ཟླ་འདིའི་ཕྱི་ཚེས་ ༢༤ ནས་བཟུང་བོད་མི་མང་སྤྱི་འཐུས་ལྷན་ཚོགས་རྒྱ་གར་ལྷོ་ཕྱོགས་ཁུལ་གྱི་བོད་དོན་ཞུ་གཏུག་ཚོགས་ཆུང་གི་སྤྱི་འཐུས་ཨ་ཀྲུག་ཚེ་བརྟན་ལགས་དང་། འཇིགས་མེད་འབྱུང་གནས། བློ་བཟང་ཡེ་ཤེས། ཚེ་རིང་གཡུ་སྒྲོན་བཅས་ལྷོ་ཕྱོགས་མངའ་སྡེ་གྷོ་ཝ་དང་བྷང་བྷེ་བཅས་སུ་མངའ་སྡེ་བློན་ཆེན་དང་གྲོས་ཚོགས་འཐུས་མི། ཆབ་སྲིད་ཚོགས་པའི་མི་སྣ་བཅས་ལ་ཐུག་འཕྲད་ཀྱིས་བོད་དོན་ཞུ་གཏུག་གི་ལས་འགུལ་སྤེལ་ཡོད་འདུག་ལ། ཕྱི་ཚེས་ ༢༧ ཉིན་སྤྱི་འཐུས་རྣམ་པ་རྒྱ་གར་གྱི་དཔལ་འབྱོར་རིགས་པའི་མཁས་དབང་གི་གཟེངས་རྟགས་བཞེས་མཁན་དང་དབྱིན་ཇིའི་གྲོས་ཚོགས་ཀྱི་འཐུས་མི། དབྱིན་ཇི་དང་རྒྱ་གར།འབྲུག་བཅས་ཀྱི་དཔལ་འབྱོར་སློབ་སྟོན་པ། རྒྱ་གར་གྱི་སྙན་གྲགས་ཅན་གྱི་གཟེངས་རྟགས་པདྨ་བྷུ་ཤོན་(padma bhushan) བཞེས་མཁན་སྐུ་ཞབས་ལོཊ་མེག་ཎ་ཊི་ངྷེ་སཱ་ཡི་ (lord meghnad desai)མཆོག་དང་མཇལ་འཕྲད་གནང་སྟེ། བོད་དོན་སྐོར་གྱི་གནས་ཚུལ་སྤྱི་དང་བྱེ་བྲག་རང་ལུས་མེར་བསྲེཊ་ཀྱི་སྐོར་ཞུས་ཡོད་འདུག སྐབས་དེར་ཁོང་གིས་རྒྱལ་ཁབ་གྱི་ཆགས་འཇིག་ཟེར་བ་དེ་ཡོང་ངེས་ཅན་ཞིག་ཡིན་པ་དང་།བོད་ལ་ཡང་ཉིན་ཞིག་གོ་སྐབས་ཡོད་ངེས་རེད། གཙོ་བོ་དབུས་བྱང་གི་ཨ་རི་སོགས་དེ་སྔོན་དེ་ཙམ་འབྲེལ་བ་མེད་པའི་རྒྱལ་ཁབ་ཁག་ལ་འབྲེལ་བ་འཛུགས་དགོས་ཚུལ་དང་། ལྷག་པར་ཡུ་རོབ་ཕྱོགས་ལ་འབྲེལ་བ་འཇོག་རྒྱུ་གལ་ཆེན་ཡིན་པ་དང་། ཡུ་རོབ་ཕྱོགས་ཀྱི་རྒྱབ་སྐྱོར་དེ་ཁ་ཡོད་ལག་ཡོད་དང་མངོན་གསལ་དོད་པོ་ཡོད་སྐོར་སོགས་གསུང་ཡོད་འདུག
ཡང་རྒྱ་ནག་གི་དཔལ་འབྱོར་གནས་བབ་ཐོག་ཁོང་གིས་རྒྱ་ནག་གི་དཔལ་འབྱོར་ཕུགས་འཕེལ་བ་ཞིག་མེད་པ་དང་། རྒྱ་ནག་གིས་དཔལ་འབྱོར་ཕྱི་ལ་གཏོང་གང་ཐུབ་བྱས་ཏེ། ནང་གི་དཔལ་འབྱོར་གྱི་དཀའ་ངལ་ཐག་བཅོད་ཐུབ་ཀྱི་མེད་པའི་དབང་གིས། བཟོ་རིགས་མི་སྣ་གཙོ་བོར་གྱུར་བའི་མང་ཚོགས་ཀྱི་དཔལ་འབྱོར་ཐོབ་ཐང་ཇི་བཞིན་མ་རག་པའི་དཀའ་ངལ་དང་སེམས་ཚོར་ཇེ་ཆེ་ཕྱིན་སྟེ། གདོང་ལེན་མི་བྱེད་ཐབས་མེད་ཆགས་པ་སོགས་ཀྱིས་རྒྱ་ནག་གི་དཔལ་འབྱོར་ལ་འགྱུར་བ་ཆེན་པོ་ཞིག་འགྲོ་ངེས་ཡིན་སྐོར་དང་། ད་ལྟའི་རྒྱ་ནག་གི་དཔལ་འབྱོར་ཐོག་དཀའ་ལས་རྒྱག་མཁན་དང་ནུས་པ་ཡོད་མཁན་གྱི་མི་རབས་དེ་རྫོགས་ཏེ། མ་འོངས་པར་རྒྱུན་འཛིན་བྱེད་མཁན་གྱི་མི་རབས་ཁག་པོ་ཆགས་ཀྱི་ཡོད་པ་དང་། མི་རབས་རྗེས་མ་ཚོ་མཐོང་རྒྱ་ཆེ་ཞིང་གུ་ཡངས་ཀྱི་བསམ་བློ་ཅུང་བཟང་བ་ཡོད་སྟབས། རྒྱ་ནག་ཤེལ་གྱི་དཀར་ཡོལ་ལྟར་མཁྲེགས་པོ་དང་ལྟ་སྣང་ལ་སྙིང་རྗེ་བོ་ཡོད་ཀྱང་། ཆག་ཀྲུམ་ཤོར་རྒྱུ་ལས་སླ་བོ་ཡིན་པ་དང་། ཆག་ཚར་རྗེས་ཕྱིར་བཟོ་སྐྲུན་བྱེད་ཐབས་མེད་པ་མ་ཟད། རྒྱ་ནག་གི་དཔོན་རིགས་ཁག་གི་ནང་ཁུལ་མི་མཐུན་པའི་དབང་གིས་ཁག་གཉིས་སུ་གྱར་ཡོད་པ་དེ་ནི། དཀར་ཡོལ་ལ་སེར་ཁ་ཆེན་པོ་ཞིག་གས་བ་ལྟ་བུ་ཡིན་པ་དང་། མི་མང་གིས་དཔོན་རིགས་ཁག་ལ་རྒྱབ་སྐྱོར་མེད་སྟབས། མྱུར་དུ་གས་ཆག་འགྲོ་བའི་རྟགས་མཚན་མང་པོ་ཡོང་གི་ཡོད་སྐོར་སོགས་གསུངས་ཡོད་འདུག
ཁ་སང་ཕྱི་ཚེས་ ༢༩ ཉིན་ནས་བཟུང་སྤྱི་འཐུས་རྣམ་པ་མ་ཧ་ར་ཤི་ཊར་མངའ་སྡེ་ནང་ཕེབས་ཏེ། མངའ་སྡེ་བློན་ཆེན་གཙོས་གནད་ཡོད་མི་སྣར་མཇལ་འཕྲད་ཀྱིས་བོད་དོན་ཞུ་གཏུག་གི་ལས་འགུལ་སྤེལ་གྱི་ཡོད་པ་མ་ཟད། དེའི་རྗེས་གྷོ་ཇི་རཱ་ཐུ་དང་ར་ཇི་སི་ཐན་བཅས་མངའ་སྡེ་ཁག་གི་ནང་བོད་དོན་ཞུ་གཏུག་གི་ལས་འགུལ་སྤེལ་འཆར་ཡོད་འདུག
གནའ་བོའི་ང་བཅུ་ང་དགུ་ནས་མགོ་བཟུང་སྟེ། ད་ལྟའི་ཉིས་སྟོང་བཅུ་གསུམ་ལ་མ་ཐུག་གི་བར་དུ། ཆབ་སྲིད་པ་ཡིན་མདོག་དང་། ཤེས་ཡོན་ལྡན་མདོག ལྷག་བསམ་ཅན་ཡིན་མདོག འགན་འཁུར་མདོག་བྱེད་རྣམས་ཀྱིས། རྒྱ་ནག་དེ་ཉིན་ཞིག་ཅི་འགྱུར་འགྲོ་རྒྱུ་དང་། ནམ་ཞིག་བརླག་འགྲོ་རྒྱུར། ཨ་རིས་བོད་ལ་རོགས་རམ་བྱེད་རྒྱུ་བཅས་བཤད་དེ་དུས་ཚོད་མང་པོ་རྫོགས་སོང་ངོ་།། ད་དུང་ཡང་མི་ཆོད་ཅིང་། ཅི་ཡང་མི་ཤེས་པ་དང་། མ་འོངས་པར་ཡང་ཚོད་དཔག་མི་འཐད་པར་ལུས་པའི་སྐད་ཆ་འདི་ལྟ་བུའི་རྒྱུན་སྐྱོང་བྱས་ཏེ་བསྡད་ན་ཕན་ཐོགས་ཅི་ཡོད། དེ་བས་སྐད་ཆ་འདི་ཚོས་རྒྱ་ནག་ལ་གནོན་ཤུགས་སྤྲོད་མི་ཐུབ་ལ། དེ་བས་ཕམ་ཉེས་སུ་གཏོང་མི་ཐུབ་པར་མ་ཟད། བཤད་མཁན་རང་ཉིད་དུས་ཚོད་རྫོགས་འགྲོ་བ་མ་གཏོགས། ཁ་ཐུག་ཕན་ཐོགས་ཡོད་པའི་གནད་དོན་ཞིག་མ་རེད། དེ་ལས་རྡ་སའི་ཉེ་འཁོར་དུ་ཁང་གླ་སྤྲད་རྒྱུ་མེད་མཁན་གྱི་རྒན་གཞོན་མང་པོ་ཞིག་ཡོད་པ་དང་། ལྷག་པར་དཀའ་ངལ་ཅན་གྱི་མི་རྣམས་སྣ། ཤེས་ཡོན་རྩ་ནས་མེད་པའི་མི་སྣ་དེ་ཚོ་ལ་གྲོགས་རམ་ཇི་ལྟར་དགོས་མིན་དང་། བཙན་བྱོལ་སྤྱི་ཚོགས་འདི་འབྱུང་འགྱུར་ཡར་རྒྱས་ཅི་འདྲ་བྱས་ཏེ་གཏོང་མིན། མ་འོངས་བོད་ཀྱི་སོན་རྩར་གྱུར་པའི་གཞོན་སྐྱེས་དེ་དག་ལ། སློབ་སྦྱོང་ཚད་ལྡན་ཞིག་སྤྲོད་ནས་རྒྱལ་སྤྱིའི་གདེངས་ཆའི་སྟེང་དུ་ཤེས་ཡོན་གྱི་གནས་བབ་དང་། ཤེས་ཚད་འདྲ་ཉམས་ཇི་ལྟར་བཟོ་དགོས་མེད་བཅས་བཤད་ན། ཕུགས་ཀྱི་རྩ་དོན་ལ་ཕན་ཐོགས་ཆེ་བ་མི་འདུག་གམ།