གཟའ་ཕུར་བུའི་ཉིན་པཱ་ཀི་སི་ཐན་ནང་འགད་རྫས་ཐེངས་བཞི་གཏོར་ཏེ། མི་ ༡༡༦ དམར་གསོད་དང་མི་ ༢༣༥ ལ་རྨས་སྐྱོན་བཟོས་འདུག
ཁ་སང་ཕྱི་ཚེས་ ༡༠ ཉིན་རྒྱབ་པཱ་ཀི་སི་ཐན་གྱི་བྷལ་ལོ་ཆཱེ་སི་ཊན་མངའ་སྡེའི་རྒྱལ་ས་ཁཱའོ་ཊ་(Quetta) ཡི་དམག་མིའི་ཞིབ་བཤེར་རྟེན་གཞི་ཞིག་ལ་འགད་རྫས་གཏོར་ཏེ། ཞིབ་བཤེར་མི་སྣ་ཚུད་པའི་མི་ ༡༢ དམར་གསོད་དང་མི་ ༥༠ ཙམ་ལ་རྨས་སྐྱོན་བཟོས་ཡོད་ཅིང་། འགད་རྫས་གཏོར་ཤུལ་གྱི་ས་དོང་གི་གཏིང་ཚད་ལ་ཧྥེ་ཊི་(Feet) གཉིས་དང་ཁ་ཞེང་ལ་ཧྥེ་ཊི་བརྒྱད་ཙམ་ཡོད་འདུག་ལ། མཐའ་འཁོར་གྱི་རླངས་འཁོར་ ༡༣ ཙམ་གཏོར་བརླག་བཟོས་ཡོད་པ་མ་ཟད། ཉེ་འགྲམ་ཁུལ་གྱི་ཚོང་ཁང་དང་ལས་ཁུངས། སྡོད་ཁང་མང་པོར་གཏོར་སྐྱོན་ཕོག་ཡོད་འདུག
གོང་གི་དོན་རྐྱེན་དེ་བྱུང་ནས་ཆུ་ཚོད་གཉིས་ཙམ་གྱི་རྗེས་སུ་པཱ་ཀི་སི་ཐན་གྱི་ནུབ་བྱང་ཁཱེ་བྷར་པཀ་ཊུན་ཝ་མངའ་སྡེ་ཡི་མེན་གྷོ་རཱ་(Mingora) ས་ཁུལ་གྱི་ཆོས་ཚོགས་བསྟི་གནས་ཁང་ཞིག་ཏུ་འགད་རྫས་གཏོར་ཏེ། མི་ ༢༢ དམར་གསོད་དང་མི་ ༦༥ ཙམ་ལ་རྨས་སྐྱོན་བཟོས་འདུག
ཆོས་ཚོགས་བསྟི་གནང་ཁང་གི་དོན་རྐྱེན་བྱུང་ནས་ཆུ་ཚོད་གསུམ་ཡས་མས་སུ་ཡང་བསྐྱར་ཁཱའོ་ཊ་རུ་བསྟུད་མར་འགད་རྫས་གཉིས་གཏོར་ཡོད་ཅིང་། དང་པོ་དེ་སི་ནོ་ཀཱར་(Snooker) རྩེད་འཇོ་ཁང་ཞིག་ཏུ་དྲག་རྒོལ་བས་རང་ཉིད་དང་ལྷན་དུ་འགད་རྫས་གཏོར་སྐབས། ཉེན་རྟོག་པ་དང་མྱུར་སྐྱོབ་རུ་ཁག གསར་འགོད་པ་སོགས་དོན་རྐྱེན་བྱུང་ཡུལ་དུ་འབྱོར་འཕྲད། རྩེད་འཇོ་ཁང་དེའི་ཉེ་འཁྲིས་སུ་སྔ་ས་ནས་རང་འཐོར་འགད་རྫས་ཤིག་བཞག་ཡོད་པ་འཐོར་ཏེ། ཉེན་རྟོག་པ་ ༩ དང་མྱུར་སྐྱོབ་རུ་ཁག་གི་མི་སྣ་ ༢༥ ། གསར་འགོད་པ་གཉིས་བཅས་ཚུད་པའི་མི་ ༨༡ རྐྱེན་ལམ་དུ་ཤོར་པ་དང་། མི་ ༡༢༡ ཙམ་ལ་རྨས་སྐྱོན་བཟོས་ཡོད་འདུག་ལ། ཚོད་དཔག་བྱས་པ་ལྟར་ན་རང་འཐོར་འགད་རྫས་དེ་སྤྱི་རྒྱ་(kg) ༡༠༠ ཙམ་ཡོད་འདུག
འགད་རྫས་དོན་རྐྱེན་དེ་དག་གི་རྒྱབ་ཏུ་དེ་སྔོན་གཞུང་གིས་བཀག་སྡོམ་བྱས་པའི་སོ་ནེ་ཁ་ཆེ་མཁྲེགས་འཛིན་ཤོག་ཁག་ལཱ་ཤཱི་ཀཱར་ཨི་ཇཱང་ཝེ་(Lashkar-e-Jhangvi) ཟེར་པ་དེ་ཡོད་འདུག
གསར་འགོད་པ། བནྡེ་སྐྱབས།
