བོད་ཡིག་འཁྲིད་སྤེལ་ཐད་བོད་མིའི་སྒྲིག་འཛུགས་ལ་རེ་བ་ཆེན་པོ་འཆང་འདུག

དེང་སྐབས་ཧི་མ་ལ་ཡའི་རི་རྒྱུད་ཀྱི་དགོན་སྡེ་དང་སློབ་གྲྭ་ཙམ་མིན་པར། མང་ཚོགས་རང་བཞིན་གྱིས་བོད་སྐད་བོད་ཡིག་ལ་དོ་སྣང་ཆེ་རུ་འགྲོ་བཞིན་ཡོད་སྟབས། མ་འོངས་པར་བཙན་བྱོལ་བོད་མིའི་སྤྱི་ཚོགས་ལས་ཧི་མ་ལ་ཡའི་རི་རྒྱུད་བོད་པའི་རིག་གཞུང་རྒྱུན་འཛིན་ཐོག་གལ་ཆེན་ཆགས་འདུག་ཟེར།

ཉེ་ལམ་གསར་འགོད་པས་ཕྱི་ལོ་ ༢༠༠༩ ལོ་ནས་ཧི་མ་ལ་ཡའི་རི་རྒྱུད་སྤི་ཏི་ས་གནས་ཀྱི་བཙུན་དགོན་དུ་དགེ་རྒན་བྱས་མྱོང་ཞིང་། ད་ལྟ་སྤི་ཏི་གསེར་ཀོང་སྒེར་བཙུགས་སློབ་གྲྭའི་ནང་བོད་ཡིག་དགེ་རྒན་གནང་བཞིན་པ་བཀྲ་ཤིས་ཚེ་རིང་ལགས་སུ། ཧི་མ་ལ་ཡའི་རི་རྒྱུད་ཀྱི་དགོན་སྡེ་དང་སློབ་གྲྭ དེ་བཞིན་མི་མང་ཚོར་བོད་ཡིག་བོད་སྐད་དང་། བོད་པའི་རིག་གཞུང་ཐོག་དོ་སྣང་གང་འདྲ་ཡོད་མེད་སྐོར་ལ་གླེང་མོལ་བྱས་ཡོད།

དགེ་རྒན་བཀྲ་ཤིས་ཚེ་རིང་ལགས་ཀྱིས་བརྗོད་པ་ལྟར་ན། ཧི་མ་ལ་ཡའི་རི་རྒྱུད་སྤི་ཏི་ཁུལ་དུ་དགོན་ཁག་ལྔ་དང་བཙུན་དགོན་བཞི། གཞུང་གི་སློབ་གྲྭ་ཁགརྟ་ཕོ་དགོན་དང་གསེར་ཀོང་། དཀྱིལ་དགོན་པ་བཅས་སུ་སྒེར་བཙུགས་སློབ་གྲྭ་ ༣ ཙམ་ཡོད་འདུག དེ་སྔོན་དགོན་སྡེ་ཁག་ལས་སློབ་གྲྭ་ཁག་ནང་བོད་སྐད་ཡིག་གི་ས་མིག་མ་སྟོང་ཙམ་ལས་མེད་ཀྱང་། ༸གོང་ས་མཆོག་ལོ་རེར་ཧི་མ་ལ་ཡའི་རི་རྒྱུད་དུ་ཐེངས་རེ་ཕེབས་ཏེ་བོད་ཀྱི་ཆོས་དང་རིག་གཞུང་ངོ་སྤྲོད་གནང་རྒྱུའི་ཞལ་བཞེས་གནང་བ་དང་། སྔོན་ཆད་ཐེངས་མང་པོར་ཕེབས་ཏེ་ལམ་སྟོན་བཀའ་སློབ་གནང་བ། ལྷག་པར་དུ་༸གོང་ས་མཆོག་གིས་ཧི་མ་ལ་ཡའི་རི་རྒྱུད་ཁག་ལ་དགེ་རྒན་དུ་བོད་ཡིག་དགེ་རྒན་བྱེད་པར་འགྲོ་མཁན་ཚོར་དམིགས་བསལ་མཇལ་ཁ་དང་། རྒྱ་ནག་གཞུང་གིས་བོད་པའི་རིག་གཞུང་རྩ་མེད་གཏོང་རྒྱུའི་ཐབས་ཇུས་འདྲ་མིན་བཏང་སྟེ། བོད་ནང་གི་གནས་སྟངས་ཧ་ཅང་ཛ་དྲག་ཆགས་པའི་སྐབས་འདིར། ཧི་མ་ལ་ཡའི་རི་རྒྱུད་ཁུལ་དུ་བོད་ཡིག་དགེ་རྒན་དུ་ཕེབས་མཁན་ཚོས་ཤུགས་རྒྱག་དགོས་པའི་བཀའ་སློབ་ཐེངས་མང་གནང་བ་བཅས་ལ་བརྟེན་ཏེ། བོད་པའི་གྲྭ་བཙུན་དང་སློབ་ཐོན་སློབ་མ་མང་པོ་སྔ་ཕྱིར་ཧི་མ་ལ་ཡའི་རི་རྒྱུད་ཁག་ནང་ཕྱིན་ཏེ་ནང་ཆོས་ངོ་སྤྲོད་དང་བོད་ཡིག་བོད་སྐད་ཁྲིད་སྤེལ་བྱས་སྟབས།དེང་སྐབས་ཧི་མ་ལ་ཡའི་རི་རྒྱུད་ཀྱི་མི་མང་ཚོས་ནང་ཆོས་སློབ་གཉེར་ལ་དོ་སྣང་ཆེན་པོ་བྱེད་ཀྱི་ཡོད་ཅིང་། ནང་ཆོས་བསླབ་པར་བོད་སྐད་བོད་ཡིག་གལ་ཆེན་ཆགས་ཡོད་པར་ངོས་ཟིན་བྱུང་སྟེ། ས་ཁུལ་དེ་དག་གི་གནད་ཡོད་མི་སྣ་ཚོས་བྷོ་ཊི་སྐད་ཡིག་དེ་རྒྱ་གར་གཞུང་གི་རྩ་ཁྲིམས་ནང་ངོས་འཛིན་ཡོང་ཐབས་ལ་འབད་བརྩོན་བྱེད་བཞིན་ཡོད་འདུག

ཁོང་ལ་མཚོན་ན། ༢༠༡༠ ལོར་གསེར་ཀོང་སྒེར་བཙུགས་སློབ་གྲྭའི་བོད་ཡིག་དགེ་རྒན་གནང་ཡོད་པ་དང་། སློབ་གྲྭ་དེར་སྤི་ཏི་དང་ཁུ་ནུ་སྟོད་སྨད་སོགས་ཀྱི་སློབ་ཕྲུག་  ༤༠༠ ཙམ་ཡོད་འདུགད་ལྟའི་ཆར་འཛིན་རིམ་ ༦ པ་ནས་བཅུ་བའི་བར་གྱི་སློབ་མ་ཚོར་སློབ་ཁྲིད་བྱེད་ཀྱི་ཡོད་པ་དང་། དེ་སྔའི་གཏན་འབེབས་ཀྱི་སློབ་དེབ་ཁག་ཁོང་ཚོའི་གནས་ཚད་དང་འཚམ་མིན་གྱི་དབང་གིས་ཁོ་རང་སྒེར་གྱིས་བོད་ཡིག་གི་སློབ་ཚན་གྲྭ་སྒྲིག་བྱས་ཏེ། སློབ་མའི་གནས་ཚད་ལ་གཞིགས་ཏེ་སློབ་ཁྲིད་གནང་བའི་ཞོར་དུ། ས་གནས་ཀྱི་མི་རབས་རྒན་པའི་ངག་ནས་དམངས་སྒྲུང་དང་བྱིས་སྒྲུང་རིགས་སྒྲ་འཇུག་གིས་ཡིག་ཐོག་ཏུ་ཕབ་ཏེ་སློབ་ཁྲིད་བྱེད་ཀྱི་ཡོད་འདུག དེ་བཞིན། བོད་ཡིག་གི་དེབ་འདྲ་མིན་དང་ཚགས་པར་སོགས་ཀློག་འདོན་བྱེད་དུ་བཅུག་སྟེ་བོད་ཡིག་ལ་དོ་སྣང་དང་དབྱིངས་སླེབས་ཐབས་བྱེད་ཀྱི་ཡོད་འདུག

ཁོང་ལ་ད་ཆར་སྤི་ཏི་ཕྱོགས་སུ་བོད་རིགས་དགེ་རྒན་ག་ཚོད་ཡོད་མེད་དང་། བོད་དགེ་ཚོར་དཀའ་ངལ་གང་དག་འཕྲད་ཀྱི་ཡོད་མེད་དྲིས་པར། “ སྤི་ཏིར་མཚོན་ན། ཕྱི་ལོགས་ནས་ཕེབས་པའི་བོད་ཡིག་དགེ་རྒན་ ༡༠ མ་ཟིན་ཙམ་འདུག དགེ་རྒན་ཚོའི་དཀའ་ངལ་གཙོ་བོ་གླ་ཆ་དང་མཐུན་རྐྱེན་རེད། བཞུགས་སྒར་གཡས་གཡོན་ལ་མཚོན་ན་ལས་བྱེད་མང་ཆེ་བ་ཧིན་སྒོར་ ༡༠༠༠༠ སྒང་རེད། ཕར་ཕྱོགས་ཀྱི་དགེ་རྒན་མང་ཆེ་བར་ཧིན་སྒོར་ ༥༠༠༠ ཡས་མས་ལས་ཡོད་པ་མ་རེད། ས་ཁུལ་དེར་སྤྱིར་བཏིང་འཚོ་བའི་ཡོ་བྱེད་དང་འགྲིམ་འགྲུལ། གླ་ཆ་སོགས་གང་ཅིའི་ཐད་ནས་སྐྱོ་བོ་ཡིན་སྟབས་དགེ་རྒན་མང་པོ་ཞིག་འདུག་འདོད་བྱེད་ཀྱི་ཡོད་པ་མ་རེད། ཧི་མ་ལ་ཡའི་རི་རྒྱུད་དུ་ཕྱིན་ཏེ་དགེ་རྒན་བྱེད་འདོད་མཁན་ཞིག་ཡིན་ཚེ་ཉུང་མཐར་ལོ་གསུམ་བཞི་རེར་བསྡད་ན་ཕན་ཐོགས་ཆེན་པོ་ཡོང་གི་འདུག དེ་མ་གཏོགས་དང་པོ་སྐད་མགོ་འཚོས་མིན་དང་དགེ་སློབ་བར་གོམས་འདྲིས་ཐུབ་མིན་སོགས་ལ་དཀའ་ངལ་ཏོག་ཙམ་འདུག” ཅེས་བརྗོད་བྱུང་།

ཁོང་ལ་བཙན་བྱོལ་བོད་མིའི་སྤྱི་ཚོགས་དང་ཧི་མ་ལ་ཡའི་རི་རྒྱུད་བར་བོད་ཡིག་སློབ་སྦྱོང་བྱེད་སྟངས་ཐོག་ཁྱད་པར་མཐོང་གི་ཡོད་མེད་དྲིས་པར། “ བཙན་བྱོལ་བོད་མིའི་སྤྱི་ཚོགས་ཀྱི་སློབ་གྲྭ་ཚང་མའི་ནང་བོད་ཡིག་འཁྲིད་ཀྱི་ཡོད་ཀྱང་། བོད་ཡིག་བོད་སྐད་ཐོག་དགེ་སློབ་གཉིས་ཀར་ཡིད་ཆེས་ཡོང་ཐུབ་ཀྱི་མེད་པའི་རྣམ་པ་ཞིག་ཡོད་པ་རེད། ཧི་མ་ལ་ཡའི་རི་རྒྱུད་ཁུལ་དུ་བོད་ཡིག་ཐོག་དོ་སྣང་ཆེན་པོ་རེད། ང་རང་གི་བསམ་པར། མ་འོངས་པར་བོད་ཡིག་བོད་སྐད་རྒྱུན་འཛིན་བྱེད་ས་ཧི་མ་ལ་ཡའི་རི་རྒྱུད་ཡག་ཤོས་ཆགས་ཀྱི་འདུག ས་ཆའི་གནས་བབ་དང་རྟ་ནོར་ལུག་གསུམ། དེ་བཞིན་ཡུལ་གོམས་གཤིས་ལུགས་དང་ཅ་དངོས་ཚུན་ཆད་བོད་ནང་གི་འབྲོག་ས་དང་གཅིག་པ་རེད། བཙན་བྱོལ་སྤྱི་ཚོགས་དང་ནུབ་ཕྱོགས་ཁག་ཏུ་རེ་བ་རྒྱག་པ་ལས་ཧི་མ་ལ་ཡའི་རི་རྒྱུད་དང་། ལྷག་པར་དུ་ལ་དྭགས་ཕྱོགས་བོད་པའི་སྐད་ཡིག་རིག་གཞུང་ཉར་ཚགས་བྱེད་ས་ཡག་ཤོས་ཤིག་ཏུ་མཐོང་སོང” ཞེས་བརྗོད་བྱུང་།

མཇུག་ཏུ་ཁོང་ལ་བོད་པའི་ངོས་ནས་ཁོང་ཚོར་མཐུན་འགྱུར་ཞུ་དགོས་པ་གང་དག་ཡོད་མེད་དྲིས་པར། “ དེང་སྐབས་ཧི་མ་ལ་ཡའི་རི་རྒྱུད་ཁུལ་དང་། ལ་དྭགས་ཕྱོགས་ནས་ཕྲུ་གུ་ཚོ་བཙན་བྱོལ་བོད་པའི་དགོན་སྡེ་ཁག་དང་། བོད་མིའི་སློབ་གྲྭ་ཁག་ནང་གཏོང་འདོད་ཆེན་པོ་བྱེད་ཀྱི་ཡོད་པ་རེད། རྒྱ་གར་སློབ་གྲྭའི་ནང་གཏོང་འདོད་ཡོད་པ་མ་རེད། ཡིན་ནའང་ས་གནས་རང་གི་སློབ་གྲྭ་ཁག་ནང་བོད་ཡིག་དགེ་རྒན་ཡག་པོ་མ་རག་པ་དང་། བོད་ཡིག་གི་སློབ་དེབ་གཅིག་གྱུར་མེད་པའི་དཀའ་ངལ་འཕྲད་བཞིན་འདུག དཀའ་ངལ་འདི་སེལ་ཐབས་ལ་བོད་མིའི་སྒྲིག་འཛུགས་དང་གཞུང་འབྲེལ་མིན་པའི་ཚོགས་པ་ཁག་ལ་རེ་བ་ཆེན་པོ་གནང་གི་འདུག བོད་མིའི་སྒྲིག་འཛུགས་དང་ཤེས་རིག་ལས་ཁུངས། བོད་པའི་སློབ་གྲྭ་ཁག་གིས་ཁོང་ཚོ་དང་འབྲེལ་བ་བྱས་ཏེ། བོད་དགེ་དང་བོད་ཡིག་སློབ་དེབ་ཐོག་རོགས་རམ་ཞིག་གནང་ཐུབ་པ་ཡིན་ན་ཕན་ཐོགས་ཆེན་པོ་ཡོང་ས་རེད” ཅེས་བརྗོད་བྱུང་།

གསར་འགོད་པ། དོན་གོ