གཞུང་ཞབས་ཚུད་རྒྱུཊ་སྦྱོང་བརྡར་སྐབས་གཉིས་པ་མགོ་འཛུཊ་གནང་།

དེ་སྔ་དྲོར་ས་རཱ་མཐོ་སློབ་ཏུ་གཞུང་ཞབས་ཚུད་རྒྱུགས་ཟབ་སྦྱོང་སྐབས་གཉིས་པ་མགོ་འཛུགས་གནང་སྟེ། འདེམས་ལྷན་འགན་འཛིན་མཆོག་གིས་ཟབ་ཞུགས་པའི་ཁྲོད་མ་འོངས་པར་ས་གནས་མགོ་འཛིན་དང་ལྷན་ཁང་ཁག་གི་དྲུང་ཆེ། སྐུ་ཚབ་དོན་གཅོད་སོགས་ཡོང་སྲིད་སྟབས་ད་ལྟ་ནས་གྲ་སྒྲིག་ཡག་པོ་དགོས་སྐོར་ལམ་སྟོན་གནང་སོང་།

དེ་རིང་ས་རཱ་མཐོ་སློབ་ཏུ་བོད་མིའི་སྒྲིག་འཛུགས་གཞུང་ཞབས་འདེམས་བསྐོ་ལྷན་ཁང་གི་གོ་སྒྲིག་འོག བཀའ་ཤག་གསར་པའི་ལས་གཞི་ཟླ་ལྔའི་རིང་གི་གཞུང་ཞབས་ཚུད་རྒྱུགས་ཟབ་སྦྱོང་སྐབས་གཉིས་པ་མགོ་འཛུགས་གནང་ཡོད་པ་དང་། ཟབ་སྦྱོང་དབུ་འཛུགས་ཀྱི་སྐུ་མགྲོན་གཙོ་བོར་ཆོས་རིག་བཀའ་བློན་པདྨ་ཆོས་འབྱོར་མཆོག་དང་། གཞན། ས་རཱ་མཐོ་སློབ་ཀྱི་སློབ་སྤྱི་དགེ་བཤེས་འཇམ་དཔལ་གྲགས་པ་དང་ལས་བྱེད་འདེམས་ལྷན་གྱི་འགན་འཛིན་འཇམ་དཔལ་ཆོས་བཟང་སོགས་ཕེབས་འདུག

ཐེངས་འདིའི་ཟབ་སྦྱོང་ཚུད་རྒྱུགས་ནང་འཛིན་རིམ་ ༡༢ ནས་མཐོ་སློབ་ཐོན་པའི་སློབ་མ་གྲངས་ ༧༧ ཙམ་བྱུང་ཡོད་པ་ལས་ ༦༤ ཙམ་གྱིས་རྒྱུགས་འཕྲོད་ཡོད་པ་དང་། དེ་དག་ལས་ཟབ་ཞུགས་པ་གྲངས་ ༤༠ རྩེ་བཏོགས་ཀྱིས་ཟབ་སྦྱོང་ནང་དངོས་སུ་ཞུགས་ཡོད་འདུག ཐེངས་འདིའི་ཟབ་སྦྱོང་ཚུད་རྒྱུགས་ལ་སྔ་ལོ་དང་མ་འདྲ་བར་ངག་རྒྱུགས་མེད་པར་བོད་དབྱིན་ཐོག་འབྲི་རྒྱུགས་བཏང་སྟེ། ཟབ་ཞུགས་པར་ཚུད་རྒྱུགས་བཏང་ཡོད་འདུག

འདེམས་ལྷན་གྱི་འགན་འཛིན་འཇམ་དཔལ་ཆོས་བཟང་ལགས་ཀྱིས་ངོ་སྤྲོད་གནང་པ་ལྟར་ན། ཟབ་སྦྱོང་འདི་གོ་སྒྲིག་བྱེད་དགོས་དོན་ནི་གཞུང་ཞབས་ལས་བྱེད་ཀྱི་ཤེས་ཚད་ཡར་རྒྱས་གཏོང་ཆེད་ཡིན་པ་དང་། གཞུང་གི་ལས་བྱེད་ཀྱི་ཤེས་ཚད་ཡར་རྒྱུས་གཏོང་རྒྱུ་འདི་ནི་བཀའ་ཤག་སྐབས་སྔོན་མ་ནས་ཡོད་ཀྱང་། ད་ལྟའི་བཀའ་ཤག་གིས་ལས་བྱེད་ཚུད་རྒྱུགས་མ་བཏང་གོང་ཟབ་སྦྱོང་སྤྲོད་རྒྱུ་མགོ་འཛུགས་གནང་ཡོད་པ་དང་། ད་རེབ་ནང་ཐེངས་གཉིས་པ་དེ་ཆགས་ཡོད་འདུག

ཁོང་གིས་ཟབ་སྦྱོང་ནང་ཞུགས་མཁན་ཚོས་ཟླ་ ༥ རིང་སོ་སོའི་ཞན་ཆ་གང་ཡིན་པ་དེའི་ཐོག་དམིགས་བསལ་གྱིས་ཤུགས་རྒྱག་དགོས་པ་དང་། གལ་སྲིད་མཐའ་མའི་ཚུད་རྒྱུགས་སྐབས་བོད་ཡིག་དང་དབྱིན་ཡིག ཨང་རྩིས། ཆབ་སྲིད་བཅས་རྒྱུགས་གཞིའི་སློབ་ཚན་ ༤ ལས་གཅིག་མ་འཕྲོད་པ་ཡིན་ན་གཞུང་ཞབས་ནང་ཚུད་ཀྱི་མེད་སྐོར་དང་། འདིར་བསྡད་པའི་རིང་འཕྲལ་གྱི་ཚུད་རྒྱུགས་དང་ཕུགས་སུ་ལས་སྣེར་ཞུགས་སྐབས་ནུས་པ་འདོན་ཐུབ་པ་ཞིག་གནང་དགོས་པ། ཐེངས་འདིའི་ཟབ་ཞུགས་པའི་ཁྲོད་མ་འོངས་པར་ས་གནས་མགོ་འཛིན་དང་ལྷན་ཁང་ཁག་གི་དྲུང་ཆེ། སྐུ་ཚབ་དོན་གཅོད་བཅས་ཡོང་སྲིད་པ་དང་། དམིགས་ཚད་དེ་འདྲ་ཞིག་ལ་བཟུང་སྟེ་གྲ་སྒྲིག་དགོས་པ། དོན་གཅོད་རྩིས་པ་ཞིག་ལ་མཚོན་ན་རང་ཉིད་རྩིས་པ་ཡིན་ཞེས་བསྡད་ན་འགན་འགྲུབ་ཀྱི་མེད་པར། བཙན་བྱོལ་བོད་མིའི་སྒྲིག་འཛུགས་ཀྱི་ཆབ་སྲིད་ལངས་ཕྱོགས་དང་། ལས་དོན་སྤྱི་ཡོངས་ལ་རྒྱུས་མངའ་དང་ཤེས་རྟོགས་མེད་པར་ཡོང་ཐབས་མེད་སྐོར་བརྗོད་བྱུང་།

ཁོང་གིས་ “ལོ་སྔོན་མའི་ཚུད་རྒྱུགས་སྐབས་རྩིས་རྒྱུགས་བཏང་པར་སྐད་ཆ་མང་པོ་ཞིག་བསླེབས་ཡོད་ཀྱང་། རྩིས་རྒྱུགས་མ་འཕྲོད་མཁན་ཉུང་ཤོས་རེད། མང་ཆེ་བ་བོད་ཡིག་དང་དབྱིན་ཡིག་མ་འཕྲོད་པ་རེད། ཆབ་སྲིད་ཐོག་ནས་མ་འཕྲོད་པ་བཅས་ནི་ཀླད་པ་སྟོང་པ་ཡིན་པའི་རྟགས་རེད། ང་ཚོའི་གཞོན་སྐྱེ་ཚོས་ངོ་དེབ་ཐོག་ཆུ་ཚོད་འཕྲོག་བརླག་གཏོང་རྒྱུ་དང་རྒྱ་གར་གྱི་གློག་བརྙན་ལ་ལྟ་རྒྱུ་ལས། གཞུང་གི་དྲ་རྒྱ་སོགས་ལ་བལྟས་པ་ཡིན་ན་བློན་ཆེན་ལྷན་ཁང་ཁག་དང་རང་དབང་ཅན་གྱི་སྡེ་ཚན་ཁག གཞུང་གི་སྲིད་ཇུས་ལངས་ཕྱོགས་དང་ལས་དོན་བྱེད་ཕྱོགས་སོགས་ཤེས་ཡོང་གི་རེད་”ཅེས་བརྗོད་སོང་།

དེའི་རྗེས་ས་རཱ་མཐོ་སློབ་ཀྱི་སློབ་སྤྱི་དགེ་བཤེས་འཇམ་དཔལ་གྲགས་པ་ལགས་ཀྱིས་རྒྱ་ནག་གིས་ཐུབ་ཚོད་བཏང་སྟེ་བོད་མི་རྣམས་ཁ་འཐོར་དུ་བཏང་ཡོད་ཀྱང་། དེང་སྐབས་བོད་མི་རྣམས་ཁ་འཛམ་གླིང་ལ་ཕྱོགས་ཏེ་བློ་ཆིག་སྒྲིལ་གྱི་ཕྱོགས་སུ་འདུ་བཞིན་ཡོད་པ་དང་། དེ་ནི་དམག་དོན་དང་དཔལ་འབྱོར་གྱི་ཐད་ནས་བོད་མི་ཚོ་འཛམ་གླིང་གི་རྗེས་སུ་ལུས་ཡོད་ཀྱང་བོད་པའི་རིག་གཞུང་དེ་གཞན་ལས་ཁྱད་དུ་འཕགས་པ་ཞིག་ཏུ་ངོས་འཛིན་གྱིས་བྱུང་ཡོད་པ། དེ་ལྟ་བུའི་རིག་གཞུང་རྩ་ཆེན་པོ་དེ་སྐད་ཡིག་བརྒྱུད་ནས་ཤེས་དགོས་དུས། རྒྱུད་ལ་རིག་གཞུང་གི་ཤེས་ཚད་ངེས་ཅན་ཞིག་མ་ཐོབ་བར་དུ་བསམ་བློའི་ཐོག་ནས་བོད་མི་ངོ་མ་ཞིག་ཡོང་ཁག་པོ་ཆགས་ཡོད་སྟབས། བོད་ཀྱི་སྐད་ཡིག་ལ་སྦྱང་བརྩོན་གནང་སྟེ་བསམ་བློའི་ཐོག་ནས་བོད་པ་རྣལ་མ་ཞིག་ཡོང་དགོས་ཚུལ་བརྗོད་བྱུང་།

ཁོང་གིས་བརྗོད་དོན། “བོད་པའི་གཞོན་སྐྱེས་ཚོར་མཐུན་རྐྱེན་གང་འཚམ་ཡག་པོ་ཡོད་རེད་དེ། ཐ་མག་ཉལ་ཐ་དང་ཆང་རག་མཐོང་ནས་རྐྱེན་འདས་ཕྱིན་པ་མང་པོ་ཡོང་གི་འདུག ཚགས་པར་ནང་དུ་ལྐོག་ཟ་རུལ་སུངས་འབུམ་འབུམ་ཟེར་བ་མང་དུ་འགྲོ་བཞིན་འདུག བོད་པའི་ནང་ནས་གྲངས་ཀ་བརྒྱབ་ན་གཉིས་གསུམ་རེད་དེ། བཙན་བྱོལ་བོད་མི་འབུམ་གཅིག་དང་ཕྱེད་ཙམ་གྱི་ནང་མི་གཉིས་གསུམ་དེ་རྒྱ་གར་གྱི་མི་དུང་ཕྱུར་ ༡༡ ནང་ཕར་བརྒྱ་ཆ་རྩིས་ན་ཀ་རོ་(Crore) མང་པོ་ཆགས་ཀྱི་རེད། འབྱུང་འགྱུར་གཞུང་ཞབས་ཚོའི་ནང་ནས་དེ་འདྲ་ཡོང་མདོག་ཁ་པོ་མ་རེད། དེ་འདྲ་མ་ཡོང་པ་ཞིག་དང་ངས་མི་བྱ་བསམ་པའི་སེམས་པ་ཞིག་དེ་རིང་ནས་ཡོད་དགོས་པ་རེད་ ”ཅེས་བརྗོད་སོང་།

མཐར་སྐུ་མགྲོན་གཙོ་བོ་ཆོས་རིག་བཀའ་བློན་མཆོག་གིས། “སོ་སོ་རང་ཉིད་ཀྱི་ཀུན་སློང་ཐོག་ནས་བོད་མིའི་སྒྲིག་འཛུགས་ནང་ཞུགས་ཏེ་བོད་མིའི་སྒྲིག་འཛུགས་ལ་ཞབས་འདེགས་ཞུ་དགོས་བསམ་པའི་འདུན་པ་ཞིག་འཁྱེར་ཡོང་པ་དང་། དབུས་བོད་མིའི་སྒྲིག་འཛུགས་ངོས་ནས་ཀྱང་ཁྱེད་རང་ཚོར་འདུན་པ་ཡོད་པ་ནང་བཞིན་འདིར་ཟླ་ ༥ རིང་ཟབ་སྦྱོང་གི་ཆ་རྐྱེན་ཞིག་བསྐྲུན་ཡོད་རེད། ཁྱེད་རང་ཚོ་གལ་ཆེན་པོ་ཞེ་དྲག་རེད། རྒྱུ་མཚན་ནི་མ་འོངས་པར་བོད་ཀྱི་རྩ་དོན་དང་བོད་དོན་འཐབ་རྩོད། བོད་ཀྱི་གནས་སྟངས་དེ་གང་འདྲ་ཞིག་ཆགས་མིན་དེ་ཁྱེད་རང་ཚོ་ལ་རགས་ལས་ཡོད་རེད་”ཅེས་བརྗོད་སོང་།

ཁོང་གིས་མུ་མཐུད་དེ། “སྤྱིར་བཏང་ཁྱེད་རང་ཚོར་ཁག་ཡོད་མ་རེད། མཐོ་སློབ་ཏུ་བོད་ཡིག་སྦྱོང་ས་ཞིག་ཡོད་རྒྱུ་མ་རེད། སོ་སོའི་སློབ་ཚན་ག་རེ་ཡིན་པ་དེའི་ཐོག་འགྲོ་དགོས་དུས་བོད་ཡིག་ཏན་ཏན་འཐུས་ཤོར་ཕྱིན་ཡོད་རྒྱུ་རེད། མ་འོངས་པར་ཡང་དཀའ་ངལ་འཕྲད་ངེས་རེད། བོད་ཡིག་ཟེར་པ་དེ་གཏིང་ཟབ་པོ་དང་རྒྱ་ཆེན་པོ་རེད། ཁྱེད་རང་ཚོ་ཚང་མ་བོད་པ་ཞིག་ཡིན་པའི་ཆ་ནས་ད་རེབ་ཟླ་ལྔའི་རིང་ཤུགས་རྒྱག་རྒྱུའི་གོ་སྐབས་ཡོད་པ་རེད། ས་རཱ་མཐོ་སློབ་འདི་བོད་ཡིག་གི་ཐད་ནས་ཧ་ཅང་ཚད་མཐོ་བོའི་སློབ་སྦྱོང་བྱེད་ས་ཞིག་རེད། ཆབ་སྲིད་ཀྱི་ཐོག་ནས་ཡིན་ན་བོད་འདི་གང་འདྲ་ཞིག་རེད། རྒྱ་ལག་ཏུ་ཇི་ལྟར་ཤོར་བ་རེད། ད་ལྟའི་གནས་སྟངས་གང་འདྲ་འདུག མ་འོངས་པར་ག་རེ་ཆགས་ས་རེད་བཅས་ལ་བསམ་བློ་གཏོང་རྒྱུ་ཧ་ཅང་གལ་ཆེན་རེད།”ཅེས་བརྗོད་སོང་།

གསར་འགོད་པ། བནྡེ་སྐྱབས།