རྒྱ་གར་དམངས་གཙོ་ཉིན་མོ་སྲུང་གཙི།

དེ་རིང་ཕྱི་ཚེས་ ༢༦ ཉིན་གྱི་ཞོགས་པའི་ཆུ་ཚོད་ ༩།༠༠ པའི་སྟེང་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་གཙོས་པའི་ཕྱག་རོགས་བཀའ་བློན་རྣམ་པ་དང་། ལྷན་ཁང་ཁག་གི་དྲུང་འཕར་དང་དྲུང་ཆེ་རྣམ་པ། བཀའ་དྲུང་ཡིག་ཚང་གི་སྲི་ཞུ་ལས་བྱེད་བཅས་དབུས་བོད་མིའི་སྒྲིག་འཛུགས་བཀག་ཤག་མདུན་ཐང་དུ་འདུ་འཛོམས་ཀྱིས། རྒྱལ་གར་གྱི་རྒྱལ་གླུ་གྱེར་འདོན་དང་སྲིད་སྐྱོང་མཆོག་གིས་རྒྱ་གར་གྱི་རྒྱལ་དར་བསྒྲེངས་འཛུགས་བཅས་གནང་སྟེ། རྒྱ་གར་གྱི་དམངས་གཙོ་དབུ་བརྙེས་ཏེ་མི་ལོ་ ༦༤ འཁོར་བའི་དུས་དྲན་ཉིན་མོ་ (Republic Day) སྲུང་གཙི་གནང་སོང་།

དུས་དྲན་མཛད་སྒོའི་ཐོག་སྲིད་སྐྱོང་བློ་བཟང་སེང་གེ་མཆོག་གིས་གསར་འགོད་པ་ཚོར། “ ང་ཚོས་ནམ་རྒྱུན་ཞུ་བསྡད་ཀྱིན་པ་ལྟར། རྒྱ་གར་གཞུང་མང་གཉིས་ཀ་བོད་མི་ཚོར་བཀའ་དྲིན་ཆེན་ཆེ་ཤོས་དེ་ཆགས་ཡོད། བོད་མིའི་མི་འབོར་མང་ཤོས་དང་བོད་མིའི་སྒྲིག་འཛུགས་བཅས་རྒྱ་གར་ནང་ཡོད་པ་ལྟར། ད་ལྟའི་བར་རྒྱ་གར་གཞུང་མང་གཉིས་ཀྱིས་རྒྱབ་སྐྱོར་དང་མཐུན་འགྱུར་གནང་བ་ལ་བརྟེན་ནས་ང་ཚོ་མི་ལོ་ ༥༠ ལྷག་གི་རིང་གནས་ཐུབ་པ་བྱུང་སྟབས། ང་རང་གི་ངོས་ནས་སྙིང་ཐག་པ་ནས་ཐུགས་རྗེ་ཆེ་ཞུ་བ་ཡིན་ལ། དམིགས་བསལ་ངས་སྲིད་སྐྱོང་གི་འགན་འཁུར་བ་ནས་ཚོར་བ་གཅིག་པུ་མིན་པར། ཉམས་མྱོང་གི་ཐོག་ནས་རྒྱ་གར་གཞུང་གི་མགོ་ཁྲིད་དང་ལས་བྱེད་རྣམ་པས་བོད་མི་རིགས་ལ་བརྩེ་བ་དང་བོད་ཀྱི་རྩ་དོན་ལ་རྒྱབ་སྐྱོར་ཡོད་པ་གསལ་བོ་རེད།  དུས་རྟག་ཏུ་རྒྱ་གར་གྱི་འབྲེལ་ཡོད་ལས་ཁུངས་མང་པོ་བཅར་སྐབས་ཁོང་རྣམ་པས་མཐུན་འགྱུར་དང་རྒྱབ་སྐྱོར་གང་ཐུབ་གནང་བར་བརྟེན། བསྐྱར་དུ་གཞུང་མང་གཉིས་ལ་བཀའ་དྲིན་ཆེ་ཞུ་བ་ཡིན། ”ཞེས་གསུངས་བྱུང་།

དེ་རིང་ཕྱི་དྲོ་ནས་ཉིན་གཉིས་རིང་སྲིད་སྐྱོང་བློ་བཟང་སེང་གེ་མཆོག་གིས། བོད་སློབ་འཛིན་སྐྱོང་ཚོགས་པའི་ཚོགས་གཙོ་ཟུར་པ་ཨ་པུར་ཝ་ཅན་ངྷིར་མཆོག་གིས་ད་ལྟའི་བར་དབུས་བོད་སློབ་འཛིན་ཚོགས་ཀྱི་སློབ་གྲྭ་ཁག་གི་འཛིན་སྐྱོང་དང་བོད་དོན་ལ་རྒྱབ་སྐྱོར་གནང་བར་ཐུགས་རྗེ་ལེགས་འབུལ་ཆེད། ཁོང་ལ་བོད་ཀྱི་ཟློས་གར་བཅར་འབུལ་སོགས་ཀྱི་ལས་རིམ་ནང་མཉམ་ཞུགས་གནང་རྒྱུ་ཡིན་འདུག་ལ།  ཟླ་འདིའི་ཕྱི་ཚེས་ ༢༨ ཉིན་ནས་ཕྱི་ཟླ་ ༣ པའི་ཚེས་ ༢ བར་ལྡི་ལི་དང་གནས་མཆོག་རྡོ་རྗེ་གདན། བྱང་ཨ་རི། ཁེ་ན་ཌ་བཅས་སུ་གཞུང་འབྲེལ་ཕྱོགས་ཕེབས་གནང་རྒྱུ་ཡིན་འདུག

གསར་འགོད་པ། དོན་གོ