དང་དགའ་སྣང་མེད་པར། ནམ་རྒྱུན་རྒྱ་ཡིག་དང་རྒྱ་སྐད་ཁོ་ནར་འབད་པ་བྱས་ཏེ། སློབ་གྲྭའི་ཁོར་ཡུག་དེ་རྒྱའི་སློབ་གྲྭ་ལྟ་བུ་ཞིག་ཏུ་གྱུར་ཡོད་སྐོར་དང་། དེ་བཞིན། ལྷ་སར་བོད་པ་གཞོན་སྐྱེས་མང་ཆེ་བའི་བོད་ཡིག་ལ་དོ་སྣང་དང་སློབ་སྦྱོང་བྱེད་ཀྱི་མེད་པའི་རྒྱུ་རྐྱེན་ཐད་ཁོང་གིས། “ ང་རང་གི་ངོས་ནས་དེའི་རྒྱུ་རྐྱེན་གཙོ་བོ་ལོ་མང་པོའི་སྔོན་ནས་བཟུང་རྒྱ་རིགས་མང་པོ་ལྷ་སར་གནས་སྤོར་གྱིས། བོད་ཀྱི་རྒྱལ་ས་ལྷ་ས་དེ་རྒྱའི་གྲོང་ཁྱེར་ལྟ་བུ་ཆགས་ཏེ། ད་ལྟའི་ཆར་ལྷ་སར་བོད་སྐད་བེད་སྤྱོད་མེད་པའི་གནས་སུ་གྱར་བཞིན་ཡོད་པ་དང་། ལྷག་པར་དུ་སློབ་གྲྭའི་ནང་དགེ་སློབ་གཉིས་ཀྱིས་རྒྱ་ཡིག་ལ་མཐོང་ཆེན་དང་རྒྱ་སྐད་བེད་སྤྱོད་བཏང་སྟེ། བོད་ཡིག་ལ་མཐོང་མ་སྤྲད་པ་སོགས་ཀྱི་དབང་གིས་གཞོན་སྐྱེས་མང་པོ་ཞིག་ལ་ཤུགས་རྐྱེན་ཐེབས་ཏེ། ད་ལྟ་ལྷ་སའི་གཞོན་སྐྱེས་མང་པོར་བོད་སྐད་བཤད་པར་ཐ་སྙད་ཀྱི་མི་འདང་བར་བོད་རིགས་ཕན་ཚུན་བར་རྒྱ་སྐད་རྒྱག་བཞིན་པའི་གནས་སུ་གྱར་ཡོད་པ་རེད། ” ཅེས་བརྗོད་བྱུང་།
ཡང་ལྷག་པ་ལགས་ཀྱིས་བརྗོད་དོན་ལྟར་ན། ཕྱི་ལོ་ ༢༠༠༨ ལོ་ནས་བཟུང་རྒྱ་གཞུང་གིས་ལྷ་སར་དམག་མི་འགྲེམས་འཇོག་གིས་དམ་དྲག་ཤུགས་ཆེན་བྱས་ཡོད་པ་མ་ཟད། འདི་ལོ་ལྷ་ལྡན་གཙུག་ལག་ཁང་གི་མདུན་དུ་རང་ལུས་མེར་བསྲེཊ་ཀྱི་གནས་ཚུལ་བྱུང་རྗེས་སྔར་ལས་ལྷག་པའི་དམ་དྲག་བྱས་ཏེ། ལྷ་སའི་བར་སྐོར་དང་པོ་ཏཱ་ལ། དེ་མིན་སེ་འབྲས་དགེ་གསུམ་བཅས་མཆོད་མཇལ་འགྲོ་སའི་དགོན་པ་དང་ལྷ་ཁང་ཡོངས་ཀྱི་སྒོ་ཁར་ཐེམ་ཐོ་ཞིབ་བཤེར་ཁང་བཙུགས་ཏེ་ཞིབ་བཤེར་ནན་མོ་བྱེད་ཀྱིན་པ་མ་ཟད། ཐ་ན་དྲ་ཁང་དང་རྩེད་མོ་རྩེད་སའི་ས་གནས་མང་པོར་ཐེམ་ཐོ་ལག་འཁྱེར་སྟོན་དགོས་པའི་གནས་སྟངས་ཆགས་ཡོད་འདུག་ལ། ད་ཆར་རྒྱ་གཞུང་གི་དམག་མི་དང་ཉེན་རྟོག་པ་མང་པོ་མི་སེར་དཀྱུས་མའི་གོན་པ་གོན་བཅུག་ཏེ་ལྟ་རྟོག་དང་། སློབ་གྲྭ་ཆེན་མོ་ཐོན་པའི་བོད་རིགས་སློབ་མ་མང་པོ་ལྟ་སྲུང་བར་བསྐོ་བཞག རླངས་འཁོར་ཁ་ལོ་བ་ཇ་ཁང་དང་ཟ་ཁང་ནང་ལས་ཀ་བྱེད་མཁན། ལྷམ་ཕྱིས་མཁན། གསང་སྤྱོད་བཀྲུས་མཁན་སོགས་ལས་རིགས་འདྲ་མིན་ནང་གསང་ཉུལ་བ་མང་པོ་བཞག་ཡོད་སྟབས། རང་དགར་དྲ་ལམ་ནས་བོད་དོན་དང་འབྲེལ་བའི་གནས་ཚུལ་ཐོས་པའམ་ཡང་ན་གྲོགས་པོ་སོགས་བརྒྱུད་དེ་གོ་བའི་བོད་དོན་གནས་ཚུལ་རིགས་བཤད་ཚེ་ལམ་སེང་འཛིན་བཟུང་བྱས་པ་སོགས་གང་བྱུང་སྐད་ཆ་འདྲ་མིན་བཤད་མི་ཕོད་པའི་གནས་སྟངས་ཆགས་བསྡད་ཡོད་པ་དང་། སློབ་གྲྭའི་ནང་ལ་མཚོན་ན་སློབ་མ་ཚོར་བོད་དོན་སྐོར་གྱི་སྐད་ཆ་བཤད་འདོད་དང་ཉན་འདོད། བོད་དོན་གྱི་གླུ་གཞས་གཏོང་འདོད་ཡོད་ཀྱང་། ད་ཆར་ལྷ་སར་ལྟ་རྟོག་བྱེད་མཁན་དང་གློག་གི་བརྙན་ཆས་སོགས་ཐབས་ལམ་འདྲ་མིན་གྱིས། བོད་མི་ཚོ་ལྒང་ཕུག་ལྟར་རྡོག་རྡོག་རིལ་རིལ་ཞིག་བཟོས་ཡོད་སྟབས། ཁོང་དང་ན་མཉམ་གཞོན་སྐྱེས་མང་པོ་ཕྱི་ཕྱོགས་སུ་ཡོང་སྟེ་སློབ་སྦྱོང་བྱ་འདོད་ཀྱི་འདུན་པ་ཡོད་པའི་སྐོར་སོགས་བརྗོད་བྱུང་།
ཁོང་ལ་ད་ལྟའི་ཆར་ལྷ་སའི་ཉེ་འཁོར་གྱི་རྒན་རབས་པ་དང་གཞོན་སྐྱེས་ཚོའི་འཚོ་བ་སྐྱེལ་སྟངས་དང་། གཞོན་སྐྱེས་ཁྲོད་བོད་དོན་ཐད་གླེང་སློང་གང་འདྲ་ཡོད་མེད། ཁོ་རང་གི་ངོས་ནས་བོད་ནང་རང་ལུས་མེར་བསྲེཊ་གནང་བའི་གནས་ཚུལ་རིམ་པ་གོ་ཡོད་མེད་སོགས་ཀྱི་ཐད་སྐད་ཆ་དྲིས་པར་ཁོང་གིས། “ ད་ལྟའི་ཆར་ལྷ་སའི་བོད་མི་ཚོས་ཁང་པ་རྣམས་རྒྱ་རིགས་དང་། ཁམས་དང་ཨ་མདོ་ནས་ཡོང་མཁན་གྱི་ཚོང་པ་ཚོར་གླ་བཏང་རྗེས། རྒན་པ་ཚོ་མང་ཆེ་བ་ནམ་རྒྱུན་སྐོར་བར་འགྲོ་རྒྱུ་དང་། ཇ་ཁང་དང་རྒྱན་ཁང་ནང་དུས་ཚོད་མང་ཆེ་བ་སྐྱེལ་གྱི་འདུག་ལ། གཞོན་སྐྱེས་ལོ་ཆུང་མང་ཆེ་བ་དྲ་ཁང་དང་རྩེད་ཁང་། གླུ་གར་ཁང་སོགས་སུ་དུས་ཚོད་གཏོང་བ་དང་། ནམ་རྒྱུན་གློག་ཀླད་དང་ལག་འཁྱེར་ཁ་པར། དེང་རབས་འཕྲུལ་ཆས་སོགས་ཀྱི་སྐོར་གླེང་བསྡད་ཡོད་པའི་ཚོར་སྣང་བྱུང་། ལྷག་པར་དུ་ལྷ་སར་གྲོང་ཁྱེར་གཞན་ལས་ལྷག་པའི་ཆང་ཁང་དང་གཞང་ཁང་མང་པོ་བཙུགས་ཡོད་པ་དེས་བོད་མི་མང་པོར་ན་ཚ་འདྲ་མིན་འགོས་བཞིན་པ་མ་ཟད། གཞོན་སྐྱེས་མང་པོ་འཕྲོ་བརླག་ཏུ་གཏོང་བཞིན་འདུག་ལ། ས་གནས་ཀྱི་ཁོར་ཡུག་ལ་གནོད་སྐྱོན་ཚབས་ཆེན་ཐེབས་བཞིན་འདུག རང་ལུས་མེར་བསྲེཊ་ཀྱི་གནས་ཚུལ་ཐད་ང་རང་གི་ངོས་ནས་ཁམས་དང་ཨ་མདོའི་ཕྱོགས་གནས་ཚུལ་ཕར་ཞོག ཐ་ན་ལྷ་སའི་མེར་བསྲེགས་ཀྱི་གནས་ཚུལ་ཡང་བལ་ཡུལ་སྣེ་ལེན་ཁང་ལ་བསླེབས་རྗེས་མ་གཏོགས་གོ་མ་བྱུང་། ”ཞེས་བརྗོད་བྱུང་།
མཇུག་མཐར་ཁོང་གིས། “ང་ལ་མཚོན་ན་འདིར་ཡོང་བའི་དམིགས་ཡུལ་དང་པོ་༸གོང་ས་མཆོག་ལ་མཇལ་ཁ་ཞུ་ཆེད་དང་། གཉིས་པ་དབྱིན་ཇི་ཡག་པོ་ཞིག་སྦྱངས་རྗེས། ངས་རྒྱ་ཡིག་ཏོག་ཙམ་ཤེས་པས་འདི་གར་ཞབས་ཞུ་ཏོག་ཙམ་བསྒྲུབ་ཐུབ་ན་བསམ་གྱི་ཡོད།” ཅེས་བརྗོད་བྱུང་།
གསར་འགོད་པ། དོན་གོ
་་་་་་ རང་ལུས་མེར་བསྲེཊ་ཀྱི་གནས་ཚུལ་ཐད་ང་རང་གི་ངོས་ནས་ཁམས་དང་ཨ་མདོའི་ཕྱོགས་གནས་ཚུལ་ཕར་ཞོག ཐ་ན་ལྷ་སའི་མེར་བསྲེགས་ཀྱི་གནས་ཚུལ་ཡང་བལ་ཡུལ་སྣེ་ལེན་ཁང་ལ་བསླེབས་རྗེས་མ་གཏོགས་གོ་མ་བྱུང་། ་་་་་་ཟེར།