རྒྱ་གཞུང་གིས་རང་ལུས་མེར་བསྲེཊ་གོ་སྒྲིག་དང་བརྒྱུད་སྐུལ་བྱས་མཁན་གྱི་ཉེས་མིང་འོག་བོད་མི་ལྔ་འཇུ་བཟུང་བྱས་འདུག
དེ་རིང་ཕྱི་ཚེས་ ༢༧ ཉིན་རྒྱ་གཞུང་ཞིན་ཧྭ་གསར་ཁང་གིས། ཀན་སུའུ་ཉེན་རྟོག་པས་ཏྭ་ལའི་རུ་ཚོགས་དང་འབྲེལ་བ་བྱས་ཏེ་རྩ་འཛུགས་དང་ཇུས་འགོད། བརྒྱུད་སྐུལ་ལ་བརྟེན་ནས། བོད་མི་ ༣ གྱིས་རང་ལུས་མེར་བཏང་ཡོད་པའི་ཉེས་མིང་འོག དར་རྒྱས་དང་བསམ་གཏན། བཀྲ་ཤིས་རྒྱ་མཚོ། བསྟན་པའི་རྒྱལ་བོ། བསྟན་བཟང་བཅས་མི་ ༥ འཛིན་བཟུང་ཐོག་ཁྲིམས་གཅོད་བྱ་འཆར་ཡོད་པ་བསྒྲགས་འདུག
རྒྱ་གཞུང་གིས་འཇུ་བཟུང་བྱས་པའི་བོད་མི་དེ་ཚོར། ལོ་སྔོན་མའི་ཕྱི་ཟླ་ ༡༠ ཚེས་ ༢༣ ཉིན་བླ་བྲང་བསང་ཆུ་རྫོང་གི་དྲག་ཆས་ཉེན་རྟོག་ཁང་གི་སྒོ་འགྲམ་དུ་རང་སྲེག་གནང་སྟེ་སྐུ་གྲོངས་པའི་རྒྱལ་གཅེས་དཔའ་བོ་རྡོ་རྗེ་རིན་ཆེན་དང་། ཕྱི་ཟླ་ ༡༠ བའི་ཚེས་ ༢༦ ཉིན་བླ་བྲང་བསང་ཆུ་རྫོང་བསང་ཁོག་ཞང་སྲིད་གཞུང་རྙིང་པའི་རླངས་འཁོར་འབབ་ཚིགས་སུ་རང་སྲེག་གནང་སྟེ་སྐུ་གྲོངས་པའི་རྒྱལ་གཅེས་དཔའ་བོ་ཐུབ་དབང་སྐྱབས། ཕྱི་ཟླ་ ༡༡ ཚེས་ ༡༠ ཉིན་བསང་ཆུ་རྫོང་ཀླུ་ཤོད་ཁུང་རུ་ཐང་ངམ་བཤད་སྒྲུབ་བསྟན་དར་གླིང་དགོན་པའི་ཉེ་འགྲམ་དུ་རང་སྲེག་གནང་སྟེ་སྐུ་གྲོངས་པའི་རྒྱལ་གཅེས་དཔའ་བོ་མགོན་པོ་ཚེ་རིང་བཅས་ལ་བརྒྱུད་སྐུལ་བྱེད་མཁན་ཡིན་པའི་ཉེས་འཛུགས་བྱས་ཡོད་པ་རེད།
དེ་བཞིན། དར་རྒྱས་དང་བསམ་གཏན། བཀྲ་ཤིས་རྒྱ་མཚོ་བཅས་ཀྱིས་མེར་སྲེག་གཏོང་མཁན་རྒྱལ་གཅེས་དཔའ་བོ་དེ་དག་གི་གནས་ཚུལ་དང་པར་རིས་སོགས་ཕྱི་ཕྱོགས་སུ་མཁོ་སྤྲོད་བྱས་ཏེ། མི་རིགས་ཕན་ཚུན་བར་འཁོན་སེམས་བསླངས་ཡོད་ཚུལ་བཀོད་ཡོད་པ་མ་ཟད། རྒྱ་གཞུང་ཉེན་རྟོག་པས་བོད་མི་དེ་དག་གིས་རང་སྲེག་དོན་རྐྱེན་གོ་སྒྲིག་དང་ཇུས་འགོད། བརྒྱུད་སྐུལ། མེར་བསྲེཊ་གཏོང་དགོས་པའི་སྐུལ་སློང་། མིའི་ཚེ་སྲོག་ལ་གནོད་འཚེ། སྤྱི་ཚོགས་ལ་གཏོར་བརླག་བཅས་བྱས་ཡོད་པ་དེ་ནི། བསམ་བཞིན་དུ་མི་གཞན་གྱི་ཚེ་སྲོག་འཕྲོག་པའི་ཚབས་ཆེའི་ཉེས་དོན་ཡིན་སྟབས། སྔར་ལས་ལྷག་པར་དམ་དྲག་ཞིབ་བཤེར་བྱས་ཐོག མི་མང་གི་ཚེ་སྲོག་འཕྲོག་པའི་ཉེས་ཁྲིམས་གཅོད་རྒྱུ་ཡིན་པ་བརྗོད་འདུག
