གཟའ་ཟླ་བ་ཉིན་ཁམས་དཀར་མཛེས་རྫོང་ནས་ཡིན་པའི་བཙུན་མ་གཉིས་དང་བུད་མེད་གཅིག་གི་ལོ་གཉིས་ཀྱི་དུས་བཀག་བཙོན་འཇུག་གི་དུས་ཡུན་རྫོགས་ཏེ་ཀློད་གྲོལ་བཏང་འདུག
༢༠༡༡ ཟླ་ ༦ ཚེས་ ༡༠ ཉིན། ཁམས་དཀར་མཛེས་རྫོང་ལམ་བྲག་བཙུན་དགོན་གྱི་བཙུན་མ་རང་ལོ་ ༢༠ ཡིན་པ་རིན་དགའ་དང་རང་ལོ་ ༢༥ ཅན་བྱམས་པ་ལྷ་མཚོ་གཉིས་ཀྱིས། “༧རྒྱལ་བ་རིན་པོ་ཆེ་བོད་དུ་ཕེབས་འཇུག་དགོས། བོད་ལ་རང་དབང་དགོས ” སོགས་ཀྱི་ཞི་བའི་ངོ་རྒོལ་གནང་ཏེ། རྒྱ་གཞུང་ཉེན་རྟོག་པས་འཛིན་བཟུང་བྱས་ཡོད་པ་དང་། དེ་བཞིན། ༢༠༡༡ ལོའི་ཟླ་ ༦ ཚེས་༨ ཉིན་ཚེ་དབང་སྒྲོལ་མ་ཞུ་བའི་བུད་མེད་ཅིག་གིས་རྒྱ་གཞུང་ལ་ཞི་བའི་ངོ་རྒོལ་གནང་ཏེ་འཛིན་བཟུང་བྱས་ཡོད། ཕྱིས་སུ་ཁོང་ཚོ་གསུམ་ལ་ལོ་ ༢ རེའི་བཙོན་འཇུག་ཁྲིམས་ཐག་བཅད་དེ་སི་ཁྲོན་གྱི་བཙོན་ཁང་ཞིག་ཏུ་བཙོན་འཇུག་བྱས་འདུག
ཟླ་འདིའི་ཕྱི་ཚེས་ ༡༠ ཉིན་བཙོན་འཇུག་དུས་ཡུན་རྫོགས་ཏེ་ཁོ་ཚོ་རང་ཁྱིམ་དུ་འབྱོར་ཡོད་པ་དང་། སྐབས་དེར་ཉེན་རྟོག་པས་ས་གནས་བོད་མི་ཚོར་ཕེབས་བསུ་བྱེད་བཅུག་མེད་ཀྱང་། ཕྱིས་སུ་ཡུལ་མི་ཚོ་ཁྱིམ་དུ་ཡོང་ནས་འཚམས་འདྲི་ཞུས་ཡོད་འདུག
