ལྐོག་ཟ་བྱེད་མཁན་འདི་ལྟར་འཇོག་ན་རྒྱ་གར་གཞུང་ལ་གཏུག་རྒྱུ་ཡིན་ཟེར།

ཨ་རི་ནཱ་ཅལ་འབུམ་སྡེ་ལ་ས་གནས་གཞིས་མགོ་བཀྲ་ཤིས་ནོར་བུ་དང་བསྟན་འཛིན་སྒང་མཉམ་འབྲེལ་དྲུང་ཆེ་བསྟན་འཛིན་རིག་བཟང་གཉིས་ཀྱིས། རྒྱ་གར་གཞུང་གིས་བོད་རིགས་ཕྲུ་གུའི་འཚོ་སྣོན་ཆེད་སྤྲོད་བཞིན་པའི་ཧིན་སྒོར་འབུམ་ ༢ ལྷག་སྒེར་ཟ་བྱས་ཡོད་པ་ར་འཕྲོད་བྱུང་འདུག

ཨ་རི་ནཱ་ཅལ་འབུམ་སྡེ་ལ་ས་གནས་གཞིས་མགོ་བཀྲ་ཤིས་ནོར་བུ་དང་བསྟན་འཛིན་སྒང་ས་གནས་མཉམ་འབྲེལ་དྲུང་ཆེ་བསྟན་འཛིན་རིག་བཟང་གཉིས་ཀྱིས། བསྟན་འཛིན་སྒང་སྣ་འཛོམས་བདེ་དོན་མཐུན་ཚོགས་ (Tenzingang Multipurpose Welfare Society) ཞེས་པའི་ཚོགས་པའི་ཐམ་ག་དང་དངུལ་འཛིན། ཚོགས་པའི་རྩིས་ཁྲ་བཅས་རྫུན་བཟོ་བྱས་ཏེ། ལོ་ལྟར་རྒྱ་གར་གཞུང་གིས་ས་གནས་ཀྱི་ཕྲུ་གུ་རང་ལོ་ ༥ མན་ལ་འཚོ་སྣོན་དུ་སྤྲོད་བཞིན་པའི་རོགས་དངུལ་ཧིན་སྒོར་འབུམ་ ༢ ལྷག་སྒེར་སྤྱོད་བྱས་ཡོད་འདུག ༢༠༡༠ ལོ་དང་ ༢༠༡༡ ལོ་བཅས་སུ་རྒྱ་གར་གཞུང་གིས་རྩིས་ཞིབ་ལས་བྱེད་ས་གནས་སུ་འབྱོར་ཏེ་ཤེས་རྟོགས་བྱུང་བ་དང་། འདི་ལོའི་ཕྱི་ཟླ་ ༥ ཚེས་ ༡༧ ཉིན་ནང་སྲིད་བཀའ་བློན་རྒྱ་རི་སྒྲོལ་མ་མཆོག་དང་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ་རྣམ་གཉིས་འབུམ་སྡེ་ལར་གཞུང་འབྲེལ་ཕྱོགས་སྐྱོད་སྐབས། ས་གནས་མི་མང་གིས་གཞིས་མགོ་བཀྲ་ཤིས་ནོར་བུ་དང་བསྟན་འཛིན་རིག་བཟང་གཉིས་ཀྱིས་ཚོགས་པའི་ཐམ་ག་དང་དངུལ་འཛིན། རྩིས་ཁྲ་དང་བཅས་པ་རྫུན་བཟོ་བྱས་པའི་བདེན་དཔང་ར་སྤྲོད་བྱས་ཡོད་འདུག སྐབས་དེར་ནང་སྲིད་བཀའ་བློན་དང་དྲུང་ཆེ་གཉིས་ཀྱིས་ལས་བྱེད་དོ་བདག་གཉིས་འབོད་འགུག་གིས་སྐད་ཆ་དྲིས་སྐབས་ངོས་ལེན་བྱས་ཡོད་པ་དང་། ཉེ་ལམ་ནང་སྲིད་ལས་ཁུངས་ཀྱིས་བཀའ་ཤག་ལ་སྙན་སེང་ཞུས་རྗེས། གཞིས་མགོ་བཀྲ་ཤིས་ནོར་བུ་ཕྱིར་ནང་སྲིད་ལས་ཁུངས་ལ་གནས་སྤོར་གྱིས་གནས་རིམ་གཅིག་མར་ཕབ་སྟེ་ཧིན་སྒོར་ ༢༥༠༠༠ ཉེས་ཆད་དང་། བསྟན་འཛིན་རིག་བཟང་ལ་ཧིན་སྒོར་ ༥༠༠༠༠ བཅས་ཀྱི་ཉེས་ཆད་བཏང་ཡོད་འདུག

ཕྱི་ཚེས་ ༧ ཉིན་གྱི་སྔ་དྲོར་ཨ་རི་ནཱ་ཅལ་བསྟན་འཛིན་སྒང་གཞིས་གྲོང་གཉིས་པའི་བློ་བཟང་རྒྱལ་མཚན་ལགས་འདི་ག་གསར་ཁང་ལ་བཅར་ཏེ། གཞིས་མགོ་བཀྲ་ཤིས་ནོར་བུ་དང་མཉམ་དྲུང་བསྟན་འཛིན་རིག་བཟང་གཉིས་ཀྱིས་ཚོགས་པ་དེབ་སྐྱེལ་གྱི་ཡིག་ཆ་རྫུན་བཟོ་བྱས་པའི་ཁུངས་སྐྱེལ་ཡིག་ཆ་དང་། ཨ་རུ་ནཱ་ཅལ་སྤྱི་ཚོགས་བདེ་དོན་ལྷན་ཁང་(ARUNACHAL PRADESH STATE SOCIAL WELFARE BOARD) ནས་དངུལ་ག་ཚོད་བླངས་མིན་གྱི་ཁུངས་སྐྱེལ་ཡིག་ཆ་བཅས་མཉམ་འཁྱེར་གྱིས། ཕྱི་ལོ་ ༢༠༠༧ ལོ་ནས་བཟུང་རྒྱ་གར་སྤྱི་ཚོགས་བདེ་དོན་ཚོགས་པས་ས་གནས་ཀྱི་བྱིས་པའི་འཚོ་སྣོན་ཧིན་སྒོར་འབུམ་ ༢ ལྷག་ལྐོག་ཟ་བྱས་པ། གནས་ཚུལ་དེ་ཐོག་མར་ཕྱི་ལོ་ ༢༠༡༠ དང་ ༢༠༡༡ ལོར་རྒྱ་གར་གཞུང་གི་རྩིས་ཞིབ་ལས་བྱེད་ས་གནས་སུ་ཡོང་སྐབས། ཁོང་ཚོ་ལས་བྱེད་ནང་ཁུལ་མཐུན་གྱི་མེད་པའི་གནས་ཚུལ་བྱུང་ཡོད་པ་དང་། རིམ་གྱིས་ས་གནས་མང་ཚོགས་ཀྱིས་ཧ་གོ་ཡོད་པ་བཅས་ལ་བརྟེན་ཏེ། ཁོང་ལ་ལས་བྱེད་ཅིག་བརྒྱུད་བཀྲ་ཤིས་ནོར་བུ་དང་བསྟན་འཛིན་རིག་བཟང་གཉིས་ཀྱི་ལས་ཁུངས་དང་ཐམ་ག དངུལ་ཁང་འཛིན་བྱང་། དེབ་སྐྱེལ་ས་ཡིག་རྫུན་བཟོ་བྱས་པ་བཅས་ཀྱི་དཔང་རྟགས་ཡིག་ཆ་ཞིག་རག་རྗེས། ཁོས་རྒྱ་གར་གནས་ཚུལ་མཁོ་སྤྲོད་ (Right To Information) ལས་ཁུངས་ལ་སྙན་ཞུ་ཕུལ་ཏེ། མཐར་ཁོ་རང་གཉིས་ཀྱིས་ཁྱོན་ཧིན་སྒོར་ ༢།༥༠༧༢༨ སྒེར་ཟ་བྱས་ཡོད་པ་ར་འཕྲོད་ཡོད་སྐོར་ངོ་སྤྲོད་གནང་སོང་། 

ཁོང་ལ་བཀྲ་ཤིས་ནོར་བུ་དང་བསྟན་འཛིན་རིག་བཟང་གཉིས་ཀྱིས་ཚོགས་པ་རྫུན་བཟོ་བྱས་པའི་བདེན་དབང་ག་རེ་ཡོད་མེད་དྲིས་པར་ཁོང་གིས། “ སྤྱིར་བཏང་བསྟན་འཛིན་སྒང་དུ་ཁྲིམས་མཐུན་དེབ་སྐྱེལ་ཡོད་པའི་ཚོཊ་པ་རྒྱུད་སྟོད་མཉམ་འབྲེལ་མཐུན་ཚོགས་ (Gyedo TrantricCooperative Society) དང་། བསྟན་འཛིན་སྒང་མཉམ་འབྲེལ་མཐུན་ཚོགས་ (Tenzingang Multipurpose cooperative society) གཉིས་ལས་ཡོད་མ་རེད། ལོ་ཤས་གོང་ཁོ་རང་གཉིས་ཀྱིས་བསྟན་འཛིན་སྒང་ས་གནས་བདེ་དོན་ཚོགས་པ་ (Tenzingang Multipurpose Welfare Society) ཞེས་པ་ཞིག་རྫུན་བཟོ་བྱས་ཏེ། ཚོགས་པ་དེའི་མིང་ཐོག་ནས་དངུལ་བླངས་འདུག ང་ཚོའི་ས་གནས་ལ་ཚོགས་པ་དེ་འདྲ་ཞིག་མེད་པ་ངས་གསལ་བོར་ཞུ་ཐུབ་ཀྱི་ཡོད། དེབ་སྐྱེལ་ཡིག་ཆ་དེ་ཡང་བསྟན་འཛིན་རིག་བཟང་གིས་ཡི་གེ་བྲིས་ཏེ། དེ་སྔོན་གྱི་མཉམ་འབྲེལ་ཚོགས་གཙོ་ཕུན་ཚོགས་ཆོས་རྒྱལ་གྱིས་དངུལ་ཁང་གི་འཛིན་བྱང་བཟོ་ཆོག་པའི་ཆོག་མཆན་རྒྱབ་གཉེར་སྤྲད་དེ། ༢༠༠༦ ཟླ་ ༡༠ ཚེས་ ༢༠ ཉིན་ནས་ལོ་ ༤ རིང་ཚོགས་པ་དེས་ལས་ཀ་ཡག་པོ་བྱས་ཡོད་ཚུལ་བྲིས་འདུག 

སྙན་ཞུ་དང་ཚོགས་པའི་ཐམ་ག་བརྒྱུད་དངུལ་ལེན་ཐབས་སུ་ཕུན་ཚོགས་ཆོས་རྒྱལ་དང་སེ་ཡཱ། ཐུབ་བསྟན། བྱམས་པ་ཤེས་རབ། བློ་བཟང་ཡེ་ཤེས་བཅས་ཡི་གེ་ཤེས་མི་ཤེས་མང་པོ་ཞིག་གི་མཚན་རྟགས་བརྒྱབ་འདུག དེའི་ཐད་ཉེ་ཆར་ནང་སྲིད་བཀའ་བློན་དང་དྲུང་ཆེ་གཉིས་ས་གནས་སུ་ཕེབས་སྐབས། མི་སྣ་དེ་དག་གིས་མཚན་རྟགས་རྫུན་མ་ཡིན་པ་ར་འཕྲོད་གསལ་བོ་བྱུང་ཡོད་པ་རེད། སྔར་ལོའི་ཕྱི་ཟླ་ ༣ ཚེས་ ༡༢ ཉིན་ངས་རྒྱ་གར་གྱི་ (Right to Information)ལས་ཁུངས་ལ་སྙན་ཞུ་ཕུལ་བ་བཞིན་ད་ལོའི་ཕྱི་ཟླ་ ༡ ཚེས་ ༡༧ ཉིན་ང་ལ་གནས་ཚུལ་སྤྲད་པའི་ནང་། ༢༠༠༥ ནས་  ༢༠༠༧ ལོའི་བར་ཁྱོན་བསྡོམས་ཧིན་སྒོར་ ༢༥༠༧༢༨ ཙམ་ཁོ་རང་གཉིས་ཀྱིས་བླངས་འདུག ” ཅེས་བརྗོད་བྱུང་། 

ཡང་ཁོང་ལ་ནང་སྲིད་བཀའ་བློན་དང་དྲུང་ཆེ་རྣམ་གཉིས་ས་གནས་སུ་ཕེབས་སྐབས་ག་རེ་གསུངས་ཡོད་མེད་དྲིས་པར། ཁོང་གིས། “ ཟླ་སྔོན་མའི་ཕྱི་ཚེས་ ༡༧ ཉིན་ནང་སྲིད་བཀའ་བློན་མཆོག་དང་དྲུང་ཆེ་རྣམ་གཉིས་ས་གནས་ལ་ཡོང་སྟེ། བསྟན་འཛིན་སྒང་དུ་ཚོགས་འདུ་ཚོགས་སོང་། སྐབས་དེར་བཀྲ་ཤིས་ནོར་བུ་དང་བསྟན་འཛིན་རིག་བཟང་གཉིས་སྐད་བཏང་ཡོད་པ་རེད། ཉིན་དེར་ངས་གནས་ཚུལ་འདིའི་སྐོར་ཆ་ཚང་སྙན་སེང་ཞུས་པ་ཡིན། ཚེས་ ༡༨ ཉིན་འབུམ་སྡེ་ལར་ཁེ་ན་ཌར་འགྲོ་ཕྱོགས་སྐོར་གྱི་ཚོགས་འདུ་གྲུབ་རྗེས། བཀྲ་ཤིས་ནོར་བུ་མི་མང་ནང་ཡར་ལངས་ཏེ་ཁོང་གིས་ད་ལྟའི་བར་ས་གནས་སུ་ལས་ཀ་ཡག་པོ་བྱས་ཡོད་ཚུལ་དང་། མི་ལ་ནོར་འཁྲུལ་ཏོག་ཙམ་ཡོང་སྲིད་སྟབས། དགོངས་དག་ཞུས་པ་ཡིན་ཞེས་བཤད་བྱུང་། སྐབས་དེར་བཀའ་བློན་མཆོག་གིས། བཀྲ་ཤིས་ནོར་བུ་ཁྱེད་རང་ངོ་ཚ་རྒྱུ་མི་འདུག ཁྱོད་རང་གིས་བྱ་སྤྱོད་དེ་ནོར་བ་ཙམ་མ་རེད། བྱེད་སྟངས་དེ་ཇག་པ་དང་གཅིག་པ་རེད་ཅེས་གསུངས་སོང་། ཉིན་དེར་ང་དང་བཟང་པོ་གཉིས་ཀྱིས་སྙན་ཞུ་ཕུལ་ཏེ། ཐེངས་འདིར་སྤྱི་རྒྱུ་སྒེར་ཟ་བྱས་པའི་དཔང་རྟགས་ཆ་ཚང་རག་ཡོད་པ་རེད། ད་དུང་ཁུངས་སྐྱེལ་མེད་པའི་ལས་ཀ་ག་ཚོད་བྱས་ཡོད་མེད་ང་ཚོས་བཤད་ཐུབ་ཀྱི་མེད་སྟབས། ཐེངས་འདིར་ཁོང་གཉིས་ལས་གནས་ནས་ཕྱིར་འཕུད་གཏོང་དགོས་པའི་རེ་སྐུལ་ཞུས་ཡོད། ཡིན་ནའང་། བློ་ཕམ་ཆེ་ཤོས་ནང་སྲིད་ལས་ཁུངས་ཀྱིས་བཀྲ་ཤིས་ནོར་བུ་ས་གནས་ནས་གནས་སྤོར་གྱིས་ནང་སྲིད་ལས་ཁུངས་ནང་མུ་མཐུད་ལས་ཀ་བྱས་བཅུག་འདུག བསྟན་འཛིན་རིག་བཟང་ཡང་གནས་ཚུལ་གང་ཡང་མ་བྱུང་མདོག་མདོག་གིས་ལས་གནས་ཐོག་རང་འཇགས་བསྡད་ཡོད་པ་རེད། ང་ཚོའི་ངོས་ནས་ད་ལྟའི་བར་བོད་མིའི་སྒྲིག་འཛུགས་ལ་འབྲེལ་བ་བྱས་ཏེ་གནས་ཚུལ་ཆ་ཚང་ཞུས་ཡོད། གལ་སྲིད་ཁོ་རང་གཉིས་འདི་ལྟར་འཇོག་རྒྱུ་ཡིན་ན། ཐེངས་འདིའི་དངུལ་དེ་རྒྱ་གར་གཞུང་གི་དངུལ་ཡིན་སྟབས། ང་ཚོའི་རྒྱ་གར་གཞུང་གི་ཆེས་མཐོའི་ཁྲིམས་ཁང་ལ་བསྐྱལ་རྒྱུ་ཡིན། ” ཞེས་བརྗོད་བྱུང་།

ཕྱི་ཚེས་ ༧ ཉིན་གྱི་ཕྱི་དྲོར་གསར་འགོད་པས་ནང་སྲིད་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ་ལཊ་སུ་ཐེངས་འདིའི་གནས་ཚུལ་ཐད་བཅར་འདྲི་བྱས་པར་ཁོང་གིས། “ འབུམ་སྡེ་ལར་བྱུང་བའི་གནས་ཚུལ་དེ་དངོས་ཡོད་རེད། བྱུང་རིམ་གྱི་ཐད་ནས་དེ་སྔོན་ནས་བཟུང་རྒྱ་གར་དབུས་སྤྱི་ཚོགས་བདེ་དོན་ལྷན་ཁང་(Center Social Welfare Board) བརྒྱུད་ལོ་ལྟར་ས་གནས་ཀྱི་རང་ལོ་ ༥ མན་གྱི་བྱིས་པ་ཚོར་ཟས་བཅུད་མཁོ་སྤྲོད་ཆེད། ལོ་ལྟར་དངུལ་ཏོག་ཙམ་ཞིག་གསོལ་རས་གནང་གི་ཡོད་པ་རེད། བར་ལམ་བསྟན་འཛིན་སྒང་མཉམ་འབྲེལ་དེབ་སྐྱེལ་ཡོད་པའི་ཚོགས་པ་ཡིན་སྟབས། ༢༠༠༢ ལོ་ཡས་མས་ནས་བཟུང་ལོ་ལྟར་ཧིན་སྒོར་འབུམ་ ༢ ཡས་མས་འབྱོར་གྱི་ཡོད་པ་རེད། ༢༠༠༤ ལོ་ཡས་མས་སུ་རྒྱ་གར་གཞུང་གིས་མཉམ་འབྲེལ་གྱི་དེབ་སྐྱེལ་དེ་ཚོང་ལས་ཀྱི་རྣམ་པ་འདུག ཁོང་ཚོའི་དངུལ་དེ་མི་མང་གི་བདེ་སྡུག་ཆེད་སྤྲོད་ཀྱི་ཡོད་སྟབས། ཚོང་དང་འབྲེལ་བའི་ཚོགས་པར་སྤྲད་ན་ཏག་ཏག་བསྡད་ཀྱི་མི་འདུག་ཅེས་བཀའ་གནང་འདུག དངོས་ནས་བྱས་ན་གནས་སྟངས་དེར་ས་གནས་མཉམ་འབྲེལ་དང་མཉམ་འབྲེལ་འགན་འཛིན་ལྷན་ཚོགས། ས་གནས་མགོ་འཛིན་བཅས་ཀྱིས་གྲོས་བསྡུར་བྱས་ཏེ། ཚོགས་པ་གསར་བ་དེབ་སྐྱེལ་ཇི་ལྟར་བྱེད་མིན་ཐོག ཁྲིམས་ཀྱི་འགྲོ་ལུགས་དང་མཐུན་པ་ཞིག་བཟོ་དགོས་ཀྱི་ཡོད་པ་རེད། འབུམ་སྡེ་ལར་ལས་ཀ་བྱེད་མཁན་བཀྲ་ཤིས་ནོར་བུ་ལ་མཚོན་ན་ས་གནས་ཀྱི་ལས་དྲུང་རེད། ལས་ཀ་བྱས་ཏེ་ལོ་གང་འཚམ་སོང་ཡོད་པ་མ་ཟད། ལས་བྱེད་རྩེ་ཕུད་ཀྱི་རྟགས་མ་རག་མྱོང་བའི་མི་ཞིག་ཆགས་ཡོད། ཁོང་གིས་བསྟན་འཛིན་སྒང་མཉམ་འབྲེལ་འགན་འཛིན་ལྷན་ཚོགས་ཀྱི་འགྲོ་སྟངས་གསལ་བོ་ཤེས་ཀྱི་མེད་སྟབས། ཁོང་ལ་རོགས་པ་གནང་རོགས་ཞེས་བཤད་འདུག  སྐབས་དེ་དག་ཏུ་ཁོས་གཞུང་ཞབས་ཞིག་ཡིན་པའི་ཆ་ནས་གཞུང་གི་སྒྲིག་འཛུཊ་ཀྱི་འགྲོ་སྟངས་དང་། ལས་བྱེད་ཀྱི་སྒྲིག་གཞི་གཞིར་བཟུང་ཆོག་དང་མི་ཆོག་མང་པོ་ཡོད་ཀྱང་། ངས་བྱས་ཆོག་གི་རེད་དམ་མ་རེད་ཅེས་ལས་ཁུངས་ལ་བཀའ་འདྲི་སོགས་རྩ་བ་ནས་མ་ཞུས་པར། སྔོན་མ་བོད་རིགས་མཉམ་འབྲེལ་མཐུན་ཚོགས་ (Multipurpose Tibetan Cooperative Society) ཀྱི་མིང་དེ་ཡོང་གི་མེད་སྟབས། བོད་རིགས་བདེ་དོན་ཚོགས་པ་ (Multipurpose Tibetan Welfare Society) ཞེས་པ་ཞིག་དེབ་སྐྱེལ་བྱས་ན་ཡག་པོ་ཡོད་པ་རེད་ཅེས་རྒྱ་གར་གཞུང་གི་ལས་བྱེད་ཚོས་ལམ་སྟོན་བྱས་ཡོང་སྐབས། བསྟན་འཛིན་སྒང་གི་མཉམ་འབྲེལ་དྲུང་ཆེ་དང་འགན་འཛིན་ལྷན་ཚོགས་ཀྱི་ཚོགས་མི་ཁག་ཅིག་གིས་ཁོང་ལ་རེ་སྐུལ་ཞུས་འདུག ལས་ཀ་དེའི་རིགས་ཁྲིམས་སྒྲིག་དང་འགྲོ་ལུགས་ལ་མཐུན་དགོས་པ་རེད། སྔོན་ལ་འགན་འཛིན་ལྷན་ཚོགས་ཀྱིས་རྒྱ་གར་གཞུང་ལ་སྙན་སེང་དང་ཚོགས་པ་དེབ་སྐྱེལ་དགོས་པའི་རྒྱུ་མཚན་ཐད་འགན་འཛིན་ལྷན་ཚོགས་རང་གིས་གྲོས་ཆོད་འཇོག་དགོས་པ་ཞིག་ཆགས་ཡོད། ཡིན་ནའང་གྲོས་ཆོད་དེར་འགན་འཛིན་ལྷན་ཚོགས་ཀྱི་མི་མེད་པར་ཁོང་ཚོ་རང་གིས་འགན་འཛིན་ལྷན་ཚོགས་ཀྱི་མིང་ཐོག་ནས་ཡི་གེ་བཟོས། མཚན་རྟགས་རྫུན་མ་བརྒྱབ་འདུག བྱེད་སྟངས་དེ་ཁྲིམས་སྒྲིག་གཞི་དང་མ་མཐུན་པ། རྒྱ་གར་གྱི་ཡུལ་ཁྲིམས་དང་འགལ་བ། བོད་གཞུང་དང་༸སྐྱབས་མགོན་རིན་པོ་ཆེར་མཚན་ཤས་འགྲོ་བའི་ལས་ཀ་ཐབས་རྡུགས་ཤིག་བྱུང་བ་རེད། ཚོགས་པ་གསར་བ་དེབ་སྐྱེལ་བྱས་ཚར་རྗེས་ལོ་གཅིག་དང་གཉིས་རིང་དངུལ་མུ་མཐུད་བསླེབས་འདུག དངུལ་བསླེབས་རྗེས་མཉམ་འབྲེལ་གྱི་རྩིས་ཁོངས་ནང་དང་། འགྲོ་སོང་གཏོང་དགོས་པའི་རིགས་དེ་འགན་འཛིན་ལྷན་ཚོགས་ལ་བཀའ་འཁྲོལ་བཅས་ལམ་ལུགས་ཀྱི་འགྲོ་སྟངས་ལྟར་མ་བྱས་པར། དངུལ་རག་པ་དེ་ཁོ་རང་གཉིས་ཀྱི་མིང་ཐོག་ཏུ་རྩིས་འགོད་དང་དངུལ་བཅུག་རྗེས་འགྲོ་སོང་དེ་ལས་གཏོང་རྐྱང་བྱས་འདུག འགྲོ་སོང་དེ་གཞུང་གི་འགྲོ་སོང་ཡིན་མིན་ཁ་གསལ་གང་ཡང་མི་འདུག ཧིན་སྒོར་ཁྲི་ ༧ དང་ ༨ ཞིག་གིས་ལག་ཁྱེར་གློག་ཀླད་དང་ཁ་པར་ཉོས་པ་དེ་འདྲ་འདུག དེའི་རིགས་ང་ཚོས་ཞིབ་འཇུག་བྱས་ཏེ་མཉམ་འབྲེལ་ནང་ཕྱིར་སློག་བྱེད་དགོས་པ་རེད་ཅེས་ཞུས་ཡོད། མཉམ་འབྲེལ་གྱི་རྒྱུ་ཅ་ལག་ཚང་མ་རྩིས་ཁྲའི་ལམ་ནས་བཏོན་ཡོང་གི་རེད། དངུལ་འཇལ་དགོས་པའི་རིགས་ཆ་ཚང་མཉམ་དྲུང་རང་གི་མིང་ཐོག་ཏུ་དངུལ་འཛིན་(cheque) ཞུས་ཡོད། ” ཅེས་གསུངས་བྱུང་།

མཇུག་ཏུ་དྲུང་ཆེ་ལགས་སུ་ཁོང་གཉིས་ལས་ནག་ཉེས་གཙོ་བོ་སུ་ལ་ཡོད་མེད་དྲིས་པར། ཁོང་གིས། “ བཀྲ་ཤིས་ནོར་བུའི་སྐྱོན་ཆ་གང་རེད་ཅེ་ན། ལས་ཀ་བྱེད་མཁན་མཉམ་འབྲེལ་དྲུང་ཆེ་རེད། ཁོ་དང་མཉམ་དུ་རྩིས་ཁོངས་བྱས་པ་དང་ཡིག་ཆ་བཟོས་པ། དངུལ་ཆ་ཚང་བེད་སྤྱོད་བཏང་རྗེས་རྒྱ་གར་གྱི་སེ་ཨེ་ (CA) རྩིས་ཞིབ་ལ་དངུལ་བེད་སྤྱོད་བཏང་བའི་རྩིས་ཁྲ་གཏོང་དགོས་ཀྱང་། རྩིས་ཁྲ་དངུལ་སྤྲད་དེ་བཟོ་བཅུག་པ་སོཊ་འགལ་འཛོལ་ཆེན་པོ་བྱུང་བ་རེད། བར་ལམ་ང་ཚོ་ལས་གཞི་གཞན་ཞིག་གི་ཆེད་ས་གནས་སུ་ཕྱིན་པ་དང་མཉམ་དུ་ཞིབ་འཇུག་བྱེད་སྐབས། རྩིས་ཞིབ་སྙན་ཐོའི་ནང་གསལ་བསྡད་འདུག སྐབས་དེར་ང་ཚོས་དོ་བདག་གཉིས་ཚུར་སྐད་བཏང་སྟེ་གསལ་བཤད་ཀྱི་གོ་སྐབས་ཆ་ཚང་སྤྲད་རྗེས་གསལ་བོ་ཆགས་པ་རེད། གནས་ཚུལ་དེའི་ཐོག་གཞུང་གིས་བཀའ་ཆད་ག་རེ་བཏང་བ་ངོས་ལེན་ཞུ་རྒྱུ་ཡིན་ཞེས་ཁས་ལེན་ཞུས་སོང་། དེའི་རྗེས་ང་ཚོས་ཞིབ་འཇུག་བྱས་པའི་གནས་སྟངས་བཀའ་ཤག་ལ་ཞུས་པ་ལྟར། བཀའ་ཤག་གིས་ང་ཚོའི་ཞིབ་འཇུག་སྙན་ཐོ་དང་བཀའ་ཤག་གི་ཕྱག་བྲིས་འདེམས་བསྐོ་ལྷན་ཁང་ལ་བཏང་སྟེ། ལས་དྲུང་བཀྲ་ཤིས་ནོར་བུ་གནས་ཚུལ་ཐག་གཅོད་མ་བྱུང་བར་ལས་ཀ་མཚམས་འཇོག་གིས་ཞོགས་པ་ཆུ་ཚོད་ ༩ པར་འབྱོར་ཐོ་དང་། དགོང་དྲོའི་ཆུ་ཚོད་ ༥ བར་ཐོན་ཐོ་འགོད་ཀྱི་ཡོད་པ་རེད། ཁོང་ནང་སྲིད་ལས་ཁུངས་ལ་གནས་སྤོར་གྱིས་གནས་རིམ་གཅིག་མར་ཕབ་པ་མ་ཟད། ཕབ་ཟིན་པའི་གནས་རིམ་དེའི་གྲལ་མཐར་འཇོག་རྒྱུ་དང་། ཧིན་སྒོར་ ༢༥༠༠༠ གི་ཉེས་ཆད་བཏང་ཡོད། བསྟན་འཛིན་རིག་བཟང་མི་མང་གིས་བདམས་པའི་མཉམ་འབྲེལ་དྲུང་ཆེ་ཆགས་ཡོད་སྟབས། ཁོ་རང་ལ་ང་ཚོས་ཧིན་སྒོར་ ༥༠༠༠༠ ཉེས་པ་བཏང་ཡོད། མུ་མཐུད་མཉམ་འབྲེལ་དྲུང་ཆེར་འཇོག་མིན་མཉམ་འབྲེལ་རང་གིས་ཐག་གཅོད་བྱ་དགོས་ཞེས་ང་ཚོར་བཅད་ཁྲ་བཏང་བ་དེ་མཉམ་འབྲེལ་ཚོགས་གཙོར་བཏང་ཡོད། ཉེ་ཆར་ཚོགས་གཙོས་མི་གཉིས་ས་གནས་སུ་ཁོང་ལ་ཞིབ་འཇུག་བྱེད་དུ་བཏང་འདུག མཐའ་མར་སྤྱི་མཐུན་མཉམ་འབྲེལ་དྲུང་ཆེར་འཇོག་མིན་གྱི་འགན་དབང་ཆ་ཚང་ཁོང་ཚོར་སྤྲད། ཧིན་སྒོར་ཁྲི་ ༥ ཉེས་ཆད་དེ་མཉམ་འབྲེལ་གྱི་རྩིས་ཁོངས་སུ་འཇོག་དགོས་པའི་ལམ་སྟོན་གནང་ཡོད། ” ཅེས་བརྗོད་བྱུང་། 

གསར་འགོད་པ། དོན་གོ