རྒྱལ་ཁ་སྟོབས་ཆེ་ཆུང་ལ་ཐུག་མེད་པར་བདེན་པ་ཡོད་མེད་ལ་ཐུག་ཡོད།

ཁ་སང་རྒྱ་གར་བོད་དོན་རྒྱབ་སྐྱོར་པ་ཁག་ཅིག་གིས་ངྷ་ས་ནས་གཏམ་བཤད་གནང་སྟེ། རྒྱ་གར་གྱི་རཱ་མ་ཡ་ནའི་གཏམ་བརྒྱུད་ལྟར། ཕར་ཕྱོགས་སྟོབས་ཆེན་ཞིག་ལ་ཚུར་ཕྱོགས་སྟོབས་ཆུང་ཞིག་གིས་འཐབ་རྩོད་བྱས་ཀྱང་། མཐའ་དོན་བདེན་པ་ལ་རྒྱལ་ཁ་འཐོབ་ངེས་ཡིན་པའི་གནས་ལུགས་དེ་མ་བརྗེད་རོགས་ཟེར།

ཁ་སང་ཕྱི་ཚེས་ ༡ ཉིན་གྱི་ཕྱི་དྲོ་ཆུ་ཚོད་ ༥།༣༠ སྟེང་ངྷ་སའི་གཞུང་འབྲེལ་མིན་པའི་ཚོགས་པ་ལྔའི་གོ་སྒྲིག་འོག དགུ་བཅུ་གསུམ་ལས་འགུལ་ཚོགས་པའི་ཚོགས་ཁང་དུ་རྒྱ་གར་རྒྱལ་ཡོངས་ཞབས་ཞུ་ཚོགས་པ་(RSS)ཞེས་པའི་སྤྱི་ཁྱབ་འབྲེལ་མཐུད་པ་ཨིན་ཌི་རེ་ཤཱི་ཀུ་མར་(Indresh Kumar) དང་། ཀང་རཱ་རྫོང་གི་ཚོགས་པ་དེའི་ཡན་ལག་ཚོགས་གཙོ་བྷུ་ཤན་ཇེ་(Bhushan jee)།  ཧི་མ་ལ་ཡ་ཁྱིམ་ཚང་ཚོགས་པའི་(Himalaya Purivaar) ས་གནས་ཧི་མ་ཅཱལ་མངའ་སྡེ་ཡན་ལག་ཚོགས་པའི་དྲུང་ཆེ་རཱེ་ཤཱེ་ཝ་ལེ་ཡ་(Rishiwalia) བཅས་གསུམ་གྱིས། བོད་དོན་འཐབ་རྩོད་ཀྱི་ཁ་ཕྱོགས་འཛིན་སྟངས་དང་། བོད་མིའི་རང་ལུས་མེར་བསྲེགས་ཐད་རྒྱ་གར་དང་རྒྱལ་སྤྱིར་གླེང་ཤུགས་ཆེ་རུ་གཏོང་ཐབས་བཅས་ཀྱི་ཐོག་གཏམ་བཤད་གནང་སོང་། གཏམ་བཤད་དེར་རྒྱ་གར་བོད་དོན་རྒྱབ་སྐྱོར་པ་ཁག་ཅིག་དང་གཞུང་འབྲེལ་མིན་པའི་ཚོགས་པ་ཁག་གི་ལས་བྱེད་བཅས་ཀྱིས་དྲི་བ་དྲིས་ལན་བཅས་གནང་སོང་། 

བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་ཟུར་པ་དང་ཧི་མ་ལ་ཡ་ཁྱིམ་ཚང་ཚོགས་པའི་རྒྱུན་ལས་འཆི་མེད་གཡང་དྲུང་ལགས་ཀྱིས་གཏམ་བཤད་དུ་ཕེབས་མཁན་དག་ནི་དུས་རྒྱུན་བོད་དོན་ལ་ཁ་ཞེ་གཉིས་མེད་ཐོག་རྒྱབ་སྐྱོར་གནང་མཁན་ཡིན་པ་དང་། རྒྱ་གར་རྒྱལ་ཡོངས་ཞབས་ཞུ་ཚོགས་པ་དེ་རྒྱ་གར་ནང་གི་གཞུང་འབྲེལ་མ་ཡིན་པའི་ཚོགས་པ་ཆེ་ཤོས་ཤིག་དང་། རྒྱ་གར་སྤྱི་ཚོགས་ནང་ཤུགས་རྐྱེན་ཆེན་པོ་ཡོད་མཁན་ཞིག་ཡིན་སྐོར། ལྷག་པར་དུ་ཨིན་ཌི་རེ་ཤཱི་ཀུ་མར་ཁོང་ནི་དུས་ཡུན་རིང་པོ་ནས་བོད་དོན་ལ་རྒྱབ་སྐྱོར་ཤུགས་ཆེན་གནང་མཁན་ཞིག་ཡིན་ཞིང་། བོད་པ་དང་རྒྱ་གར་བར་གྱི་འབྲེལ་ལམ་གོང་འཕེལ་དང་རྒྱ་གར་ནང་བོད་དོན་རྒྱབ་སྐྱོར་རྒྱ་སྐྱེད་གཏོང་ཕྱིར་ཆེད་དུ་ཁོང་གིས་འཕགས་བོད་མཛའ་འབྲེལ་ཚོགས་པ་དང་ཧི་མ་ལ་ཡ་ཁྱིམ་ཚང་ཚོགས་པ་གཉིས་གསར་འཛུགས་བྱས་ཤིང་། དེང་སྐབས་ཚོགས་པ་འདི་གཉིས་བརྒྱུད་རྒྱ་གར་སྤྱི་ཚོགས་ནང་བོད་དོན་རྒྱབ་སྐྱོར་གྱི་ནུས་ཤུགས་ཇེ་ཆེར་འགྲོ་བཞིན་ཡོད་སྐོར་ངོ་སྤྲོད་གནང་སོང་།

དེའི་རྗེས་བྷུ་ཤན་ཇེ་ཡིས་གཏམ་བཤད་གནང་བའི་ནང་། དུས་རབས་ ༡༩ ནང་བྱུང་པ་རྒྱ་གར་ཧིན་རྡུ་ཆོས་ལུགས་ཀྱི་ལྟ་གྲུབ་སྨྲ་བ་ཝི་ཝེ་ཀཱ་ནན་ཌ་(Swami Vivekananda) ལགས་རྒྱ་གར་ཙམ་མ་ཡིན་པར་ནུབ་ཕྱོགས་པའི་སྤྱི་ཚོགས་ནང་གདེང་འཇོག་ཆེན་པོ་ཐོབ་མཁན་ཞིག་ཆགས་ཡོད་ཅིང་། དེ་ནི་ཁོང་གིས་གང་བཤད་པ་དང་གང་བསྒྲུབས་པ་དག་བདེན་དོན་རྐྱང་ཡིན་པ་ལྟར། དེང་སྐབས་ཨིན་ཌི་རེ་ཤཱི་ཀུ་མར་གྱིས་ཁོང་ནང་བཞིན་བདེན་པའི་རྗེས་སུ་འབྲང་སྟེ་སྤྱི་ཚོགས་ནང་ལས་དོན་རླབས་ཆེན་སྒྲུབ་མཁན་ཞིག་ཆགས་ཡོད་སྐོར། གཏམ་བཤད་འདིར་ངོ་བོའི་ཆ་ནས་ཚོགས་པ་འདྲ་མིན་ཆགས་ཡོད་ཀྱང་། ནང་དོན་གྱི་ཆ་ནས་ཚང་མ་བདེན་དོན་ཆེད་ཁ་ཕྱོགས་གཅིག་གི་སྟེང་སྐྱོད་དགོས་པ། རྒྱ་ནག་ཅི་ཙམ་ཆེན་པོ་ཡིན་ཡང་བདེན་དོན་རྩོད་པའི་སྙིང་སྟོབས་ནམ་ཡང་ཞུམ་མི་རུང་བ་དང་། རྒྱ་གར་གྱི་མ་ཧ་བྷ་རཱ་ཊ་(Mahabharata) དང་ར་མ་ཡ་ན་སོགས་རིག་བྱེད་ཀྱི་གཏམ་རྒྱུད་དག་ལ་བལྟས་ཀྱང་། ཕ་རོལ་བ་ཇི་འདྲའི་སྟོབས་དང་ལྡན་པ་ཞིག་ཡིན་ཡང་མཐའ་མའི་རྒྱལ་ཁ་དེ་བདེན་པ་རྩོད་མཁན་ལ་ཐོབ་ཡོད་པ་ལྟར་དུས་ཀྱི་སྔ་ཕྱི་ཙམ་ལས་བོད་ཀྱི་བདེན་པར་རྒྱལ་ཁ་འཐོབ་པའི་ཉིན་ཞིག་འཆར་ངེས་ཡིན་པ་དང་། བོད་ཀྱི་བདེན་དོན་ལ་རྒྱལ་ཁ་འཐོབ་རྒྱུར་ཡིད་ཆེས་བརྟན་པོ་ཡོད་པར་བརྗོད་བྱུང་།

ཉིན་དེའི་མི་སྣ་གཙོ་བོ་ཨིན་ཌི་རེ་ཤཱི་ཀུ་མར་གྱིས་བོད་ནང་གི་རང་ལུས་མེར་བསྲེགས་ཐད། དེང་སྐབས་བོད་མིའི་རང་སྲེག་ལ་རང་ཤི་བརྒྱབ་པར་ངོས་འཛིན་བྱེད་མཁན་ཡོང་གི་ཡོད་པ་དང་། རང་ཤི་ཟེར་པ་ནི་སྒེར་དང་ཁྱིམ་ཚང་སོགས་ཀྱི་དཀའ་རྙོག་འོག་བྱུང་གི་ཡོད་པ་ཞིག་དང་། བོད་མིའི་རང་སྲེག་ནི་རྒྱལ་ཁབ་དང་མི་རིགས། རང་དབང་དང་བདེན་པ་སོགས་ཀྱི་ཆེད་དུ་རང་སྲོག་བློས་གཏོང་བྱས་པ་ཞིག་ཡིན་པ། འདས་པའི་མི་ལོ་ ༥༠ ལྷག་གི་རིང་རྒྱ་ནག་གིས་བོད་མིར་དྲག་གནོན་མནར་གཅོད་བྱས་པའི་ཉེར་ལེན་གྱིས་རྒྱ་ནག་གིས་འགོག་ཐབས་མེད་པའི་ད་ལྟའི་རང་སྲེག་འདི་བྱུང་ཡོད་ཅིང་། དེ་ནི་འཐབ་རྩོད་ཀྱི་ཚད་མཐོ་ཤོས་དང་རིན་ཐང་ཆེ་ཤོས་ཤིག་ཆགས་ཡོད་སྐོར། ཕྱོགས་གཅིག་ནས་མི་ཞིག་གི་ཚེ་སྲོག་མེ་རུ་སྒྲོན་པ་དེ་བསམ་ཡུལ་ལས་འདས་པ་ཞིག་དང་། ཕ་མ་ནང་མི་དང་མི་རིགས་ལ་མཚོན་ན་བོད་མི་གཅིག་གི་ཚེ་སྲོག་ཤོར་ཡང་བློ་འཚབ་ཡོད་ངེས་ཀྱང་། ཕྱོགས་གཞན་ཞིག་ནས་བལྟས་ན་རང་ལུས་མེར་བསྲེགས་ལས་འགུལ་དེ་ནང་ཁུལ་ཆིག་སྒྲིལ་དང་བོད་དོན་རྒྱལ་སྤྱི་ཅན་དུ་འགྱུར་རྒྱུ་བཅས་ལ་ཕན་ཐོགས་ཆེན་པོ་བྱུང་ཡོད་སྟབས། ཁོང་རང་གི་ངོས་ནས་ལས་འགུལ་འདི་བྱུང་པ་ཧ་ཅང་ཡག་པོ་ཞིག་ལ་ངོས་འཛིན་བྱེད་ཀྱི་ཡོད་སྐོར་སོགས་བརྗོད་སོང་།

དྲི་བ་དྲིས་ལན་སྐབས་རྒྱ་གར་རྒྱལ་ཡོངས་ཞབས་ཞུ་ཚོགས་པས། ད་སྔའི་རྒྱ་གར་གྱི་བོད་ཐོག་བཟུང་པའི་སྲིད་ཇུས་ལ་འགྱུར་བ་གཏོང་རྒྱུར་ཤུགས་རྐྱེན་སྤྲོད་ཐུབ་མིན་དྲིས་པར་ཁོང་གིས། དང་པོ་རྒྱ་གར་གཞུང་གི་སྲིད་ཇུས་ལ་འགྱུར་པ་གཏོང་རྒྱུར་༧གོང་ས་མཆོག་དང་བཙན་བྱོལ་བོད་མིའི་སྒྲིག་འཛུགས་ཀྱི་ངོས་ནས་འཐབ་རྩོད་ཀྱི་ལངས་ཕྱོགས་གསལ་བོ་བཟོ་རྒྱུ་གལ་ཆེན་པོ་ཡིན་པ། དེང་སྐབས་བཙན་བྱོལ་བོད་མིའི་མགོ་ཁྲིད་ཚོས་རང་སྐྱོང་བཤད་ཀྱི་ཡོད་པ་དང་མང་ཚོགས་ཁྲོད་རང་བཙན་བཤད་ཀྱི་ཡོད་བཅས་གཉིས་ཆགས་ཡོད་པ་དེ་གཅིག་དང་། གཉིས་ནས་རྒྱ་གར་གཞུང་གིས་བོད་ཐོག་བཟུང་པའི་སྲིད་ཇུས་ནི་བོད་རྒྱ་ནག་གི་ཆ་ཤས་ཡིན་པར་ཁས་ལེན་བྱས་ཡོད་ལ། བོད་མིའི་སྒྲིག་འཛུགས་ཀྱིས་ཀྱང་རྒྱ་ནག་གི་རྩ་ཁྲིམས་འོག་གནས་རྒྱུར་ཁས་ལེན་བྱེད་ཀྱི་ཡོད་སྟབས། རྒྱ་གར་གཞུང་གི་སྲིད་ཇུས་དང་བོད་མིའི་སྒྲིག་འཛུགས་གཉིས་ཀྱི་རྩ་བ་ཐུག་ས་གཅིག་པ་ལྟ་བུ་ཆགས་ཡོད་པས། རྒྱ་གར་གཞུང་གིས་བོད་ཐོག་འཛིན་པའི་སྲིད་ཇུས་ལ་འགྱུར་པ་གཏོང་དགོས་ཟེར་ན་དོན་ལ་འགྱུར་པ་གང་འདྲ་གཏོང་དགོས་པ་ཁ་གསལ་ཆགས་མེད་སྐོར་། གལ་སྲིད་རྒྱ་གར་གཞུང་གི་སྲིད་ཇུས་འགྱུར་པ་གཏོང་དགོས་ཚེ་བཙན་བྱོལ་སྒྲིག་འཛུགས་དང་མི་མང་གི་འཐབ་རྩོད་ཀྱི་ལངས་ཕྱོགས་དེ་སྔ་དང་མ་འདྲ་ཞིག་འཛིན་དགོས་པར་བརྗོད་སོང་།

ཡང་ཁོང་གིས་དེང་སྐབས་གལ་ཆེ་ཤོས་རྒྱ་གར་གྲོས་ཚོགས་ནང་ད་ལྟའི་བོད་ནང་གི་དངོས་ཡོད་གནས་སྟངས་ཐད་གླེང་སློང་ཡོང་ཐབས་བྱ་རྒྱུ་དེ་ཡིན་སྐོར། དོན་དངོས་ཐོག་རྒྱ་དཀར་ནག་གི་འབྲེལ་བ་ཡག་པོ་མེད་སྐོར། རྒྱ་ནག་ནི་ཁ་གཏན་ཚིག་ལ་མི་གནས་པ་དང་། རྒྱ་ནག་ནི་སོ་སོའི་ཁེ་ཕན་ཆེད་གཞན་གྱི་ཆེད་མཐོང་དང་ཐོབ་ཐང་སོགས་གང་ལའང་མི་བལྟ་བར་ཧམ་འཛུལ་བྱེད་མཁན་གྱི་རྒྱ་སྐྱེད་རིང་ལུགས་པ་ཞིག་ཡིན་སྐོར་སོགས་བརྗོད།

གསར་འགོད་པ། བནྡེ་སྐྱབས།