ཨི་ཇིབ་ནང་དམག་སྤྱི་ཆེན་མོས་རྒྱལ་ཁབ་ཀྱི་སྲིད་འཛིན་མོར་སི་འཛིན་བཟུང་བྱས་རྗེས་ཁོའི་ཕྱོགས་གཏོགས་ཁ་ཆེ་སྤུན་ཟླ་ཚོགས་པས་ངོ་རྒོལ་ཤུགས་ཆེན་བྱས་ཏེ་གནས་སྟངས་ཛ་དྲག་ཇེ་ཆེར་འགྲོ་བཞིན་འདུག
ཕྱི་ཚེས་ ༥ ཉིན་ཨ་རིའི་སྲིད་འཛིན་ཨོ་བྷ་མའི་ཆེས་མཐོའི་སྐུ་ཚབ། གྲོས་ཚོགས་གོང་མའི་འཐུས་མི་ཇོན་མད་ཀམ་ (John McCain) ལགས་དང་གྷིར་ཧམ་( Lindsey Graham) ལགས་གཉིས་ཨི་ཇིབ་ནང་གི་སྲིད་དོན་དཀའ་རྙོག་འདུམ་སྒྲིག་བྱེད་ཆེད་ཨི་ཇིབ་རྒྱལ་ས་ཁད་རོབ་ནང་འབྱོར་ཏེ། ཨི་ཇིབ་བར་བརྒལ་གཞུང་གི་སྲིད་འཛིན་མཱན་སོར་ ( Adli Mansour) ལགས་གཙོས་དམག་སྤྱི་ཆེན་མོ་སེ་སེ་( Abdel Fattah el-Sisi) དང་། ནང་སྲིད་བློན་ཆེན་ཧྥའ་མེ་ ( Nabil Fahmy) བཅས་ལ་ཐུག་འཕྲད་གནང་སྟེ། ཕྱིར་འཕུད་བཏང་བའི་སྲིད་འཛིན་མོར་སེ་ལགས་དང་སྲིད་དོན་བཙོན་མ་རྣམས་ཀློད་གྲོལ་བཏང་སྟེ། བར་བརྒལ་སྲིད་གཞུང་དང་སྲིད་འཛིན་མོར་སིའི་རྒྱབ་སྐྱོར་བྱེད་མཁན་མང་ཚོགས་བར་གྲོས་སྡུར་དང་ཨི་ཇིབ་ནང་དམངས་གཙོའི་སྲིད་གཞུང་ཞིག་གང་མགྱོགས་འཛུགས་རྒྱུའི་སྐོར་ལ་གྲོས་བསྡུར་གནང་འདུག
ཁ་སང་ཕྱི་ཚེས་ ༦ ཉིན། གོང་གི་སྐུ་ཚབ་དེ་གཉིས་ཀྱིས་ཨི་ཇིབ་རྒྱལ་སར། གསར་འགོད་གསལ་བསྒྲགས་ཤིག་སྤེལ་བའི་ནང་། སྐུ་ཚབ་ཇོན་མད་ཀམ་ལགས་ཀྱིས་ “ ཨི་ཇིབ་སྲིད་འཛིན་མོར་སི་ཕྱིར་ཕུད་བཏང་བ་དེ་དམག་མིའི་གྱེན་ལངས་ཡིན་པ་དང་བར་བརྒལ་གཞུང་གིས་མི་མང་གི་མངོན་འདོད་ལྟར་ཁ་ཆེ་སྤུན་ཟླ་ཚོགས་པའི་མི་སྣ་ཀློད་གྲོལ་བཏང་ནས་ཕྱོགས་གཉིས་ཀྱིས་གྲོས་མོལ་བྱེད་དགོས་པའི་ལམ་སྟོན་བྱས་ཡོད། དེ་མིན་ཨ་རིའི་གཞུང་གིས་ཨི་ཇིབ་ཀྱི་དམག་མིར་རོགས་སྐྱོར་མ་དངུལ་ཨ་སྒོར་ཐེར་འབུམ་ ༡།༣ སྤྲོད་བཞིན་ཡོད་པ་དེ་མཚམས་འཇོག་བྱེད་རྒྱུ་ཡིན”ཞེས་དང་། དེ་བཞིན། གྷིར་ཧམ་ལགས་ཀྱིས་ཀྱང་ “ དམངས་གཙོའི་རྒྱལ་ཁབ་ནང་ཕྱོགས་གཉིས་ཀྱིས་མཉམ་དུ་གྲོས་མོལ་བྱེད་དགོས་པ་ལས་ཕྱོགས་གཅིག་བཙོན་ཁང་ནང་བསྡད་ནས་ཕྱོགས་གཅིག་གིས་གྲོས་མོལ་བྱ་ཐུབ་མེད་པ་མ་ཟད། མི་མང་གིས་བདམས་པའི་མི་དེ་བཙོན་ཁང་ནང་བཅུག་སྟེ་འོས་འདེམས་མ་བྱས་པའི་མི་ཞིག་གིས་སྲིད་གཞུང་འཛིན་སྐྱོང་བྱས་ན་མི་མང་གིས་ངོས་ལེན་བྱེད་ཐབས་མེད། ཡིན་ནའང་ཨ་རིའི་གཞུང་གིས་རྒྱལ་ཁབ་གཉིས་ཀྱི་ཕྱི་སྲིད་འབྲེལ་ལམ་གལ་ཆེན་དུ་བརྩིས་ཏེ་རྒྱུན་འཁྱོངས་བྱེད་བཞིན་ཡོད” ཅེས་བཤད་འདུག
ཐེངས་འདིར་སྐུ་ཚབ་གཉིས་ཀྱིས་ཨི་ཇིབ་ཀྱི་དམག་ཕྱོགས་ནས་རྒྱབ་སྐྱོར་ཡོད་པའི་བར་བརྒལ་གཞུང་ལ་སྣོན་ཤུགས་སྤྲད་ཡོད་པ་མ་ཟད། དམག་མིས་གྱེན་ལངས་བྱས་ཏེ་སྲིད་འཛིན་མོར་སི་ཕྱིར་འཕུད་བཏང་བར་ངོས་འཛིན་བྱས་པ་ཡོངས་བསྒྲགས་བྱས་ཡོད། ད་སྔ་ཨ་རིས་གཞུང་གིས་ཨི་ཇིབ་དང་ཇོར་ཌིན་གཉིས་བརྒྱུད་དེ་དཀྱིལ་ཤར་ཁུལ་གྱི་ཞི་བདེ་ལ་སྲུང་སྐྱོང་བྱེད་ཀྱི་ཡོད་པ་དང་། ཨི་ཇིབ་དམག་ཕྱོགས་ནས་སྲིད་འཛིན་མོར་སི་ཕྱིར་འཕུད་བཏང་བ་སོགས་ནི་ནོར་འཁྲུལ་ཞིག་ཏུ་ངོས་འཛིན་བྱས་མེད། ཡིན་ནའང་ཨ་རིའི་གཞུང་གིས་ཨི་ཇིབ་ནང་ངོ་རྒོལ་བྱེད་བཞིན་ཡོད་པར་ཁ་གཡར་ཏེ་ཨ་རིའི་འཐབ་འཁྲུག་གནམ་གྲུ་ ( F -16) རྟགས་ཅན་གྱི་རོགས་སྐྱོར་སྤྲོད་བཞིན་པ་དེ་ཕྱི་ཟླ་ ༧ ཚེས ༡༠ ཉིན་གནས་སྐབས་རིང་མཚམས་འཇོག་བྱས་པ་གསལ་བསྒྲགས་བྱས་འདུག
ཟླ་སྔོན་མའི་ནང་། ཨ་རིའི་གྲོས་ཚོགས་ནང་སྤྱི་མཐུན་ཚོགས་པའི་འཐུས་མི་ཇོན་མད་ཀམ་ལགས་དང་གྷིར་ཧམ་ལགས་གཉིས་ཀྱིས། ཨི་ཇིབ་ཀྱི་དམག་སྤྱིས་སྲིད་འཛིན་མོར་སི་ཕྱིར་འཕུད་འཛིན་བཟུང་བྱས་པ་དེར་མང་ཚོགས་ཀྱིས་ངོ་རྒོལ་ཤུགས་ཆེན་འབྱུང་བཞིན་ཡོད་སྟབས། ཨ་རིའི་གཞུང་གིས་ཨི་ཇིབ་གཞུང་ལ་དམག་དོན་རོགས་སྐྱོར་མ་དངུལ་གཏོང་བཞིན་པ་དེ་མཚམས་འཇོག་བྱེད་དགོས་པའི་གྲོས་གཞི་བཏོན་ཡོད་ཀྱང་གྲོས་ཚོགས་ནང་རྒྱབ་སྐྱོར་འཐོབ་མེད།
ཟླ་སྔོན་མའི་ཟླ་མཇུག་ནས་བཟུང་ཉིན་བཅུའི་རིང་། ཨ་རིའི་རྒྱལ་དོན་དྲུང་ཆེ་གཞོན་པ་བི་ལིམ་སྦིན་སི་ ( William Burns) དང་ཡུ་རོབ་མཐུན་ཚོགས་ཀྱི་དཀྱིལ་ཤར་ཡུལ་གྲུའི་སྐུ་ཚབ་བྷེ་ནཱར་ཊི་ནོལ ( Bernardino Leon) ལགས་གཉིས་ཀྱིས་ཀྱང་ཨི་ཇིབ་ནང་གི་དཀའ་རྙོག་སེལ་ཆེད། བར་བརྒལ་གཞུང་གི་གནད་ཡོད་མི་སྣ་དང་། བཟང་བཙོན་འོག་ཡོད་པའི་སྲིད་འཛིན་མོར་སི་ལགས་དང་ཁ་ཆེ་སྤུན་ཟླ་ཚོགས་པའི་མི་སྣ་སོགས་ལ་ཐུག་འཕྲད་གྲོས་མོལ་བྱས་ཡོད་ཀྱང་། ཨི་ཇིབ་ནང་ཞི་འགྲིག་གྲོས་མོལ་མ་བྱས་པར་ཁ་ཆེ་སྤུན་ཟླ་ཚོགས་པས་སྲིད་འཛིན་མོར་སི་ལ་རྒྱབ་སྐྱོར་བྱེད་པའི་ལངས་ཕྱོགས་ལ་འགྱུར་བ་གང་ཡང་མེད་ཚུལ་བརྗོད་ཡོད་འདུག ཨ་རིའི་རྒྱལ་དོན་དྲུང་ཆེ་གཞོན་པ་ཨི་ཇིབ་ནང་གཟིགས་སྐོར་བྱས་པའི་སྐོར་ལ། ཨ་རིའི་རྒྱལ་དོན་ལས་ཁུངས་ཀྱི་མགྲིན་པ་ལྕམ་མཱ་ཁུ་ར་ཡ་ཧར་ཧྥུ་ ( Marie Harf) ལགས་ཀྱིས་གསར་འགོད་ཚོར་བརྗོད་དོན། “ ཨི་ཇིབ་བར་བརྒལ་གཞུང་དང་ཁ་ཆེ་སྤུན་ཟླ་ཚོགས་པ་གཉིས་བར་གྲོས་མོལ་གནང་སྟེ། ཨི་ཇིབ་ནང་དམངས་གཙོའི་གཞུང་ཞིག་འཛུགས་པར་རོགས་ཕན་དང་ཛ་དྲག་གནས་སྟངས་ཞི་འཇགས་ཡོང་བའི་ཆེད་ཡིན།” ཞེས་བརྗོད་འདུག
དེ་བཞིན་རྒྱལ་སྤྱིའི་ནང་ཨི་ཇིབ་ཀྱི་གནས་བབ་ཛ་དྲག་ཆེན་པོ་ཆགས་སྟབས། ཨ་ཧྥི་རི་ཁ་མཐུན་ཚོགས། ཁ་ཆེ་རྒྱལ་ཁབ་མཐུན་ཚོགས་བཅས་ཀྱིས་ཀྱང་དམིགས་བསལ་སྐུ་ཚབ་ཆེད་གཏོང་གནང་སྟེ། ཨི་ཇིབ་བར་བརྒལ་གཞུང་ལ་གནོན་ཤུགས་སྤྲད་དེ་གང་མགྱོགས་ཨི་ཇིབ་ནང་གི་སྲིད་དོན་དཀའ་རྙོག་ཞི་འཇགས་ཡོང་རྒྱུར་འབོད་སྐུལ་ཞུ་བཞིན་ཡོད་པ་མ་ཟད། ཧྥ་རན་སི་དང་ལྷོ་ཨ་ཧྥེ་རི་ཀ འཇར་མན་བཅས་ཀྱིས་སྲིད་འཛིན་མོར་སི་གང་མགྱོགས་ཀློད་གྲོལ་བཏང་སྟེ་མི་མང་ཞི་འཇགས་ཡོང་ཐབས་བྱེད་དགོས་པའི་འབོད་སྐུལ་ཞུས་ཡོད་འདུག
དེ་རིང་ཕྱི་ཚེས་ ༧ ཉིན། ཨི་ཇིབ་བར་བརྒལ་སྲིད་འཛིན་ལས་ཁུངས་ཀྱིས། ཨ་རི་དང་ཡུ་རོབ་མཐུན་ཚོགས་གཙོས་རྒྱལ་སྤྱིའི་སྲིད་དོན་མི་སྣ་ཚོས་ཨི་ཇིབ་ནང་གི་སྲིད་དོན་དཀའ་རྙོག་སེལ་རྒྱུར་འབད་བརྩོན་བྱས་པར་གྲུབ་འབྲས་མ་སོན་པ་དེ་ཁ་ཆེ་སྤུན་ཟླ་ཚོགས་པར་འགན་འཁུར་ཡོད་ཅེས་གསལ་བསྒྲགས་སྤེལ་འདུག
ཕྱི་ཟླ་ ༧ ཚེས་ ༣ ཉིན་ཨི་ཇིབ་དམག་ཕྱོགས་ཀྱིས་སྲིད་འཛིན་མོར་སི་ཕྱིར་འཕུད་བཏང་རྗེས། ཁོང་གི་ཕྱོགས་གཏོགས་ཁ་ཆེ་སྤུན་ཟླ་ཚོགས་པ་དང་། སྲིད་འཛིན་མོར་སི་ལ་རྒྱབ་སྐྱོར་བྱེད་མཁན་མང་ཚོགས་ཚོས་ཨི་ཇིབ་རྒྱལ་ས་གཙོས་པའི་གྲོང་ཁྱེར་མང་པོའི་ནང་ངོ་རྒོལ་ཤུགས་ཆེན་བྱས་ཏེ། སྲིད་འཛིན་མོར་སི་ཕྱིར་འཕུད་བཏང་བ་ནི་དམངས་གཙོར་རྡོག་རོལ་བཏང་བ་ཞིག་ཡིན་པ་དང་། ཁོང་གི་སྲིད་འཛིན་གོ་གནས་བསྐྱར་གསོ་དགོས་པ་སོགས་ཀྱི་འབོད་ཚིག་བསྒྲགས་ཡོད། ད་སྔ་རྙོག་ཟིང་དེའི་ཁྲོད་ ༢༥༠ ཙམ་གྱི་ཚེ་སྲོག་ཤོར་ཡོད་འདུག
གསར་འགོད་པ། ལྷ་སྐྱབས་རྒྱལ།
