མདུན་ངོས།
About Us
  • English
Advertisement
བོད་ཀྱི་དུས་བབ།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
བོད་ཀྱི་དུས་བབ།
English
No Result
ཆ་ཚང་གཟིགས།

ནུབ་ཕྱོཊ་བོད་ཕྲུག་ཚོར་བོད་སྐད་ཡིག་སློབ་ཁྲིད་ཀྱི་གྲོས་འཆར།

བོད་ཀྱི་དུས་བབ།
༢༠༡༣/༠༧/༡༨
Share on FacebookShare on TwitterShare on EmailShare on Whatsapp

ནུབ་ཕྱོགས་ཡུལ་གྲུ་ཁག་གི་བོད་ཕྲུག་རྣམས་ཀྱི་བོད་ཀྱི་སྐད་ཡིག་རྒྱུན་འཛིན་བྱེད་ཐབས་སྐོར་གྱི་གྲོས་འཆར།

            ཤེས་རིག    བྱ་གཞུང་དཔལ་ལྡན་རྡོ་རྗེ།

ཉེ་བའི་ལོ་འགའི་སྔོན་ནས་ནུབ་ཕྱོགས་སུ་གནས་བཞུགས་བོད་མིའི་ཕྲུ་གུ་ཚོའི་བོད་ཀྱི་རིག་གཞུང་དང་། འདུ་ཤེས་འཛིན་སྟངས། བོད་མིའི་ངོ་བོ་རྒྱུན་འཛིན། བོད་ཀྱི་སྐད་ཡིག་གི་བྱང་རྩལ་ཡར་རྒྱས་བཅས་ཀྱི་ཐད་ལ་བསམ་ཚུལ་དང་། དགོངས་སྐོར། དོགས་འདྲི་བཅས་རིམ་པ་མང་པོ་ཞིག་སླེབས་ཡོད་ལ། དེ་དག་ལས་བསམ་ཚུལ་ཆེས་མངོན་གསལ་དོད་ཤོས་ནི་ནུབ་ཕྱོགས་ཡུལ་གྲུ་ཁག་ཚང་མ་མཉམ་འབྲེལ་བྱས་ཏེ། བོད་ཀྱི་རིག་གཞུང་དང་སྐད་ཡིག་གི་དམིགས་ཚད་གཅིག་ལ་སླེབས་པར་ངེས་པར་དུ་བོད་མིའི་སྒྲིག་འཛུགས་ཤེས་རིག་ལས་ཁུངས་ནས་རྐང་འགན་འཁུར་དགོས་པའི་དགོངས་ཚུལ་དེ་རེད། འདས་པའི་ལོ་ངོ་དེ་དག་གི་ཉམས་མྱོང་དང་དཔལ་ལྡན་སྲིད་སྐྱོང་བློ་བཟང་སེང་གེ་མཆོག་གི་མ་འོངས་སྔོན་དཔག་གི་དཔྱད་ཞིབ་ནང་། ཕྱི་ལོ་ ༢༠༢༠ ཡས་མས་ནས་བཙན་བྱོལ་བོད་མི་ཕྱེད་ལྷག་ནུབ་ཕྱོགས་ཡུལ་གྲུ་ཁག་ཏུ་གནས་སྤོ་བྱ་རྒྱུ་ཡིན་པས། བོད་མིའི་སྒྲིག་འཛུགས་ཀྱི་ལས་དོན་བྱེད་ཕྱོགས་ཀྱི་སྒྲོམ་གཞི་ལ་འགྱུར་བ་འགྲོ་དགོས་སྐོར་གསུངས་ཡོད། བོད་ཕྲུག་དེ་དག་གི་བོད་ཀྱི་སྐད་ཡིག་དང་རིག་གཞུང་བཅས་པ་རྒྱུན་འཛིན་ཡོང་ཐབས་བྱ་རྒྱུ་དེ་ནི་འབྲེལ་ཡོད་སྒྲིག་འཛུགས་ཁག་གི་ལྡོག་ཏུ་མེད་པའི་ལས་འགན་ཞིག་ཡིན། འདིའི་ཐད་ད་ལྟ་ནས་མགོ་འཛུགས་ཀྱིས་ལས་རིམ་སྒྲིག་རྒྱུ་ནི་ཤིན་ཏུ་གལ་ཆེན་ཞིག་རེད།

དེར་བརྟེན། སྔ་ལོར་ཤེས་རིག་ལས་ཁུངས་ནས་ནུབ་ཕྱོགས་སུ་གནས་བཞུགས་བོད་ཕྲུག་ཚོའི་བོད་ཀྱི་སྐད་ཡིག་རིག་གཞུང་དང་བཅས་པ་ཡར་རྒྱས་ཆེད་སྐད་ཡིག་གཉིས་པའི་ལམ་ནས་བོད་སྐད་སློབ་ཐབས་ཀྱི་ལས་འཆར་ཞིག་བསྒྲིགས་ཡོད། སྔ་ལོའི་ཕྱི་ཟླ་ལྔ་པའི་ནང་དེའི་ཐད་ལ་སྐུ་ཚབ་དོན་གཅོད་ཁང་ཁག་བརྒྱུད་གསལ་བསྒྲགས་ཀྱང་མི་ཉུང་བ་ཞིག་སྤེལ་རྗེས་བྱང་ཨ་རི་དང་། ཡུ་རོབ། སུད་སི་བཅས་ནས་བོད་སྐད་སློབ་ཐབས་སྐོར་ལ་ཚོགས་འདུ་ཡང་རིམ་པ་འགའ་ཤས་ཚོགས་པ་མ་ཟད། དེའི་སྐོར་ལ་གྲོས་ཆོད་ཀྱང་བཞག་ཡོད་སྟབས། དེར་ཤེས་རིག་ལས་ཁུངས་ནས་ལས་འཆར་དེ་བང་རིམ་བསྒྲིགས་ཏེ་ལག་བསྟར་བྱེད་བཞིན་ཡོད་པ་རེད།

            རྒྱུ་མཚན་དེ་དག་ལ་བརྟེན་ནས་ང་ཚོས་ནུབ་ཕྱོགས་ཀྱི་བོད་ཕྲུག་རྣམས་ལ་བོད་ཀྱི་སྐད་ཡིག་སློབ་པར་གོ་རིམ་ལྡན་པའི་འཆར་འགོད་(Systematic Planning) བྱ་རྒྱུ་དང་། བོད་ཀྱི་སྐད་ཡིག་དེ་སྐད་ཡིག་དང་པོ་དང་སྐད་ཡིག་གཉིས་པའི་ཐོག་ནས་བསླབ་ཐབས་མི་འདྲ་སའི་གནད་དོན་གང་དུ་ཡོད་མེད་དང་། དགོས་དོན་ཅི་ཞིག་ཡིན་མིན། སྐད་ཡིག་གཉིས་པའི་ཐོག་ནས་བསླབ་ཐབས་ཀྱི་རྣམ་གཞག་(Theory) བཅས་གཞི་རིམ་གྱི་ལྟ་བ་དང་། སྒོས་སུ་ནུབ་ཕྱོགས་བོད་ཕྲུག་ཚོའི་གནས་སྟངས་ལ་འཚམ་པའི་བསླབ་གཞི་བཟོ་འགོད།(Curriculum Development)  སློབ་ཁྲིད་ཐབས་ལམ་གསར་གཏོད།(Teaching Methods) ཐབས་ལམ་གྱི་རྣམ་བཤད་ཕྱོགས་སྒྲིག(Methodology) སློབ་དེབ་དང་སློབ་ཁྲིད་ཀྱི་རྒྱུ་ཆ་རྩོམ་སྒྲིག (Editing Text Books and Study Material) དགེ་རྒན་རྣམས་ལ་སྐད་ཡིག་གཉིས་པའི་ཐོག་བོད་སྐད་སློབ་ཐབས་ཀྱི་འོས་སྦྱོང་། ཕ་མ་རྣམས་ལ་ཁྱིམ་ཚང་ནང་བོད་སྐད་རྒྱུན་འཛིན་ཡོང་ཐབས་ཀྱི་ཟབ་སྦྱོང་བཅས་ལ་འཆར་གཞི་སྒྲིག་དགོས། ཡིན་ནའང་ད་ཡོད་ཀྱི་གནས་སྟངས་ལ་བལྟས་ན་དེ་དག་ཚང་མ་ལག་བསྟར་བྱེད་པར་ད་དུང་དངུལ་རྩ་དང་མི་རྩ་གཉིས་ཀས་འདང་གི་མེད་ཀྱང་གོམ་པ་དང་པོའི་ཚུལ་དུ་གནད་དོན་ཁ་ཤས་ཤིག་ལག་བསྟར་བྱེད་དགོས་པ་མ་ཟད། ལས་རིམ་དེ་དག་ཕན་ཚུན་འབྲེལ་ཆགས་དང་གོ་རིམ་ལྡན་པ་(Systematically) ཞིག་ཡོང་དགོས།

༡།  བསླབ་གཞི་རྩ་འཛིན་བཟོ་འགོད། Curriculum Development

            དེང་སྐབས་ཀྱི་ཤེས་ཡོན་ལག་བསྟར་ཁྲོད། གལ་གནད་ཆེ་ཤོས་ནི་བསླབ་གཞི་རྩ་འཛིན་བཟོ་འགོད་བྱེད་རྒྱུ་དེ་ཡིན། བསླབ་གཞི་རྩ་འཛིན་ནང་དམིགས་ཚད་གང་འདྲ་ཞིག་ཏུ་བསླེབ་རྒྱུ་ནས་གནས་ཚད་ཅི་འདྲ་ཞིག་ཏུ་སླེབས་རྒྱུའི་བར་དང་། ནང་དོན་ཅི་ཞིག་བསླབ་རྒྱུ་ནས་ཇི་ལྟར་བསླབ་རྒྱུའི་སྐོར་གྱི་ལམ་སྟོན་ཆ་ཚང་ཚུད་ཡོད། དེར་བརྟེན་བོད་ཀྱི་སྐད་ཡིག་དེ་སྐད་ཡིག་གཉིས་པའི་ལམ་ནས་སློབ་ཐབས་ལ་ངེས་པར་དུ་བསླབ་གཞི་རྩ་འཛིན་ཞིག་བཟོ་དགོས། དེས་བོད་ཀྱི་སྐད་ཡིག་དེ་སྐད་ཡིག་གཉིས་པའི་ལམ་ནས་སློབ་ཐབས་ཀྱི་གཞི་རྩའི་ལམ་སྟོན་བྱེད་པ་དང་། སློབ་དེབ་བཟོ་སྒྲིག་དང་སློབ་སྦྱོང་གི་རྒྱུ་ཆ་(Study Materials) འདེམས་སྒྲིག་ལའང་ཐད་ཀར་ལམ་སྟོན་བྱེད་ཐུབ། དེར་མ་ཟད་བོད་ཀྱི་སྐད་ཡིག་སློབ་ཁྲིད་བྱེད་སྟངས་དང་ཕྲུ་གུའི་སྐད་ཡིག་སྦྱངས་སྟངས་བཅས་ཕྱོགས་ཡོངས་ཀྱི་གནས་སྟངས་ལ་འགྱུར་བ་གཏོང་ཐུབ།

            ནུབ་ཕྱོགས་ཀྱི་བོད་ཕྲུག་ཚོའི་གནས་སྟངས་ལ་འཚམ་པའི་བསླབ་གཞི་རྩ་འཛིན་ཞིག་བཟོ་བར་ངེས་པར་ཤེས་རིག་ལས་ཁུངས་ཀྱིས་རྐང་འགན་བཞེས་ཐོག བསླབ་གཞི་རྩ་འཛིན་བཟོ་འགོད་ཚོགས་ཆུང་ཞིག་འཛུགས་རྒྱུ་དེ་ཡིན། དེའི་ནང་གི་ཚོགས་མི་ནི་ཨ་རི་དང་། ཁེ་ན་ཌ། ཡུ་རོབ། སུད་སི་བཅས་ཀྱི་བོད་དགེ་ཉམས་མྱོང་ཅན་རྣམས་ཡིན་དགོས། ཐོག་མར་གཞི་རིམ་གྱི་ཞིབ་འཇུག་ཆ་ཚང་གནང་སྟེ། བསླབ་གཞི་རྩ་འཛིན་གྱི་རགས་ཟིན་བཟོ་འགོད་བྱེད་དགོས་ཤིང་། ཞིབ་འཇུག་གི་བརྒྱུད་རིམ་ཁྲོད། ནུབ་ཕྱོགས་ཡུལ་ཁག་གི་བོད་རིགས་མཐུན་ཚོགས་དང་བོད་མིའི་གནས་སྟངས་སྤྱི། སློབ་གྲྭའི་མཐུན་རྐྱེན། བོད་སྐད་སློབ་སྦྱོང་གི་དུས་ཚོད། ཕྲུ་གུའི་སློབ་སྦྱོང་གི་གོམས་གཤིས། དགའ་མོས་དགའ་ཕྱོགས། དགེ་རྒན་གྱི་གནས་སྟངས་བཅས་ཕྱོགས་ཡོངས་ཀྱི་གཞི་རིམ་གནས་ཚུལ་ལ་རྒྱུས་ལོན་བྱེད་དགོས།

            བསླབ་གཞི་རྩ་འཛིན་བཟོ་འགོད་བྱེད་སྟངས་ཐད་རྣམ་གཞག་(Theory) མང་པོ་ཞིག་ཡོད་ཀྱང་མདོར་བསྡུས་ན་ཐད་ཀར་བཟོ་འགོད་བརྒྱུད་རིམ་(The Forward Design Process) དང་། ལྟེ་བའི་བཟོ་འགོད་བརྒྱུད་རིམ།(The Central Design Process ) རྒྱབ་ཕྱོགས་བཟོ་འགོད་བརྒྱུད་རིམ་(The Backward Design Process) བཅས་གསུམ་ཡོད། དེ་དག་ལས་རྒྱབ་ཕྱོགས་བཟོ་འགོད་བརྒྱུད་རིམ་ནི་ང་ཚོའི་གནས་སྟངས་ལ་འཚམས་ཤོས་ཡིན་པ་མ་ཟད། དེང་སྐབས་བསླབ་གཞི་རྩ་འཛིན་བཟོ་འགོད་ཀྱི་རྣམ་གཞག་འདི་ལེགས་ཤོས་ཤིག་དང་དངོས་ཡོད་དང་དམིགས་ཡུལ་གཉིས་ཀ་ནས་ནུས་པ་ལྡན་པ་ཞིག་རེད། ཡུ་རོབ་སྤྱི་ཡོངས་སྐད་ཡིག་གི་སྒྲོམ་གཞི་(CEFR) དེ་ནི་རྒྱབ་ཕྱོགས་བཟོ་འགོད་ཀྱི་བརྒྱུད་རིམ་ལ་བརྟེན་ནས་བཟོས་པ་ཞིག་རེད།

            བསླབ་གཞི་རྩ་འཛིན་བཟོ་བར་གོང་གི་རྣམ་གཞག་རྣམས་ལས་ལེགས་ཆ་བསྡུ་ལེན་བྱེད་པ་དང་། ང་ཚོའི་དངོས་ཡོད་ཀྱི་གནས་ཚུལ་ལ་བརྟེན་ནས་ཕན་ཚུན་འབྲེལ་ཆགས་དང་གོ་རིམ་ལྡན་པ་ཞིག་བཟོ་དགོས། དཔེར་ན་དམིགས་ཚད།(Objective) གནས་ཚད། (Level) ནང་དོན། (Theme) སྐད་ཡིག་གི་བྱང་རྩལ།(Language Skills) དུས་ཚོད་(Period) བཅས་རིམ་པ་བཞིན་བཟོ་འགོད་བྱེད་དགོས་ལ། དེ་ཐད་སྐད་བརྡ་རིག་པ་དང་། སེམས་ཁམས་རིག་པ། སྤྱི་ཚོགས་དང་རིག་གཞུང་གི་རྐྱེན་བྱེད་བཅས་ལའང་རྒྱུས་ལོན་བྱེད་དགོས།

           དེར་བརྟེན། གོ་རིམ་ལྡན་པའི་སྤྱི་ཡོངས་ཀྱི་བསླབ་གཞི་རྩ་འཛིན་གཅིག་གི་འོག་སློབ་དེབ་དང་། སློབ་སྦྱོང་གི་རྒྱུ་ཆ་(Study Materials) མི་འདྲ་བ་བེད་སྤྱོད་བྱེད་ཆོག་པ་དཔེར་ན། བྱང་ཨ་རི་དང་། ཡུ་རོབ། སུད་སི་བཅས་ཀྱི་བསླབ་གཞི་རྩ་འཛིན་གཅིག་ཡིན་ཡང་ས་གནས་ཀྱི་གནས་ཚུལ་ལ་བརྟེན་ནས་སློབ་དེབ་རིགས་ཁ་ཤས་བཟོ་ཆོག་པ་ལྟ་བུ་ཡིན། བསླབ་གཞི་རྩ་འཛིན་དེས་ས་གནས་ཀྱི་སྐད་ཡིག་དང་དངོས་ཡོད་གནས་ཚུལ་ལ་གཞིགས་ཏེ་སློབ་དེབ་ག་གེ་མོ་གཅིག་གིས་དབང་སྒྱུར་བྱེད་པ་དེ་མེད་པར་བཟོ་བཞིན་ཡོད་པས། ནུབ་ཕྱོགས་རྒྱལ་ཁབ་ཁག་ནང་གི་ཁ་ཐོར་བོད་མིའི་ཚོའི་དངོས་ཡོད་གནས་ཚུལ་ལ་འོས་འཚམས་ཡིན་ཏེ། བསླབ་གཞི་དེའི་འོག་ཨ་རིའི་བོད་མི་ཚོས་ཨ་རིའི་གནས་ཚུལ་ལ་བལྟས་ཏེ་སློབ་དེབ་དང་སློབ་སྦྱོང་གི་རྒྱུ་ཆ་བཟོ་ཆོག་པ་དང་། ཡུ་རོབ་བོད་མི་ཚོས་ས་གནས་དེའི་གནས་ཚུལ་བལྟས་ཏེ་སློབ་དེབ་དང་སློབ་སྦྱོང་གི་རྒྱུ་ཆ་བཟོ་ཆོག དེར་བརྟེན་འབྲེལ་ཆགས་ཡིན་ལ་དོན་དངོས་དང་མཐུན་པའི་བསླབ་གཞི་རྩ་འཛིན་ཞིག་བཟོ་རྒྱུ་དེ་ལས་རིམ་འདིའི་མགོ་འཛུགས་ལྟ་བུ་བྱས་ཆོག་གོ།

༢།  སློབ་སྦྱོང་གི་རྒྱུ་ཆ་རྩོམ་སྒྲིག Editing Study Materials

            སློབ་སྦྱོང་གི་རྒྱུ་ཆའི་ནང་། སློབ་དེབ་དང་། གཞོགས་འདེགས་སློབ་དེབ། སྦྱོང་དེབ། སྒྲ་ལྡན་ཀློག་དེབ། བརྙན་དེབ། བརྙན་འཁོར། དྲ་ཐོག་སློབ་སྦྱོང་། རྩེད་མོ། དཔྱད་ཞིབ་སོགས་ཚུད་ཡོད།  རྒྱུ་ཆ་འདི་དག་གིས་དམིགས་ཚད་ཀྱང་ངེས་ཅན་ཞིག་ཡོད་དགོས་ལ། བསླབ་གཞི་རྩ་འཛིན་གྱི་དགོངས་དོན་དང་མཐུན་པར་བྱེད་དགོས། སྐད་ཡིག་གི་བྱང་རྩལ་བཞིར་དབྱེ་ན་སྐད་ཡིག་ཐོབ་པའི་བརྒྱུད་རིམ་གྱི་འབྲེལ་བའི་ནང་། ནང་འཇུག་(Input) སྟེ་ཉན་པ་དང་ཀློག་པ་གཉིས་དང་། ཕྱིར་འདོན་(Output) སྟེ་ བཤད་པ་དང་འབྲི་བ་བཅས་སུ་དབྱེ་ཞིང་། ངོ་བོའི་ཆ་ནས་དབྱེ་ན་འབྲེལ་ལམ་སྐད་ཡིག་ (Communicative Language) ཏེ་ཉན་བཤད་གཉིས་དང་། བྲིས་རྩོམ་སྐད་ཡིག་(Literary Language) ཏེ་ཀློག་འབྲི་གཉིས་སུ་དབྱེ་བ་ཡིན། དེ་དག་ལས་གང་ཞིག་ཡར་རྒྱས་གཏོང་ཐུབ་མིན་དང་ཇི་ལྟར་གཏོང་མིན་ལའང་ཞིབ་འཇུག་བྱེད་དགོས།

            དེས་ན་གོང་གི་དབྱེ་བ་དེ་དག་བརྒྱུད་ནས་རྒྱུ་ཆ་རྣམས་གོ་རིམ་ཡོད་པ་དང་དངོས་ཡོད་ཀྱི་འཚོ་བའི་ནང་བེད་སྤྱོད་ཡོད་པ་ཞིག་བཟོ་དགོས་པ་ཡིན། ལྷག་པར་དུ་བཤད་རྩལ་ཡར་རྒྱས་འགྲོ་བར་ཉན་རྩལ་ཤིན་ཏུ་གལ་ཆེ་བས་དེ་ཐད་དམིགས་བསལ་གྱིས་སྒྲ་ལྡན་ཀློག་དེབ་སོགས་བཟོ་དགོས་ལ། ཀློག་རྩལ་ཡར་རྒྱས་འགྲོ་བར་ཡང་རྒྱུ་ཆ་རྣམས་གནས་ཚད་ཀྱི་རིམ་པ་ལྟར་བཟོ་དགོས། དབྱིན་ཇི་ལྟ་བུ་ལ་མཚོན་ན་སྤྱི་ཡོངས་སུ། གཞི་རིམ་དང་། འབྲིང་རིམ། མཐོ་རིམ་བཅས་དང་། ནང་གསེས་རིམ་པ་དྲུག་ཏུ་དབྱེ་སྟེ་རེ་རེའང་ཐ་སྙད་ཀྱི་ཚད་བཀག་རིམ་པ་བཞིན་ཡོད་ལ། དེའི་རྗེས་སུ་སྤྱི་ཡོངས་ཀྱི་དེབ་རིགས་བཅས་ཀློག་པར་དཀའ་ངལ་མེད་པ་རེད། དེ་ལྟར་ཡང་འབྲི་རྩལ་ཡར་རྒྱས་གཏོང་རྒྱུ་དེ་ནི་དཀའ་ངལ་ཆེ་ཤོས་ཤིག་ཡིན་ཡང་དམིགས་ཚད་འབྲིང་ཙམ་དུ་བསླེབ་ཐུབ་པ་བྱ་དགོས་སྙམ།

            ང་རང་ལྡི་ལི་གསར་བའི་དབྱིན་ཇིའི་རིག་གཞུང་ལྷན་ཁང་(British Council) ནང་སློབ་སྦྱོང་བྱེད་སྐབས་དམིགས་བསལ་གྱིས་ཚོར་སྣང་བྱུང་བ་ཞིག་ནི། སློབ་ཁྲིད་ཀྱི་བརྒྱུད་རིམ་གཅིག་གི་ནང་། སྐད་ཡིག་གི་བྱང་རྩལ་བཞི་མཉམ་དུ་འགྲོ་བ་དེ་དང་།  སློབ་དེབ་དང་སློབ་ཁྲིད་ཐབས་ལམ་མཉམ་དུ་ངོ་བོ་གཅིག་དུ་ཡོད་པ་དེ་རེད། དེའི་ནང་དབྱིན་ཇི་སྐད་ཡིག་དེ་སྐད་ཡིག་གཉིས་པའི་ཚུལ་དུ་སློབ་ཀྱི་ཡོད། ང་ཚོས་དེ་དག་ལས་ཉམས་མྱོང་མང་པོ་ཞིག་ལེན་རྒྱུ་ཡོད་པ་མ་ཟད། སློབ་སྦྱོང་གི་རྒྱུ་ཆ་བཟོ་འགོད་ཐད་ལའང་དཔེ་ལྟ་བྱེད་དགོས་ས་མང་པོ་ཞིག་འདུག དེ་མིན་ཀ་ལི་ཕོར་ནི་ཡའི་མི་མང་སློབ་གྲྭ་ཁག་གི་སྐད་ཡིག་གཉིས་པའི་བསླབ་གཞི་རྩ་འཛིན་གྱི་སྒྲོམ་གཞི་དང་། ནེའུ་ཡོག་མངའ་སྡེའི་དབྱིན་ཇི་དེ་སྐད་ཡིག་གཉིས་པའི་ལམ་ནས་སློབ་ཐབས་སོགས་ལས་ཀྱང་ལེགས་ཆ་ལེན་ཆོག་པ་ཡིན།

            རྒྱུ་ཆ་དེ་དག་བཟོ་བར་དང་པོ་རྒྱུ་ཆ་དེ་དག་གནས་ཚད་དང་མཐུན་པ། སྐབས་དོན་དང་འབྲེལ་བ། འདེམས་གསེས་མ་ནོར་བ། མྱུར་ལམ་གྱི་སྒོ་ནས་སྦྱངས་བར་ཕན་ཐོགས་ཡོད་པའི་ནང་དོན་རྩོམ་སྒྲིག་བྱེད་དགོས་ལ། དེ་རྗེས་དེ་དག་སྒྲ་འཇུག་དང་། བརྙན་སྡེར། ཀློག་དེབ། རྩེད་མོ་ལ་སོགས་པའི་ངོ་བོར་བཟོ་སྒྲིག་བྱ་རྒྱུ་དེ་ཡིན། དཔེར་ན་ནང་དོན་རྩོམ་སྒྲིག་བྱེད་སྐབས་དུས་ཚོད་ཀྱི་ཚད་བཀག་ཤིན་ཏུ་དམ་པོ་ཞིག་གི་སྒྲོམ་གཞིའི་འོག ནང་དོན་བརྒྱ་ཕྲག་མང་པོ་འདེམས་གསེས་བྱེད་དགོས་ཤིང་། འདེམས་གསེས་མ་ནོར་བར་མང་ཉུང་རན་པ་ཞིག་བཟོ་རྒྱུ་ནི་གལ་ཆེན་ནང་གི་དོན་ཆེན་ཡིན། དེ་མིན་ནང་དོན་རྩོམ་སྒྲིག་དེ་འོས་འཚམས་བྱེད་མ་ཐུབ་ཚེ་རྣམ་པ་(སྒྲ་བརྙན་རྩེད་མོ་སོགས་) གང་ཞིག་ཏུ་བཟོ་སྒྲིག་བྱས་ཀྱང་དངོས་ཡོད་ཀྱི་ཕན་ཐོགས་ཡོང་མི་ཐུབ། དེས་ན་རྒྱུ་ཆ་འདི་དག་རྩོམ་སྒྲིག་བྱེད་པར་ངེས་པར་འབྲེལ་ཆགས་གོ་རིམ་ཅན་ཞིག་ཡིན་དགོས།

༣། བོད་དགེ་ཚོའི་སྡིངས་ཆ་གསར་གཏོད།

            གོང་དུ་བཤད་པ་ལྟར། བོད་ཀྱི་སྐད་ཡིག་དེ་སྐད་ཡིག་གཉིས་པའི་ལམ་ནས་སློབ་ཁྲིད་བྱེད་པར་དགེ་རྒན་ཚོར་དེའི་ཐད་ཀྱི་སྦྱོང་བརྡར་ཡོད་དགོས། སྦྱོང་བརྡར་དེ་འདྲ་ཞིག་སྤྲོད་པར་ཤེས་ལས་དང་བོད་རིགས་མཐུན་ཚོགས་ཚང་མ་མཉམ་འབྲེལ་བྱ་དགོས། ཡིན་ནའང་ཐོག་མར་ཕྱི་རྒྱལ་ཡུལ་གྲུ་ཁག་ཏུ་བོད་ཡིག་སློབ་ཁྲིད་གནང་བཞིན་པའི་དགེ་རྒན་རྣམས་ཀྱིས་བསམ་ཚུལ་དང་ཉམས་མྱོང་བརྗེ་རེས་བྱེད་སའི་གླེང་སྟེགས་ཤིག་བསྐྲུན་རྒྱུ་དང་། དེ་རྗེས་ཉམས་མྱོང་འདེམས་གསེས་(Selection of Experiences) དང་ཉམས་མྱོང་ཕྱོགས་སྒྲིག་བྱེད་རྒྱུ་(Organization of Experiences)། དགེ་རྒན་ཚོའི་གནས་སྟངས་ལ་ཞིབ་འཇུག་བྱས་ཏེ་གནད་དོན་གང་དག་ཐད་སྦྱོང་བརྡར་སྤྲོད་དགོས་མིན་དང་། ཇི་ལྟར་སྤྲོད་མིན་སོགས་ལ་འཆར་འགོད་བྱ་དགོས།

            གཞན་ཡང་བོད་ཀྱི་སྐད་ཡིག་དེ་སྐད་ཡིག་གཉིས་པའི་ཐོག་སློབ་ཁྲིད་བྱེད་ཕྱོགས་ཀྱི་ལམ་སྟོན་རྩ་འཛིན་ཞིག་དང་། སློབ་ཁྲིད་ཀྱི་ལག་ལེན་ཁྲོད་དཀའ་ངལ་ཅི་ཞིག་འཕྲད་ཀྱི་ཡོད་མེད་གླེང་སའི་ཆ་རྐྱེན་ཞིག་ཀྱང་བསྐྲུན་ཏེ་བསླབ་གཞི་སྤྱི་དང་། སློབ་དེབ། སློབ་སྦྱོང་གི་རྒྱུ་ཆ་དེ་དག་གི་བེད་སྤྱོད་དང་ལག་ལེན་གྱི་གནས་ཚུལ་(Feedback)བསྐྱར་ཞིབ་བྱེད་སའི་སྡིངས་ཆ་ཞིག་ཀྱང་བསྐྲུན་དགོས།

༤། ཕ་མ་རྣམས་ལ་གོ་སྐོན་སློབ་གསོ་དང་ཟབ་སྦྱོང་།

            ནུབ་ཕྱོགས་ཡུལ་གྲུ་ཁག་གི་ཁ་ཐོར་བོད་མིའི་གནས་སྟངས་དང་ཁོར་ཡུག་བཅས་ཀྱི་རྐྱེན་པས་བོད་ཀྱི་སྐད་ཡིག་རྒྱུན་འཛིན་བྱ་རྒྱུ་དེ་དཀའ་ངལ་ཞིག་ཡིན། ཡིན་ནའང་ཁྱིམ་ཚང་ནི་ཕྲུ་གུ་ཚོས་མི་རིགས་ཀྱི་ངོ་བོ་དང་། སྐད་ཡིག རིག་གཞུང་བཅས་རྒྱུན་འཛིན་བྱེད་པའི་ཐོག་མའི་གོམ་པ་སྤོ་ས་ཡིན་ལ། ཁྱིམ་ཚང་གི་སློབ་གསོ་ནི་གཞི་རིམ་གྱི་སྐད་ཡིག་སྦྱོང་བའི་གོ་སྐབས་གལ་ཆེན་ཞིག་དང་ནུབ་ཕྱོགས་སུ་བཞུགས་པའི་བོད་མི་རྣམས་ལ་མཚོན་ན་སྐད་ཡིག་བེད་སྤྱོད་ཀྱི་ཁོར་ཡུག་ཡག་ཤོས་དེ་ཡིན། དེར་བརྟེན་བོད་ཀྱི་སྐད་ཡིག་རྒྱུན་འཛིན་བྱེད་པར་ཁྱིམ་ཚང་གི་སློབ་གསོ་དང་ཁ་བྲལ་ཐབས་མེད།

            དེར་བརྟེན་ཕ་མ་ཚོར་གོ་སྐོན་སློབ་གསོ་གཏོང་བ་དང་། ཁྱིམ་ཚང་ནང་བོད་སྐད་བེད་སྤྱོད་གཏོང་བར་སྐུལ་མ་བྱེད་དགོས་ཤིང་། བོད་སྐད་ཡར་རྒྱས་གཏོང་བར་བྱེད་སྒོ་ཅི་ཞིག་སྤེལ་བ་ནས་ཇི་ལྟར་སྤེལ་བའི་བར་གྱི་ཐབས་ཤེས་ལ་ཞིབ་འཇུག་གིས་ཟབ་སྦྱོང་སྤྲོད་དགོས། ནུབ་ཕྱོགས་ཀྱི་རིག་གཞུང་དང་ཁོར་ཡུག་ཁྲོད། དེང་སྐབས་ཀྱི་བུ་ཕྲུག་རྣམས་ཀྱི་བསམ་ཚུལ་དང་། སྤྱོད་ལམ། དགའ་ཕྱོགས་སོགས་ཁྱོན་ནས་མི་འདྲ་བས་ཁོང་ཚོའི་བློ་དང་འཚམ་པར་ཁྱིམ་ཚང་ནང་བོད་སྐད་བེད་སྤྱོད་ཇི་ལྟར་བྱེད་ཚུལ་སོགས་ལ་ཟབ་སྦྱོང་སྤྲོད་དགོས། དེའི་ཐད་༸གོང་ས་མཆོག་ཕྱི་རྒྱལ་ཡུལ་ཁག་ཏུ་ཆིབས་བསྒྱུར་སྐབས་བོད་རིགས་ཁེ་གཙང་ལོགས་སུ་ཐུག་གི་ཡོད་པས། གོ་སྐབས་དེ་དག་དམ་འཛིན་གྱིས་ཕ་མ་རྣམས་ལ་གོ་སྐོན་སློབ་གསོ་དང་བྱུང་ན་ཉིན་གཅིག་གཉིས་ནང་ཟབ་སྦྱོང་སྤྲོད་དགོས་སྙམ།

༥། བོད་ཕྲུག་ཚོར་འབྲེལ་འདྲིས་ཀྱི་གོ་སྐབས་བསྐྲུན་པ།

            བོད་ཕྲུག་ཚོར་བོད་མིའི་ཁོངས་གཏོགས་ཀྱི་འདུ་ཤེས་དང་། བོད་སྐད་བེད་སྤྱོད་ཀྱི་གོ་སྐབས། བོད་ཕྲུག་ཚོ་ནང་ཕན་ཚུན་འབྲེལ་ལམ་ཡོང་བར་བྱེད་དགོས་ལ། དེ་འདྲ་ཞིག་ཡོང་བར་དབྱར་དགུན་གྱི་གུང་གསེང་དང་བསྟུན་ནས་གཞས་དང་ཞབས་བྲོའི་མཚན་ཚོགས་དང་། དེ་མིན་བོད་ཟས་བོད་ལ་གྱོན་པའི་ཉིན་མོ་སྲུང་བརྩི་སོགས་ཁོང་ཚོ་མཉམ་འཛོམས་ཀྱི་གོ་སྐབས་བསྐྲུན་རྒྱུ་དེ་ཡིན། དེ་ལྟར་ཡོང་བར་བོད་མིའི་སྒྲིག་འཛུགས་ཀྱི་དོན་གཅོད་ཁག་དང་། བོད་རིགས་མཐུན་ཚོགས་ཁག་ནས་འགན་ལེན་བྱེད་ཐུབ་དགོས།

            བོད་རིགས་ཁེ་གཙང་མཉམ་འཛོམས་བྱུང་ཚེ། ཁོང་ཚོའི་བར་གྱི་འབྲེལ་ལམ་ཇེ་ཆེར་གྱུར་ཏེ། བོད་མི་ནང་ཁུལ་ལ་གྲོགས་པོ་གྲོགས་མོ་བཟོ་རྒྱུ་དང་།  རྗེས་སུ་བོད་རིགས་ནང་ཁུལ་གཉེན་སྒྲིག་ལའང་ཕན་ཐོགས་ཆེན་པོ་ཡོང་ཐུབ་ལ། དེ་ལྟར་བྱུང་བར་ད་ལྟ་ནས་བསམ་བློ་ཞིབ་ཚགས་ཤིག་བཏང་སྟེ་འཆར་གཞི་སྒྲིག་དགོས་སྙམ།

༦། མཐའ་སྡོམ།

            གོང་གི་གནད་དོན་དེ་དག་ལ་བསམ་ཞིབ་ཅིག་བྱས་ཚེ། ནུབ་ཕྱོགས་ཡུལ་གྲུ་ཁག་གི་བོད་ཕྲུག་ཚོར་བོད་ཀྱི་སྐད་ཡིག་བསླབ་རྒྱུའི་ལས་དོན་དེ་ནི། ད་ཡོད་ཀྱི་བོད་མིའི་སྒྲིག་འཛུགས་དང་། ཚོགས་པ་ཁག མི་སྒེར་བཅས་ཀྱི་གདོང་ལེན་བྱེད་དགོས་པའི་གནད་དོན་ཞིག་ཡིན་པ་ཙམ་མ་ཟད། ལྡོག་ཏུ་མེད་པའི་དཀའ་ངལ་ཞིག་ཀྱང་ཆགས་ཡོད། དེར་བརྟེན། འདིའི་ཐད་ལ་བོད་མི་ཡོངས་ནས་ཀླད་དཀྲུགས་འཚུབ་འདོན་གྱིས་ནུས་པ་མཉམ་སྤུངས་བྱེད་རྒྱུ་དང་། ཞིབ་འཇུག་གི་བརྒྱུད་རིམ་ནང་། ངེས་པར་དུ་རྣམ་དཔྱོད་ཕྱོགས་ལྷུང་ཅན་གྱི་མ་གོས་པར་དྲང་བདེན་གྱིས་སྒོ་ནས་གནད་དོན་ལ་ལྟ་རྒྱུ་དེ་ཡིན། དེ་ལས་ཀྱང་ཤིན་ཏུ་གལ་ཆེ་བ་ནི་ལས་དོན་དེ་དམིགས་ཚད་ལྡན་པ་ཞིག་ཡོང་རྒྱུར་གོ་རིམ་ཡོད་པའི་སྒོ་ནས་གནད་དོན་བྱེ་བྲག་པ་རེ་རེར་ལས་འཆར་གྱི་རིམ་པ་ཆ་ཚང་ཞིག་དགོས་པ་མ་ཟད། དེ་དང་འཚམས་པར་ལས་དོན་བྱེད་རྒྱུ་དེ་ཡིན་ནོ།།

( རྩོམ་ཡིག་འདི་ནི་ང་རང་སྒེར་གྱི་བསམ་ཚུལ་ཡིན་པ་ལས་སྒྲིག་འཛུགས་གང་ཞིག་གི་ལྟ་བ་མཚོན་མེད། )

འབྲེལ་ཡོད་གསར་འགྱུར།

སྲིད་སྐྱོང་མཆོག་གིས་ཨོ་གླིང་སིཌ་ཎི་བོད་རིགས་མི་མང་ལ་གསུང་བཤད་གནང་། ༢༠༢༥།༠༧།༡༡ པར་འབྲེལ་ཡོད་ཀྱིས་མཁོ་སྤྲོད་གནང་།
Mobile App

སྲིད་སྐྱོང་མཆོག་གིས་རྒྱ་ནག་གཞུང་དང་མཉམ་དུ་སྒོ་རྒྱབ་ཀྱི་འབྲེལ་བ་ཡོད་ཀྱང་འབྲེལ་བ་སླར་གསོ་བྱེད་པར་ཕན་ཐོགས་གང་ཡང་བྱུང་མེད་ཅེས་གསུངས།

ཆུ་ཚོད་ ༣ སྔོན་ལ།
Arunachal Pradesh CM Pema Khandu (Photo/DNA)
Mobile App

རྒྱ་གར་དང་བོད་ས་འབྲེལ་ཡིན་པ་ལས་རྒྱ་ནག་ལ་འབྲེལ་བ་མེད་ཅེས་གསུངས།

ཆུ་ཚོད་ ༤ སྔོན་ལ།
པར་འགྲེལ། བོད་ཀྱི་གནས་མཆོག་གངས་རིན་པོ་ཆེ། དྲ་ལམ་གྱི་པར།
Mobile App

བོད་སྐྱིད་གྲོང་ཁུལ་དུ་ཆུ་ལོག་བྱུང་རྐྱེན་རྒྱ་གར་གྱི་གནས་མཇལ་བ་ཕྱིར་ལོག་བཏང་།

ཆུ་ཚོད་ ༦ སྔོན་ལ།
མདོ་སྨད་ཆོལ་ཁས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས། བོད་མིའི་སྒྲིག་འཛུགས་ཀྱི་སྐུ་པར། ༢༠༢༥།༦།༣༠
Mobile App

༧གོང་ས་རྒྱལ་བ་རིན་པོ་མཆོག་ལ་རྒྱ་གར་གྱི་གཟེངས་རྟགས་མཐོ་ཤོས་དེ་དབུལ་དགོས་པའི་འབོད་སྐུལ་ཞུས།

༢༠༢༥/༠༧/༠༩
རྒྱ་གར་ཡུལ་མི་རྣམས་ཀྱིས་བོད་རིགས་བྱིས་པའི་བྲིས་པའི་རི་མོར་གཟིགས་ཞིབ་གནང་བཞིན་པ། འབྲེལ་ཡོད་ཀྱིས་མཁོ་སྤྲོད་གནང་། ༢༠༢༥།༧།༧
Mobile App

བརྩེ་བའི་སྐུ་མདུན་ཞེས་པའི་རི་མོའི་འགྲེམས་སྟོན་བྱེད་བཞིན་འདུག 

༢༠༢༥/༠༧/༠༩
བོད་རང་སྐྱོང་ལྗོངས་མི་དམངས་སྲིད་གཞུང་ཟེར་བའི་མགོ་ཁྲིད་གཞོན་པ་ཟུར་བ་ཝང་ཡུང་།
གསར་འགྱུར།

བོད་རང་སྐྱོང་ལྗོངས་ཟེར་བའི་མགོ་ཁྲིད་གཞོན་པ་ཟུར་བ་ཞིག་ལ་སྲོག་ཁྲིམས་གཅད་རྒྱུ་ཡིན་འདུག

༢༠༢༥/༠༧/༠༩

མཆན། 15

  1. ཆབ་བྲག་ལྷ་མོ་སྐྱབས། says:
    ལོ་ 12 སྔོན།

    ཨོ་རེད། ཡ་ཡ། དེང་སང་གསར་ཉམས་ཇེ་དོད་དང་ལྷན་དུ་བསམ་བློ་ཡང་ཇེ་ཟབ་རེད། དགའ་ཡོད། ནུབ་ཀྱི་བོད་བྱིས་ཚོར་ཐབས་ཤེས་གང་འོས་རེ་འཐེན་ཐུབ་ན་ཡང་གཙོ་བོ་གྲོས་ཚོགས་ཀྱི་ལམ་སྟོན་མ་ནོར་བ་ཞིག་ཡོད་ན་ས་གནས་ཁག་ནས་དང་ལེན་བྱ་རྒྱུར་ཕན་ཐོགས་ཡོད། འོན་ཀྱང་སློབ་གསོའི་ཐོག་ལ་གྲོས་ཚོགས་ནང་ན་བསམ་གཞིགས་ཐུབ་མཁན་དུ་ཙམ་ཡོད་མེད་མི་ཤེས། དེ་སྔོན་ཡིན་ན་རེ་བ་མེད།

    Reply
  2. བྱ་གཞུང་དཔལ་རྡོར། says:
    ལོ་ 12 སྔོན།

    རྒན་ལགས། ཆོལ་གསུམ་སྤུན་མཆེད་མ་རེད་ལགས། ཡུལ་གྱུར་སྤུན་ལྔ་རེད། ཡུལ་གྱུར་སྤུན་ལྔའི་བཏོན་པའི་སྙན་དངགས་ཀྱི་དེབ་དེར་ཅོང་སྒྲ་ཟེར་བ་རེད། ད་སྐབས་ཡུལ་གྱུར་སྤུན་ལྔའི་ནང་ནས་གཉིས་གཤོག་ཐོགས་ཆགས་པ་རེད། དེ་མིན་གསུམ་འདི་ན་བསྡད་ཡོད། གང་ལྟར་རྒན་ལགས་ལ་ཐུགས་ཁག་ཡོད་མ་རེད། དེ་ལྟར་ཡང་ད་དུང་ལས་དོན་སྔར་བཞིན་ཡིན་ཙང་བློ་བ་དགའ་ཡོད། གང་ལྟར་དེའི་སྐོར་འདིར་སྐབས་སུ་མ་བབས་པས་རེ་ཞིག་གླེང་བར་མི་བྱ། ནུབ་ཕྱོགས་བོད་ཕྲུག་ཚོར་བོད་ཀྱི་སྐད་ཡིག་དེ་སྐད་ཡིག་གཉིས་པའི་ལམ་ནས་སློབ་ཐབས་ཀྱི་ལས་ཀ་དེའང་ད་སྐབས་མག་མོག་རབ་རིབ་ཅིག་ཅིག་ཏུ་གནས་ཡོད་རེད། དོན་དངོས་ཐོག་ལས་ཀ་དེ་འདྲ་ཞིག་བྱེད་པར་ལས་སླ་པོ་ཞིག་མེད་པ་རེད། གཙོ་བོ་དེ་ལས་ཀ་འདི་འདྲ་ཞིག་འགོ་བཙུགས་ན་གྲུབ་འབྲས་ཅི་འདྲ་ཞིག་ཐོབ་རྒྱུ་ཡིན་མིན་དང་། ལས་དོན་དེ་ཅི་ལྟར་བསྒྲུབ་རྒྱུ་ཡིན་མིན་དེ་གནད་འགག་རེད། ད་རུང་དེ་སྐོར་བསམ་ཚུལ་གྱི་ངོ་བོ་རང་ན་གནས་ཡོད་པ་ལས་དངོས་སུ་ཞིབ་འཇུག་གི་བརྒྱུད་རིམ་ད་དུང་ཕྱིན་མེད་པ་རེད། ད་དེ་ཙམ་ཡིན།

    Reply
  3. ཆབ་བྲག་ལྷ་མོ་སྐྱབས། says:
    ལོ་ 12 སྔོན།

    ཁྱེད་ཀྱིས་ང་ལ་ཕྱིར་དྲན་ཐེངས་གཅིག་བྱེད་བཅུག་སོང། ངའི་ཕྱིར་དྲན་གྱི་ཁྲོད་ན་ཁྱེད་དང་ཁྱེད་འདྲ་མི་ཉུང་བ་ཞིག་ཡོད། དཔེར་ན། གཅིག་དཀར་གཉིས་ནག་ཟེར་བའི་རྩོམ་རིག་གི་ཚོགས་ཆུང་ཞིག་ཡོད། ཁོ་ཚོས་རང་གི་ཉལ་ཁང་ནང་ལ་སྙན་དངགས་སྦྱོར་གླེང་གི་ལས་གཞི་ཞིག་ཀྱང་སྤེལ་མྱོང། ད་དུང་ཁོ་ཚོའི་འཛིན་གྲྭས་མཐར་ཕྱིན་རྩོམ་རིག་གི་དུས་དེབ། <<རྩོམ་རིག་གི་གྲུ་ཁ>>ཟེར་བ་བཏོན་ཡོད། དེ་ནས་ཆོལ་གསུམ་སྤུན་མཆེད་ཡིན་ནམ། ཁོང་ཚོས་ <<ཅོང>> ཟེར་བའི་སྙན་ངག་གི་དུས་དེབ་བཏོན་ཡོད། བསྟུད་མར་རིག་གནས་འཛིན་གྲྭ་ཐེངས་གསུམ་བཞི་བར་ལ་རེ་བ་ཡོད་པའི་སློབ་མ་མི་ཉུང་བ་ཐོན། དེ་དུས་ང་རང་ལ་མཚོན་ན་ཡང་ཧ་ཅང་སྤྲོ་བ་འཕེལ་བའི་སྐབས་ཤིག་ཡིན།
    དེ་ནས་རིམ་བཞིན་དུ་བོད་ཀྱི་སྐད་ཡིག་ལ་རང་རྐྱ་འཕེར་བའི་སློབ་མའི་གྲངས་ཚད་ཇེ་ཉུང་དུ་གྱུར་བར་མ་ཟད། སློབ་མཐར་ཕྱིན་པའི་རེ་བ་ཅན་གྱི་སློབ་མ་མི་ཉུང་བ་ཞིག་སྙུ་གུ་དང་ཁ་ཐག་ཇེ་རིང་དུ་གྱུར་བར་མ་ཟད་ལ་ལ་ཞིག་གོ་མེད་ཚོར་མེད་དུའང་གྱུར། དེའི་མཚུངས་ངའི་སློབ་ཁྲིད་ཀྱི་སྤྲོ་བ་ཡང་ཆུང་དུ་སོང་ཡང། ཐ་ན་མུ་མཐུད་ཨུ་ཚུགས་བྱས་ན་དོན་སྙིང་མི་འདུག་སྙམ་པའི་བསམ་ཚོར་ཡང་ཡང་བྱུང། དེ་ལྟར་ང་རང་ཡང་མཐོ་སློབ་ཁང་དང་ཁ་བྲལ། ཡིན་ན་ཡང་ང་ནམ་ཡང་བོད་དགེ་དང་རྩོམ་རིག་ལ་ཁ་འབྲལ་མི་སྲིད།
    རེ་བ་ཅན་གྱི་སློབ་མ་མི་ཉུང་བ་ཞིག་བྱུང་ཡོད་དེ། ཁ་ཤས་རྩོམ་སྒྲིག་པ་དང། ཁ་ཅིག་ཉམས་ཞིབ་པ། ལ་ལ་ཡིག་སྒྱུར་བ། མི་ཉུང་བ་ཞིག་དགེ་རྒན་སོགས་ཀྱི་ལས་གནས་སུ་ཞུགས་ཐུབ་ཡོད་ལ། འགའ་ཞིག་ད་དུང་ཡང་མུ་མཐུད་ཕྱག་ལས་གང་ལེགས་གནང་བཞིན་པ་དག་ནི་ཡི་རངས་དང་སྤོབས་པའི་གཞི་སྟེ། བཀའ་དྲིན་ཆེ་ཞུའོ།

    Reply
  4. བྱ་གཞུང་དཔལ་རྡོར། says:
    ལོ་ 12 སྔོན།

    དགོངས་དག གཅིག་ལབ་རྒྱུ་ལུས་འདུག སློབ་དེབ་རྩོམ་སྒྲིག་པའི་ནང་ལ་རྒན་ལགས་ཕེབས་ཐུབ་ན་ཤིན་ཏུ་ལེགས་མོད། དེ་ལྟར་བྱུང་མེད་ཀྱང་རྒན་ལགས་ནས་སློབ་ཕྲུག་མང་པོ་ཞིག་བསྐྱངས་ཡོད་རེད། ང་ཡང་དེ་ནང་གི་གཅིག་རེད། ཐུགས་མདངས་ཅུང་ཡོད་མཁན་ཟིག་ཡིན། ཧ་་་ཧ་་་་ཧ་་་་ ས་རཱའི་མཐོ་སློབ་ཀྱི་སློབ་དེབ་དེ་ཚོ་སྐྱིད་པོ་ཟིག་སྒྲིག་ཡོད། ལྷག་པར་དུ་རྩོམ་རིག་གི་སློབ་དེབ་དེ་ཚོ་སྦྱངས་རྒྱུ་བྱུང་བ་སྐལ་བ་བཟང་པོ་བྱུང་། ལྷག་པར་དུ་ལངས་ཚོའི་རྦབ་ཆུ་དང་། རྟ་ནག་སྒྲོག་འགྲོས། རྐང་ལམ་ཕྲ་མོ། ཆུང་གྲོགས་རྗེས་དྲན། རྒྱན་ཆ། སྡོམ་གྱི་སྐུད་པ། ཤར་རི་སྤོ་བ། དཔའ་བོའི་མེ་ཏོག་སོགས་ལ་བག་ཆགས་འཇོག་རྒྱུ་བྱུང་བ་དགའ་ཡོད། རྒྱན་ཆའི་སྒྲུང་འབྲི་ཐབས་དེ་ཅུང་ངོ་མཚར་བ་ཞིག་ཡིན། དེའི་སྐོར་ལ་ངས་དཔྱད་གཏམ་ཞིག་བྲིས་ཡོད་པ་དེ་ང་སློབ་གྲྭ་ཐོན་པའི་རྗེས་སུའང་ས་རཱའི་སློབ་ཕྲུག་ཚོས་ཡིག་ཚད་སྦྱངས་བྱེད་དུ་ལྟ་བཞིན་འདུག་ཟེར། དེ་མིན་རྒན་ལགས་ཀྱིས་ལང་ཚོའི་རྦབ་ཆུ་འཁྲིད་སྐབས། རྒན་གྱིས་འཛིན་ཁང་ནང་དུ་སྐད་ཤུགས་ཆེན་པོས་སྙན་ངག་གྱེར་འདོན་བྱས་པ་དེ་ངས་བརྗེད་རྒྱུ་ཞིག་མི་འདུག སྐབས་དེར་ལང་ཚོའི་རྦབ་ཆུའི་སློབ་ཁྲིད་དེ་ནི་ཚོར་སྣང་སྣ་ཚོགས་ཤིག་གི་ཁྲོད་དུ་གནས་ཡོད། གྱེར་འདོན། འགྲེལ་བཤད། རྩོམ་པ་པོ་དོན་གྲུབ་རྒྱལ་རྗེས་དྲན། དེང་རབས་གསར་བའི་རྩོམ་རིག་སོགས་དང་འབྲེལ་ནས་སློབ་ཐུན་དེ་ཇི་ལྟར་རྫོགས་པའང་མ་ཤེས། དེ་མིན་རྐང་ལམ་ཕྲ་མོ་ཁྲིད་དུས་ང་ཚོའི་མིག་མདུན་ནི་གསར་གཏོད་དང་སེམས་ཤུགས་ཀྱིས་ཁེངས་ཡོད། གང་ལྟར་རྒན་ལགས་ཀྱི་སློབ་དེབ་ད་ཚོ་ལ་བརྟེན་ནས་སློབ་ཕྲུག་མང་པོ་ཞིག་བསྐྱེད་བསྲིངས་བྱས་ཡོད་རེད། སྐབས་དེའི་དུས་ངོ་མ་སྐྱིད་པོ་ཟིག་ཡིན། དེ་ལྟར་ཡང་སྙན་ངག་མེ་ལོང་མ་ཁྲིད་པ་དེ་ང་བག་ཆགས་ཞེ་དྲག་ཅིག་བཞག་མི་འདུག སྐབས་དེ་ཙམ་ནས་སློབ་གྲྭ་ཁག་གི་སློབ་དེབ་ཁག་རྒན་ལགས་ཀྱི་ལམ་སྟོན་དང་བཟོས་ཡོད་ཚེ་ཇི་ལྟར་ཡང་སློབ་ཕྲུག་གང་ལ་གང་འཚམ་ཞིག་བསྐྱེད་བསྲིངས་བྱས་ཡོད་རེད། ད་སྐབས་ཀྱི་བོད་ཡིག་གི་སློབ་དེབ་ནང་དུ་སུམ་རྟགས་དང་། གཏོང་ཡིག་དང་རྒྱུན་སྤྱོད་ཡིག་རིགས་མང་པོ་ཞིག་བླུགས་ནས་བཞག་ཡོད་རེད། ད་རེ་བ་ཞེ་དྲག་མི་འདུག གང་ལྟར་རྒན་ལགས་ཀྱི་རྩོམ་རིག་གི་སློབ་དེབ་དེ་ཚོ་ང་ལ་བག་ཆགས་ཟབ་མོ་བྱུང་། འདི་ཚོ་གླེང་སྐབས་ས་རཱའི་མཐོ་སློབ་ཀྱི་འཚོ་བ་དེའང་དྲན་ཐལ། ཧཧཧཧ

    Reply
  5. བྱ་གཞུང་དཔལ་རྡོར། says:
    ལོ་ 12 སྔོན།

    རྒན་མཆོག་གིས་གསུངས་བ་བདེན། གཅིག་བྱས་ན་ངས་ཕོ་གསར་གྱི་རྟགས་སྟོན་གྱི་ཡོད་སྲིད། གང་ལྟར་དེང་སང་ངས་ཅིག་བྱེད་འདོད་ཤིན་ཏུ་ཆེན་པོ་འདུག ཡིན་ནའང་གཞུང་གི་ལས་བྱེད་ཡིན་ཙང་ལས་ཀ་ཚང་མ་གོང་རིམ་ལ་བསྟུན་དགོས་དུས་ཁྱོན་ནས་འདོད་པ་ཁེངས་པ་ཞིག་བྱེད་ཐུབ་ཀྱི་མི་འདུག དེ་དང་མཉམ་དུ་དེང་སང་སྔོན་མ་ལས་སྤོབས་པའང་ཆེ་རུ་ཕྱིན་པ་འདྲ། གོང་རིམ་གྱི་མདུན་དུའང་སོ་སོའི་བསམ་ཚུལ་བཤད་རྒྱུ་དཀའ་ངལ་མི་འདུག གང་ལྟར་ཉམས་མྱོང་ཅུང་ཆེ་རུ་འགྲོ་གི་ཡོད་པ་འདྲ། གང་ལྟར་ལས་ཀའི་ཐོག་ནས་གྲུབ་འབྲས་ཤིག་མེད་ན་ལས་ཁུངས་ཤིག་གི་ནང་དུ་རྒས་ན་བློ་ཕམ་པོ་འདུག བྱས་ཙང་ལས་ཀ་འདི་འདྲ་ཞིག་གི་སྒང་ལ་ཤུགས་རྒྱག་ཐུབ་ན་བསམ་པ་ཙམ་ཡིན། ཡིན་ནའང་དེ་སྐོར་ནས་ཀྱང་ཡར་བསྟུན་མར་བསྟུན་བྱེད་དུས་འཆར་སྣང་ངོ་མ་དེ་བརླག་འགྲོ་གི་འདུག དེ་མིན་རྒན་ལགས་མཉམ་དུ་ས་རཱ་མཐོ་སློབ་ན་ཡོད་དུས་སྐྱིད་པོ་བྱུང་། སྐབས་དེ་ཚོ་དྲན་དུས་སྣང་བ་སྐྱིད་པ་འདུག དེ་དུས་བསྐལ་བ་བཟང་པོའི་དུས་རེད་ལ། ཕུགས་བསམ་ཡང་རྒྱ་ཆེ་གི་རེད། དེ་དུས་ང་རྩོམ་པ་པོ་ཞིག་བྱེད་རྒྱུ་ལ་འདུན་པ་ཡོད་རེད། ད་འདི་ལྟར་གང་ཡིན་འདི་ཡིན་མེད་པར་གཞུང་གི་ལས་བྱེད་ཅིག་ཆགས་པ་རེད། འདི་འཚོ་བའི་དཀའ་ངལ་ལ་བརྟེན་ནས་བྱུང་བ་འདྲ། ལས་ཀ་ཞིག་རེག་པ་དང་ངོ་བོ་ལ་ལྟོས་བ་མེད་པར་འཛུལ་ས་རེག་ན་འཛུལ་རྐྱང་བྱས་པ་རེད། ད་དེ་ཚོ་མི་གླེང་། རྒྱ་གཞུང་གིས་ཁྱོད་ལ་ཉེས་འདོགས་བྱེད་དུས་རྒན་ལགས་ལ་དཀའ་ངལ་བྱུང་ཡོད་སྲིད་ཀྱང་དེ་ཚོ་གཙོ་བོ་མ་རེད། གཞུང་གི་ལས་སྣེ་བཀའ་སྤྱི་ཚོས་བྱེད་སྟངས་དེ་ནི་ཁོང་ཚོས་ལངས་ཕྱོགས་ཞིག་གིས་དེ་ལྟར་བྱས་ཡོད་རེད། ཡིན་ནའང་གཙོ་བོ་དེ་བདེན་པ་རེད། རྒྱ་གཞུང་གིས་འཁྱོག་བརྗོད་དེ་ཚོར་ཧ་ལས་དགོས་ཀྱི་མ་རེད། ང་ཚོ་ཚང་མ་ཁྱེད་ཀྱིས་རྒྱབ་ལ་ལངས་ནས་བསྡད་ཡོད་རེད། ངས་བསམ་ན་སྐབས་དེ་དུས་རྒན་ལགས་འཇོན་པོ་བྱུང་བ་རེད་བསམ་ཡོད། རྒྱ་ནག་གཞུང་ཁྱེད་ཀྱི་ཁ་གཏད་ལ་ལངས་པ་རེད། ང་རང་ལ་མི་ཚེ་ནང་དེ་འདྲ་ཞིག་ཡོང་ཐུབ་ཀྱི་མ་རེད། དེ་འདྲ་ཞིག་སླེབས་ན་སྐྱིད་པ་ལ། ཧཧཧཧ མི་ཚོགས་ཀྱིས་གླེང་ཕྱོགས་མང་ན་འཇོན་པའི་རྟགས་རེད། ངས་དེ་ལྟར་བསམ་གི་ཡོད། ནག་ཁུང་ནང་ལ་འཛུལ་ནས་མི་ལ་འཕྱ་དམོད་བྱེད་པ་དེ་ཚོ་ལས་བྱབ་ཆུང་ཞིག་གང་ན་ཡོད། ད་དེ་ཙམ་ཡིན།

    Reply
  6. ཆབ་བྲག་ལྷ་མོ་སྐྱབས། says:
    ལོ་ 12 སྔོན།

    ང་ཚོ་མ་ཤི་བར་དུ་འཕག་འཚག་ལོས་རྒྱག མ་གཞི་ནས་རྒྱག་བཞིན་པ་ཞིག་རེད། འོན་ཀྱང་ངའི་རྨོངས་ཚོད་ལ་ཕྱི་བོད་གསོན་ཐབས་མེད་ན་ཡང་ནང་བོད་ངེས་པར་གསོན་དགོས་ཟེར་བ་འདི་ཡིན། དེ་བས་བོད་ཀྱི་རྩ་དོན་ངོ་མ་དེ་ཡང་གང་ལ་ཐུག་པ་དང་གང་ཞིག་བྱེད་དགོས་པ་ཧ་གོ་དགོས་པ་རེད། འདི་གཞུང་སྒེར་ཚང་མར་བཤད་པ་ཡིན།
    ང་སྒེར་ལ་མཚོན་ན་བོད་ཕྱི་ནང་སོགས་སུ་བོད་ཡིག་གི་དགེ་རྒན་བྱས་ནས་ལོ་སུམ་ཅུ་ཙམ་རེད། ངའི་རེ་བ་གཅིག་ནི་བོད་ཡིག་གི་སློབ་དེབ་རྩོམ་སྒྲིག་པའི་ནང་ལ་སླེབས་འདུན་སྔ་མོ་ཞིག་ནས་ཡོད། འོན་ཀྱང་ངས་རེ་བ་བཏོན་མ་མྱོང་ལ། ང་ལ་དེའི་སྐོར་ནས་བསམ་ཚུལ་འདོན་མཁན་ཡང་བྱུང་མྱོང་མེད། ཅུང་སྟབས་ལེགས་པ་ཞིག་ལ་ས་རཱ་མཐོ་སློབ་ཁང་གི་རྩོམ་རིག་སློབ་དེབ་བཞི་བོ་རྩོམ་སྒྲིག་གི་གོ་སྐབས་ཐོབ་སོང་ལ་གང་ཐུབ་བྱས་ཀྱང་ཡོད།
    དེང་སང་ཕལ་ཆེར་ང་ལ་གཞུང་འབྲེལ་གྱི་བྱ་བ་གནང་རྒྱུར་གོང་རིམ་ལས་ཁུངས་ཁག་ཀྱང་འཚེར་སྣང་བྱེད་ཀྱིན་ཡོད་ཚོད། གང་ཡིན་ཟེར་ན་རྒྱ་གཞུང་གིས་ཉེ་ཆར་ང་ལ་ཉེས་འདོགས་བྱས་དུས་བཀའ་སྤྱི་གཉིས་ནས་ང་ལ་ཡིག་ངག་གཉིས་ཐོག་ནས་གཟབ་གཟབ་དགོས་པའི་བསླབ་འདོམས་གནང་སོང། ཧ་ཧ་ཧ་ཧ་་་་་

    Reply
  7. བྱ་གཞུང་དཔལ་རྡོར། says:
    ལོ་ 12 སྔོན།

    འདིར་ཕེབས་གྲོགས་པོ་རྣམ་པ་ཚོས་དགོངས་ཚུལ་གསུང་བར་དགའ་ཡོད། ཕྲན་གྱི་སློབ་དཔོན་མཆོག་གིས་གསུང་བ་དོན་ལ་གནད། དེ་ལྟར་ཡང་དབྱིན་ཇི་བ་ཚོའི་ཁ་དཔེ་ལ། impossible is possible ཟེར་བ་ལྟར། ང་ཚོས་ཐབས་ཤེས་མེད་ས་ནས་ཐབས་ཤེས་འཚོལ་དགོས་ལ། རེ་བ་མེད་ས་ནས་རེ་བ་བརྒྱབ་ཆོག་གི་རེད་དྲན། གཙོ་བོ་དེ་རེ་བ་དང་ཡིད་ཆེས་རེད། རེ་བ་དང་ཡིད་ཆེས་བརླག་ཚེ་ལས་ཀ་དེ་འགྲུབ་ཐུབ་རྒྱུ་མ་རེད། དེ་མིན་ང་ཚོ་རང་ཉིད་ལ་འཆར་སྣང་དགོས་པ་མ་ཟད་བསམ་བློ་ཅུང་གུ་ཡངས་པོ་ཞིག་གི་ཐོག་ནས་ལྟ་དགོས་རེད་བསམ། ཇི་ལྟར་བསམ་བློ་དེ་གུ་དོག་པོ་དང་ཞེན་ཁོག་རང་དུ་ཕྱིན་པ་དེ་ཚོད་ཀྱིས་བོད་ཡིག་གི་མདུན་ལམ་དེ་དེ་ལྟར་གུ་དོག་པོ་ཆགས་ཏེ་མཐར་མེད་པ་ཆགས་ཀྱི་རེད། ལོ་ངོ་ལྔ་བཅུའི་ནང་རྒྱ་གར་དུ་བོད་ཡིག་གི་ཤེས་ཚད་ཡར་རྒྱས་འདོད་པ་ཁེངས་པ་ཞིག་བྱུང་ཐུབ་མེད་པ་དེ་བདེན་པ་རེད། ཡིན་ནའང་དེའི་རྒྱུ་རྐྱེན་གསལ་པོ་ཞིག་ད་ཕན་བྱུང་ཡོད་མ་རེད། གང་ལྟར་ཕྱི་རྒྱལ་བུ་ཕྲུག་ཚོར་བོད་ཡིག་ཚད་མཐོ་བོ་ཞིག་བསླབ་མི་ཐུབ་ནའང་ཕན་ཚུན་ལ་འབྲེལ་འདྲིས་བྱེད་ཐུབ་པ་ཞིག་ངེས་པར་བཟོ་དགོས་བ་རེད། གཞན་ཀརྨ་རྡོ་རྗེས་བོད་ཚིག་དང་དབྱིན་ཚིག་ལོགས་སུ་བཏོན་པར་ཐུགས་རྗེ་ཆེ། དེ་ནང་ཚིག་ཁ་ཤས་བསྒྱུར་བདེ་བོ་ཆགས་མེད་སྲིད་ཀྱང་རྩ་བའི་ཆ་ནས་འགྲིག་ཙམ་བྱུང་ཡོད་བསམ། བསྟན་ཆོས་ལགས་ཀྱི་གསུངས་བའི་གནས་ཚུལ་དེ་ཚོ་ང་ཚོར་ཕན་ཐོགས་ཆེན་པོ་འདུག ཁྱེད་རང་དེ་སྐོར་ལ་གསལ་ཆ་ཡོད་ཚོད་འདུག་པས་ང་ཚོར་ཐད་ཀར་འབྲེལ་བ་བྱེད་ཐུབ་ན་སྙམ། བོད་ཡིག་གི་ཡིག་གཟུགས་དབུ་ཅན་བཞག་དགོས་ཟེར་བ་དོན་ལ་གནད། ངས་ཀྱང་དེ་འདྲ་བསམ་གྱི་ཡོད། དབུ་མེད་ཡིག་གཟུགས་དེ་ཞོར་ནས་ངོ་སྤྲོད་བྱས་ཀྱང་ཆོག་པ་རེད། ས་གནས་རང་ལ་འཚམ་པའི་སློབ་དེབ་བཟོ་བཞིན་པ་དེར་བརྒྱ་ཆ་བརྒྱ་ཐམ་པ་དགའ་བསུ་ཚད་མེད་ཡོད། གང་ལྟར་ང་ཚོ་ཚང་མས་ནུས་པ་མཉམ་སྤོངས་བྱེད་ཐུབ་ན་དམིགས་ཚད་ལ་སླེབས་ཐུབ་ཀྱི་རེད། གནས་སྐབས་སུ་དེ་ཙམ་ཡིན།

    Reply
  8. བསྟན་ཆོས། says:
    ལོ་ 12 སྔོན།

    ཆད་=ཤེས་ལྷན་ལ

    Reply
  9. བསྟན་ཆོས། says:
    ལོ་ 12 སྔོན།

    ཨོ་གླིང་བོད་རིགས་ཚོགས་ཆེན་ལྔ་བའི་ཐོག་ས་གནས་ལ་བབ་པའི་སློབ་དེབ་བཟོ་དགོས་གྲོས་ཆོད་བཞག་ཅིང། འདི་ག་བསིལ་ལྡན་གནས་བོད་ཚོགས་ཀྱིས་དུས་ཚིག་རེར་ཕ་མ་ཚོགས་བསྡུར་གྱིས་བསམ་ཚུལ་བྱུང་དོན། ཕྱི་ཡུལ་ལ་བབ་པའི་སློབ་དེབ་རྩོམ་བསྐུལ་ཞུ་རྒྱུ། མ་ཟད་དེའི་འགྲོ་སོང་གི་ཆ་གང་ཙམ་ཞིག་ཕ་མ་དང་མཐུན་ཚོགས་ནས་གཏོང་རྒྱུར་མོས་མཐུན་བྱུང་ཡོད་དོ།།

    Reply
  10. བསྟན་ཆོས། says:
    ལོ་ 12 སྔོན།

    ལེགས་སོ་ཞུ་བ་དང་ཆབ་ཅིག འདི་ལ་གལ་ཆེན་གཉིས་སྣོན་དགོས་པ་ནི། ༡) ཡིག་གཟུགས་དབུ་ཅན་ཡིན་དགོས་པ། ༢) མིང་མཐའ་ངེས་ཅན་གཏེན་འབེབ་དགོས་པ། ༣) དུས་གསུམ་ཏག་ཏག་ཡོད་པ་བཅས་སོ

    Reply
  11. ཀརྨ་རྡོ་རྗེ། says:
    ལོ་ 12 སྔོན།

    འདིར་འཁོད་ཨིན་བོད་ལྟ་བདེར་ཟུར་བཀོལ།

    གོ་རིམ་ལྡན་པའི་འཆར་འགོད་ = Systematic Planning
    བསླབ་ཐབས་ཀྱི་རྣམ་གཞག་ = Theory
    བསླབ་གཞི་བཟོ་འགོད། = Curriculum Development
    སློབ་ཁྲིད་ཐབས་ལམ་གསར་གཏོད། =Teaching Methods
    ཐབས་ལམ་གྱི་རྣམ་བཤད་ཕྱོགས་སྒྲིག =Methodology
    སློབ་དེབ་དང་སློབ་ཁྲིད་ཀྱི་རྒྱུ་ཆ་རྩོམ་སྒྲིག = Editing Text Books and Study Material
    གོ་རིམ་ལྡན་པ་ = Systematically
    སློབ་སྦྱོང་གི་རྒྱུ་ཆ་ = Study Materials
    ཐད་ཀར་བཟོ་འགོད་བརྒྱུད་རིམ་ = The Forward Design Process
    སློབ་སྦྱོང་གི་རྒྱུ་ཆ་རྩོམ་སྒྲིག = Editing Study Materials
    ནང་འཇུག་ = Input
    ཕྱིར་འདོན་ = Output
    འབྲེལ་ལམ་སྐད་ཡིག་ = Communicative Language
    བྲིས་རྩོམ་སྐད་ཡིག་ = Literary Language
    ཉམས་མྱོང་འདེམས་གསེས་ = Selection of Experiences
    ཉམས་མྱོང་ཕྱོགས་སྒྲིག = Organization of Experiences
    ལྟེ་བའི་བཟོ་འགོད་བརྒྱུད་རིམ། = The Central Design Process
    རྒྱབ་ཕྱོགས་བཟོ་འགོད་བརྒྱུད་རིམ་ = The Backward Design Process
    དམིགས་ཚད། = Objective
    གནས་ཚད། = Level
    ནང་དོན། = Theme
    སྐད་ཡིག་གི་བྱང་རྩལ། = Language Skills
    དུས་ཚོད་ = Period

    Reply
  12. ཆབ་བྲག་ལྷ་མོ་སྐྱབས། says:
    ལོ་ 12 སྔོན།

    ང་ཚོས་གསལ་བོར་ཤེས་པ་ཞིག་ནི། རྒྱ་གར་ལ་གནས་རིང་གི་མི་ལོ་ལྔ་བཅུའི་ཤེས་ཡོན་གྱི་གནས་སྟངས་འདི་རེད། ད་རྒྱལ་ཁོངས་མང་པོར་ཁ་འཐོར་དགུ་ཐོར་དུ་འགྱུར་བཞིན་པ་རེད། གལ་ཏེ་གང་མྱུར་གྱུར་ཚར་ན་ང་ཚོས་ཅི་ཞིག་བྱ་ནུས། རབ་ཡིན་ན་ཁ་ན་ཏ་དང་ཨ་རི། སུད་སི་ལྟ་བུ་འགའ་རེར་བོད་སློབ་རེ་གསར་འཛུགས་ཐུབ་མདོག་ཁ་བོ་རེད། དེ་མིན་ད་ལྟའི་ས་ཁུལ་ཁག་ཅིག་ལ་གཟའ་ཉི་མ་གཅིག་པུའི་དུས་ཚོད་འགའ་ཞིག་བོད་ཡིག་ཐོག་ལ་གཏོང་ཐབས་ལྟ་བུའི་སློབ་ཐབས་ཉི་ཚེ་བ་འདི་རིགས་ཀྱིས་ཁ་ཡོད་ལག་ཡོད་ཀྱི་ཁེ་ཕན་གང་ཡང་སྒྲུབ་མི་ཐུབ་པ་གསལ་བོ་རེད།
    འུ་ཐུག་པའི་གནས་སྟངས་རིགས་ཀྱི་འོག་ནས་ཉི་ཚེ་བའི་ལས་རིགས་རེ་ཡང་མི་གཉེར་ཀ་མེད་ཡིན་སྲིད། འོན་ཀྱང་འདི་ནི་མི་རིགས་ཤིག་སྐྱོབ་ཐབས་ཀྱི་བྱུས་མཆོག་ཅིག་གཏན་ནས་མིན།
    ངའི་ལྟ་ཚུལ་ནི་དེང་རབས་ཀྱི་སྐབས་སུ་མི་རིགས་ཤིག་དང་རྒྱལ་ཁབ་ཅིག ཡང་ན་ས་གནས་རང་སྐྱོང་ཞིག་ཚང་མར་མཚོན་ན། དེང་རབས་རིག་གནས་དང་ལག་རྩལ་རིགས་ལ་ཆེད་སྦྱོང་གི་མི་སྣ་འཛོམས་པོ་དགོས་པ་གལ་ཧ་ཅང་ཆེ། དེས་ན་བོད་པའི་བྱིས་པ་འདི་དག་གིས་བོད་སྐད་མི་བརྗེད་པ་ཙམ་དང་བོད་ཡིག་ཀློག་ཤེས་པ་ཙམ་ལས་བོད་ཡིག་ལ་བྱང་ཆུབ་པ་མ་བྱུང་ཡང་མི་སྐྱོན། ཡིན་ཡང་བོད་ཤེས་དགོས། བོད་ཞེན་དང་བོད་དོན་ལ་དོ་སྣང་དང་འགན་ཁུར་གྱི་བསམ་བློ་རེ་ངེས་པར་སྐྱེད་བསྲིང་གནང་འོས། དེ་མིན་ཁོ་རང་ཚོས་རང་དབང་རང་མོས་ལྟར་གང་ཞིག་སྦྱོང་འདོད་ན་དེའི་ཐོག་ལ་ཤར་སྐྱོད་ཐུབ་དགོས། མི་རིགས་དང་སྤྱི་ཚོགས་ལ་མ་ཕན་ན་ཡང་མ་མཐར་རང་ཉིད་ལ་ཕན་ངེས།
    འདི་ནི་ངའི་བསམ་ཚུལ་གསར་བ་ཞིག་མིན། ངས་དེ་སྔོན་ཞིག་ནས་བཙན་བྱོལ་བོད་མིའི་སློབ་གསོའི་ཁ་ཕྱོགས་སྐོར་ལ་བསམ་ཚུལ་ཅུང་ཞིབ་ཙམ་ཞིག་བྲིས་མྱོང། ཡིན་ཡང་དེ་ལ་གདེང་འཇོག་བྱེད་མཁན་ཕལ་ཆེར་མེད་ཚོད་རེད། རྩོམ་ཡིག་དེ་གཟིགས་འདོད་ཡོད་ན་དྲ་ཐག་འདི་རེད།
    http://www.chapdaklhamokyab.fr/%E0%BD%91%E0%BD%94-%E0%BD%91-%E0%BD%96%E0%BD%A2-%E0%BD%91/%E0%BD%A6-%E0%BD%96-%E0%BD%82%E0%BD%A6/%E0%BD%96%E0%BD%99%E0%BD%93-%E0%BD%96-%E0%BD%A3-%E0%BD%96-%E0%BD%91-%E0%BD%80-%E0%BD%A6-%E0%BD%96-%E0%BD%82%E0%BD%A6-%E0%BD%A0-%E0%BD%A6-%E0%BD%A2/

    Reply
  13. གསེར་འབྲུག་སྡེར་ལྔ་ says:
    ལོ་ 12 སྔོན།

    བྱ་གཞུང་དཔལ་རྡོར་ལགས་ཀྱིས་དགོངས་འཆར་འདི་དོན་དངོས་ནུབ་ཕྱོགས་ཡུལ་གྲུ་ཁག་གི་ཁ་འཐོར་གྱི་བོད་ཕྲུག་ཚོའི་བོད་སྐད་ཡིག་ཤི་གསོན་གྱི་གནས་བབས་དང་འབྲེལ་འདུག་ལ། ཕ་མ་ཚོའི་འཚོ་གོས་ཆེད་མ་རྒྱུགས་རང་རྒྱུགས་ཀྱི་ལས་རིགས་ཀྱི་གནས་སྟངས་དང་། སྤྱི་ཚོགས་འཁོར་ཡུག་ཤུགས་རྐྱེན་གྱིས་གནས་སྟངས་ལ་བརྟེན་པའི་བོད་སྐད་ཡིག་སྦྱོང་སྤྱོད་སྤེལ་གསུམ་མེད་པའི་གནས་བབས་འདི་འདྲའི་འོག། བོད་སྐད་བོད་ཡིག་མི་ཤེས་པའི་བོད་ཕྲུག་མང་དག་ཅིག་འཚར་ལོངས་བྱུང་དང་འབྱུང་བཞིན་པ་ལ་སྨན་པའི་དགོངས་འཆར་འདི་ཡ་གི་སྒྲིག་འཛུགས་གཞུང་གི་དབུ་འཁྲིད་ཚོས་ཐུགས་འཇགས་གནང་རྒྱུའི་རེ་བ་ཡོད།

    རྒན་ཆབ་བྲག་ལགས་ཀྱིས་བོད་མི་རིགས་འཚོ་གནས་ཀྱི་གནད་དོན་ཐད་ཞལ་གཞིས་ལ་གཟིགས་པ་ལེགས་མོད་ཀྱང་། གཟིགས་རྒྱང་རིང་དྲག་ནས་མིག་མདུན་དུ་ལྷག་པའི་ཅུང་སྒྲུབ་སླ་བའི་གནས་དོན་འདི་ཚོར་སྣང་ཆུང་གནང་མི་ཉན་ཡ། གལ་ཏེ་བོད་ཀྱི་གནད་དོན་ཐག་གཅོད་མི་ཐུབ་པར་ལོ་བརྒྱ་ཕྲག་སྒུག་དགོས་བྱུང་ན་གཞིས་བྱེས་གཉིས་སྐད་བརྡ་མི་འཕྲོད་པའི་གནས་སྟངས་ཞིག་ཡོང་མི་སྲིད་པ་མ་རེད། བྱས་ཙང་བོད་ནང་རྒྱས་བཙན་དབང་གིས་བོད་སྐད་ཡིག་ལ་རྡུང་བརྡེག་འཕོག་གི་ཡོད་པ་རེད་ལ། བཙན་བྱོལ་རང་དབང་དུ་ཁས་ཆེ་བས་སྤྱི་ཚོགས་ཀྱི་འཁོར་ཡུག་གིས་ཤུགས་རྐྱེན་དང་གསར་འགྲོགས་ལ་ཞེན་པ། དོ་སྣང་དང་མི་རིགས་ཀྱི་འདུ་ཤེས་ཞན་པས་རང་བཞིན་མཐུས་ཤོར་གྱི་རྨ་ཁ་འདི་གསོ་དགོས་པ་ཁ་ཚ་དགོས་གཏུགས་ཆགས་བསྡད་པ་འདྲ་ཞིག་རེད་སྙམ།

    Reply
  14. བྱ་གཞུང་དཔལ་རྡོར། says:
    ལོ་ 12 སྔོན།

    རྒན་ལགས་ཕེབས་པར་དགའ་བསུ་ཞུ། ལོ་ངོ་ལྔ་བཅུ་རྗེས་སུ་ཅི་འདྲ་ཆགས་མིན་དེ་བཤད་ཁག་པོ་རེད། ཡིན་ནའང་ག་འདྲ་ཞིག་ཆགས་མིན་དེ་ད་ལྟའི་མི་རབས་དང་དེའི་རྗེས་ཀྱི་མི་རབས་ཚོས་འབད་བརྩོན་ལ་རག་ལས་ཡོད་པ་དེ་རེད། རེད་དེ་དྲི་བ་གཅིག་དེ་ལོ་ངོ་ལྔ་བཅུ་རྗེས་སུ་ད་དུང་ང་ཚོ་བཙན་བྱོལ་བ་ཡིན་ནམ། འདི་བཤད་ཁག་པོ་རེད། བོད་ནང་ལ་བསམ་བློ་གཏོང་རྒྱུ་དེ་ནི་ང་ཚོར་མཚོན་ན་ཤིན་ཏུ་གལ་ཆེ་ཡང་། དོན་དངོས་ཐོག་ནས་ང་ཚོས་ཁོང་ཚོར་རྒྱབ་སྐྱོར་བྱེད་པ་དང་གནས་ཚུལ་དེ་ཚོ་ཁྱབ་བསྒྲགས་བྱེད་པ་ཙམ་ལས་ཕན་ཐོགས་ག་རེ་བྱེད་ཐུབ་བམ། གང་ལྟར་བོད་ཕྱི་ནང་གཉིས་ཀ་ནས་བོད་ཀྱི་རིག་གཞུང་དང་། སྐད་ཡིག འཐབ་རྩོད་བཅས་ཀྱི་མེ་ལྕེ་བཞུ་མི་འཇུག་རྒྱུ་དེ་ང་ཚོས་ལས་འགན་ཡིན་པ་མ་ཟད། ལྷག་པར་དུ་བོད་ཀྱི་སྐད་ཡིག་གི་ཚེ་སྲོག་དེ་རྒྱ་གར་ཙམ་མ་ཟད། ནུབ་ཕྱོགས་ཡུལ་གྲུ་ཁག་ཚང་མ་ནས་རྒྱུན་འཛིན་བྱེད་དགོས་སྙམ། གང་ལྟར་རང་ང་འདུག་རྒྱུ་ལས་ཅིག་བྱེད་ཀིན་བྱེད་ཀིན་སོང་ན་ལེགས་པ་འདུག་སྙམ། གཞན་ངས་གསར་རྟགས་གཏོད་གི་ཡོད་ནའང་ཐང་། ཅི་ལྟར་ཡང་ལས་རྒྱུ་ཟིག་ཡོད་ནའང་སྐྱིད་པོ་ཟིག་རེད། དེ་མིན་ལས་ཁུངས་ནང་འཛུལ་ནས་བསྡད་ན་ཆོལ་མི་འདུག

    Reply
  15. ཆབ་བྲག་ལྷ་མོ་སྐྱབས། says:
    ལོ་ 12 སྔོན།

    ཧ་ཅང་ཡག་པོ་བྲིས་འདུག བཀའ་སྤྱི་གཉིས་ཀྱིས་བསམ་འཆར་འདི་རིགས་ལ་ཐུགས་སྣང་གནང་དགོས་ངེས་ཤིག་རེད།
    འོན་ཀྱང་ངས་བལྟས་ན་མ་འོངས་པའི་ལོ་ངོ་ལྔ་བཅུའི་རྗེས་ཀྱི་གནས་སྟངས་ངོ་མ་དེ་ཅི་འདྲ་ཞིག་ཆགས་རྒྱུ་ཡིན་མིན་ཐད་ལ་ཚོད་དཔག་ཐུབ་བམ།
    ངས་འདིར་བསམ་འཆར་ཞིབ་ཚགས་འབུལ་འདོད་མེད། གང་ཡིན་ཟེར་ན་བོད་ཀྱི་མི་རིགས་འཚོ་གནས་ཀྱི་གནད་དོན་ཐད་ནས་དེང་སང་ངའི་བསམ་བློ་གཏོང་ས་བོད་ནང་ལས་ཕྱི་མིན།

    Reply

དཔྱད་མཆན་སྤེལ། Cancel reply

Your email address will not be published. Required fields are marked *

སྤྱི་ཚོགས་དྲ་གནས།

ཁྱབ་བསྒྲགས།

དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།

གློག་འཕྲིན།

editor@tibettimes.net | office@tibettimes.net

ཁ་པར།

+91-98823-47075 | +91-92189-38041 | +91-81972-44372

Welcome Back!

OR

Login to your account below

Forgotten Password?

Retrieve your password

Please enter your username or email address to reset your password.

Log In

Add New Playlist

No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese