དེ་རིང་ངྷ་སར་བཙན་བྱོལ་བོད་མིའི་དམངས་གཙོའི་དུས་དྲན་ཐེངས་ང་གསུམ་པའི་སྟེང་། བཀའ་ཤག་དང་སྤྱི་འཐུས་གཉིས་ཀྱིས་གསུང་བཤད་གནང་བའི་ནང་། བཀའ་ཤག་གིས་དེང་སྐབས་བཙན་བྱོལ་ནང་ལྐོག་ཟ་དང་བུད་མེད་ལ་བརྙས་བཅོས་ཀྱི་གནས་ཚུལ་ཡོད་པར། བོད་པའི་ཀུན་སྤྱོད་ཉམ་ཆག་ལ་གཟབ་དགོས་སྐོར་ནན་གྱིས་གསུངས་སོང་།
སྲིད་སྐྱོང་བློ་བཟང་སེང་གེ་མཆོག་གིས་བཀའ་བཤག་གི་གསུང་བཤད་གནང་སྐབས། བཀའ་ཤག་བཅུ་བཞི་པའི་ལས་དོན་ཆེ་ཁག་དང་། བོད་རྒྱ་འབྲེལ་མོལ་སྐོར་ལ་ཁོང་གིས “ ༧གོང་ས་མཆོག་གིས་ཆབ་སྲིད་ཀྱི་སྐུ་དབང་རྩིས་སྤྲོད་གནང་རྒྱུའི་བཀའ་ལྕི་ཟློག་མེད་ཕེབས་པའི་དབང་གིས། བཀའ་ཤག་སྐབས་བཅུ་བཞི་པར་ལོ་རྒྱུས་རང་བཞིན་ལྡན་པའི་རླབས་ཆེ་བའི་འགྱུར་བ་འདི་ལམ་ལྷོངས་ཡོང་བ་བྱེད་རྒྱུའི་ལས་འགན་བབས་པར་བརྟེན། ང་ཚོའི་ཕྱོགས་ཡོངས་ཀྱི་ལས་དོན་བྱེད་ཕྱོགས་ནི། ཐོག་མར་ནུས་ཤུགས་ཕྱོགས་སྒྲིལ་བྱེད་རྒྱུ་དང་། དངོས་གཞིའི་ལས་འགུལ་སྤེལ་རྒྱུ། མཐར་འབྲེལ་མོལ་ཐོག་འབབ་རྒྱུ་བཅས་ཀྱི་ལས་དོན་གོ་རིམ་ངེས་ཅན་ཞུས་ཡོད། གྲོས་མོལ་བརྒྱུད་ཞི་བའི་སྒོ་ནས་བོད་དོན་དཀའ་རྙོག་སེལ་རྒྱུའི་ཐབས་ལམ་ཡག་ཤོས་དབུ་མའི་ལམ་གྱི་སྲིད་བྱུས་འདི་ཉིད་ཡིན་པ་ཡིད་ཆེས་བརྟན་པོའི་སྒོ་ནས་ཞུ་རྒྱུ་ཡིན། སྲིད་བྱུས་འདི་མཐའ་གཉིས་ཀྱི་དབུས་ཏེ། ད་ལྟའི་ཆར་རྒྱ་ནག་གཞུང་གིས་བོད་མིའི་ཐོག་ལག་བསྟར་བྱེད་བཞིན་པའི་དྲག་གནོན་གྱི་སྲིད་བྱུས་ཁག་མཚམས་འཇོག་དགོས་རྒྱུ་དང་། རྒྱ་ནག་མི་དམངས་སྤྱི་མཐུན་རྒྱལ་ཁབ་ནས་བོད་ཁ་བྲལ་རྩོད་ཀྱི་མེད་སྟབས། དེ་ནི་ཕྱོགས་གཉིས་ཀ་ལ་ཁེ་ཕན་ཡོད་པ་ཞིག་ཡིན། རྒྱ་ནག་གི་མགོ་ཁྲིད་ཚོས་སྲིད་བྱུས་འདིའི་དགེ་མཚན་ཤེས་པའི་སྒོ་ནས་བོད་དོན་དཀའ་རྙོག་སེལ་བའི་རེ་བ་ཡོད། བོད་དོན་འགྲིག་ཆགས་ཡོང་ཐབས་བྱེད་རྒྱུ་རྒྱ་ནག་གི་ཁེ་ཕན་ལ་ཐུག་ཡོད་པ་མ་ཟད། རྒྱལ་སྤྱིའི་ནང་གི་རྒྱ་ནག་གི་མཚན་མཐོང་བསྐྲུན་རྒྱུར་ཡང་ཕན་ཐོགས་ཡོད། འདིའི་ཐད་ཉིན་ཤས་རྗེས་ངྷ་རམ་ས་ལར་ལས་དོན་ཚོགས་ཆུང་གི་ཚོགས་འདུ་ཐེངས་ ༢༦ པ་འཚོགས་ཀྱི་ཡོད་” ཅེས་གསུངས་སོང་།
མཐར་སྲིད་སྐྱོང་མཆོག་གིས “དེ་རིང་གི་གོ་སྐབས་འདི་དང་བསྟུན་དྲན་སྐུལ་ཞུ་རྒྱུ་ཞིག་ལ། མང་གཙོའི་སྤྱི་ཚོགས་ནང་ཚང་མས་ཐོབ་ཐང་དང་ཁེ་ཕན་ལོངས་སུ་སྤྱོད་བཞིན་པ་ལྟརལས་འགན་ཡང་མཉམ་འཁུར་དགོས་རྒྱུ་ནྱ་ཡང་བརྗེད་མི་རུང་། ལས་འགན་མཉམ་འཁུར་ཞུ་རྒྱུ་འཇིག་རྟེན་ཡ་རབས་ཀྱི་སྤྱོད་ཚུལ་ཡིན་པ་ཙམ་མ་ཟད། ཁྲིམས་ཀྱིས་བསྐུར་བའི་ལས་འགན་ཞིག་ཀྱང་ཆགས་ཡོད། དེ་མཚུངས་མང་གཙོ་དང་རང་དབང་གི་སྤྱི་ཚོགས་ནི་ཁྲིམས་ཀྱི་དབང་སྒྱུར་ལ་བརྟེན་པ་ཞིག་ཡིན་སྟབས། རྒྱུན་ལྡན་འཚོ་བའི་ནང་ཁྲིམས་སྒྲིག་ལ་གཙི་འཇོག་དང་སློབ་སྦྱོང་གིས་གོམས་འདྲིས་བསྟེན་རྒྱུ་ཧ་ཅང་གི་གལ་ཆེན་པོ་ཡིན། དེང་སྐབས་ང་ཚོའི་སྤྱི་ཚོགས་དང་སྒྲིག་འཛུགས་ཁག་ནང་སྤྱི་རྒྱུ་སྒེར་ཟ་དང་། ལོག་འཚོ། བུད་མེད་ལ་བརྙས་བཅོས་ལྟ་བུའི་གནས་ཚུལ་ཉུང་ཤས་ལྷག་བཞིན་པ་ནི་བོད་མིའི་ཡ་རབས་བཟང་སྤྱོད་ཀྱི་གཤིས་ཀ་ཉམས་ཆག་འགྲོ་བའི་རྟགས་མཚན་ཡིན་སྟབས། ཚང་མས་འདིའི་ཐད་ཐུགས་སྣང་ཟབ་བཞེས་དང་། འགན་འཁུར་མཉམ་ལེན་དགོས་པའི་འབོད་སྐུལ་ནན་པོ་ཞུ་རྒྱུ་ཡིན་”ཞེས་འབོད་སྐུ་གནང་སོང་།
བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་ནང་། རྒྱ་ནག་གི་དྲག་གནོན་སྲིད་བྱུས་འོག་ ༢༠༠༩ ལོ་ནས་ད་བར་བོད་མི་ ༡༢༠ ཙམ་གྱིས་རྒྱ་གཞུང་ལ་ངོ་རྒོལ་གནང་སྟེ་རང་ལུས་མེར་བསྲེགས་གནང་ཡོད་ཀྱང་རྒྱ་གཞུང་གིས་དེ་དག་གི་མངོན་འདོད་ལ་བསམ་ཞིབ་རྩ་ནས་མེད་པར་བསྙོན་འཛུགས་སྣ་ཚོགས་དང་། རང་སྲེག་གནང་མཁན་ཚོའི་ནང་མི་གཉེན་འབྲེལ་སོགས་འཛིན་བཟུང་བྱེད་ཀྱིན་ཡོད་པ་དང་། ལྷག་པར་དུ་ཉེ་ཆར་རྒྱ་ནག་དབུས་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་དང་རྒྱལ་ཡོངས་སྲིད་གྲོས་འགན་འཛིན་ཡུས་ཀྲིན་ཧྲིན་བོད་ཁུལ་དུ་བསྐྱོད་དེ། ཏཱ་ལའི་བླམ་འི་བོད་ཆེན་པོ་དང་། ཚད་མཐོའི་རང་སྐྱོང་ནི་ཀྲུང་གོའི་རྩ་ཁྲིམས་དང་འགལ་ཡོད་པ་མ་ཟད། བོད་བརྒྱུད་ནང་བསྟན་གྱི་རྩ་བའི་ཁེ་ཕན་དང་ཡང་འགལ་ཡོད་སྐོར་བརྗོད་པ་ནི། རྒྱ་གུང་ཁྲན་སྲིད་དབང་སྒེར་འཛིན་པ་ཁོ་རང་ཚོས་ཁྲིམས་འགལ་བྱས་ཏེ། བོད་པའི་ཆོས་དང་རིག་གཞུང་རྩ་མེད་གཏོང་འདོད་ཀྱི་གདོང་རིས་ངོ་མ་དེ་ཡིན་སྐོར་བཀོད་འདུག
རྒྱ་གཞུང་གིས་བོད་པའི་དགོན་སྡེ་ཁག་ཏུ་རྒྱ་དར་བསྒྲེངས་འཛུགས་དང་། རྒྱ་ནག་གི་མགོ་ཁྲིད་ཚོའི་པར་སྒྲིག་བཤོམ། ཆོས་ཀྱི་བྱེད་སྒོ་བཀག་སྡོམ་བྱེད་ཀྱིན་ཡོད་ཅིང་། བོད་རང་སྐྱོང་ལྗོངས་ཟེར་བ་ཁོ་ནའི་ནང་གི་དགོན་སྡེ་ ༡༧༨༧ ཙམ་ནང་བཅའ་སྡོད་ལས་བྱེད་ ༦༥༧༥ ཆེད་གཏོང་བྱས་ཏེ་ཆབ་སྲིད་ལས་འགུལ་སྤེལ་བཞིན་པ་དག་མཚམས་འཇོག་བྱེད་དགོས་པ་དང་། ད་ལོའི་ཕྱི་ཟླ་ ༧ ཚེས་ ༡ ཉིན་ནས་དེ་སྔོན་བོད་སྡོད་ཨམ་བན་གྱི་ལོ་རྒྱུས་ལ་འཁྱོག་བཤད་ཀྱི་འགྲེམས་སྟོན་ཁང་སྒོ་འབྱེད་དང་། ཟླ་ ༨ ཚེས་ ༡ ཉིན་ནས་རྒྱ་གཞུང་གིས་ཨ་སྒོར་ས་ཡ་མང་པོ་བཏང་སྟེ། ལྷ་སར་འུན་ཤིང་ཀོང་ཇོ་ཟེར་བ་འཁྲབ་སྟོན་སོགས་བྱས་ཏེ་ལོ་རྒྱུས་ལ་འཁྱོག་བཤད་བྱེད་མགོ་བཙུགས་ཡོད་པ་དེ་དག་ལ། བོད་མི་ཚོ་མགོ་སྐོར་བསླུ་བྲིད་འོག་མ་ཚུད་པ་གནང་དགོས་སྐོར་བཀོད་འདུག
རྒྱ་གཞུང་གིས་ཕྱོགས་གཅིག་ནས་བོད་ནང་འཕེལ་རྒྱས་དང་ཁོར་ཡུག་སྲུང་སྐྱོབ། ཡུན་རིང་བདེ་འཁོད་སོགས་སྒྲོག་གི་ཡོད་ཀྱང་། འབྲོག་པ་གནས་སྤོར་བྱས་ཤུལ་དུ་གཏེར་ཁ་སྔོག་འདོན་དང་། རང་བྱུང་ཐོན་ཁུངས་ཀྱི་བཟོ་གྲྭ་མང་པོ་གསར་རྒྱག བོད་ཁུལ་གྱི་ཐོན་རྫས་སྐྱེལ་འདྲེན་ཆེད་མེར་འཁོར་ལྕགས་ལམ་དང་། གཞུང་ལམ་མང་པོ་འཛུགས་སྐྲུན་བཅས་བྱེད་ཀྱིན་ཡོད་པ་འདི་དག་ནི་སྤྱིར་འཛམ་གླིང་དང་། སྒོས་ཨེ་ཤ་ཡ། བྱེ་བྲག་ཏུ་བོད་ཀྱི་སྣོད་བཅུད་ལ་གནོད་ཚབས་ཆེ་བ། ཟླ་ ༨ ཚེས་ ༡༢ ཉིན་ནས་བཟུང་མཚོ་སྔོན་ཡུལ་ཤུལ་རྫ་སྟོད་དུ་གཏེར་ཁ་སྔོག་འདོན་བྱེད་མཁན་ལ་ས་གནས་མི་མང་གིས་ངོ་རྒོལ་བྱེད་སྐབས། རྒྱ་དམག་གིས་དྲག་གནོན་བྱས་དང་བྱེད་བཞིན་ཡོད་པ་དག་མཚམས་འཇོག་བྱེད་དགོས་སྐོར་བཀོད་འདུག
ཡང་འདི་ལོར་བོད་ནང་གི་དཀར་མཛེས་དང་ལི་ཐང་། བླ་བྲང་དང་མགོ་ལོག་སོགས་སུ་༧གོང་ས་མཆོག་གི་སྐུའི་འཁྲུངས་སྐར་སྲུང་གཙི་བྱེད་སྐབས་རྒྱ་གཞུང་གིས་དམ་དྲག་ཆེན་པོ་བྱས་པ། ལྷག་པར་དུ་ཁམས་རྟའུ་ས་ཁུལ་དུ་འཁྲུངས་སྐར་སྲུང་གཙིའི་སྐབས་རྒྱ་དམག་གིས་མི་མང་ལ་རྡུང་རྡེག་དང་མེ་མདའ་བརྒྱབ་སྟེ་དྲག་གནོན་བྱས་པ། དེ་བཞིན། ནག་ཆུ་ཤག་རོང་པོ་དགོན་གྱི་བླ་མ་ཟླ་བ་རིན་པོ་ཆེས་༧གོང་ས་མཆོག་ལ་འབྲེལ་བ་གནང་ཡོད་པའི་ཉེས་འཛུགས་འོག དགོན་པའི་ལས་སྣེ་འཛིན་བཟུང་དང་དགོན་པ་སྒོ་བརྒྱབ་པ་སོགས་ལ་བརྟེན་ཏེ་དགེ་འདུན་པ་ཞིག་གིས་རང་ཤུ་རྒྱག་དགོས་བྱུང་པ་སོགས་ཀྱིས་རྒྱ་གཞུང་གིས་ཤོད་བཞིན་པའི་ཆོས་ལུགས་དད་མོས་ལ་འགྲེལ་བཤད་རྒྱག་གི་ཡོད་སྐོར་སོགས་བཀོད་འདུག
གསར་འགོད་པ། བནྟེ་སྐྱབས་ཀྱིས་བསྡུ་སྒྲིག་བྱས།
རྒྱ་གཞུག་གིས་དབུ་ལམ་རྒྱའི་ཁྲིམས་དང་འགལ་འདུག་ཅེས་པའི་ཐད་ནས་ལན་ཚ་ཐག་ཆོད་པོ་ཞིག་རྒྱག་དགོས་པ་ཁ་ཚ་དགོས་གཏུགས་རེད། བཀའ་ཤག་གཙོས་གཞུང་དང་ཚོགས་སྡེ། ཐ་ན་མི་སྒེར་རེ་རེར་བབ་པའི་འགན་རེད། འདི་མི་ཁུར་བ་ག་ལ་སྲིད་ཀྱང།་མ་འཇོན་ན་ཞབས་འདྲེན་པ་རྐྱང་རེད།
ཀེ་ཏ་ཀེས”ལས་ཀ་བྱེད་ཕྱོགས་ཀྱིས་ཐམས་ཅད་འཕྲོ་བརླག་ལ་ཤོར་སྲིད་སྟབས”ཟེར་ཡང་སྲིད་པ་ཙམ་མ་རེད་སྲིད་པའི་ཁྱབ་རེད། གཞུང་ཞབས་ཚང་མ་ལ་མཇལ་ཁ་མ་གནང་བ་ཏག་ཏག་རེད།་ད་དུང་ཉུང་དུ་གཏོང་རོགས་ཞུ།
་་་་་ ང་ཚོའི་ཕྱོགས་ཡོངས་ཀྱི་ལས་དོན་བྱེད་ཕྱོགས་ནི། ཐོག་མར་ནུས་ཤུགས་ཕྱོགས་སྒྲིལ་བྱེད་རྒྱུ་དང་། དངོས་གཞིའི་ལས་འགུལ་སྤེལ་རྒྱུ། མཐར་འབྲེལ་མོལ་ཐོག་འབབ་རྒྱུ་བཅས་ཀྱི་ལས་དོན་གོ་རིམ་ངེས་ཅན་ཞུས་ཡོད།
གྲོས་མོལ་བརྒྱུད་ཞི་བའི་སྒོ་ནས་བོད་དོན་དཀའ་རྙོག་སེལ་རྒྱུའི་ཐབས་ལམ་ཡག་ཤོས་དབུ་མའི་ལམ་གྱི་སྲིད་བྱུས་འདི་ཉིད་ཡིན་པ་ཡིད་ཆེས་བརྟན་པོའི་སྒོ་ནས་ཞུ་རྒྱུ་ཡིན། ་་་་་་ཟེར།
གསར་འགྱུར་འདིའི་ཁ་བྱང་གནད་དུ་འཁེལ་འདུག སྲིད་སྐྱོང་མཆོག་གིས་ “བོད་དོན་དཀའ་རྙོག་སེལ་རྒྱུའི་ཐབས་ལམ་ཡག་ཤོས་དབུ་མའི་ལམ་གྱི་སྲིད་བྱུས་འདི་ཉིད་ཡིན་པ་ཡིད་ཆེས་བརྟན་པོའི་སྒོ་ནས་ཞུ་རྒྱུ་ཡིན།”ཞེས་གསུངས་འདུག གསུང་བཤད་དེས་དངོས་བསྟན་ནི། ད་ནས་བཟུང་སྟེ་བོད་དོན་དཀའ་རྙོག་སེལ་བའི་ཐབས་ལམ་ཡག་ཤོས་དབུ་མའི་ལམ་གྱི་སྲིད་བྱུས་ཡན་པར་ཡིད་ཆེས་བྱེད་རྒྱུ་ཡིན་ཞེས་བསྟན་འདུག་པས། ཤུགས་བསྟན་སུ་ད་སྔ་དབུ་མའི་ལམ་ལ་ཡིད་ཆེས་མེད་པ་དང་། ཡང་ན་ད་བར་དབུ་མའི་ལམ་ལ་ཡིད་ཆེས་བྱས་མྱོང་མེད་པ་བཅས་བསྟན་འདུག ཧ་ཧ་ཧ། སྲིད་སྐྱོང་མཆོག་གིས་དེ་སྔོན་བཀའ་མོལ་གནང་ཡུལ་མང་པོ་ཞིག་ཏུ། བཀའ་ཤག་སྐབས་བཅུ་བཞི་བས་ངོས་ནས་༧གོང་ས་མཆོག་གི་དགོངས་གཞི་དང་བོད་མིའི་སྒྲིག་འཛུགས་ཀྱི་སྲིད་བྱུས་དབུ་མའི་ལམ་མུ་མཐུད་རྒྱུན་འཁྱོངས་བྱེད་རྒྱུ་ཡིན་ཟེར་བ་ཙམ་ལས། ང་རང་སྒེར་ངོས་ནས་དབུ་མའི་ལམ་ལ་མོས་མཐུན་ཡིད་ཆེས་ཡོད་མེད་གང་ཡང་བཤད་མེད་པ་མ་ཟད། སྒེར་ངོས་ནས་དབུ་མའི་ལམ་ལ་ཤར་སྐྱོད་བྱེད་འདོད་ཡོད་མེད་ཀྱི་ཁ་ཡང་གསལ་བོ་མེད་པར་འགྲོ་ཐབས་འདུག་ཐབས་ཀྱི་གསུང་བཤད་རྐྱང་གནང་བསྡད་པ་རེད།
སྡེ་ཚན་འགན་འཛིན་་་་་་མན་་་་་ཞེས་བཟོ་བཅོས་གནང་རོགས།།
སྲིད་སྐྱོང་གིས་ཡིད་ཆེས་རྙེད་ཡ་འཕྱི་དྲགས་འདུག ཡིད་ཆེས་ཡོད་མེད་ཕྱག་བསྟར་གནང་ཕྱོགས་ནས་བལྟ་ཡ་རེད་མ་གཏོགས། ཁ་ནས་དམ་འཛིན་ཞུ་རྒྱུ་ཡིན། འགྱུར་བ་མེད། ཡིད་ཆེས་ཞུ་རྒྱུ་ཡིན་ཞེས་གསུངས་བསྡད་པས་ཕན་ཅི་གང་ཐོག་གི་མ་རེད། བཙན་བྱོལ་ནང་བོད་མི་ཕྱི་རྒྱལ་གྱི་མི་སེར་ཟུར་ཕོག་ཡོད་མཁན་འགའ་དང། སྡེ་པ་གཞུང་གི་སྐུ་དྲག་ཁ་ཤས། རྒྱ་མིའི་བེད་སྤྱོད་འོག་ཕྱིན་པ་རེ་འགའ་བཅས་ལས་དབུ་མའི་ལམ་ལ་ཡིད་ཆེས་མེད་མཁན་གཅིག་ཀྱང་མེད་པས། སྲིད་སྐྱོང་མཆོག་གིས་ད་དབུ་མའི་ལམ་གསུངས་ཏེ་བཞུགས་རྒྱུ་མིན་པར། ཕྱག་བསྟར་གནང་ནས་མིའི་མིག་ལ་འཆར་ཡ་ཡོད་པ་ཞིག་གནང་རོགས།།
དེ་མིན་ཤེས་རིག་ལས་ཁུངས་ཀི་ཤེས་ཡོན་སྲིད་བྱུས་ཐད་ཀྱི་དེ་རིང་སང་ཉིན་གྱི་རྙོག་གླེང་དང། དེ་བཞིན་བོད་སློབ་འཛིན་ཚོགས་རྩིས་བཞེས་ཐུབ་མིན་ཁེག་སེ་ཡོད་པའི་གནང་སྟངས་འདི་ལྟར་དབུ་མའི་ལམ་ཕྱག་བསྟར་མ་གནང་རོགས། ངེས་པར་དུ་བཀའ་ཤག་ལྷན་རྒྱས་ལ་གྲོས་འདྲི་རོགས། གལ་སྲིད་བཀའ་བློན་གནད་ཡོད་རྣམས་མེད་དུས་རྩ་བ་ནས་ཐག་གཅོད་གནང་རྒྱུ་ཡོད་པ་མ་རེད།
གོ་ཐོས་བྱས་ན། ༼ སྲིད་སྐྱོང་སློབ་ཡོན་༽དང་༼ ཤེས་ཡོན་སྲིད་བྱུས་དང་འབྲེལ་བའི་བཀོད་ཁྱབ་ཕྱིན་ཅི་ལོག་པ་ཁག༽། ༼ ནང་སྲིད་བཀའ་བློན་ཤེས་རིག་བཀའ་བློན་ལ་བརྗེ་བོ་གནང་འཆར། ༽དེ་བཞིན་༼ རང་གི་གྲོགས་པོ་ཨ་རིའི་སྐུ་ཚབ་དོན་གཅོད་དུ་བསྐོས་པ་༽སོགས་ནི་བཀའ་ཤག་ལྷན་རྒྱས་མི་བཞུགས་དུས། བཀའ་བློན་མཁྱེན་ལྡན་རྣམས་ཕྱོགས་ཕེབས་དང་གུང་གསེང་ཕྱིན་པ་ཅི་རིགས་ཀྱི་རྗེས་སུ་ཐག་གཅོད་བྱས་འདུག་སྟབས་དེ་དག་ནི་དངོས་གནས་ཞབས་འདྲེན་དང་ལོ་རྒྱུས་ཀྱིས་ཐར་བ་མི་གཏོང་བ་ཁག་རེད།
ད་དུང་དཔེར་མཚོན་ཞིག་ལ། དེ་རིང་མང་གཙོ་དུས་དྲན་གྱི་གཞུང་ཞབས་རྣམ་པའི་མཇལ་ཁའི་སྐོར་རེད། གཟའ་ཕུར་བུ་ལ་བཀའ་དྲུང་གིས་བཀོད་ཁྱབ་ནང་གཞུང་ཞབས་ཚང་མ་མཇལ་ཁ་ཡོད་ཅེས་ཕེབས། ཁ་སང་གཟའ་ཉི་མར་ཡང་བསྐྱར་ངག་ཐོག་ནས་སྡེ་ཚན་འགན་འཛིན་དང་ཆོད་གན་སོགས་ལ་མཇལ་ཁ་མེད་ཅེས་ཁ་པར་གཏོང་རེ་བྱེད་པ་སོགས་ནི་ད་བར་གངས་སྐྱིད་ཀྱི་འཛིན་སྐྱོང་ནང་བྱུང་མ་མྱོང་དོན་དག་ཅིག་རེད། འདི་དག་ཞབས་འདྲེན་རེད། མི་མང་གིས་མཁྱེན་གྱི་མེད་སྟབས་ཅི་བྱས་ན་ཆོག་གི་བསམས་པ་དེ་ནོར་བ་རེད།
དེ་བཞིན། ད་དུང་གནས་ཚུལ་མང་པོ་འདུག དཔེར་ན་སྲིད་བྱུས་ཉམས་ཞིབ་ཁང་གི་འགན་འཛིན་ཁ་སང་སོག་པོར་ཚོགས་འདུར་སོང་ནས་ར་བཟི་ནས་ཉིན་གཅིག་ཧྲིལ་བོར་ཉལ་ནས་ཚོགས་འདུར་བཅར་མ་ཐུབ་པ། དེ་བཞིན་ལྷ་བཟང་ཚེ་རིང་གི་དཔེ་དེབ་དབུ་འབྱེད་ཚོགས་འདུར་སོང་ནས་དབུ་མའི་ལམ་དང་སྒྲིག་འཛུགས་ལ་སྐྱོན་བརྗོད་གྲོས་རྭར་མཉམ་ཞུགས་བྱས་པ་སོགས་ནི་སྲིད་སྐྱོང་གིས་མ་ཐོས་པ་དང་མ་མཐོང་བ་ཡིན་མི་སྲིད་མོད། ད་བར་གྲགས་འགུལ་གང་ཡང་མེད་པ་ནི་ཞབས་འདྲེན་རེད། ལས་ཀ་བྱེད་ཕྱོགས་ཀྱིས་ཐམས་ཅད་འཕྲོ་བརླག་ལ་ཤོར་སྲིད་སྟབས། མ་འོངས་པར་གཟབ་ཙམ་གནང་རོགས།།།
ད་ཚང་མ་ལོས་དགའ་ཁ་འཁྱེར་ཕྱོགས་མི་གནང་བར་དབུ་མའི་ལམ་གྱི་འགྲེལ་བརྗོད་དང་བོད་རིང་ལུགས་ཀྱི་འགྲེལ་བརྗོད་གཉིས་ལ་གཤིབས་བསྡུར་ཉམས་ཞིབ་གནང་གལ་ཤིན་ཏུ་ཆེ་བའི་ཁར། བོད་ཕྱི་ནང་གཉིས་ཀྱི་བསམ་བློ་གཅིག་གྱུར་དང་ངོ་རྒོལ་བྱེད་ཡུལ་གཅིག་གྱུར་ཡོང་ཐབས་ཤིག་འཚོལ་རན་འདུག རྒྱུ་མཚན་ནི་རྒྱ་གཞུང་གིས་དབུ་མའི་ལམ་རྩ་ཁྲིམས་ལ་འགལ་འདུག་ཅེས་གསལ་བོ་དག་པོ་བརྗོད་ཡོད་པས། གོང་ས་མཆོག་བཙོན་ཁང་ནང་སྐྱེལ་བསམ་མཁན་ཞིག་མིན་ན། ད་ལམ་གསུམ་པ་ཞིག་འཚོལ་རན་འདུག