ཨ་རིར་གནས་སྡོད་རིན་པོ་ལགས་ཀྱིས་བོད་མི་རང་ལུས་མེར་བསྲེགས་གནང་མཁན་ཚོའི་མངོན་འདོད་ཁྱེར་ཏེ། ཡུ་རོབ་རྒྱབ་ཁབ་ ༡༣ ནང་རྐང་འཁོར་སྐོར་སྐྱོད་ཀྱི་ལས་འགུལ་ཞིག་མགོ་འཛུགས་གནང་འདུག
ཕྱི་ཚེས་ ༡༧ ཉིན་ཨ་རིའི་མེ་ནི་སོ་ཏྲར་གནས་སྡོད་བོད་མི་རིན་པོ་ལགས་ཀྱིས་བོད་ཕྱི་ནང་གཉིས་སུ་རང་ལུས་མེར་བསྲེགས་གནང་མཁན་དག་གི་མངོན་འདོད་རྒྱལ་སྤྱིའི་ཐོག་ཁྱབ་བསྒྲགས་ཆེད་བྷེལ་ཇམ་གྱི་རྒྱལ་ས་སྦ་རཱ་སིལ་ནས་མགོ་བཙུགས་ཏེ། ཡུ་རོབ་ནང་གི་རྒྱལ་ཁབ་ཁག་ ༡༣ གྱི་གྲོང་ཁྱེར་དང་གྲོང་བརྡལ་ ༢༠༠ ཙམ་ནང་རྐང་འཁོར་སྐོར་སྐྱོད་གྱི་ལས་འགུལ་ཞིག་སྤེལ་བཞིན་ཡོད་འདུག
བྷེལ་ཇམ་དུ་གནས་སྡོད་བློ་གྲོས་རྣམ་རྒྱལ་ལགས་ཀྱིས་གནས་ཚུལ་མཁོ་སྤྲོད་གནང་པ་ལྟར་ན། གཟའ་ཉི་མའི་ཉིན་བྷེལ་ཇམ་བོད་རིགས་ཚོགས་པ་དང་ས་གནས་གཞོན་ནུ། ས་གནས་ཆུ་སྒང་བཅས་ཀྱི་གོ་སྒྲིག་འོག བྷེལ་ཇམ་རྒྱལ་ས་སྦ་རཱ་སིལ་ནང་། རིན་པོ་ལགས་ཀྱི་ལས་འགུལ་མགོ་འཛུགས་མཛད་སྒོ་ཞིག་ཚོགས་པའི་སྟེང་། ཚོགས་པ་ཁག་གི་མཛད་གཙོ་རྣམ་པས་ཁོང་གི་ལས་འགུལ་ལ་རྒྱབ་སྐྱོར་གྱི་གཏམ་བཤད་སྤེལ་མཐར། ཚོགས་པ་ཁག་དང་ས་གནས་བོད་རིགས་དང་བོད་དོན་རྒྱབ་སྐྱོར་བ་བཅས་ཁོང་ལ་ཕེབས་སྐྱེལ་བྱས་ཡོད་འདུག
རིན་པོ་ལགས་ཀྱི་རྐང་འཁོར་སྐོར་སྐྱོད་སྐབས་འགྲེམས་སྤེལ་བྱེད་བཞིན་པའི་འབོད་སྐུལ་ཡིག་ཆའི་ནང་། མཉམ་འབྲེལ་རྒྱལ་ཚོགས་དང་། ཡུ་རོབ་མཐུན་ཚོགས་དང་དེའི་ཁོངས་མི་རྒྱལ་ཁབ་ཁག་གིས་བོད་ནང་གི་རང་ལུས་མེར་བསྲེགས་གནང་མཁན་ཚོའི་མངོན་འདོད་དེ། བོད་མིར་རང་དབང་དགོས། ༧གོང་ས་མཆོག་ཕྱིར་བོད་དུ་ཕེབས་འཇུག་དགོས་ཞེས་པར་རྒྱབ་སྐྱོར་ཐོག རྒྱ་གཞུང་ལ་དངོས་ཤུགས་བརྒྱུད་གསུམ་ནས་གནོན་ཤུགས་སྤྲོད་དགོས་པའི་འབོད་སྐུལ་ཞུས་འདུག
ཡིག་ཆ་དེར། རྒྱ་གཞུང་གིས་བོད་མིར་དྲག་གནོན་མནར་གཅོད་བཟོད་ཐབས་མེད་པ་བཟོ་བཞིན་པ་དེ་དག་ཐབས་ལམ་སྣ་ཚོགས་བརྒྱུད་འགོག་ཐབས་དང་བོད་ཀྱི་རྩ་དོན་སེལ་རྒྱུར་རྒྱ་གཞུང་ལ་གནོན་ཤུགས་སྤྲོད་རྒྱུ་བཅས་ནི་རྒྱལ་སྤྱིའི་སྤྱི་ཚོགས་ཀྱི་བསྒྲུབ་དགོས་པའི་འགན་འཁྲི་ཡིན་སྟབས། ཁོང་བོད་ནང་གི་སྤུན་ཟླ་བོད་མི་ཚོའི་མགྲིན་ཚབ་བྱས་ཏེ། ཡུ་རོབ་རྒྱལ་ཁབ་ཁག་གི་མགོ་ཁྲིད་རྣམ་པ་དང་ཤེས་ཡོན་ཅན། སློབ་ཕྲུག མི་མང་བཅས་ཀྱིས། ༡༽ རྒྱ་གཞུང་གིས་བོད་ཐོག་འཛིན་པའི་མཁྲེགས་འཛིན་སྲིད་ཇུས་ལ་བསྐྱར་ཞིབ་ཀྱིས་བོད་མིའི་དངོས་ཡོད་དཀའ་ངལ་རྣམས་གྲོས་མོལ་བརྒྱུད་སེལ་ཐབས་བྱ་དགོས་པ་དང་། ༢༽ མཉམ་འབྲེལ་རྒྱལ་ཚོགས་དང་རྒྱལ་སྤྱིའི་རྟོག་ཞིབ་མི་སྣ། རང་དབང་ཅན་གྱི་གསར་འགོད་པ་བཅས་བོད་ནང་བསྐྱོད་བཅུག་སྟེ། བོད་མིའི་རང་ལུས་མེར་བསྲེགས་གནས་སྟངས་དང་དེའི་རྒྱུ་རྐྱེན་ལ་རྒྱུས་ལོན་རྟོག་ཞིབ་བྱེད་འཇུག་རྒྱུ་བཅས་ཀྱི་ཐད་རྒྱ་གཞུང་ལ་སྐུལ་འདེད་གནང་དགོས་པའི་འབོད་སྐུལ་ཞུས་འདུག
རིན་པོ་ལགས་ཀྱིས་རྒྱལ་ཁབ་དེ་དག་ནང་སྐོར་སྐྱོད་ཀྱིས་མཚན་རྟགས་བསྡུ་རིབ་གནང་རྗེས་མཉམ་འབྲེལ་རྒྱལ་ཚོགས་དང་ཡུ་རོབ་མཐུན་ཚོགས། ཡུ་རོབ་མཐུན་ཚོགས་ཀྱི་ཁོངས་མི་རྒྱབ་ཁབ་ཁག་བཅས་ལ་འབུལ་རྒྱུ་ཡིན་འདུག
ཐེངས་འདིའི་རིན་པོ་ལགས་ཀྱི་རྐང་འཁོར་སྐོར་སྐྱོད་བྱེད་ཡུལ་ནི་བྷེལ་ཇམ་ནས་ཧྥ་རན་སི་དང་། སི་པེན། ཨི་ཊ་ལེ། སུད་སི། ཨོ་སི་ཀྲོ་རི་ཡ། ཅེ་ཀི་སྤྱི་མཐུན་རྒྱལ་ཁབ། འཇར་མན། སུ་ཝེ་ཌན། ནོར་ཝེ། ཌན་མཀ ཧོ་ལན་ཌི། དབྱིན་ཡུལ་བཅས་ཡིན་འདུག
གསར་འགོད་པས་རིན་པོ་ལགས་སུ་ཁ་པར་བརྒྱུད་འབྲེལ་བ་བྱས་ཀྱང་མཐུད་ཐུབ་མ་བྱུང་སྟབས། བློ་གྲོས་རྣམ་རྒྱལ་ལགས་སུ་ཁ་པར་བརྒྱུད་གནས་ཚུལ་རྒྱུས་ལོན་བྱས་པར། རིན་པོ་ཁོང་གིས་ནམ་རྒྱུན་རང་ཉིད་སློབ་སྦྱོང་ཡག་པོ་ཡོད་མཁན་ཞིག་མིན་ཡང་། བོད་ཀྱི་རྩ་དོན་དང་ལྷག་པར་དུ་རང་སྲོག་བློས་གཏོང་གིས་རང་ལུས་མེར་བསྲེགས་གནང་མཁན་བོད་མི་ཚོའི་མངོན་འདོད་རྒྱལ་སྤྱིའི་སྟེངས་བསྐྱལ་རྒྱུ་དང་རྒྱབ་སྐྱོར་རག་ཐབས་སུ་སོ་སོ་བོད་མི་ཞིག་གི་ངོས་ནས་རང་འགན་རང་ཁུར་གྱིས་ནུས་པ་རེ་འདོན་ཐབས་བྱེད་ཀྱི་སྐོར་བརྗོད་འདུག
རིན་པོ་ལགས་ཀྱི་སྐྱེས་ཡུལ་བོད་ཡིན་པ་དང་རྒྱ་གར་ནང་བཙན་བྱོལ་དུ་འབྱོར་རྗེས་ ༡༩༩༨ ལོར་ཨ་རིར་གནས་སྤོར་བྱས་ཤིང་། ༢༠༠༠ ལོའི་པཎ་ཆེན་རིན་པོ་ཆེའི་འཁྲུངས་སྐར་དང་བསྟུན་ཏེ། ཨ་རིའི་མངའ་སྡེ་མེ་ནེ་སོ་ཊ་ནས་མགོ་འཛུགས་ཐོག ད་སྔ་ཨ་རིའི་མངའ་སྡེ་ ༤༤ ནང་མེལ་ལེ་ ༨༤༠༠ ལྷག་ལ་རྐང་འཁོར་སྐོར་སྐྱོད་ཀྱི་ལས་འགུལ་ཐེངས་ ༢༤ དང་། ཕྱག་འཚམ་ནས་སྐྱོད་པའི་ལས་འགུལ་ཐེངས་གཉིས། གོམ་བགྲོད་ལས་འགུལ་ཐེངས་གཉིས་བཅས་སྤེལ་ཡོད་འདུག
གསར་འགོད་པ། བནྡེ་སྐྱབས།
༄༅། །རིན་པོ་ལགས་ནི་དེ་སྔོན་རྒྱལ་སྤྱིའི་བོད་རང་བཙན་ལས་འགུལ་ཚོགས་པས་གོ་སྒྲིག་གནང་བའི་རྐང་འཁོར་སྐོར་བསྐྱོད་དང་ཞི་བའི་གོམ་བགྲོད་སོགས་ཐེངས་ཁ་ཤས་གནང་མྱོང་ཡོད་པ་མ་ཟད་གུས་རང་ཀྱང་རིན་པོ་ལགས་དང་མཉམ་དུ་གོམ་བགྲོད་ཐེངས་རེ་གཉིས་ཙམ་བྱེད་རྒྱུ་བྱུང་བས་དགའ་འཚོར་ཡོད། ད་རེའི་རྐང་འཁོར་བསྐོར་བསྐྱོད་འདི་བཞིན་སྐུ་གཟུགས་གསལ་ཐང་ཐོག་ལམ་ལྷོངས་ཡོང་བའི་སྨོན་བདུན་ཞུ། །
རིན་པོ་ལགས་ཀྱི་སྐྱེས་ཡུལ་བོད་ཨ་མདོ་རྔ་བ་ཡིན་པ་དང་རྒྱ་གར་ནང་བཙན་བྱོལ་དུ་འབྱོར་རྗེས་ ༡༩༩༨ ལོར་ཨ་རིར་གནས་སྤོར་བྱས་ཤིང་། ༢༠༠༠ ལོའི་པཎ་ཆེན་རིན་པོ་ཆེའི་འཁྲུངས་སྐར་དང་བསྟུན་ཏེ། ཨ་རིའི་མངའ་སྡེ་མེ་ནེ་སོ་ཊ་ནས་མགོ་འཛུགས་ཐོག ད་སྔ་ཨ་རིའི་མངའ་སྡེ་ ༤༤ ནང་མེལ་ལེ་ ༨༤༠༠ ལྷག་ལ་རྐང་འཁོར་སྐོར་སྐྱོད་ཀྱི་ལས་འགུལ་ཐེངས་ ༢༤ དང་། ཕྱག་འཚམ་ནས་སྐྱོད་པའི་ལས་འགུལ་ཐེངས་གཉིས། གོམ་བགྲོད་ལས་འགུལ་ཐེངས་གཉིས་བཅས་སྤེལ་ཡོད་འདུག
ཡང་བསྐྱར་རིན་པོ་ལགས་ཀྱིས། བོད་ཕྱི་ནང་གཉིས་སུ་རང་ལུས་མེར་བསྲེགས་གནང་མཁན་དག་གི་མངོན་འདོད་རྒྱལ་སྤྱིའི་ཐོག་ཁྱབ་བསྒྲགས་ཆེད་བྷེལ་ཇམ་གྱི་རྒྱལ་ས་སྦ་རཱ་སིལ་ནས་མགོ་བཙུགས་ཏེ། ཡུ་རོབ་ནང་གི་རྒྱལ་ཁབ་ཁག་ ༡༣ གྱི་གྲོང་ཁྱེར་དང་གྲོང་བརྡལ་ ༢༠༠ ཙམ་ནང་རྐང་འཁོར་སྐོར་སྐྱོད་གྱི་ལས་འགུལ་ཞིག་སྤེལ་བཞིན་ཡོད་འདུག་པས་ཐུགས་རྗེ་ཆེ་ཞུ།
ལས་འགུལ་འདི་ནི། བོད་མི་སྒེར་བ་ཞིག་ལ་འཁྲི་བའི་ལས་འགུལ་དང་བླངས་བྱས་པ་ནི། རང་འགུལ་རང་རྟོགས་ཀྱི་བསམ་བློ་དང་འགན་སེམས་ཤིག་ཡོད་པ་མཚོན་གྱི་འདུག ཡང་བསྐྱར་ཁ་དྲོ་བཀྲ་ཤིས་ཞུ་རྒྱུ་ཡིན།