དེ་རིང་ཕྱི་ཚེས་ ༢༣ ཉིན་གྱི་སྔ་དྲོའི་ཆུ་ཚོད་ ༡༠ ཡས་མས་སུ། བཞུགས་སྒར་ཉེ་འཁྲིས་ནོར་གླིང་དུ་རྡ་ས་ས་གནས་མགོ་འཛིན་གྱི་ཡན་ལག་ལས་ཁུངས་དབུ་འབྱེད་ཀྱི་མཛད་སྒོ་ཞིག་ཚོགས་སོང་ལ། མཛད་སྒོ་དེར་ངྷ་ས་གནས་མགོ་འཛིན་བསོད་ནམས་རྡོ་རྗེ་ལགས་དང་། སི་ཏེ་པུར་( SIDHPUR) ས་གནས་ཀྱི་བརྒྱ་དཔོན་ལྕམ་ཨོའུ་ཞི་ཤར་མ་གཙོས་པའི་ས་གནས་རྒྱུན་ལས་དང་། བོད་མི་མང་སྤྱི་འཐུས་ཟུར་པ་དང་སྙིང་སྟོབས་གླིང་གི་འགན་འཛིན་ངག་དབང་ལྷ་མོ་ལགས། བོད་མིའི་སྒྲིག་འཛུགས་འོས་བསྡུའི་འགན་འཛིན་ལས་རོགས་ཟུར་པ་དང་བཙུན་དགོན་སྒྲོལ་མ་གླིང་གི་སློབ་སྤྱི་དགེ་བཤེས་རིག་འཛིན་ཆོས་གྲགས་ལགས། དབུས་སྣེ་ལེན་ཁང་དང་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་སྐུ་ཚབ། རྒྱུ་སྟོད་གྲྭ་ཚང་གི་ཕྱག་མཛོད་གཙོས་པའི་དགེ་འདུན་པ། ནོར་གླིང་གནས་སྡོད་སེར་སྐྱ་མི་མང་བཅས་མི་ ༡༠༠ ལྷག་འདུ་འཛོམས་བྱུང་འདུག
མཛད་སྒོའི་ཐོག་མར་རྒྱུད་སྟོད་གྲྭ་ཚང་གི་ཕྱག་མཛོད་གཙོས་པའི་དགེ་འདུན་པ་རྣམས་ཀྱིས་ས་གནས་ཡན་ལག་ལས་ཁུངས་ལ་རབ་གནས་དང་། ཕྱག་མཛོད་མཆོག་གིས་ལས་ཁུངས་དབུ་འབྱེད་གནང་རྗེས། སྒྲོལ་མ་གླིང་གི་སློབ་སྤྱི་དང་སྙིང་སྟོབས་གླིང་གི་འགན་འཛིན་བཅས་ཀྱིས་ལོ་མང་རིང་ནོར་གླིང་གནས་སྡོད་བོད་མི་ཚོར་འཕྲད་བཞིན་པའི་དཀའ་ངལ་དང་། བོད་མིའི་སྒྲིག་འཛུགས་ཀྱི་ལས་ཁུངས་ཁག་ལ་ས་གནས་ཡན་ལག་ལས་ཁུངས་གསར་འཛུགས་ཆེད་རེ་སྐུལ་ཞུས་པའི་བརྒྱུད་རིམ་སོགས་ཀྱི་ཐད་ནས་གཏམ་བཤད་དང་། ས་གནས་མགོ་འཛིན་བསོད་ནམས་རྡོ་རྗེ་མཆོག་གིས་ས་གནས་ཡན་ལག་ལས་ཁུངས་གསར་འཛུགས་ཀྱི་དམིགས་ཡུལ་དང་། མ་འོངས་པའི་ལས་དོན་བྱེད་ཕྱོགས་སྐོར་གྱི་གཏམ་བཤད་བཅས་གནང་སོང་།
ས་གནས་མགོ་འཛིན་མཆོག་གིས་ངོ་སྤྲོད་གནང་བ་ལྟར་ན། ཐེངས་འདིར་བཞུགས་སྒར་ཉེ་མཁྲིས་ནོར་གླིང་དུ་རྡ་ས་གནས་ཡན་ལག་ལས་ཁུངས་གསར་འཛུགས་གནང་དགོས་པའི་དམིགས་ཡུལ་གཙོ་བོ། ད་ལྟའི་བར་ནོར་གླིང་ཉེ་མཁྲིས་ཀྱི་རྒན་འཁོགས་གཙོས་པའི་བོད་མི་མང་པོ་ཞིག བདེ་དོན་ལས་ཁུངས་ཀྱི་རྒྱབ་གཉེར་དང་འབྲེལ་བའི་ལས་དོན་ཁག་གི་ཐད་དུས་ཚོད་དང་འགྲོ་སོང་མང་པོ་བཏང་སྟེ་རྡ་རམ་ས་ལར་འགྲོ་དགོས་པའི་དཀའ་ངལ་འཕྲད་ཀྱིན་པའི་གནས་སྟངས་དང་། ས་གནས་ཀྱི་ཉམ་ཐག་ལ་ཞིབ་འཇུག་དང་ས་གནས་ཕྲུ་གུ་སློབ་གྲྭར་གཏོང་ལེན་ཐད་རྒྱབ་གཉེར་སྤྲོད་རྒྱུ། དངུལ་ཁང་དང་རཱ་ཤིན་
ཀཱ་ཊི་སོགས་ཀྱི་དཀའ་ངལ། ས་གནས་མི་མང་གི་བདེ་སྡུག་ལ་གཟིགས་ཞིབ། དུས་ལྟར་མི་མང་ལ་བོད་མིའི་སྒྲིག་འཛུགས་ཀྱི་ལས་གཞི་དང་གསལ་བསྒྲགས་ཁྱབ་སྤེལ་བཅས་ལ་དམིགས་པ་ཞིག་ཡིན་འདུག
ད་ལྟའི་ཆར་ཡན་ལག་ལས་ཁུངས་འདིའི་ཁྱབ་ཁོངས་སུ་གྷོ་པ་པུར་བོད་ཁྱིམ་དང་ཅཱ་མོན་ཊ། རྒྱུད་སྟོད། ནོར་གླིང་རིག་གཞུང་གཅེས་སྐྱོང་ཁང་། སྒྲོལ་མ་གླིང་། འཆི་མེད་དགའ་ཚལ་གླིང་། སྙིང་སྟོབས་གླིང་། ཤེས་རབ་དགའ་ཚལ་སློབ་གླིང་བཅས་དང་། ས་གནས་ཁ་འཐོར་མི་དམངས་བཅས་ཁྱོན་མི་འབོར་ ༥༠༠༠ ལྷག་ཡོད་འདུག་ལ། དེ་རིང་ནས་བཟུང་བདུན་ཕྲག་རེའི་གཟའ་ལྷག་པའི་ཆུ་ཚོད་ ༩།༠༠ ནས་ ༥།༠༠ བར་ས་གནས་མགོ་འཛིན་ལགས་ལས་ཁུངས་སུ་ཕེབས་ཏེ་ཕྱག་ལས་གནང་རྒྱུ་དང་། གཟའ་ལྷག་པ་གུང་གསེང་ཡིན་ཚེ་གཟའ་ཕུར་བའི་ཉིན་ས་གནས་མགོ་འཛིན་དང་དྲུང་གཞོན་ལས་རོགས་བརྗེ་བསྒྱུར་གྱིས་ཕྱག་ལས་གནང་སྟེ། ས་གནས་མི་མང་ལ་རྒྱབ་གཉེར་མཚོན་པའི་ལས་དོན་དང་ལམ་སྟོན་སོགས་གནང་རྒྱུ་ཡིན་འདུག་ལ། ཟླ་གཅིག་རིང་ཞིབ་འཇུག་བྱས་རྗེས་གཏན་འཇགས་ལས་བྱེད་བསྐོ་འཇོག་བྱ་འཆར་ཡོད་པ་མ་ཟད། ད་ཆར་ནོར་གླིང་ཉེ་འཁྲིས་སུ་འབྲེལ་མཐུད་པ་གསར་འཛུགས་ཀྱི་ཆ་རྐྱེན་ཚང་ཡོད་པ་ལྟར། མ་འོངས་པར་རིམ་པས་འབྲེལ་མཐུད་པ་བསྐོ་བཞག་གནང་ཐབས་ལ་འབད་བརྩོན་གནང་འཆར་ཡོད་འདུག
གསར་འགོད་པ། དོན་གོ
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
མེག་གྷན་གྱི་ས་གནས་དབུ་འཛིན་བསོད་ནམ་རྡོ་རྗེ་ལགས་ལྟའུ་ཡིན་ན་གང་ཡང་ཕན་པ་མིན་འདུག་སྙམ། གང་ཡིན་ཟེར་ན་དེ་སྔོན་སྙིང་སྟོབས་གླིང་གི་ལས་བྱེད་ཞིག་གི་སྙིང་སྟོབས་གླིང་གི་དབུ་འཛིན་ངག་དབང་ལྷ་མོ་གྱིས་སྙིང་སྟོབས་གླིང་དུ་དྲང་པོ་རྩ་བ་ནས་བྱེད་ཀྱི་མེད་ཚུལ་དང་གནས་ཚུལ་དེའི་ཐོག་ས་གནས་འགན་འཛིན་མཆོག་ལ་སྙན་ཞུ་ཞིག་དེ་སྔོན་ ༡༣/༡༡/༢༠༡༢ ཉིན་འབུལ་འདུག་ན། ལས་བྱེད་དེ་ལ་ད་བར་རྡ་ས་ས་གནས་མགོ་འཛིན་བསོད་ནམ་རྡོ་རྗེ་ལགས་ནས་ཕྱག་རོག་གང་ཡང་གནང་མིན་འདུག
དེར་སོང་མགོ་འཛིན་ཡིན་ཕྱིན་མི་མང་གི་གང་ཞུས་ཐོག་ཞིབ་འཇུག་དང་དྲང་པོ་ངེས་པར་དུ་གནང་དགོས།
སྤྱིར་བཏང་ཡིན་ན་ཡག་པོ་རེད་ཡིན་ནའང་ལས་ཀ་སྤོས་དག་པོ་ཞིག་བྱེད་དགོས་པ་གལ་ཆེན་རེད་བསམ།