ཝ་སི་ཝཱ་ནེའི་འཁྲུངས་སྐར་ལ་བགྲོ་གླེང་གནང་རྒྱུ་རེད།

གཟའ་ཉི་མའི་ཉིན་རྒྱ་གར་ཧིན་རྡུའི་རྣལ་འབྱོར་པ་ཆེ་མོ་ཝ་སི་ཝཱ་ནེ་དང་༧གོང་ས་མཆོག རྒྱ་གར་གྱི་གློག་བརྙན་འཁྲབ་སྟོན་པ་གྲགས་ཅན་ཨ་མེར་ཁན་གསུམ་གྱིས་ལྷན་འཛོམས་བགྲོ་གླེང་གནང་རྒྱུ་ཡིན་འདུག

ཕྱི་ཚེས་ ༢༨ ཉིན་གྱི་ཞོགས་པ་ཆུ་ཚོད་ ༩།༣༠ སྟེང་། ༧གོང་ས་མཆོག་རྒྱ་གར་གྱི་མ་ཧ་རཱ་ཤཱི་ཊི་རཱ་(MP) མངའ་སྡེའི་གྲོང་ཁྱེར་པུ་ནེ་(Pune) ནང་རྟེན་གཞི་བྱས་པའི་ཧིན་རྡུ་རྣལ་འབྱོར་ཝ་སི་ཝཱ་ནེ་ལྟེ་གནས་ཁང་(Sadhu Vaswani Mission) གི་གོ་སྒྲོག་འོག ལྟེ་གནས་ཁང་དེའི་དབུ་འཛིན་རྣལ་འབྱོར་པ་ཆེ་མོ་ཝ་སི་ཝཱ་ནེ་(Dada J.P vaswani)མཆོག་དགུང་གྲངས་ ༩༥ ལ་ཕེབས་པའི་འཁྲུངས་སྐར་མཛད་སྒོར་ཆིབས་བསྒྱུར་བསྐྱངས་ཏེ། རྒྱ་གར་གྱི་གློག་བརྙན་འཁྲབ་སྟོན་པ་གྲགས་ཅན་ཨ་མེར་ཁན་(Aamir Khan) གྱིས་མདོ་འཛིན་འོག ༧གོང་ས་མཆོག་དང་ཧིན་རྡུའི་རྣལ་འབྱོར་བ་ཆེ་མོ་ཝ་སི་ཝཱ་ནེ་མཆོག་བཅས་ཀྱིས་བགྲོ་གླེང་ཞིག་གནང་གཏན་འཁེལ་འདུག བགྲོ་གླེང་དེ་(༧གོང་ས་མཆོག་གི་དྲ་ཚིགས)འདི་བརྒྱུད་ཐད་གཏོང་བྱེད་རྒྱུ་ཡིན་འདུག

གསར་འགོད་པས་ཁ་པར་བརྒྱུད་སྐུ་སྒེར་ཡིག་ཚང་ལ་ཉིན་དེའི་བགྲོ་གླེང་བརྗོད་གཞི་གང་ཡིན་དང་། པུ་ནེ་ནང་གི་མཛད་རིམ་སྐོར་དྲིས་པར། ༧གོང་ས་མཆོག་ཕྱི་ཚེས་ ༢༥ ཉིན་གྱི་ཉིན་རྒྱབ་མོན་གྷོ་ཌི་ནས་པུ་ནེ་གྲོང་ཁྱེར་དུ་ཆིབས་བསྒྱུར་བསྐྱངས་ཏེ། ཉིན་འདི་འགའི་རིང་གྲོང་ཁྱེར་དེར་ཡོད་པའི་ནང་པ་ཚོས་གསོལ་འདེབས་ཞུས་པ་ལྟར། བླང་དོར་བཀའ་སློབ་གནང་བཞིན་ཡོད་པ་དང་། གཟའ་ཉི་མའི་ཉིན་ཧིན་རྡུ་རྣལ་འབྱོར་པ་ཆེ་མོ་ཝ་སི་ཝཱ་ནེ་མཆོག་དགུང་གྲངས་ ༩༥ ཕེབས་པའི་འཁྲུངས་སྐར་ལ་གདན་ཞུ་གནང་ཡོད་པ་ལྟར་ཆིབས་བསྒྱུར་གནང་གི་ཡོད་པ་ལས། བྱེ་བྲག་མཛད་རིམ་ཅི་ཡིན་གསལ་ཁ་བྱུང་མི་འདུག

ཧིན་རྡུའི་རྣལ་འབྱོར་པ་ཝ་སི་ཝཱ་ནེ་ཡི་འཁྲུངས་སྐར་ཉིན་མོ་ནི་ཕྱི་ཟླ་ ༨ ཚེས་ ༢ ལ་འཁེལ་ཡོད་ཀྱང་། འཁྲུངས་སྐར་གྱི་མཛད་རིམ་ཕྱི་ཚེས་ ༢༨ ཉིན་ནས་དབུ་འཛུགས་ཀྱིས་ཉིན་ ༦ རིང་གཏོང་འཆར་ཡོད་པ་དང་། དེའི་རིང་བསམ་བློ་དང་སྤྱི་ཚོགས། འཕྲོད་བསྟེན། བྱམས་བརྩེ། བྱིས་པའི་བདེ་སྡུག་སོགས་བརྗོད་གཞི་འདྲ་མིན་ཐོག མཁས་དབང་དང་གནད་ཡོད་མི་སྣ་གདན་འདྲེན་གྱིས་བགྲོ་གླེང་གནང་རྒྱུ་ཡིན་འདུག

སྐུ་སྒེར་དྲུང་ཆེ་འཆི་མེད་རིག་འཛིན་ལགས་ཀྱིས། ཝ་སི་ཝཱ་ནེ་ཡི་འཁྲུངས་སྐར་མཛད་སྒོའི་རྗེས་སུ། ཉིན་དེའི་ཕྱི་དྲོར་༧གོང་ས་མཆོག་པུ་ནེ་ནས་ལྡི་ལི་དང་། ཕྱི་ཚེས་ ༢༩ ཉིན་གྱི་ཞོགས་པར་ལྡི་ལི་ནས་ལ་དྭགས་སུ་ཆིབས་བསྒྱུར་བསྐྱང་རྒྱུ་ཡིན་སྐོར་གསུངས་བྱུང་།

ཧིན་རྡུ་རྣམ་འབྱོར་པ་ཆེ་མོ་ཝ་སི་ཝཱ་ནེ་མཆོག་ནི་ ༡༩༡༨ ཟླ་ ༨ ཚེས་ ༢ ཉིན་འཁྲུངས་པ་དང་། ཁོང་གིས་སོ་སོའི་ཚན་རིག་པའི་ལམ་ཁ་དེ་དོར་ཏེ། རྣམ་འབྱོར་པ་ཆེ་མོ་ཊི་ཨལ་ཝ་སི་ཝཱ་ནེ་(T.L Vaswani) ཡི་རྗེས་འབྲང་རྒྱ་གར་གྱི་བསམ་བློའི་དབུ་ཁྲིད་དང་ལྷག་པར་དུ་རྣལ་འབྱོར་པའི་ཁྲོད་ཀྱི་མི་སྣ་རླབས་ཆེན་ཞིག་ཆགས་ཡོད་འདུག་ལ། ཝ་སི་ཝཱ་ནེ་མཆོག་མཉམ་འབྲེལ་རྒྱལ་ཚོགས་ཀྱི་ཆོས་ལུགས་ཚོགས་ཆེན་སོགས་རྒྱལ་སྤྱིའི་སྟེང་གི་ཆོས་ལུགས་ཚོགས་ཆེན་འདྲ་མིན་ནང་ཕེབས་ཏེ་གསུང་བཤད་གནང་ཡོད་པ་དང་། ཡུ་ཐན་ཊི་ཞི་བདེ་གཟིངས་རྟགས་(U Thant Peace Award) ཐོབ་མྱོང་ཞིང་། ད་ཆར་ཁོང་ལ་དཔེ་དེབ་ ༧༥ ཙམ་ཡོད་པ་དག་སྐད་རིགས་འདྲ་མིན་ནང་པར་སྐྲུན་བྱས་ཡོད་འདུག

རྣལ་འབྱོར་པ་ཁོང་དུས་རྒྱུན་ཉམས་ཆུང་ཞི་ཞིང་དུལ་བ་ཞིག་ཡིན་པ་མ་ཟད། མི་དམངས་དཀྱུས་མ་ལྟར་ཕེབས་བཞུགས་གནང་མཁན་ཞིག་ཡིན་ཞིང་། ༧གོང་ས་མཆོག་དང་ཕན་ཚུན་དུས་ཡུན་རིང་པོ་ནས་རྒྱུས་ཡོད་གྲོགས་པོ་ཡིན་འདུག

གསར་འགོད་པ། བནྡེ་སྐྱབས།