ཁམས་ནགས་ཤོད་འབྲི་རུ་རྫོང་ཆགས་རི་དགོན་པའི་གྲྭ་དཀོན་མཆོག་བཟོད་པ་ལགས་སྔ་ལོར་རྒྱ་གཞུང་གིས་འཛིན་བཟུང་གིས་ད་ལྟ་འབྲི་རུ་རྫོང་ས་གནས་བཙོན་ཁང་དུ་དཀའ་སྡུག་མྱོང་བཞིན་ཡོད་འདུག
དར་ལྕེ་ཟད་པོ་ལགས་ཀྱིས་གནས་ཚུལ་བཏང་འབྱོར་ལ། ཁམས་ནགས་ཤོད་འབྲི་རུ་རྫོང་ཆགས་རི་དགོན་གྱི་གྲྭ་དཀོན་མཆོག་བཟོད་པ་འམ་སྐྱ་མིང་བཀྲ་ཤིས་ཉི་མ་འབོད་པ་ཁོང་ནི། འབྲི་རུ་རྫོང་བོམ་ཕན་ཤང་ནགས་དག་གྲོང་ཚོ་ནས་ཡིན་ཞིང་། ༢༠༡༢ ལོའི་ཟླ་ ༡༡ ནང་དུ་འབྲི་རུ་རྫོང་རྩ་ལ་ཤང་ཁོངས་མི་ཚང་ཞིག་ཏུ་འདས་མཆོད་སྒྲུབ་སྐབས་སུ། གློ་བུར་དུ་ཉེན་རྟོག་པའི་རླངས་འཁོར་གཉིས་སྒོ་ཁར་བསླེབས་ཏེ་དཀོན་མཆོག་བཟོད་པ་ཟེར་བ་དེ་སྒོར་ཐོན་ཤོག་ཅེས་བོས་འདུག དཀོན་མཆོག་བཟོད་པར་ནག་ཉེས་གང་ཡང་མེད་སྟབས། བློ་སྤོབས་ངང་སྒོར་ཐོན་མ་ཐག་ཉེན་རྟོག་པའི་རླངས་འཁོར་ནང་བརྫངས་ཏེ་འཛིན་བཟུང་བཙན་འཁྲིད་བྱས་ཡོད་འདུག
དེ་ནས་ཁོང་འབྲི་རྫོང་བཙོན་ཁང་དུ་ཁྲིད་དེ་འདྲི་རྩད་སྣ་ཚོགས་བྱས་ཤིང་། ཉིན་གསུམ་ནང་ཟ་མ་ཐེངས་གཅིག་རེ་ལས་མེད་པ་དང་། མཚམས་རེར་ལུས་ལ་དུག་ཆུ་གཏོར་ནས་ཚོར་བ་མེད་པ་བཟོས་ཏེ་འདྲི་རྩད་བྱས་ཏེ་མནར་གཅོད་སྣ་ཚོགས་བཏང་ཡོད་པ་མ་ཟད། ཟླ་གཅིག་ཙམ་རིང་མུན་བཙོན་དུ་བཅུག་སྟེ་སེམས་རྣལ་དུ་མི་གནས་པ་ཆགས་ཡོད་འདུག
ད་ལོའི་ཟླ་ ༡ པོའི་ནང་ཁྱིམ་མི་ལ་ཁ་པར་གཏོང་བཅུག་སྟེ། བཙན་པོ་དབང་འོག་ཁོང་བཙོན་ཁང་དུ་སྐྱིད་པོ་ཡོད་སྐོར་དང་། སློབ་སྦྱོང་ཡང་བྱེད་ཐུབ་ཀྱི་ཡོད་སྐོར། ཟ་མ་དང་ཉལ་ས་སོགས་ཀྱང་ཡག་པོ་ཡོད་རབས་བཤད་བཅུག་ཡོད་འདུག
ཁོང་སྡོད་སའི་བཙོན་ཁང་དེར་ནག་ཉེས་གང་ཡིན་གསལ་ཁ་མེད་པའི་བཙོན་པ་གཞན་བརྒྱ་སྐོར་ཞིག་ཡོད་འདུག་ལ། བཙོན་ཁང་ནང་བོད་མི་ཕན་ཚུན་སྐད་ཆ་བཤད་པ་མཐོང་ཚེ་གསང་གཏམ་བཤད་ཀྱི་འདུག་ཟེར་ནས་གང་བྱུང་གཅར་རྡུང་གཏོང་གི་ཡོད་འདུག
