ཕྱི་ཟླ་ ༣ པའི་ནང་༸གོང་ས་མཆོག་འབྲས་ལྗོངས་སུ་ཆིབས་བསྒྱུར་གྱིས་སྟོན་པའི་སྐུ་བརྙན་ཞིག་ལ་རབ་གནས་དང་། ཁུལ་དེར་གསར་བསྐྲུན་བྱས་པའི་ནང་པའི་སྤྱི་གླིང་ཞིག་དབུ་འབྱེད་གནང་རྒྱུ་རེད།
ཉེ་ལམ་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་གསལ་ལ། ད་ལོའི་ཕྱི་ཟླ་ ༣ པའི་ཚེས་ ༢༦ ཉིན་༸གོང་ས་མཆོག་འབྲས་ལྗོངས་སུ་ཆིབས་བསྒྱུར་གྱིས། ཁུལ་དེར་གསར་བཞེངས་བྱས་པའི་མཐོ་ཚད་ཕི་ཀྲི་ ༡༣༥ ཙམ་ཡོད་པའི་སྟོན་པའི་སྐུ་བརྙན་ཞིག་ལ་རབ་གནས་མཛད་རྒྱུ་ཡིན་པར་མ་ཟད། ཡུལ་དེའི་རཱ་བང་ལ་ཞེས་པའི་ས་གནས་སུ་ཡུལ་སྐོར་སྤྲོ་འཆམ་པར་དམིགས་ཏེ་འཛུགས་སྐྲུན་བྱས་པའི་༼ནང་པའི་སྤྱི་གླིང་༽ཞེས་པ་ཞིག་ཀྱང་དབུ་འབྱེད་གནང་རྒྱུ་ཡིན་འདུག་ལ། ཐེངས་འདིའི་ཆིབས་བསྒྱུར་གྱི་སྐབས་དང་བསྟུན་ལྷོ་ཨ་ཧྥི་རི་ཀའི་ཡུལ་གྲུ་ཁག་ཅིག་ནས་སྟོན་པའི་རིང་བསྲེལ་གདན་ཞུ་གནང་འཆར་ཡོད་འདུག
དེ་བཞིན། ཟླ་འདིའི་ཕྱི་ཚེས་ ༢༥ ཉིན་༸གོང་ས་མཆོག་གིས་བཞུགས་སྒར་ངྷ་ས་ཐེག་ཆེན་ཆོས་གླིང་གཙུག་ལག་ཁང་དུ། ངྷ་སའི་བོད་རིགས་སེར་སྐྱ་མང་ཚོགས་ལ་༼སྐྱེས་རབས༽བཀའ་ཁྲིད་གནང་རྒྱུ་ཡིན་འདུག གཞན། ལོ་ལྟར་༸གོང་ས་མཆོག་གིས་བཞུགས་སྒར་དུ་གདན་ས་གསུམ་གཙོས་དགོན་སྡེ་ཁག་གི་དགེ་འདུན་པ་དང་ཕྱོགས་མཐའ་ཁག་ནས་བཅར་བའི་དད་ལྡན་མང་ཚོགས་ལ་དཔྱིད་ཆོས་ཆེན་མོ་གསུང་བཞིན་ཡོད་ཀྱང་། ད་ལོར་ཕྱི་ནང་གི་གནས་སྟངས་དང་རྒྱུ་རྐྱེན་དུ་མ་ལ་བརྟེན་ནས་དཔྱིད་ཆོས་ཆེན་མོ་མེད་པ་བཟོས་ཡོད་འདུག
ཕྱི་ཟླ་ ༤ ཚེས་ ༡༣ ནས་ ༡༤ ཉིན་བར་༸གོང་ས་མཆོག་གིས་མུ་མཐུད་དུ་སུད་སི་ཧྥི་རི་བྷག་ཏུ་ས་གནས་མང་ཚོགས་ལ་ཇོ་བོ་རྗེ་དཔལ་ལྡན་ཨ་ཏི་ཤས་མཛད་པའི་༼བྱང་ཆུབ་ལམ་སྒྲོན༽བཀའ་ཁྲིད་དང་། ཉིན་མཐའ་མར་རྗེ་བཙུན་སྒྲོལ་དཀར་གྱི་བཀའ་དབང་བསྩལ་རྒྱུ་དང་། སྐབས་དེར་མང་ཚོགས་ལ་༼ཆོས་དང་མ་འདྲེས་པའི་ཚུལ་ཁྲིམས༽ཞེས་པའི་བརྗོད་གཞིའི་བཀའ་སློབ། ཕྱི་ཚེས་ ༢༦ ཉིན་༸གོང་ས་མཆོག་ཧི་མ་ཅལ་མངའ་སྡེར་ཡོད་པའི་ཌལ་ཧོལ་གཏན་སློབ་དབུ་བརྙེས་ཏེ་མི་ལོ་ ༥༠ འཁོར་བའི་དུས་དྲན་མཛད་སྒོར་ཆིབས་བསྒྱུར་གྱིས་མང་ཚོགས་ལ་བཀའ་སློབ་བསྩལ་རྒྱུ་ཡིན་འདུག
