བླ་མ་དབུ་མཛད་ཁྲི་འདོན།

ཁ་སང་ཕྱི་ཚེས་ ༡༧ ཉིན་གྱི་སྔ་དྲོ་བཞུགས་སྒར་ཉེ་འཁྲིས་དཔལ་ལྡན་རྒྱུད་སྟོད་གྲྭ་ཚང་དུ་དགོན་པའི་བླ་མ་དབུ་མཛད་ཁྲི་འདོན་གྱི་མཛད་སྒོ་ཞིག་ཚོགས་སོང་ལ། དེར་དབུས་བོད་མིའི་སྒྲིག་འཛུགས་ཆོས་རིག་དྲུང་ཆེ་ངག་དབང་ཆོས་གྲགས་ལགས་གཙོས། རྡ་ས་ས་གནས་མགོ་འཛིན་དང་བཞུགས་སྒར་ཉེ་མཁྲིས་དགོན་སྡེ་ཁག་དང་ཁམས་ཚན་ཁག་གི་སྐུ་ཚབ། རྒྱུད་སྟོད་གྲྭ་ཚང་གི་མཁན་པོ་དབུས་པའི་དགེ་འདུན་འདུས་མང་ཡོངས་དང་སེར་སྐྱ་མི་མང་བཅས་འདུ་འཛོམས་ཐོག  གྲྭ་ཚང་གི་མཁན་པོ་ལས་སྣེ་སོགས་ཀྱིས་སྤོས་སྣེས་གདན་དྲངས་ཏེ་རྒྱུད་སྟོད་གྲྭ་ཚང་གི་བླ་མ་དབུ་མཛད་ཀྱི་བཞུགས་ཁྲིར་མངའ་གསོལ་དང་། ཆོས་རིག་དྲུང་ཆེ་མཆོག་དང་རྒྱུད་སྟོད་གྲྭ་ཚང་གི་ལས་སྣེ་བཅས་ཀྱིས་མནྜལ་རྟེན་གསུམ་འདེགས་འབུལ་བཅས་གནང་སྟེ། མཁན་ཟུར་བྱ་ཏོ་རིན་པོ་ཆེ་མཆོག་རྒྱུད་སྟོད་གྲྭ་ཚང་གི་དབུ་མཛད་བླ་མར་ཁྲི་འདོན་གནང་སོང་།

ཐེངས་འདིའི་ཁྲི་འདོན་མཛད་སྒོའི་ཐད་གསར་འགོད་པས་དཔལ་ལྡན་རྒྱུད་སྟོད་གྲྭ་ཚང་གི་ཤེས་ཡོན་དང་འཕྲོད་བསྟེན་འགན་འཛིན་གྲྭ་འཇམ་དཔལ་རྒྱ་མཚོ་ལགས་སུ་བཅར་འདྲི་བརྒྱུད་ཤེས་རྟོགས་བྱུང་བ་ལྟར་ན། དཔལ་ལྡན་རྒྱུད་སྟོད་གྲྭ་ཚང་གི་བླ་མ་དབུ་མཛད་དེ་ནི་གྲྭ་ཚང་གི་ཁྲིམས་ཀྱི་བདག་པོ་ཆགས་ཡོད་འདུག་ལ། བླ་མ་དབུ་མཛད་ཀྱི་གང་ཟག་དེ་གདན་སར་ལྷ་རམས་དགེ་བཤེས་དང་། གྲྭ་ཚང་དུ་ཆོས་ཞུགས་ཀྱིས་ལོ་གཅིག་རིང་ཆོས་ཕྱོགས་ཀྱི་བྱེད་སྒོ་རྣམ་གསུམ་སྤེལ་རྗེས། དགེ་བསྐོས་དང་སྔགས་ཀྱི་དམ་བཅའ་ཆེན་མོ་འཇོག་དགོས་ཀྱི་ཡོད་པ་དང་། དེའི་རྗེས་རྒྱུད་སྟོད་གྲྭ་ཚང་གི་བླ་མ་དབུ་མཛད་ཀྱི་འོས་གཞིའི་ཁོངས་སུ་འཛུལ་ཏེ། གྲྭ་ཚང་གི་ངོས་ནས་འོས་ཆོས་ཚང་བའི་མཚན་ཤར་བྱང་ཆོས་རྗེ་རྣམ་གཉིས་ལ་ཕུལ་བ་དང་། ཆོས་རྗེ་རྣམ་གཉིས་ཀྱིས་འོས་མི་གཉིས་དང་གསུམ་ལས་མ་མང་བ་ཞིག་འདེམས་སྒྲུག  དེ་ནས་དགའ་ལྡན་ཁྲི་རིན་པོ་ཆེས་འོས་མི་འདེམས་སྒྲུག་བཅས་གནང་རྗེས། ༸གོང་ས་མཆོག་ལ་ཕུལ་ཏེ་མཐའ་མའི་ཕྱག་རྟགས་ཕུལ་བ་ལྟར་ཁྲི་འདོན་གནང་བཞིན་པ་ཞིག་ཡིན་འདུག དུས་ཡུན་ལོ་ ༣ གྱི་རྗེས་སུ་རྒྱུད་སྟོད་གྲྭ་ཚང་གི་མཁན་པོར་བཞུགས་ཆོག་གི་ཡོད་འདུག

ཡང་གྲྭ་འཇམ་དཔལ་རྒྱ་མཚོ་ལགས་ཀྱི་བརྗོད་པ་ལྟར་ན། བླ་མ་དབུ་མཛད་ནི་དགའ་ལྡན་ཁྲི་པར་ཕེབས་པའི་ལམ་ཁ་དང་པོ་དེ་ཆགས་ཡོད་འདུག་ལ། བླ་མ་དབུ་མཛད་ཀྱི་རྗེས་སུ་མཁན་པོ་དང་། དེ་ནས་ཤར་བ་ཆོས་རྗེའི་གསེར་ཁྲི་བཅས་རིམ་པ་བརྒྱུད་རྗེས་དགའ་ལྡན་གསེར་ཁྲིར་བཞུགས་ཆོག་གི་ཡོད་འདུག ད་ལྟའི་བར་རྒྱུད་སྟོད་གྲྭ་ཚང་གིས་ལོ་ ༥༠༠ སྔོན་གྱི་བོད་ཀྱི་སྲོལ་རྒྱུན་གྱི་ལུགས་སྲོལ་ལྟར་ཁྲི་འདོན་གནང་གི་ཡོད་སྟབས། གདན་ས་ཁག་ཏུ་བླ་བྲང་ཡོད་མཁན་སུ་ཡིན་ཡང་། རྒྱུད་གྲྭ་སྟོད་སྨད་གཉིས་སུ་ཐོག་མའི་ཆོས་ཞུགས་ཀྱི་གྲུབ་མཚམས་ལྟར་བཞུགས་དགོས་པ་ལྟར། མཁན་ཟུར་ཁོང་ཡང་ཁ་སང་ཞོགས་པའི་བར་གྲྭ་བ་དཀྱུས་མ་ལྟར་བཞུགས་ཡོད་འདུག ཁ་སང་ཞོགས་པར་ཆོས་ཕྱོགས་ཀྱི་འགྲོ་ལུགས་ལྟར། རིན་པོ་ཆེ་མཆོག་གིས་རང་གི་གཟིམ་ཤག་ནས་ལྷུང་གཟེད་དང་ཤོ་ཀ་ལི་རྒྱབ་ལ་བསྣམས་ཏེ་འདུ་ཁང་དུ་ཕེབས་རྗེས། གྲྭ་ཚང་གི་སྲོལ་རྒྱུན་གྱི་ཆོལ་ཁ་ལྟར་ཁྲི་འདོན་གནང་རྗེས་ཕྱིར་གཟིམ་ཤག་ཏུ་ཕེབས་ཏེ་མཇལ་ཁ་དང་མཇལ་དར་བསྒྲོན་འབུལ་གནང་སྲོལ་ཡོད་འདུག   

དཔལ་ལྡན་རྒྱུད་སྟོད་གྲྭ་ཚང་གི་བླ་མ་དབུ་མཛད་མཁན་ཟུར་བྱ་ཏོ་རིན་པོ་ཆེ་མཆོག་ནི། སེར་བྱེས་གྲྭ་ཚང་དུ་ཆོས་ཞུགས་ཀྱིས་དགེ་བཤེས་ལྷ་རམས་པ་ཐོན་རྗེས། སྐུ་གོང་མའི་མཛད་པ་ལྟར་ཆོས་ཕྱོགས་ཀྱི་མཛད་འཕྲིན་བསྐྱངས་ཡོད་པ་དང་། ཞོར་དུ་༸གོང་ས་མཆོག་གིས་རྣམ་རྒྱལ་གྲྭ་ཚང་གི་མཁན་རིན་པོ་ཆེར་བསྐོ་བཞག་གནང་བ་ལྟར་མཁན་པོའི་ལས་འགན་བཞེས་ཡོད་འདུག་ལ། ཁོང་བཙན་བྱོལ་སྤྱི་ཚོགས་ཀྱི་བླ་སྤྲུལ་ཆུང་བའི་ནང་༸གོང་ས་མཆོག་གི་གམ་དུ་དབང་ལུང་མན་ངག་སོགས་ཀྱི་ཐད་ནས་གནད་འགག་ཅན་གྱི་བླ་མ་ཞིག་ཆགས་ཡོད་འདུག