ཕྱི་ཚེས་ ༡༢ ཉིན། ཀན་ལྷོ་ཁུལ་ཀླུ་ཆུ་རྫོང་ཉེན་རྟོག་པ་དང་དྲག་ཆས་ཉེན་རྟོག་པས་ས་གནས་བོད་མིའི་ས་ཆ་བཙན་འཕྲོག་བྱས་ཡོད་པ་མ་ཟད། བོད་མི་ ༡༥ ཙམ་འཛིན་བཟུང་བཀག་ཉར་བྱས་ཡོད་འདུག
ཟླ་འདིའི་ཕྱི་ཚེས་ ༡༢ ཉིན། བོད་མདོ་སྨད་ཀན་ལྷོ་ཀླུ་ཆུ་རྫོང་ཉེན་རྟོག་པ་དང་དྲག་ཆས་ཉེན་རྟོག་པ་མི་གྲངས་ ༢༠༠ ཙམ། གློ་བུར་དུ་རྫོང་མཐའ་རུ་ས་ཆ་ཉོས་ཡོད་པའི་བོད་མི་ཚོའི་སར་ཡོང་ཏེ། ས་ཆ་དེ་དག་རྒྱལ་ཁབ་ཀྱི་ཡིན་པ་ལས་མི་སྒེར་གྱིས་ཉོ་བ་དང་བེད་སྤྱོད་བྱེད་པའི་དབང་ཆ་གང་ཡང་མེད་སྟབས། རྩིས་སྤྲོད་མ་བྱས་ན་བཙན་འཕྲོག་བྱ་རྒྱུ་ཡིན་ལུགས་ཀྱི་འཇིགས་སྐུལ་བྱས་སྐབས། ས་བདག་བོད་མི་ཚོས་ས་ཆ་དེ་ཚོ་སོ་སོས་རིན་གོང་ཆེན་པོ་སྤྲད་ནས་ཉོས་པ་ཡིན་པས་རྩིས་སྤྲོད་བྱ་རྒྱུ་མིན་ཚུལ་བརྗོད་དེ་ངོས་ལེན་མ་བྱས་པར་བརྟེན། གཉེན་རྟོག་པས་གཅར་རྡུང་བྱས་ནས་བོད་མི་ཚོ་སོ་སོའི་ས་ཐོག་ནས་ཕྱིར་ཕུད་བཏང་ཡོད་པ་མ་ཟད། འཕྲལ་དུ་ས་ཆ་དེར་ལྕགས་རྭས་བསྐོར་ཏེ་གཞུང་བཞེས་བྱས་ཟིན་པའི་བརྡ་ཁྱབ་སྦྱར་ཡོད་འདུག
གནས་ཚུལ་འདིའི་སྐོར་ཨེ་ཤ་ཡ་རང་དབང་རླུང་འཕྲིན་ཁང་གིས་རྒྱང་སྲིང་བྱས་དོན་ལྟར་ན། སྐབས་དེར་བོད་མི་ཚོས་ས་ཆ་རྩིས་སྤྲོད་བྱེད་འདོད་མེད་པའི་རྣམ་འགྱུར་བསྟན་སྟབས། ཉེན་རྟོག་པས་ཁོ་ཚོར་གཅར་རྡུང་དྲག་པོ་བཏང་བ་མ་ཟད། ས་བདག་དར་རྒྱས་དང་མགོན་པོ་སྐྱབས་སོགས་ཉུང་མཐར་མི་ ༡༥ ཙམ་འཛིན་བཟུང་བཙན་ཁྲིད་དང་། མི་གཅིག་རྨས་སྐྱོན་ཕོག་སྟེ་སྨན་ཁང་དུ་བསྐྱལ་ཡོད་འདུག
