བཞུགས་སྒར་དུ་སྐད་འབོད་ཁྲོམ་སྐོར།

དེ་རིང་ཕྱི་ཚེས་ ༡༦ ཉིན་གྱི་ཕྱི་དྲོའི་ཆུ་ཚོད་ ༤།༠༠ བའི་ཐོག ངྷ་ས་ས་གནས་གཞོན་ནུའི་གོ་སྒྲིག་འོག བཞུགས་སྒར་ངྷ་རམ་ས་ལའི་སེར་སྐྱ་མི་མང་ ༥༠ མ་ཟིན་ཙམ་གྱིས། མེག་ལོར་ཁྲོམ་གཞུང་དུ་སྐད་འབོད་ཁྲོམ་སྐོར་གྱི་ལས་འགུལ་ཞིག་སྤེལ་སོང་ལ། དེ་ནི། ཕྱི་ལོ་ ༢༠༠༩ ལོ་ནས་ཕྱི་ལོ་ ༢༠༡༣ ལོའི་ཕྱི་ཟླ་ ༢ བའི་ཚེས་ ༡༣ བར་བོད་ནང་གི་བོད་མི་ཚོས་རང་ལུས་མེར་བསྲེཊ་ཀྱིས་རྒྱ་ནག་གཞུང་གི་དྲག་གནོན་དབང་བསྒྱུར་སྲིད་ཇུས་ལ་ངོ་རྒོལ་གནང་སྟེ། བོད་མི་  ༡༠༡ ལོན་པའི་སྐབས་དང་སྟབས་བསྟུན་ཏེ་སྤེལ་བ་ཞིག་ཡིན་འདུག

ལས་འགུལ་སྐབས་ངྷ་ས་ས་གནས་གཞོན་ནུའི་ཚོགས་མི་བཀྲ་ཤིས་ལམ་བཟང་ལགས་ཀྱིས་གསར་འགོད་བསྒྲགས་གཏམ་ཞིག་སྤེལ་བའི་ནང་། ཟླ་འདིའི་ཕྱི་ཚེས་ ༣ ཉིན་རྔ་པ་ཀིརྟི་དགོན་པའི་གྲྭ་བློ་བཟང་རྣམ་རྒྱལ་ལགས་ཀྱིས་རང་ལུས་མེར་བསྲེཊ་དང་། ཕྱི་ཚེས་ ༡༣ ཉིན་རྒྱལ་གཅེས་དཔའ་བོ་སྒྲུབ་ཚེ་དང་རྒྱལ་གཅེས་དཔའ་བོ་འབྲུག་པ་མཁར་བཅས་ཀྱིས་སྔ་ཕྱིར་རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་གནང་སྟེ། རྒྱལ་གཅེས་དཔའ་བོ་འབྲུག་པ་མཁར་ལགས་ནི་བོད་ནང་རང་ལུས་མེར་བསྲེཊ་གནང་མཁན་ ༡༠༡ པ་དང་།  རྒྱལ་གཅེས་དཔའ་བོ་སྒྲུབ་ཚེ་ལགས་ནི་བཙན་བྱོལ་ནང་རང་ལུས་མེར་བསྲེཊ་གནང་མཁན་  ༣ པ་ཆགས་ཡོད་པ་མ་ཟད། ཁོང་གཉིས་ཀྱི་རང་ལུས་མེར་བསྲེཊ་གནང་བའི་དུས་ཚེ་དེ་ ༸གོང་ས་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་བོད་རང་བཙན་གྱི་གསལ་བསྒྲགས་སྤེལ་ནས་ལོ་ཧྲིལ་བོ་ ༡༠༠ འཁོར་བའི་དུས་ཚེས་དང་ཏག་ཏག་ཁེལ་ཡོད། ཅེས་བཀོད་ཡོད་པ་དང་།

ཡང་བསྒྲགས་གཏམ་དེའི་ནང་། རྒྱ་གཞུང་གིས་བོད་མིའི་ཐོག་དྲག་གནོན་དང་། གསོད་རྡུང་འཇུ་གསུམ་སོགས་མི་སྤྱོད་ལས་འདས་པའི་དམ་དྲག་དང་མནར་གཅོད་ཇི་ལྟར་བྱས་ཀྱང་། གཞིས་བཞུགས་སྤུན་ཟླ་ཚོས་འཇིགས་ཞུམ་སྤུ་ཙམ་མེད་པར་སྔར་ལས་ལྷག་པའི་མཐུན་སྒྲིལ་དང་ལར་ཞེན་ཆེན་པོས་བོད་རྒྱལ་ཁབ་དང་མི་རིཊ་ཀྱི་ཆེད་དུ་གཅིག་རྗེས་གཉིས་མཐུད་ཀྱིས་ལུས་སྲོག་མཆོད་མེར་ཕུལ་ནས། རྒྱ་གཞུང་ལ་ངོ་རྒོལ་གནང་བའི་སྙིང་སྟོབས་འདི་ནི་འཛམ་གླིང་ལོ་རྒྱུས་ནང་བྱུང་མ་མྱོང་བའི་མི་རིཊ་ཞིག་གི་སྙིང་སྟོབས་མཚོན་པ་མ་ཟད། མི་རིགས་དང་རྒྱལ་ཁབ་ཀྱི་འཐབ་རྩོད་ནང་དགྲ་བོའི་བཙན་གནོན་ཇི་ལྟ་ཆེ་ནའང་། འཚེ་བ་མེད་པའི་ལས་འགུལ་གྱི་རྒྱ་ལས་མ་འགལ་བར་འབྱུང་འགྱུར་གྱི་འཛམ་གླིང་ལོ་རྒྱུས་ནང་དཔེ་མཚོན་དུ་འདྲེན་འོས་པའི་འཚེ་མེད་ཞི་བའི་ལས་འགུལ་ཚད་མཐོ་ཤོས་ཞིག་ཆགས་ཡོད་སྟབས།  ང་ཚོ་རང་དབང་ལུང་པར་ཡོད་པའི་བོད་མི་རྩམ་ཟན་ཡོངས་ནས་གནས་སྐབས་ཀྱི་ཚ་གྲང་གི་དཀའ་ངལ་དང་། གནས་སྐབས་ཀྱི་འཚོ་བའི་དཀའ་ངལ་ཙམ་ལ་མགོ་འཁོར་ནས་མ་བསྡད་པར། མི་རིགས་དང་རང་དབང་འཐབ་རྩོད་ཀྱི་འགན་འཁུར་ཕྲག་ཏུ་བླངས་ནས་གཤིན་པོའི་ཁ་ཆེམས་དང་གསོན་པོའི་རེ་འདོད་སྟེ། བོད་རང་བཙན་སླར་གསོ་དང་༸གོང་ས་མཆོག་གང་མགྱོགས་ཕ་ཡུལ་གངས་ཅན་ལྗོངས་ལ་གདན་འདྲེན་ཞུ་ཐབས་ལ་འབད་དགོས་པ་དང་། རྒྱལ་སྤྱིའི་གཞུང་དང་གཞུང་འབྲེལ་མིན་པའི་ཚོགས་པ་ཁག འགྲོ་བ་མིའི་ཐོབ་ཐང་ཚོགས་པ་ཁག་བཅས་ནས་ཀྱང་བོད་དོན་བདེན་མཐའ་སེལ་ཐབས་ལ་རྒྱབ་སྐྱོར་གནང་དགོས་པའི་དུས་ལ་བབ་ཡོད། རྒྱ་ནག་གཞུང་གིས་ཀྱང་དངོས་ཐོག་བདེན་འཚོལ་གྱིས་བོད་ཐོག་འཛིན་པའི་སྲིད་ཇུས་ལ་བསྐྱར་ཞིབ་ཀྱིས། བོད་ཀྱི་དངོས་ཡོད་དཀའ་ངལ་ཁས་ལེན་དགོས་པའི་དུས་ལ་བབ་ཡོད། ཅེས་སོགས་འཁོད་འདུག

མཇུག་ཏུ་བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་གི་རིག་གཞུང་འགན་འཛིན་འཇིགས་མེད་ལགས་ཀྱིས། བོད་ནང་འདི་ལོའི་ལོ་སར་ཚེས་ ༣ བར་བོད་མི་ ༡༠༠ ལྷག་གིས་བོད་རྒྱལ་ཁབ་དང་མི་རིགས་ཀྱི་ཆེད་དང་། ལྷག་པར་དུ་༸གོང་ས་མཆོག་བོད་ནང་གདན་འདྲེན་ཞུ་ཆེད་རང་ལུས་མཆོད་མེར་ཕུལ་ཏེ་བློས་གཏོང་བྱས་དང་བྱེད་བཞིན་ཡོད་སྟབས། བཙན་བྱོལ་ནང་ཡོད་པའི་བོད་མི་ཚོས་དགོངས་བཞེས་དང་བསམ་བློ་གཏོང་དགོས་པ་ཞིག་ཆགས་ཡོད་པ་དང་། འདས་པའི་ལོ་རྒྱུས་ལ་ཕྱིར་བལྟས་བྱེད་སྐབས་ཆུ་སྦྲུལ་ལོའི་ལོ་འདི་ནི། ཆོས་སྲིད་གཉིས་ཀྱི་ཐད་ནས་གལ་ཆེན་གྱི་ལོ་ཞིག་ཆགས་ཡོད་པ་ལྟར། ལོ་འདིའི་ནང་བོད་མི་ཚོས་རང་ངོས་ནས་བོད་ཀྱི་འཐབ་རྩོད་ལ་འགན་འཁུར་ཏེ་འབད་བརྩོན་བྱ་རྒྱུ་དང་། གཞུང་དང་གཞུང་འབྲེལ་མིན་པའི་ཚོགས་པ་གང་ཡིན་ཡང་། ཚང་མ་བོད་སྤྱི་བའི་ལས་དོན་འགྲུབ་ཐབས་ལ་འབད་པ་བྱེད་མཁན་ཡིན་སྟབས། མ་འོངས་པར་བོད་མི་ཚོ་སེམས་ཤུགས་མི་ཆགས་པར་ལས་འགུལ་ཁག་ཏུ་མཉམ་ཞུགས་ཀྱིས་༸གོང་ས་མཆོག་བོད་ནང་གདན་འདྲེན་ཞུ་རྒྱུ་དང་བོད་གཞིས་བྱེས་ལྷན་འཛོམས་ཡོངས་ཐབས་ལ་འབད་བརྩོན་གནང་དགོས་པའི་འབོད་སྐུལ་སོགས་གནང་སོང་།

དེ་རིང་ངྷ་ས་ས་གནས་གཞོན་ནུས་ཆར་བ་འབབ་བཞིན་པའི་གནམ་གཤིས་ལ་མ་འཛེམ་པར་སྐད་འབོད་ཁྲོམ་སྐོར་གྱི་སྣེ་འཁྲིད་ཡོད་ཅིང་། ཕྱི་ ༡༨ ཉིན་བོད་ཀྱི་གཞོན་ནུ་ལྷན་ཚོགས་དང་བུད་མེད་ལྷན་ཚོགས། བོད་ཀྱི་དགུ་བཅུ་གསུམ་ལས་འགུལ་ཚོགས་པ། བོད་རྒྱལ་ཡོངས་མང་གཙོ་ཚོགས་པ། བོད་རང་བཙན་སློབ་ཕྲུག་ཚོགས་པ་བཅས་གཞུང་འབྲེལ་མིན་པའི་ཚོགས་པ་ལྔས་སྣེ་འཁྲིད་དེ། བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་ནས་ཀཱ་ཅཱ་རི་བར་སྐད་འབོད་ཁྲོམ་སྐོར་གྱི་ལས་འགུལ་ཞིག་སྤེལ་རྒྱུ་ཡིན་འདུག

གསར་འགོད་པ། དོན་གོ