རྒྱ་ནག་གི་དམངས་གཙོ་དོན་གཉེར་བ་མིག་གཉིས་ལོང་བ་ཡིན་པའི་ཁྲིན་ཀང་ཁྲུན་ནེའུ་ཡོག་གཙུག་ལག་སློབ་ཆེན་ནས་ཕྱིར་འཕུད་གཏོང་རྒྱུ་རེད་ཟེར།
ཁ་སང་ནེའུ་ཡོག་ཆ་འཕྲིན་གྱིས་གནས་ཚུལ་སྤེལ་བ་ལྟར་ན། རྒྱ་རིགས་ཁྲིན་ཀང་ཁྲུན་ནེའུ་ཡོག་གཙུག་ལག་སློབ་ཆེན་དུ་ཞུགས་ཏེ་ལོ་ ༡ ཙམ་ལས་མ་ཕྱིན་པར། ནེའུ་ཡོག་སློབ་ཆེན་གྱིས་ཟླ་འདིའི་ཟླ་མཇུག་ཙམ་ལ་ཁྲིན་ཀང་ཁྲུན་སློབ་གྲྭ་ནས་ཕྱིར་འབུད་དགོས་སྐོར་དང་། དུས་ཡུན་ངེས་མེད་བར་ཁོང་ལ་རོགས་སྐྱོར་བྱེད་ཐབས་མེད་པའི་གནས་ཚུལ་བསྒྲགས་ཡོད་འདུག
གནས་ཚུལ་དེ་བསྒྲགས་རྗེས། ནེའུ་ཡོག་གི་སྒེར་གཉེར་ཁྲིམས་ལུགས་སློབ་ཆེན（Fordham Law School）གྱི་མགྲིན་ཚབ་པས། ང་ཚོས་ཁྲིན་ཀང་ཁྲུན་དང་མཉམ་དུ་མ་འོངས་པར་ཁོང་ང་ཚོའི་སློབ་གྲྭར་ཞུགས་རྒྱུར་གྲོས་བསྡུར་བྱེད་བཞིན་ཡོད་ཀྱང་། གནས་ཚུལ་དེ་དང་འབྲེལ་བའི་གནད་དོན་ཁག་གི་ཐད་དཔྱད་གླེང་སྤེལ་བར་ཁྲིན་གྱིས་དེ་ལ་བརྡ་ལན་གང་ཡང་སྤྲད་མེད་ལུགས་བརྗོད་འདུག
ཆབ་སྲིད་དཔྱད་བརྗོད་པ་ཚོས། ཉེ་ལམ་ནས་རྒྱ་ནག་སྐམ་ས་ཆེན་མོ་རུ་ཝེ་པའོ་(新浪微博)ནང་དུ་ཁྲིན་ཀང་ཁྲུན་དང་འབྲེལ་བའི་གནས་ཚུལ་འཚོལ་ཞིབ་བྱེད་པར་བཀག་འགོག་བྱས་ཡོད་པ་དང་། ཟླ་འདིའི་ཟླ་མཇུག་ཏུ་ཁྲིན་ཀང་ཁྲུན་གྱིས་ཐའེ་ཝན་གྱི་ཁྲིམས་བཟོ་ལྷན་ཁང་དང་ཐའེ་ཝན་སློབ་ཆེན་སོགས་སུ་སྐོར་སྐྱོད་གནང་འཆར་ཡོད་པའི་སྐབས་དང་བསྟུན་ཏེ། ཁོང་གི་ཨ་མ་དང་ཕུ་བོ་གཉིས་ཐུག་འཕྲད་དུ་འགྲོ་རྩིས་ཡོད་ཀྱང་། ཐའེ་ཝན་གྱི་ཐོངས་མཆན་རག་རྒྱུ་ཁག་པོ་ཆགས་ཡོད་པ་དང་། ནེའུ་ཡོག་སློབ་ཆེན་གྱིས་རྒྱ་ནག་ཧྲང་ཧེ་རུ་ཡན་ལག་སློབ་གྲྭ་ཞིག་འཛུགས་འཆར་ཡོད་སྟབས། རྒྱ་གཞུང་གིས་གནོན་ཤུགས་སྤྲོད་པར་སྐྲག་ནས་ཁྲིན་ཀང་ཁྲུན་ཕྱིར་འཕུད་གཏོང་རྒྱུའི་ཐག་གཅོད་བྱས་པ་ཡིན་སྐོར་བརྗོད་འདུག
གོང་གསལ་གནས་ཚུལ་སྐོར་ལ་ནེའུ་ཡོག་སློབ་ཆེན་གྱི་མགྲིན་ཚབ་པས་གསལ་བཤད་ཅིག་སྤེལ་བའི་ནང་། ད་རེབ་རྒྱ་རིགས་ཁྲིན་ནེའུ་ཡོག་སློབ་ཆེན་ནས་འཐོན་དགོས་པའི་རྒྱུ་མཚན་རྒྱ་གཞུང་གིས་གནོན་ཤུགས་སྤྲད་པ་གང་ཡང་མིན་པ་དང་། རྒྱ་ནག་ཧྲིང་ཧེ་རུ་ནེའུ་ཡོག་སློབ་ཆེན་གྱི་ཡན་ལག་འཛུགས་རྒྱུ་སོགས་ལའང་འབྲེལ་བ་མེད་སྐོར་བརྗོད་འདུག
