གཟའ་ཟླ་བའི་ཉིན་ཨ་རིའི་གྲོང་ཁྱེར་བྷོ་སི་ཊོན་ནང་འཚོགས་བཞིན་པའི་རྒྱང་རྒྱུག་འགྲན་བསྡུར་སྐབས་འགད་རྫས་དོན་རྐྱེན་བྱུང་སྟེ། མི་ ༣ རྐྱེན་ལམ་དུ་བཏང་ཡོད་པ་དང་། མི་ ༡༤༠ ལྷག་ལ་རྨས་སྐྱོན་ཕོག་འདུག
ཁ་སང་ཕྱི་ཚེས་ ༡༥ ཉིན་གྱི་ཕྱི་དྲོ་ཨ་རིའི་མངའ་སྡེ་མཱ་སེ་ཆུ་སེ་ཊི་ (Massachusetts) ཡི་གྲོང་ཁྱེར་བྷོ་སི་ཊོན་ (Boston) ནང་འཚོགས་བཞིན་པའི་ལོ་འཁོར་རྒྱང་རྒྱུག་འགྲན་བསྡུར་ཆེན་མོའི་སྐབས། རྒྱང་རྒྱུག་མཐའ་ཐུག་གི་ཉེ་འགྲམ་དུ་འགད་རྫས་གཉིས་གཏོར་ཏེ། མི་ ༣ རྐྱེན་ལམ་དུ་བཏང་ཡོད་པ་དང་། མི་ ༡༤༠ ལྷག་ལ་རྨས་སྐྱོན་ཕོག་སྟེ་སྨན་ཁང་དུ་ཁྲིད་ཡོད་པའི་ཁྲོད་ཀྱི་མི་ ༡༧ ཙམ་ཉེན་ཁའི་གནས་སུ་གྱར་ཡོད་འདུག གཞན་རྨས་སྐྱོན་ཕོག་མཁན་ཁྲོད་རྐང་ལག་བཅད་པ་སོགས་དབང་བོ་སྐྱོན་ཅན་བཟོས་པའི་རིགས་མང་པོ་བྱུང་ཡོད་འདུག
ད་སྔ་ཨ་རིའི་གསང་བའི་ལས་ཁུངས་དང་ཉེན་རྟོག་ལས་ཁུངས་བཅས་ཀྱིས་འགད་རྫས་གཏོར་མཁན་སུ་ཡིན་མིན་ཞིབ་འཇུག་བྱེད་བཞིན་པ་ལས་ཁ་གསལ་ཤེས་རྟོགས་བྱུང་མེད་པ་དང་། འགད་རྫས་དོན་རྐྱེན་འོག་འདས་གྲོངས་ཕྱིན་པ་དང་རྨས་སྐྱོན་ཕོག་མཁན་ཚོའི་ཞིབ་ཕྲའི་གནས་ཚུལ་ཕྱིར་བསྒྲགས་བྱས་མེད་ཀྱང་། སྐོང་འཇོག་བྱས་པའི་འགད་རྫས་གཞན་གཉིས་འགད་རྫས་གཏོར་ཡུལ་གྱི་ཉེ་འཁྲིས་ནས་རྙེད་སོན་བྱུང་ཡོད་སྐོར་བརྗོད་འདུག
བྷོ་སི་ཊོན་རྒྱང་རྒྱུག་ཆེན་མོ་འདི་ནི། ༡༧༧༥ ལོའི་ཨ་རིའི་གསར་བརྗེ་དམག་འཁྲུག་གི་དྲན་གསོའི་རྩེད་འགྲན་ཞིག་དང་། ཨ་རིའི་རྒྱལ་ཁོངས་ཀྱི་ལོ་འཁོར་རྩེད་འགྲན་ཆེ་ཤོས་ཤིག་ཡིན་པ་མ་ཟད། འཛམ་གླིང་ནང་གི་ལོ་འཁོར་རྒྱང་རྒྱུག་རྩེད་འགྲན་རྙིང་ཤོས་དེ་ཡིན་འདུག ཐེངས་འདིའི་རྒྱང་རྒྱུག་འགྲན་བསྡུར་ཁྲོད་ཨ་རི་གཙོས་པའི་རྒྱལ་ཁབ་ ༩༠ ལྷག་གི་འཐུས་མི་ ༢༨༠༠༠ ཙམ་མཉམ་ཞུགས་བྱས་ཡོད་འདུག
ཨ་རིར་འབར་གས་ཀྱི་དོན་རྐྱེན་བྱུང་འཕྲལ་འཛམ་གླིང་གསར་འགྱུར་ཡོངས་རྫོགས་ཀྱིས་ད་བར་བཤད་རྒྱུ་མང་ཤོས་དང་། སྟོན་རྒྱུ་མང་ཤོས་དེའི་སྐོར་རེད་འདུག གནས་ཚུལ་འདི་མཐོང་དུས་རྒྱ་ནག་རྒྱལ་ས་པེའེ་ཅིན་དྲན་ཡོང་གི་འདུག་ལ། རང་རིགས་བརྒྱ་ལྷག་གི་ཚེ་སྲོག་བློས་བཏང་བ་ཡང་དྲན་ཡོང་། གང་ལྟར་རང་བློས་བཏང་བའི་མཉམ་པོོར་འདི་འདྲ་བོ་་་་་་་་་་་་་་་རྒྱལ་སྤྱིར་ཁྱབ་བསྒྲགས་དང་མི་མང་གི་དོ་སྣང་་་་་མི་འདི་ཚོ་འདྲ་བོ་བོད་པའི་ནང་ལ་མེད་མི་སྲིད་པ་རེད།