རུལ་སུངས་ཆེ་ཆུང་ཚང་མ་རྩ་མེད་གཏོང་།

ཁ་སང་རྒྱ་ནག་དབུས་ཆབ་སྲིད་ལས་ཁུངས་ཀྱིས་གྲོས་ཚོགས་བསྡུས་ཏེ། ཕྱི་ལོ་ ༢༠༡༣ ནས་ ༢༠༡༧ བར་གྱི་རུལ་སུངས་བ་ཆེ་ཆུང་ཚང་མ་རྩ་མེད་གཏོང་རྒྱུར་གྲོས་འཆམ་བྱུང་ཡོད་ཟེར། 

ཟླ་འདིའི་ཕྱི་ཚེས་ ༢༨ ཉིན། རྒྱ་ནག་དབུས་ཆབ་སྲིད་ལས་ཁུངས་ཀྱིས་ཚོགས་འདུ་བསྡུས་ཏེ། རྒྱ་ནག་འཐུས་མིའི་ཚོགས་ཆེན་སྐབས་ ༡༨ པའི་ཚང་འཛོམས་གྲོས་ཚོགས་ཐེངས་གསུམ་པ་ད་ལོའི་ཕྱི་ཟླ་ ༡༡ པའི་ནང་པེ་ཅིན་ནས་ཚོགས་གཏན་འཁེལ་ཡོད་པ་མ་ཟད། ཚོགས་འདུ་དེའི་ཐོག་ ༼ རུལ་སུངས་ལ་ཁྲིམས་ཆད་ནན་མོ་གཅོད་པ་དང་། རུལ་སུངས་སྔོན་འགོག་མ་ལག་འཛུགས་པ་དང་དེ་འཐུས་ཚང་དུ་གཏོང་བའི་ ༢༠༡༣ ལོ་ནས་ ༢༠༡༧ བར་གྱི་བྱ་བའི་འཆར་འགོད༽ ཅེས་པ་དང། ༼ ས་གནས་སྲིད་གཞུང་གི་འགན་ནུས་ལེགས་བསྒྱུར་དང་ལས་ཁུངས་བཅོས་བསྒྱུར་སྐོར་གྱི་བསམ་འཆར ༽ ཞེས་པ་སོགས་ལ་གྲོས་འཆམ་བྱུང་ཡོད་སྐོར་མཚོ་སྔོན་རླུང་འཕྲིན་དྲ་བའི་སྟེང་སྤེལ་འདུག   

གནས་ཚུལ་དེར་མུ་མཐུད་དོན། ཚོགས་ཐོག་ཏུ་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་རུལ་སུངས་ལ་ཁྲིམས་ཆད་ནན་མོ་གཅོད་པ་དང་རུལ་སུངས་སྔོན་འགོག་བྱེད་པའི་མ་ལག་ཕྱོགས་ཡོངས་ནས་འཛུགས་རྒྱུ་དེ། གུང་ཁྲན་ཏང་གི་ཆབ་སྲིད་ལས་འགན་གཙོ་བོ་དང་སྤྱི་ཚོགས་ཡོངས་ཀྱི་ཐུན་མོང་འགན་འཁྲི་ཡིན་སྟབས རུལ་སུངས་ལ་ངོ་རྒོལ་བྱེད་པའི་འཐབ་རྩོད་ཀྱི་གནས་བབ་ལ་བརྡར་ཤ་གཅོད་པ་དང་བཀོད་སྒྲིག་བྱེད་པར་བསམ་བློ་དང་བྱ་འགུལ་གཅིག་གྱུར་བྱེད་དགོས་པ་དང་། རུལ་སུངས་གཏན་འགོག་བྱེད་པ་ལས་འགན་གཙོ་བོ་དང་བྱ་བའི་དམིགས་འབེན་དུ་རྩིས་ཏེ། རུལ་སུངས་བ་ཆེ་ཆུང་ཚང་མ་ཕམ་པར་གཏོང་བ་རྒྱུན་འཁྱོངས་དང་། ཏང་ཡོན་ལས་བྱེད་པའི་ཁྲིམས་འགལ་ལུགས་འགལ་གྱི་གྱོད་གཞི་རྩད་གཅོད་ནན་མོ་བྱེད་དགོས་སྐོར་སོགས་བརྗོད་ཡོད་འདུག

གསར་འགོད་པ། པདྨ་མཚོ།