ཁ་སང་གཟའ་མིག་དམར་ཉིན་སྲིད་སྐྱོང་བློ་བཟང་སེང་གེ་མཆོག་གིས། ཁེ་ན་ཌའི་རྒྱལ་ཡོངས་གྲོས་ཚོགས་སུ་བོད་ནང་གི་རང་ལུས་མེར་བསྲེཊ་ཀྱི་གནས་ཚུལ་གཙོས་པའི་ཛ་དྲག་གནས་སྟངས་ཁག་སྙན་སེང་ཞུས་འདུག
ཟླ་འདིའི་ཕྱི་ཚེས་ ༢༦ ཉིན་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་། བྱང་ཨ་རིའི་སྐུ་ཚབ་དོན་གཅོད་བློ་བཟང་སྙན་གྲགས་རྣམ་གཉིས་ཁེ་ན་ཌའི་རྒྱལ་ས་ཨོ་ཊ་ཝར་རྒྱལ་ཡོངས་གྲོས་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་སུ་མཉམ་ཞུགས་ཀྱིས། དེར་ཡོད་གྲོས་ཚོགས་ཚོགས་མིར་ད་ལྟའི་བོད་ནང་གི་འགྲོ་བ་མིའི་ཐོབ་ཐང་གནས་སྟངས་དང་རང་ལུས་མེར་བསྲེཊ་ཀྱི་གནས་ཚུལ། རྒྱ་ནག་གཞུང་གིས་བོད་ཐོག་འཛིན་དྲག་གནོན་སྲིད་ཇུས། བོད་ནང་ཆོས་དད་དང་སྨྲ་བརྗོད་རང་དབང་མེད་པའི་དཀའ་ངལ་སོགས་སྙན་སེང་ཞུས་ཡོད་པ་མ་ཟད། ཉེ་ཆར་བཀའ་སྤྱི་ཐུན་མོང་གི་སྣེ་འཁྲིད་པའི་ལྡི་ལིའི་བོད་མིའི་གདུང་སེམས་མཉམ་སྐྱེད་ལས་འགུལ་ཐོག་རྒྱ་གར་གྱི་གནད་ཡོད་མི་སྣ་མཉམ་ཞུགས་ཀྱིས་བོད་དོན་རྒྱབ་སྐྱོར་གྱི་གཏམ་བཤད་གནང་བ་དང་། རྒྱ་ནག་གནས་སྡོད་ཨ་རིའི་གཞུང་ཚབ་མཆོག་བོད་ཀྱི་ས་གནས་ཁག་ཏུ་ཕེབས་པའི་གནས་ཚུལ་རིམ་པ་བྱུང་ཡོད་སྟབས། མ་འོངས་པར་ཁེ་ན་ཌའི་གཞུང་ཚབ་མཆོག་ཀྱང་བོད་ཀྱི་ས་གནས་སྤྱི་དང་ལྷག་པར་དུ་རང་ལུས་མེར་བསྲེཊ་བཏང་དང་གཏོང་བཞིན་པའི་ས་ཁུལ་ཁག་ཏུ་ཕེབས་ཏེ། བོད་ནང་གི་དངོས་ཡོད་གནས་སྟངས་ལ་ཞིབ་འཇུག་གིས་རྒྱ་ནག་གཞུང་དང་ཁེ་ན་ཌའི་མི་མང་། གྲོས་ཚོགས་བཅས་ལ་དངོས་ཡོད་གནས་ཚུལ་སྙན་སེང་ཞུ་རྒྱུ་ཧ་ཅང་གལ་ཆེན་ཡིན་པ་དང་། ད་ལྟའི་བར་ཁེ་ན་ཌའི་གཞུང་ནས་བོད་དོན་ཐོག་རྒྱབ་སྐྱོར་གནང་བ་ལྟར། མ་འོངས་པར་མུ་མཐུད་བོད་དོན་ལ་རྒྱབ་སྐྱོར་གནང་དགོས་པའི་འབོད་སྐུལ་གནང་ཡོད་འདུག
ཉིན་དེར་སྲིད་སྐྱོང་མཆོག་གིས་གྲོས་ཚོགས་འཐུས་མིར་བོད་དོན་སྙན་སེང་དང་ཁོང་རྣམ་པའི་དྲི་བར་ལན་འདེབས་གནང་ཡོད་པ་མ་ཟད། ཉིན་རྒྱབ་ཆུ་ཚོད་ ༢།༠༠ པ་ཡས་མས་སུ་ཁེ་ན་ཌའི་སི་ཊི་ཝེ་ (CTV) ཞེས་པའི་བརྙན་འཕྲིན་གྱི་བཅར་འདྲི་དང་ལེན་ཐོག བོད་ནང་བོད་མི་མང་པོས་རང་ལུས་མེར་བསྲེཊ་བཏང་སྟེ་ཛ་དྲག་གི་གནས་སྟངས་ཆགས་ཡོད་པའི་སྐབས་འདིར། ཁོང་གི་ངོས་ནས་ཁེ་ན་ཌའི་གཞུང་ནས་རྒྱ་ནག་ལ་འབོད་སྐུལ་ཞུས་ཏེ། བོད་ནང་གི་དཀའ་ངལ་སེལ་ཆེད་རྒྱ་གཞུང་དང་གྲོས་མོལ་ཡོང་ཐབས་ཀྱི་རེ་བ་ཞུ་བཞིན་ཡོད་པ་དང་། བོད་ནང་རང་ལུས་མེར་བསྲེཊ་ཀྱི་གནས་ཚུལ་བྱུང་བཞིན་པའི་རྒྱུ་རྐྱེན་གཙོ་བོ། རྒྱ་ནག་གི་དཔལ་འབྱོར་གྱི་གནས་སྟངས་ཆ་མི་སྙོམས་པ་དང་། ལྷག་པར་དུ་བོད་མི་རིགས་ཀྱི་ཆོས་དང་རིག་གཞུང་། སྐད་ཡིག བོད་མིའི་འགྲོ་འདུག་སྤྱོད་གསུམ་བཅས་ལ་དམ་དྲག་བྱས་པའི་དབང་གིས་བྱུང་བ་ཡིན་སྟབས། བོད་རྒྱའི་དཀའ་ངལ་ཞི་བའི་ལམ་ནས་སེལ་རྒྱུ་ཧ་ཅང་གལ་ཆེན་པོ་ཆགས་ཡོད་པ་དང་། ཁེ་ན་ཌའི་གཞུང་ནི་མང་གཙོ་དང་འགྲོ་མིའི་ཐོབ་ཐང་ལ་སྲུང་སྐྱོབ་ཤུགས་ཆེར་གནང་མཁན་གྱི་རྒྱལ་ཁབ་ཅིག་ཡིན་སྟབས། མ་འོངས་པར་རྒྱལ་ཁབ་གཉིས་ཀྱི་ཚོང་འབྲེལ་སོགས་ཀྱི་སྐབས་སུ་བོད་ནང་གི་འགྲོ་བ་མིའི་ཐོབ་ཐང་དང་དངོས་ཡོད་གནས་སྟངས་རྟོག་ཞིབ་གནང་རྒྱུར་རེ་བ་ཡོད་སྐོར་གསུངས་འདུག
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
ཡིན་ཡང་རྒྱ་མིའི་སྒོར་མོ་དེ་་་འགྲོ་བ་མིའི་རིན་ཐོང་ལས་ཚད་མཐོ་བ་རེད་་་་ངོ་མ་ཁག་པོ་རེད་་་
མ་འོངས་པར་རྒྱལ་ཁབ་གཉིས་ཀྱི་ཚོང་འབྲེལ་སོགས་ཀྱི་སྐབས་སུ་བོད་ནང་གི་འགྲོ་བ་མིའི་ཐོབ་ཐང་དང་དངོས་ཡོད་གནས་སྟངས་རྟོག་ཞིབ་གནང་རྒྱུར་རེ་བ་ཡོད་གསུངས་འདུག །བཀའ་དྲིན་ཆེ་་་་ངོ་མ་ཁྱེད་ཀྱིས་ལས་དོན་ཧུར་བརྩོན་གནང་བར་་་་་་་