གླུ་བ་ཞིག་ལ་ཁྲིམས་ཆད།

རྒྱ་ནག་གཞུང་གིས་བོད་མདོ་སྨད་རྨ་ལྷོ་ཁུལ་རེབ་གོང་མདོ་བ་ཤང་གི་གླུ་བ་ཤ་བོ་བཀྲ་ཤིས་ལགས་སུ། རང་ལུས་མེར་བསྲེཊ་དང་འབྲེལ་བ་ཡོད་པའི་ཉེས་མིང་འོག་ལོ་ལྔའི་བཙོན་འཇུག་ཁྲིམས་ཐག་བཅད་འདུག

བསོད་ནམས་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། རྒྱ་ནག་གཞུང་གིས་སྔར་ལོའི་ཕྱི་ཟླ་ ༡༡ ནང་བོད་མདོ་སྨད་རྨ་ལྷོ་ཁུལ་རེབ་གོང་མདོ་བར་རང་ལུས་མེར་བསྲེཊ་ཀྱི་གནས་ཚུལ་བསྟུད་མར་བྱུང་སྐབས། མདོ་བ་ཤང་སྒྲོ་རོང་བོ་སྡེ་བའི་རང་ལོ་ ༤༠ ཡིན་པའི་གླུ་བ་ཤ་བོ་བཀྲ་ཤིས་ལགས་འཛིན་བཟུང་གིས་ད་བར་བཀག་ཉར་བྱས་ཡོད་པ་མ་ཟད། ཉེ་ལམ་གསང་བའི་སྒོ་ནས་ཁོང་ལ་རང་ལུས་མེར་བསྲེཊ་གནང་མཁན་གྱི་འདྲ་པར་བཀྲམས་པ་དང་། མེར་བསྲེཊ་གནང་མཁན་གྱི་འདྲ་པར་སྟེང་ཁ་ཆེམས་ཡི་གེ་བྲིས་བ། སྲིད་གཞུང་ལ་ངོ་རྒོད་སྐབས་ལས་འགུལ་ནང་མཉམ་ཞུགས་བྱས་པ། ལ་རྒྱའི་གླུ་བླངས་བ་སོགས་ཀྱི་ཉེས་མིང་འོག་ལོ་ ༥ དུས་བཀག་བཙོན་འཇུག་གི་ཁྲིམས་ཐག་བཅད་དེ། ད་ཆར་མཚོ་སྔོན་ཞིང་ཆེན་ཟི་ལིང་གྲོང་ཁྱེར་གྱི་བཙོན་ཁང་ཞིག་ཏུ་བཙོན་འཇུག་བཀག་ཉར་བྱས་ཡོད་འདུག

ཤ་བོ་བཀྲ་ཤིས་ལགས་ནི། རེབ་གོང་མདོ་བ་ཤང་སྒྲོག་རོང་བོ་སྡེ་བ་ནས་ཡིན་པ་དང་། ཆུང་དུས་ནས་དམངས་གླུ་དང་རྡུང་ལེན་ལ་ཤིན་ཏུ་དགའ་མོས་ཡོད་མཁན་ཞིག་ཡིན་འདུག འདས་པའི་དུས་སུ་ཁོང་གིས་༼རྒྱང་རིང་གི་ཕ་ལོ༽ཞེས་བའི་ཆེད་བསྒྲིགས་འོད་སྡེར་གཙོས་འོད་སྡེར་ཁག་ཅིག་སྥྱི་ཚོགས་ཁྲོད་འགྲེམས་སྤེལ་ཞུས་ཏེ་རོང་འབྲོག་མང་ཚོགས་ཀྱིས་དགའ་བསུ་ཐོབ་ཡོད་འདུག་ལ། ཁོང་ནི་ཡུལ་མི་ཀུན་གྱིས་དགའ་བསུ་དང་བསྟོད་བསྔགས་ཞུ་སའི་གླུ་བ་ཞིག་ཡིན་འདུག

གནས་ཚུལ་ཤེས་རྟོགས་བྱུང་བ་ལྟར་ན། རྒྱ་ནག་གཞུང་གིས་སྔར་ལོའི་རེབ་གོང་མདོ་བ་ཞང་དུ་རང་ལུས་མེར་བསྲེཊ་ཀྱི་གནས་ཚུལ་བྱུང་བར་རྐྱེན་བྱས་ཏེ། ད་ལྟའི་བར་མདོ་བ་ཤང་གི་བོད་མི་འཕགས་པ་ལགས་སུ་མི་བསད་པ་དང་རྒྱལ་ཁབ་ཁ་བྲལ་བཏང་བའི་ཉེས་མིང་འོག་ལོ་ ༡༣ ཁྲིམས་ཐག་དང་། རང་ལོ་ ༦༣ ཡིན་པའི་ཨ་ཁུ་རྒྱ་སྟག་ལགས་སུ་ལོ་ ༤ ། སློབ་མ་རྡོ་རྗེར་ལོ་ ༢ དང་ཕྱེད་ཀ རང་ལོ་ ༢༠ ཡིན་པའི་ལྷ་མོར་ལོ་ ༢། ལོ་ ༡༩ ཡིན་ཞིང་མདོ་བ་ལྡོང་ངེ་སྡེ་བའི་བསམ་མེ་ཚང་གི་བུ་(མིང་གསལ་བོ་ཤེས་མེད༽ ལ་ལོ་ ༢ བཅས་ཀྱི་ཁྲིམས་ཐག་བཅད་ཡོད་པ་མ་ཟད། རང་ལོ་ ༡༩ ཡིན་པའི་གྲྭ་བརྩོན་འགྲུས་ཆོས་ལྡན་ལགས་དང་། རང་ལོ་ ༡༨ ཡིན་པའི་བསོད་འབུམ་གཉིས་འཛིན་བཟུང་བྱས་ཏེ། ད་ཆར་ཡང་ཟི་ལིང་གི་བཙོན་ཁང་ཞིག་ཏུ་བཀག་ཉར་བྱས་ཡོད་འདུག