སྨན་པའི་ལྷན་ཚོཊ་ཀྱི་དུས་དྲན་དང་རྒྱུན་ལས་གསར་འདེམས།

དེ་རིང་སྔ་དྲོར་ངྷ་ས་སྨན་རྩིས་ཁང་དུ་བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས་དབུ་བརྙེས་ཏེ་ལོ་ངོ་ ༩ འཁོར་བའི་དུས་དྲན་སྲུང་གཙི་གནང་བའི་ཐོག་སྐབས་བཞི་བའི་རྒྱུན་ལས་བསྐོ་བཞག་གནང་སོང་ཡང་། ཚོགས་གཙོ་གཞོན་དང་དྲུང་ཆེ་བསྐོ་བཞག་ཐུབ་མ་སོང་།

དེ་རིང་ཕྱི་ཚེས་ ༥ ཉིན་གྱི་སྔ་དྲོར་བཞུགས་སྒར་སྨན་རྩིས་མཐོ་སློབ་ཚོགས་ཁང་དུ་བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས་དབུ་བརྙེས་ཏེ་ལོ་ཧྲིལ་བོ་ ༩ འཁོར་བའི་དུས་དྲན་དང་། སྐབས་བཞི་བའི་སྨན་པའི་ལྷན་ཚོགས་ཀྱི་རྒྱུན་ལས་གསར་འདེམས་ཀྱི་མཛད་སྒོ་ཚོགས་ཡོད་ཅིང་།  མཛད་སྒོའི་སྐུ་མགྲོན་གཙོ་བོར་བོད་མིའི་སྒྲིག་འཛུགས་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གཙོས། སྐུའི་བླ་སྨན་པ་བགྲེས་པ་ཨམ་ཆི་རྟ་མགྲིན་མཆོག་དང་སྤྱི་འཐུས་རྒྱུན་ལས་རྣམ་པ། སྐུ་བཅར་བླ་སྨན་པ་དང་ཆེས་མཐོའི་སྨན་པའི་ལྷན་ཚོགས་ཀྱི་འཛིན་སྐྱོང་ཚོགས་མི་ཟུར་པ། དབུས་སྨན་རྩིས་ཁང་གི་འགན་འཛིན་དབུས་པའི་སྡེ་ཚན་ཁག་གི་འགན་འཛིན་དང་སྨན་པ། སྨན་པའི་ལྷན་ཚོགས་ཀྱི་འབྲེལ་མཐུད་པ་དང་དེབ་སྐྱེལ་ཚོགས་མི་བཅས་འདུ་འཛོམས་བྱུང་འདུག

སྐུ་མགྲོན་གཙོ་བོ་མཆོག་ནས་སྣང་གསལ་མར་མེ་ཞལ་དབྱེ་དང་ཚོགས་ཞུགས་པ་ཚང་མས་གཡུ་ཐོག་གསོལ་འདེབས་གསུང་འདོན། སྐུ་མགྲོན་གཙོ་བོ་མཆོག་ནས་སྐུའི་བླ་སྨན་ཟུར་པ་རྔོག་རིགས་དགེ་སློང་ཡེ་ཤེས་དོན་ལྡན་མཆོག་གི་སྨན་སྦྱོར་ཁང་དེབ་སྐྱེལ་ཕྱག་འཁྱེར་དང་། སྐབས་གསུམ་པའི་སྨན་པའི་ལྷན་ཚོགས་ཀྱི་ཚོགས་མི་རྣམས་ལ་ཆེ་བསྟོད་ཕྱག་འཁྱེར་བཅས་ཕུལ་རྗེས། སྨན་པའི་ལྷན་ཚོགས་ཀྱི་འོས་བསྡུ་ཚོགས་ཆུང་གི་ཚོགས་གཙོ་མཆོག་ནས་སྐབས་བཞི་བའི་རྒྱུན་ལས་ཀྱི་མཚན་ཐོ་གསལ་བསྒྲགས་གནང་སོང་།  

དེའི་རྗེས་ཆེས་མཐོའི་སྨན་པའི་ལྷན་ཚོགས་ཀྱི་ཚོགས་གཙོ་ཚེ་རིང་ཐག་གཅོད་ལགས་ཀྱིས་ཕྱི་ལོ་ ༢༠༠༤ ལོའི་ཕྱི་ཟླ་ ༡ ཚེས་ ༥ ཉིན་བོད་མི་མང་སྤྱི་འཐུས་ལྷན་ཚོགས་ཀྱིས་ཁྲིམས་སྒྲིག་གཏན་འབེབས་དང་༸གོང་ས་མཆོག་གི་ཕྱག་རྟགས་ཕབ་པ་ལྟར། བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས་གསར་འཛུགས་གནང་བ་ནས་ད་ལྟའི་བར་གྱི་ཚོགས་མིའི་ཡོངས་ཁུངས་དང་། དེབ་སྐྱེལ་བྱས་པའི་ཚོགས་མི་དང་སྨན་ཁང་། མཐོི་སློབ་ཁག སྨན་པ་དཀའ་བཅུ་བ་དང་བསྡུས་ར་བའི་སློབ་ཚན་གཏན་འབེབས། རྒྱུན་ལས་རིམ་པའི་རྩིས་སྤྲོད་རྩིས་ལེན་གྱི་བརྒྱུད་རིམ་བཅས་ངོ་སྤྲོད་གནང་སོང་།

སྨན་པའི་ལྷན་ཚོགས་ཀྱི་དྲུང་ཆེ་སྨན་པ་བསོད་ནམས་རིན་ཆེན་ལགས་ཀྱིས་ཕྱི་ལོ་ ༢༠༡༠ ལོ་ནས་ ༢༠༡༢ ལོའི་སྐབས་གསུམ་པའི་རྒྱུན་ལས་ཀྱི་ལས་སྡོམ་ངོ་སྤྲོད་གནང་བ་ལྟར་ན།  ༢༠༠༩ ཟླ་ ༩ པའི་ཚེས་ ༡༠ ཉིན་རྒྱ་གར་དབུས་གཞུང་བཀའ་ཤག་ལྷན་ཚོགས་ནས་བོད་ཀྱི་གསོ་བ་རིག་པ་ཁྲིམས་མཐུན་ངོས་འཛིན་དགོས་པའི་ཁྲིམས་ཡིག་བསྐྱར་བཅོས་ལ་ངོས་ལེན་རྒྱབ་གཉེར་གནང་འདུག་ལ། གྲོས་ཚོགས་ཀྱི་མཐའ་མའི་ངོས་བཞེས་ཡོང་ཆེད་ ༢༠༡༠ ཟླ་ ༨ པའི་ཚེས་ ༢༥ ཉིན་གྲོས་ཚོགས་གོང་མའི་རཱ་ཇི་ས་བྷར་ནང་གྲོས་འཆར་བཏོན་སྟེ་ཚོགས་མི་རྣམས་ཀྱིས་སྤྱི་མོས་རྒྱབ་སྐྱོར་དང་། ལོ་དེའི་ཕྱི་ཟླ་ ༨ པའི་ཚེས་ ༣༠ ཉིན་གྲོས་ཚོགས་ཀྱིས་བཏོན་པའི་གྲོས་གཞི་ལ་རྒྱ་གར་ཚོགས་མི་རྣམ་པས་ལྷན་ཚོགས་ཀྱི་ཁྲིམས་ཡིག་དོན་ཚན་གཉིས་པ་དང་གསུམ་པ། དགུ་བ། བཅུ་བདུན་བཅས་ལ་བསྐྱར་བཅོས་ཀྱིས་སྤྱི་མོས་རྒྱབ་སྐྱོར་འོག་བོད་ཀྱི་གསོ་བ་རིག་པ་ངོས་བཞེས་གནང་ཡོད་འདུག

དེ་བཞིན། བོད་མིའི་སྒྲིག་འཛུགས་ཀྱི་ཁྲིམས་སྒྲིག་བསྐྱར་བཅོས་སྐབས། བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས་ཀྱི་ཁྲིམས་སྒྲིག་དང་། སྨན་པ་དེབ་སྐྱེལ་དང་གསོ་རིག་ངོས་ལེན། སྨན་པ་ངོས་ལེན་བྱེད་ཕྱོགས་སྒྲིག་གཞི་བསྐྱར་བཅོས་དང་ཁྲིམས་ཡིག་གཏན་འབེབས་གནང་བ་མ་ཟད། ལྷན་ཚོགས་ཀྱིས་སྒྲིག་གཞི་ལྟར་སྨན་ཁང་དང་སློབ་གཉེར་ཁང་། སྨན་སྦྱོར་ཁང་།  སྨན་པ་བཅས་ངོས་ལེན་དེབ་སྐྱེལ་དང་ཕྱག་འཁྱེར་སྤྱོད་པ་སོགས་ཀྱི་ལས་འགུལ་མང་པོ་ཞིག་སྤེལ་ཡོད་འདུག

ཚོགས་པའི་ལོ་གསུམ་གྱི་རྩིས་ཁྲའི་བྱུང་སོང་ཁག་ནི།  ཕྱི་ལོ་ ༢༠༡༠ ལོར་བྱུང་དངུལ་ཁྱོན་སྒོར་ ༦༦༨༨༩༣  དང་། སོང་དངུལ་སྒོར་ ༩༦༡༠༦༩ དང་པེ་ ༤༠། ༢༠༡༡ ལོར་བྱུང་དངུལ་སྒོར་ ༡༦༥༣༠༡༥།༥༠ དང་། སོང་དངུལ་སྒོར་༨༨༡༩༥༧ །༧༦ ཡིན་འདུག ༢༠༡༢  ལོར་བྱུང་དངུལ་སྒོར་ ༢༤༡༦༩༨༦ དང་པེ་ ༦༨ དང་སོང་དངུལ་སྒོར་ ༩༥༡༩༣༦།༩༨ བཅས་ཡིན་འདུག་ལ།  ད་ཡོད་དངུལ་སྦྱོར་སྒོར་ ༢༤༡༠༦༥།༢༩ དང་། ལག་ཡོད་ ༢༥༠༠༠ བཅས་ཡིན་འདུག

དེའི་རྗེས་སྐུ་མགྲོན་གཙོ་བོ་འཕྲོད་བསྟེན་བཀའ་བློན་མཆོག་གིས། བོད་ཀྱི་གསོ་བ་རིག་པ་དེ་བོད་རང་གི་ཐུན་མོང་མ་ཡིན་པའི་རིག་གཞུང་གི་ཆ་ཤས་གལ་ཆེན་ཞིག་ཆགས་ཡོད་པ་ལྟར། ཆེས་མཐོའི་སྨན་པའི་ལྷན་ཚོགས་ཀྱིས་བཙན་བྱོལ་ནང་སྨན་པ་དང་སྨོན་སྦྱོར་ཁང་ལ་དེབ་སྐྱེལ་གྱི་ལག་འཁྱེར་འབུལ་བ་དང་། ཟབ་སྦྱོང་དང་ཚོགས་ཆེན་རིམ་པ་གོ་སྒྲིག་གནང་བའི་ཐད་འཕྲོད་བསྟེན་ལས་ཁུངས་ཀྱིོས་ཕྱག་ལས་ཡག་པོ་གནང་ཡོད་པའི་ངོས་འཛིན་གནང་བའི་ཐོག  གནད་དོན་རིམ་པའི་ཐོག་བཀའ་ཤག་སྙན་སེང་ཞུ་རྒྱུ་ཡིན་པའི་ཁས་ལེན་གནང་སོང་ལ། ལྷན་ཚོགས་དེ་གྲོས་ཚོགས་ཀྱིས་གྲོས་ཆོད་བཞག་ཏེ་གསར་འཛུགས་གནང་བ་ཞིག་ཡིན་སྟབས། མ་འོངས་པར་ཕྱི་གསལ་ནང་གསལ་གྱི་ཐོག་འབད་བརྩོན་བྱ་རྒྱུ་དང་། བོད་ཀྱི་གསོ་བ་རིག་པའི་མིང་འཁུར་ཏེ་གསོ་བ་རིག་པར་མཚན་ཤས་འགྲོ་བའི་ལས་དོན་ཁག་ལ་གདོང་ལེན་དང་འབད་བརྩོན་བྱ་དགོས་པའི་སྐོར་གསུངས་སོང་།

ཐེངས་འདིར་འོས་བསྡུའི་ལམ་ནས་འདེམས་ཐོན་བྱུང་བའི་བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས་ཀྱི་སྐབས་བཞི་བའི་རྒྱུན་དག་ནི། སྨན་རམས་པ་ཚེ་དབང་རྟ་མགྲིན་དང་སྨན་རམས་པ་ངག་དབང་བཟོད་པ། སྨན་རམས་པ་ཚེ་བརྟན་ནོར་བུ། སྨན་པ་བློ་བཟང་ཡེ་ཤེས། ཝ་ནཱའི་སྨན་དགེ་བློ་བཟང་བསྟན་འཛིན། སྨན་པ་སྐལ་བཟང་དོན་ལྡན། སྨན་པ་བསོད་ནམས་ཕུན་ཚོགས། སྨན་པ་ཐོགས་མེད། སྨན་པ་ཚེ་རིང་མཚམས་གཅོད། སྨན་པ་བློ་གྲོས་ཕུན་ཚོགས་བཅས་བསྐོ་བཞག་གནང་ཡོད་ཀྱང་། སྨན་རྩིས་ཁང་གི་སྒྲིག་ཁོངས་སུ་ཡོད་པའི་སྨན་པ་དང་ལས་བྱེད་ཁག་རྒྱུན་ལས་ཁོངས་སུ་འཛུལ་བར་ལས་ཀའི་དཀའ་ངལ་དང་། འོས་བསྡུའི་སྒྲིག་གཞི་ཁ་གསལ་མིན་སོགས་ཀྱི་དབང་གིས་ཚོགས་གཙོ་དང་དྲུང་ཆེ་བསྐོ་བཞག་གནང་རྒྱུ་ཕྱིར་འགྱངས་བྱེད་དགོས་བྱུང་ཡོད་པ་དང་། དེའི་ཐད་འཕྲོད་བསྟེན་བཀའ་བློན་མཆོག་གིས་བཀའ་ཤག་ལ་སྙན་སེང་ཞུས་རྗེས་བསྐྱར་ཞིབ་གནང་རྒྱུ་ཡིན་སྐོར་གསུངས་སོང་།

གསར་འགོད་པ། དོན་གོ