ཞང་བློན།
སྐབས་བཅོ་ལྔ་པའི་བོད་མི་མང་སྤྱི་འཐུས་གྲོས་ཚོགས་ཚོགས་དུས་ལྔ་པ། ཕྱི་ལོ་ ༢༠༡༣ ཟླ་ ༣ ཚེས་ ༢༧ ཉིན་སྤྱི་འཐུས་སྒེར་གྱི་གསལ་བཤད་བྱ་རྒྱུའི་གོ་སྐབས་བཟུང་སྟེ། བཀའ་བརྒྱུད་སྤྱི་འཐུས་ཀརྨ་ཆོས་འཕེལ་གྱིས་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་ལྗགས་རྩོམ་གནང་བའི་བདེན་ཚིག་སྨོན་ལམ་ནང་། “ཡོངས་རྫོགས་བོད་ལྗོངས་རང་དབང་གཙང་མའི་དཔལ།།” ཞེས་པ་དང་། ལྷ་མོའི་འཕྲིན་བསྐུལ་དུ་“རང་དབང་དཔལ་ལ་རེ་བཞིན་རྟག་གནས་ན།།”ཞེས་པ། གནས་ཆུང་འཕྲིན་བསྐུལ་དུ་“ཆོས་སྲིད་རང་དབང་དགའ་སྟོན་སྒྲུབས་ཤིག་ཀྱེ།།”ཞེས་པ། དེ་བཞིན་བོད་སྐྱོང་ལྷ་སྲུང་སྤྱིའི་འཕྲིན་བསྐུལ་དུ་“ཆོས་སྲིད་རང་དབང་གཙང་མའི་སྣང་བའི་དཔལ།།” ཞེས་གསུངས་པ་དེ་དག་གི་བརྗོད་ཚིག་ཏུ་ཡོད་པའི་‘རང་དབང་’ཞེས་པ་‘རང་བཙན་’གྱི་དོན་ལ་གོ་དགོས་པ་དང་། ༸གོང་ས་མཆོག་གི་ཐུགས་ཀྱི་བཞེད་དགོངས་ངོ་མ་‘བོད་རང་བཙན་’ཡིན་ཚུལ་འགྲེལ་བརྗོད་བྱས་ཡོད་པ་དང་། “ངས་ཤེས་ཚོད་བྱས་པ་ཡིན་ན་སྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་གིས་ལམ་དབུ་མ་དེ་ཛ་དྲག་དང་དེ་འདྲའི་གནས་སྟངས་ཤིག་ལ་གཟིགས་ནས་ཐབས་བརྒྱ་ཇུས་སྟོང་གིས་ཐབས་ཤེས་ཤིག་བཏོན་གནང་བ་རེད་མ་གཏོགས། དགོས་པ་དེ་སྐུ་མདུན་གྱི་དགོངས་པའི་ནང་དུ་ཡང་རང་དབང་རང་བཙན་རེད་བསམ་པ་དེ་ཡོད།” ཅེས་བཤད་ཡོད། གནད་དོན་དེ་དང་འབྲེལ་ནས་༸གོང་ས་སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༣ ཟླ་ ༥ པའི་ཚེས་ ༡༦ དང། ཕྱི་ལོ་ ༢༠༡༣ ཟླ་ ༩ པའི་ཚེས་ ༢ ཉིན་སོ་སོར། ཀརྨ་ཆོས་འཕེལ་དངོས་སུ་མིང་འདོན་གནང་ནས་དངོས་ཡོད་གནས་ཚུལ་ལ་གསལ་འགྲེལ་གྱི་བཀའ་སློབ་ཟབ་རྒྱས་ཕེབས་ཡོད།
འོན་ཀྱང་ཁོ་པས་རང་སྐྱོན་ངོས་ལེན་བྱ་རྒྱུ་ལས་ཟློག་སྟེ། ཕྱི་ལོ་ ༢༠༡༣ ཟླ་ ༩ ཚེས་ ༦ ཉིན་གསལ་བསྒྲགས་ཤིག་སྤེལ་ཏེ། དངོས་ཡོད་གནས་ཚུལ་ལ་ཁྱོག་བཤད་དང་ལོ་རྒྱུས་རྫུན་བཟོ་བྱེད་པའི་བྱ་ཐབས་སྤེལ་ཡོད། ང་ཚོས་གནས་ཚུལ་འདི་རིགས་ལ་དུས་དང་མཐུན་པའི་གསལ་འགྲེལ་ཞིག་མ་བྱས་ཚེ། དེབ་ཐེར་ནང་རྫུས་བཟོས་བདེན་འགྱུར་གྱི་ངོ་བོར་གནས་། འབྱུང་འགྱུར་མི་རབས་རྣམས་མགོ་བོ་རྨོངས་གཞིར་འགྱུར་ཉེན་ཤིན་ཏུ་ཆེ། གཤམ་དུ་ཁོ་བོས་དངོས་ཡོད་གནས་ཚུལ་ལ་བདེན་རྒྱབ་བདེན་གནོན་གྱི་ཚུལ་དུ། ཀརྨ་ཆོས་འཕེལ་གྱི་བདེན་པ་མིན་པའི་སྐད་ཆ་རེ་རེ་བཞིན་ཐིལ་བརྟོལ་བྱ་རྒྱུ་ཡིན།
ཁོ་པའི་གསལ་བཤད་ནང་། ཕྱི་ལོ་ ༢༠༡༣ ཟླ་ ༩ ཚེས་ ༥ ཉིན་སྤྱི་འཐུས་རྒྱུན་ལས་ནང་ཉེ་ཆར་མང་གཙོའི་དུས་ཆེན་ཉིན་སྤྱི་ནོར་ྋགོང་ས་ྋ སྐྱབས་མགོན་ཆེན་པོ་མཆོག་ནས་སྲི་ཞུ་ལས་བྱེད་མཉམ་བཞུགས་མོལ་ཚོགས་འདུ་གནང་བའི་ནང་བཀའ་སློབ་དང་བཀའ་བསྡུར་ཇི་བྱུང་སྐོར་དེ་སྐབས་ཚོགས་འདུར་ངོ་ཕེབས་ཚོགས་ཙོ་སྦྲེལ་པོ་དང་ཚོགས་དྲུང་གསུམ་ནས་གསལ་བཤད་བགྲོ་གླེང་གནང་འབྲས། བར་ལམ་ྋགོང་ས་མཆོག་ལ་ཐུགས་ཕམ་བྱུང་རྐྱེན་སྐུ་ཚེའི་ལོ་ཚད་སྐོར་གྱི་གནད་དོན་དང་ཕྲན་འབྲེལ་བ་གང་ཡང་མེད་པ་གསལ་པོ་ཆགས་པའི་ཐོག དེའི་ཕྱི་ཉིན་གུས་ནས་དཔལ་ལྡན་དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་མཆོག་ལ་ངོ་བཅར་གྱིས་གཤམ་གསལ་གནད་དོན་རྣམས་སྙན་སེང་ཞུས་པ་ཡིན། ཞེས་ཟེར་བར། སྤྱི་ནོར་༸གོང་ས་མཆོག་ཐུགས་ཕམ་བྱུང་རྐྱེན་གྱི་གནད་དོན་དང་། ཁྱོད་ཉིད་འབྲེལ་བ་གང་ཡང་མེད་པ་གསལ་པོ་ཆགས་ཞེས་པ་ནི་བདེན་པ་མིན་ཏེ། ཕྱི་ལོ་ ༢༠༡༣ ཟླ་ ༥ པའི་ཚེས་ ༡༦ ཉིན་༸གོང་ས་མཆོག་གིས་བོད་པའི་སློབ་ཕྲུག་ཅིག་གི་དྲི་བའི་ལན་དུ་ཁྱོད་ཀྱི་མིང་འདོན་གནང་སྟེ། “ཁོས་ང་མ་བིན་བཟོ་གི་ཡོད་པ་རེད།” ཅེས་གསུངས་པ་དང༌། ཕྱི་ལོ་ ༢༠༡༣ ཟླ་ ༩ པའི་ཚེས་ ༢ ཉིན་བོད་མིའི་སྒྲིག་འཛུགས་དབུས་ལས་ཁུངས་ཁག་གི་སྡེ་འགན་ཡན་གྱི་སྲི་ཞུའི་ལས་བྱེད་ཡོངས་ལ། བཞུགས་སྒར་ཕོ་བྲང་དུ་བཀའ་སློབ་གནང་སྐབས། སླར་ཡང་ཁྱོད་ཀྱི་མིང་འདོན་གནང་ནས། “ཀརྨ་ཆོས་འཕེལ་གྱིས་བཤད་པར་གྲུབ་འབྲས་ཐོན་འདུག ད་ཆ་རྒྱ་མིས་ངོས་ལ་ཚུར་‘ཁ་ནས་དབུ་མའི་ལམ་ཟེར་བ་མ་གཏོགས་དོན་དངོས་སུ་རང་བཙན་རྩོད་ཀྱི་འདུག་‘ཅེས་སྐྱོན་བརྗོད་བྱེད་ཀྱི་འདུག” ཅེས་སོགས་བཀའ་སློབ་ཕེབས་ཡོད། དེ་སྐབས་མཇལ་ཁར་ངོ་ཕེབས་ཡོངས་ནས་༸གོང་ས་མཆོག་ཐུགས་ཕམ་བྱུང་རྐྱེན་གྱི་གནད་དོན་ཐད། ཁྱོད་ཀྱིས་སྡིག་ཉེས་ཇི་བསགས་མཁྱེན་རྟོགས་ཞིབ་གསལ་བྱུང་ཡོད་མོད། ཚོགས་ཙོ་སྦྲེལ་པོ་དང་ཚོགས་དྲུང་གསུམ་ནས་གསལ་བཤད་བགྲོ་གླེང་གནང་སྟེ། གནད་དོན་དེ་དང་ཕྲན་འབྲེལ་བ་གང་ཡང་མེད་པ་གསལ་པོ་ཆགས་ཟེར་བ། ཁྱོད་ཀྱིས་རང་ཉིད་དཀར་འདོན་ཆེད་ཚོགས་གཙོ་སྦྲེལ་པོ་དང་ཚོགས་དྲུང་རྒྱབ་དཔུང་དུ་འཁྱེར་ནས། རྒྱ་ཆེའི་མང་ཚོགས་ལ་མགོ་སྐོར་གཏོང་སེམས་བྱས་པ་རེད།
ཡང་ཁྱོད་ཀྱིས། “བོད་ཕྲུག་དེས་གོ་བ་ལོག་གྲུབ་ཀྱིས་ྋགོང་ས་མཆོག་ནས་ལམ་དབུ་མ་གསུངས་བཞིན་ཡང་ཐུགས་ནང་རང་བཙན་ཡོད་ལུགས་ཞུས་པ་དེ་དག་ཕྲན་ནས་སྔ་ཕྱིར་གྲོས་ཚོགས་སུ་ཞུས་པའི་གཏམ་བཤད་ནང་གཏན་ནས་བརྗོད་མེད་ཅིང། རང་ཉིད་ཀྱི་རྣམ་ཀུན་ཀུན་སློང་དང་སྣང་བའི་ཡུལ་དུའང་དེ་ལྟར་མེད་ངེས་ཡིན།” ཞེས་པར། གལ་ཏེ་ཁྱོད་རང་སྐབས་བཅོ་ལྔ་པའི་བོད་མི་མང་སྤྱི་འཐུས་གྲོས་ཚོགས་ཚོགས་དུས་ལྔ་པ། ཕྱི་ལོ་ ༢༠༡༣ ཟླ་ ༣ ཚེས་ ༢༧ ཉིན་གྲོས་ཚོགས་ནང་ཤེས་པ་རྣལ་དུ་མ་གནས་པ་མིན་ན། ཁྱོད་ཀྱིས་དེ་ཉིན་སྤྱི་འཐུས་སྒེར་གྱི་གསལ་བཤད་བྱ་རྒྱུའི་གོ་སྐབས་བཟུང་སྟེ། གོང་གསལ་འཕྲིན་བཅོལ་ཁག་གི་བརྗོད་ཚིག་ཏུ་ཡོད་པའི་‘རང་དབང་’ཞེས་པ་‘རང་བཙན་’གྱི་དོན་ལ་གོ་དགོས་པ་དང་། ༸གོང་ས་མཆོག་གི་ཐུགས་ཀྱི་བཞེད་དགོངས་ངོ་མ་‘བོད་རང་བཙན་’ཡིན་ཚུལ་འགྲེལ་བརྗོད་བྱས་ཡོད་པ་མ་ཟད། “ངས་ཤེས་ཚོད་བྱས་པ་ཡིན་ན་སྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་གིས་ལམ་དབུ་མ་དེ་ཛ་དྲག་དང་དེ་འདྲའི་གནས་སྟངས་ཤིག་ལ་གཟིགས་ནས་ཐབས་བརྒྱ་ཇུས་སྟོང་གིས་ཐབས་ཤེས་ཤིག་བཏོན་གནང་བ་རེད་མ་གཏོགས། དགོས་པ་དེ་ྋསྐུ་མདུན་གྱི་དགོངས་པའི་ནང་དུ་ཡང་རང་དབང་རང་བཙན་རེད་བསམ་པ་དེ་ཡོད།”ཅེས་སོགས་བཤད་པ་བརྙན་པར་དང་སྒྲ་འཇུག་གང་དགོས་འཛམ་གླིང་ཡུལ་གྲུ་ཀུན་ནས་ཉན་བལྟ་བྱ་ཆོག་པས། ཁྱོད་ཀྱི་གོང་བཀོད་གསལ་བཤད་དེ་ཤེས་པ་རྣལ་དུ་མ་གནས་པའི་སྐད་ཆ་ཙམ་ལས་མ་འདས།
དེ་བཞིན་སྐབས་དེར་“གྲོས་ཚོགས་ནང་དཔལ་ལྡན་བཀའ་ཤག་དང༌། སྤྱི་འཐུས་རྣམ་པ་ཚོགས་བཞུགས་ཡོད་སྟབས་དགག་ལན་ཡོང་དགོས་ངེས་ཀྱང་བྱུང་མེད་པ་ནས་གསལ་པོ་མཁྱེན་ཐུབ།“ ཟེར་བར། ཁྱོད་ཀྱིས་སྤྱི་འཐུས་སྒེར་གྱི་གསལ་བཤད་ཟེར་བའི་སྐད་ཆ་བཤད་མཚམས་གྲུབ་མ་ཉིད་དུ། བཀུར་འོས་དཔལ་ལྡན་ཚོགས་སྦྲེལ་པོ་མཆོག་ནས། དགག་ལན་ཚ་ནན་ཕེབས་ཤིང་། དོན་ཚན་གསུམ་གྱི་ཐོག་ནས་ཁྱོད་ཀྱི་སྐད་ཆ་དེར་གྲོས་ཚོགས་ནང་གླེང་སློང་བྱ་རིན་མེད་པའི་གསལ་བཤད་གནང་ཡོད། དཔལ་ལྡན་ཚོགས་གཙོ་མཆོག་ནས་གཟི་བརྗིད་དང་ལྡན་པའི་ཐུགས་ཐག་དེ་བཅད་མཚམས། བསྐྱར་དུ་བཀའ་བློན་རྣམ་པ་དང་སྤྱི་འཐུས་ཚོས་དགག་ལན་གནང་དགོས་མ་མཆིས་ཏེ། རྒྱུ་མཚན་ནི་ཁྱོད་ཀྱི་སྐད་ཆ་དེར་གྲོས་ཚོགས་ནང་བགྲོ་གླེང་བྱ་རིན་མེད་པ་ཚོགས་གཙོ་མཆོག་ནས་གསལ་བཤད་གནང་གྲུབ་པ་རེད། དེར་བརྟེན་གྲོས་ལ་མ་ཚུད་པ་ཞིག་ལ་གྲོས་ཚོགས་ནང་དགག་ལན་རྒྱག་ས་མེད་པ་ཁྱོད་ཀྱིས་གསལ་པོར་ཤེས་ངེས་ཡིན། ཁྱོད་རང་ད་བར་ཐབས་ཤེས་དང་བརྒྱུད་ལམ་སྣ་ཚོགས་ཐོག་ནས་སྤྱི་འཐུས་ཡུན་རིང་བྱས་པས་གནས་ཚུལ་ཕྲན་ཚེགས་འདི་ཙམ་ཞིག་ལྟ་ལོས་ཤེས། འོན་ཀྱང་གལ་པོ་ཆེ་ལ་ནན་ཏན་དང་། དམ་པའི་ཆོས་ལ་བརྒྱ་ཚར་ཞེས་པའི་དཔེ་བཞིན། ཕྱི་ཉིན་དཔལ་ལྡན་སྲིད་སྐྱོང་མཆོག་གིས་གནད་དོན་དེ་གལ་ཆེར་བརྩིས་ནས་“བཀུར་འོས་སྤྱི་འཐུས་གཅིག་གིས་ྋགོང་ས་མཆོག་གི་ཞལ་ནས་དབུ་མའི་ལམ་གསུངས་ཀྱི་ཡོད་ནའང༌། ཐུགས་ལ་རང་བཙན་གྱི་དགོངས་པ་ཡོད་པའི་ཚོད་དཔག་གཅིག་གནང་སོང༌། ཚོད་དཔག་གནང་བ་དེ་གཞི་རྩ་ཡོད་པ་མ་རེད་ཅེས་ཞུ་རྒྱུ་ཡིན། གང་ཡིན་ཞེ་ན། ྋགོང་ས་མཆོག་གི་དགོངས་པ་དེ་ཞལ་ཞེ་གཉིས་མེད། སྔ་ཕྱི་བར་གསུམ་ལ་གསལ་པོ་བཀའ་གནང་བསྒྲུབས་པ་རེད། དེ་འདྲ་གསུངས་ཡོང་དུས་ྋགོང་ས་མཆོག་གི་ཐུགས་ལ་གཅིག་ཡོད་པ་དང༌། ཞལ་ནས་གཅིག་གསུངས་པ་རེད་ཟེར་བ་དེ་གཞི་རྩ་མེད་པ་རེད་ཞུ་རྒྱུ་ཡིན།”ཞེས་བཀའ་ཤག་གིས་གསལ་འདེབས་གནང་ཡོད།
ཡང། “དེ་བཞིན་གྲོས་ཚོགས་ཀྱི་ལས་དོན་རྡ་སར་གཟུགས་མཐོང་རླུང་འཕྲིན་ཐོག་ཐད་བཏོང་དང༌། བསྐྱར་སྟོན་ཡང་གནང་ཡོད་པས་དེ་སྐབས་མང་ཚོགས་ནས་ཀྱང་བསམ་ཚུལ་སྣེ་གཅིག་ཞུ་མཁན་བྱུང་མེད། “ ཅེས་པར། གྲོས་ཚོགས་དེ་རང་དུ་དཔལ་ལྡན་ཚོགས་གཙོ་སྦྲེལ་པོ་མཆོག་ནས་ཁྱོད་ཀྱི་སྐད་ཆར་གཞི་རྩ་མེད་པའི་ལམ་སྟོན་ཡོངས་ཁྱབ་གནང་བར། བོད་མི་སེམས་ཡོད་ཕལ་ཆེར་ལ་དེ་མ་ཉིད་དུ་ངེས་ཤེས་རྙེད་ཡོད་པས། ཡང་འགྲེལ་དང་བསྐྱར་འགྲེལ་བྱེད་པ་ངལ་བའི་རྒྱུ་ཡིན་མོད། བདེན་རྫུན་དཀར་ནག་དབྱེ་འབྱེད་བྱེད་མཁན་གྱི་སྐྱེ་བོ་གཏན་ཚིགས་པ་མང་པོས་ཁྱོད་ལ་དགག་པའི་སྟ་རེ་ཡང་ཡང་འཆར་བ་དེ་དག་ཁྱོད་ཀྱིས་མ་ཤེས་པའི་ཁུལ་དུ་བརྫུས་པ་ནི་བཞད་གད་ཀྱི་ཡུལ་ལགས། གཞན་ཡང་ཕྱི་ལོ་ ༢༠༡༣ ཕྱི་ཟླ་ ༤ ཚེས་ ༨ ཉིན་དགའ་ལྡན་ཕོ་བྲང་ཡིག་ཚང་ནས། “༸གོང་ས་མཆོག་གི་བཞེད་དགོངས་ངོ་མ་གང་ཡིན་ཆེས་གསལ་བ་ཞིག་ནི་༸གོང་ས་མཆོག་གི་བཀའ་རྩོམ་དགའ་གདོང་འཕྲིན་བསྐུལ་དུ་“མཉེས་གཤིན་བྱམས་བརྩེས་འགྲོགས་ཐབས་འཚེ་མེད་ལམ།། མཐའ་གཉིས་སྤངས་པ་གཉིས་སྨན་དབུ་མའི་ལམ།། འཇིགས་རུང་དྲག་མཚོན་མ་མཆིས་ཞི་བདེའི་ཡུལ།། བསྐྲུན་པའི་ཐབས་ཚུལ་འགྲུབ་པའི་མཐུ་དཔུང་སྐྱེད།།”ཅེས་གསུངས་ཡོད་ཅིང་། འདི་ལས་གསུང་རྩོམ་གཞན་གྱི་དགོངས་དོན་ཡང་དཔོག་ནུས་པ་ལགས་ན། དྲང་བདེན་ལ་ཡིད་ཆེས་ཡོད་པའི་ཕྱི་ནང་མང་ཚོགས་རྣམས་ཀྱིས་གོ་ནོར་མ་ཐེབས་པ་གནང་གལ་ཆེ།” ཞེས་གསུངས་པའི་ཡོངས་ཁྱབ་གསལ་བསྒྲགས་ཤིག་སྤེལ་བ་དེ་ཁྱོད་ཀྱི་གསལ་བཤད་ནང་ཟུར་ཙམ་ཡང་བཀོད་མ་ནུས་པར་འཇོག་པ་ནི་ཨ་སྡུག་ནང་གི་ཐབས་སྡུག་རང་རེད།
གཞན་ཡང། “དེར་བརྟེན་དེང་གི་འགྲོ་ལུགས་ལྟར་ན་བོད་ཕྲུག་དེར་ཕྲན་ནས་ཨ་སྒོར་ཐེར་འབུམ་གཅིག་གུན་གསབ་དགོས་པའི་ཁྲིམས་ཐོག་ཁ་མཆུ་འཛུགས་རྒྱུའི་གདེང་ཚོད་ཡང་ཡོད།“ ཅེས་པར། ཁྱོད་ཀྱིས་རང་ཉིད་ལ་དབང་ཆ་དང་གོ་ཐོབ་ཡོད་མདོག་གིས་ཉམས་ཆུང་སློབ་ཕྲུག་ཅིག་ལ་རྫིག་རྫིག་བྱེད་པ་ནི་ཅོལ་ཆུང་རང་རེད། ཨ་སྒོར་ཐེར་འབུམ་གཅིག་གུན་གསབ་དགོས་པའི་ཁྲིམས་ཐོག་ཁ་མཆུ་འཛུགས་རྒྱུའི་གདེང་ཚོད་ཡོད་ན་ད་བར་ཁ་མཆུ་མ་འཛུགས་པ་གང་ཡིན། གལ་ཏེ་ཁོ་བོ་སློབ་ཕྲུག་དེ་ཡིན་ན་ངས་ཁྱོད་རང་ཁྲིམས་ཁང་ལ་བསྐྱལ་ཏེ་ཨ་སྒོར་ཐེར་འབུམ་གཅིག་དགོས་པའི་ཁ་མཆུ་འཛུགས་རྒྱུའི་གདེང་ཚོད་ཡོད། གང་ཡིན་ཞེ་ན་ཁྱོད་ཀྱིས་རྫུན་བཤད་པ་དང་ཁོ་བོས་བདེན་པ་རྩོད་ཀྱིན་ཡོད། གཅིག་ནས་སློབ་ཕྲུག་དེས་ཁྱོད་ཀྱི་མིང་འདོན་བྱས་མེད་པས། “བཀུར་འོས་སྤྱི་འཐུས་ཤིག་“ཟེར་བ་དེ་ཁྱེད་རང་ཡིན་པ་ཇི་ལྟར་བསྒྲུབ་ནུས་སམ། གལ་ཏེ་སྤྱི་འཐུས་དེ་ཁྱེད་རང་ཡིན་པར་བསྒྲུབས་ན། “ྋསྐུ་མདུན་གྱི་དགོངས་པའི་ནང་དུ་རང་དབང་རང་བཙན་རེད་བསམ་པ་དེ་ཡོད།” ཟེར་མཁན་གྱི་སྤྱི་འཐུས་དེ་ཁྱེད་རང་ཡིན་པར་བསྒྲུབས་པ་མ་རེད་དམ། ཡང། “བོད་ཕྲུག་དེས་གོ་བ་ལོག་གྲུབ་ཀྱིས་ྋགོང་ས་མཆོག་ནས་ལམ་དབུ་མ་གསུངས་བཞིན་ཡང་ཐུགས་ནང་རང་བཙན་ཡོད་ལུགས་ཞུས་པ་དེ་དག་ཕྲན་ནས་སྔ་ཕྱིར་གྲོས་ཚོགས་སུ་ཞུས་པའི་གཏམ་བཤད་ནང་གཏན་ནས་བརྗོད་མེད།“ ཅེས་ཤོད་ཀྱིན་ཡོད་པས། གནད་དོན་གྱི་སྔ་ཕྱི་ནང་འགལ་ཏག་ཏག་འགྲོ་བ་ཁྱོད་ཀྱིས་མི་ཤེས་སམ། དོན་དངོས་སུ་ཁྱོད་ཀྱིས་དེ་ལྟར་བཤད་སྐབས་ཀྱི་གྲོས་ཚོགས་ཀྱི་མི་རྣམས་ད་ལྟ་བཞུགས་ཡོད་པ་དང་། ཁྱོད་ཀྱིས་དེ་ལྟར་བཤད་པའི་དཔང་རྟགས་བརྙན་འཕྲིན་ཡོད། དགའ་ལྡན་ཕོ་བྲང་ཡིག་ཚང་དང་བཀའ་ཤག་གིས་གསལ་བཤད་གནང་བའི་ཡིག་ཆའི་དཔང་རྟགས་ཆ་ཚང་ཁོ་བའི་ལག་ཏུ་ཡོད་པས། དེང་གི་འགྲོ་ལུགས་ཡིན་ནའང་འདྲ། སྔར་གྱི་འགྲོ་ལུགས་ཡིན་ནའང་འདྲ། བདེན་པ་སུ་ལ་ཡོད་ན་དེ་ལ་རྒྱལ་ཁ་ཡོད་པས། ཁ་མཆུའི་སྐོར་བཤད་དུས་ཁྱོད་སྔངས་འདར་མི་ཤོར་བ་ཡ་མཚན། མ་གཞི་ཁོ་བོ་ཁྱོད་ལྟར་ཨ་སྒོར་ལ་དེ་འདྲའི་དགའ་མཁན་ཞིག་མིན་མོད། ཁྲིམས་ས་གང་དུའང་གདེང་ཚོད་ངང་འགྲོ་བའི་སྤོབས་པ་ཡོད།
ཡང་“ཕྲན་གང་ཟག་ཕལ་པ་ཞིག་ནས་ྋརྒྱལ་བ་ཐམས་ཅད་མཁྱེན་པའི་དགོངས་པར་ཚོད་དཔག་ནམ་ཡང་ཞུ་མི་སྲིད།” ཟེར་བར། གཅིག་ནས་ཁྱོད་ཀྱིས་རང་ལས་ལྷག་པ་མེད་བསམ་པ་དང་། རང་གི་ལྟ་བ་དེ་ཁོ་ན་འགྲིག་ཡོད་བསམ་པ་དེ་ང་རྒྱལ་རེད། གཉིས་ནས་སངས་རྒྱས་ལ་ཀ་ཁ་བསླབ་འདོད་པ་དང། ༸གོང་ས་མཆོག་ལ་འགྲན་འདོད་པ་དེ་ཞེ་སྡང་རེད། གསུམ་ནས་༸གོང་ས་མཆོག་གིས་ལམ་ལེགས་པར་བསྟན་ཡང་ཁྱོད་ཀྱིས་གོ་ཤེས་ཉན་ཤེས་ཁྱོན་ནས་མེད་པར་ཨུ་ཚུགས་ཀྱི་མཐའ་ལ་བུད་པ་དེ་གཏི་མུག་རེད། དེར་བརྟེན་ཉོན་མོངས་དུག་གསུམ་གྱིས་ཚོས་པའི་གང་ཟག་ཅིག་གིས་༸རྒྱལ་བ་ཐམས་ཅད་མཁྱེན་པའི་དགོངས་པར་ཚོད་དཔག་ཞུ་བསམ་ན་ལྟས་ངན་རེད། དེ་ལྟར་ཨུ་ཚུགས་ཀྱིས་ཞུ་བའི་དམ་བཅའ་བླངས་ན་ལོག་རྟོག་རེད།
ཡང་“འོན་ཀྱང་ྋསྙན་སེང་སྒྲོན་སྟངས་ནས་ྋགོང་ས་མཆོག་ལ་མི་ལེགས་པའི་དགོངས་ཚུལ་ཞིག་བྱུང་ཡོད་གཤིས་དེར་གུས་ནས་ལྷ་དགོངས་དྭངས་བར་གུས་ཕྱག་དང་བཅས་དགོངས་སེལ་ཞུ་རྒྱུ་ཡིན།” སྐད་ཆ་འདི་ནི་ཁོ་པའི་གསལ་བཤད་ནང་གི་ཧམ་བསྙོན་ཆེ་ཤོས་དེ་རེད། ཁྭ་ཏས་མི་གཙང་ཟོས་པའི་མཆུ། ། ས་གཙང་གཞན་ལ་འབད་ནས་འཕྱིད། ། ཟེར་བ་ལྟར། ༸གོང་ས་༸སྐྱབས་མགོན་ཆེན་པོ་མཆོག་ལ་སྙན་གསེང་སྒྲོན་མཁན་གྱིས་གནས་ཚུལ་རྫུན་བཟོ་བྱས་ནས། ཁོ་པར་མ་ཉེས་ཁག་གཡོགས་བྱས་བྱུང་ཞེས། རང་སྐྱོན་གཞན་ལ་འགེལ་ཐབས་བྱེད་པ་ནི་ཐ་ཤལ་གྱི་བྱ་ཐབས་འབའ་ཞིག་རེད།
གཞན་ཡང། “དགོངས་ཚུལ་འབྱུང་གཞིའི་གནད་དོན་དེ་དག་གུས་ནས་བརྗོད་པ་རྩ་བ་ནས་མེད་ཐད་རིང་མིན་ྋགོང་ས་མཆོག་ལ་ྋམཚན་འཁོད་ྋསྙན་ཞུ་ཞིག་འབུལ་རྒྱུ་ཡིན།“ ཟེར་བ་དང། “དགོངས་སེལ་ཞུ་རྟེན་དུ་ཕྲན་ནས་ད་ཕན་གནད་དོན་དེ་ཐོག་བསམ་ཚུལ་བརྗོད་རིགས་ཡོངས་རྫོགས་ཕྱིར་འཐེན་ཞུ་རྒྱུ་དང༌། སླད་མར་དེ་སྐོར་གླེང་སློང་ནམ་ཡང་བྱ་རྒྱུ་མིན།“ ཟེར་བར། གཅིག་ནས་གནད་དོན་དེ་དག་ཁྱོད་ནས་བརྗོད་པ་རྩ་བ་ནས་མེད་ཟེར་བ་དང་། ཡང་ཕྱོགས་གཞན་ནས་ད་ཕན་གནད་དོན་དེ་ཐོག་བསམ་ཚུལ་བརྗོད་རིགས་ཡོངས་རྫོགས་ཕྱིར་འཐེན་བྱ་རྒྱུ་ཟེར་བར། ཡང་སྙིང་ཁྱོད་ཀྱི་ཞེ་འདོད་ངོ་མ་གང་ཡིན་ཆ་མ་འཚལ། གང་ལྟར་ཡང་གནད་དོན་དེ་དག་ཐད་གོང་དུ་གསལ་བཤད་ངེས་འདྲོངས་བྱས་ཡོད་པས། བསྐྱར་དུ་༸གོང་ས་མཆོག་སྙན་སུན་ཞུ་སེམས་ཡེ་ནས་མ་བཅངས་པ་དགོས་རྒྱུ་དང་། ལྷག་པར་ཁྱོད་རང་སྤྱི་འཐུས་ཤིག་གི་མིང་འཁུར་ཡོད་པས། འཕྲལ་ཕུགས་ཀུན་ལ་གནོད་གཞིའི་ལས་ངན་འདི་རིགས་སྤེལ་མཚམས་འཇོག་རོགས། ཁྱོད་ཀྱིས་བོད་མི་མང་སྤྱི་འཐུས་གྲོས་ཚོགས་ཀྱི་སྡིངས་ཆ་བེད་སྤྱད་དེ་གོང་གསལ་གླེང་ཕྱོགས་བཟོས་ཡོད་པས། གནད་དོན་འདི་ཕྱིར་བསྡུ་བྱ་ས་དང་སླད་མར་གླེང་སློང་མི་བྱ་བའི་ཁས་ལེན་བྱ་ས་ཡང་གྲོས་ཚོགས་ཀྱི་སྡིངས་ཆ་འདི་རང་ཡིན་དགོས། སྐབས་བཅོ་ལྔ་པའི་བོད་མི་མང་སྤྱི་འཐུས་གྲོས་ཚོགས་ཚོགས་དུས་དྲུག་པ་འཚོགས་གྲབས་ཡོད་པས། རང་བློ་རང་གིས་མ་རྟོགས་ན། ། རང་སྐྱོན་རང་གིས་མཐོང་བར་དཀའ། ། ཞེས་པ་ལྟར། ཁྱོད་ཀྱིས་ཤེས་པ་ནང་དུ་བསྡུས་ནས་རང་ཉིད་ཀྱི་མཐའ་མའི་གདམ་ག་དེ་བྱ་རྒྱུའི་དུས་ལ་སླེབས་ཡོད་དོ། །
ཞོར་གླེང།
ཕྱི་ལོ་ ༢༠༡༣ ཟླ་ ༩ ཚེས་ ༦ ཉིན་ཀརྨ་ཆོས་འཕེལ་གྱིས་གསལ་བཤད་དེ་སྤེལ་རྗེས། བཙན་བྱོལ་སྤྱི་ཚོགས་ནང་དྲང་ལྡོག་གཉིས་ཀྱི་ཐད་ནས་གླེང་སློང་གང་འཚམས་ཤིག་བྱས་ཡོད། གནད་དོན་དེ་དག་ནང་ནས་ཆེས་ཉེས་འཛོལ་ཆེ་བ་ནི། དབུ་མའི་ལམ་༸གོང་ས་མཆོག་གི་དགོངས་གཞི་ཡིན་པ་དང་། ཀརྨ་ཆོས་འཕེལ་གྱིས་རང་བཙན་གླེང་ནས་༸གོང་ས་མཆོག་ཐུགས་ཕམ་བྱུང་བ་རེད། ཅེས་པ་འདི་རེད། དངོས་ཡོད་གནས་ཚུལ་ལ། དབུ་མའི་ལམ་ནི་༸གོང་ས་མཆོག་གི་དགོངས་གཞི་ཙམ་མ་ཟད། དེ་ནི་བཙན་བྱོལ་བོད་མི་ཕལ་ཆེར་གྱིས་གདམ་ག་བྱས་པའི་ཆབ་སྲིད་ཀྱི་ལམ་ལུགས་ཤིག་དང་། གྲོས་ཚོགས་ཀྱིས་གཏན་ལ་ཕབ་པའི་སྲིད་བྱུས་ཤིག་རེད། སྲིད་བྱུས་འདིའི་གཏན་འབེབས་ཀྱི་ལས་དོན་ནང་དངོས་སུ་ཞུགས་མྱོང་བའི་གང་ཟག་ཅིག་གིས་ཧམ་བཤད་ཀྱིས། རང་སྒེར་གྱི་འདོད་ཚུལ་རང་བཙན་ཡིན་པ་དང་། དེ་ཡང་དག་པར་ཡིན་པའི་བསྒྲུབ་བྱེད་དུ་༸གོང་ས་མཆོག་གི་གསུང་ཡར་འཐེན་མར་འཐེན་གྱིས་ལུང་འདྲེན་བྱས་ཡོད། ཁོ་པའི་བྱ་ཐབས་འདི་༸གོང་ས་མཆོག་ཐུགས་ཕམ་ཡོང་གཞི་ཙམ་མ་ཟད། རྒྱ་ཆེའི་མང་ཚོགས་ལ་མགོ་སྐོར་གཏོང་བའི་བྱ་ཐབས་ཤིག་ཡིན་པས། བོད་མི་ཚོས་དངོས་ཡོད་གནས་ཚུལ་ལ་རྒྱུས་ལོན་དགོས་རྒྱུ་དང་། འབྲེལ་ཡོད་བཀའ་བརྒྱུད་མི་མང་ཚོས་ཀྱང་ངེས་པར་དུ་གསལ་བཤད་ཅིག་མ་གནང་བར་དེ་མུར་ཅམ་གྱིས་འཇོག་ཚེ། ལོ་རྒྱུས་ཀྱི་གནད་དོན་ལ་དཀར་ནག་གོ་ཟློག་གི་ལྷད་ཞུགས་ངེས།
གཞན་ཡང་། ཀརྨ་ཆོས་འཕེལ་གྱི་ལོག་བཤད་དང་འགྲེལ་བ་མེད་ཀྱང་འདིར་སྐབས་བབ་ཀྱི་གནད་དོན་གཞན་ཞིག་གླེང་ན། ཕྱི་ལོ་ ༢༠༡༣ ཟླ་ ༩ པའི་ཚེས་ ༢ ཉིན་སྲི་ཞུའི་ལས་བྱེད་ལ་བཀའ་སློབ་ཕེབས་སྐབས། ལྷ་བཟང་ཚེ་རིང་དང་། འཇམ་དབྱངས་ནོར་བུ། དོན་གྲུབ་ལྷ་དར། ཀརྨ་རྒྱ་མཚོ་བཅས་ཀྱི་མིང་འདོན་གནང་འདུག ལྷ་བཟང་ཚེ་རིང་དང་འཇམ་དབྱངས་ནོར་བུས་འཆར་སྣང་ཁྲོད་བོད་རང་བཙན་གླེང་བ་ཙམ་ལས། བོད་དོན་བདེན་མཐའ་སེལ་ཐབས་ཐོག་ཕན་འབྲས་སོན་པའི་བྱ་བ་སྣ་གཅིག་བསྒྲུབས་མེད་པ་དང་། དེ་ལས་ཟློག་སྟེ་དབུ་མའི་ལམ་ནི་༸གོང་ས་མཆོག་གི་དགོངས་གཞི་ཙམ་ལ་ངོས་འཛིན་པ་ལས། དེ་ནི་བོད་མི་མང་གི་མངོན་འདོད་དང་གྲོས་ཚོགས་ཀྱིས་ཁྲིམས་སུ་བཅས་པའི་སྲིད་བྱུས་ཤིག་ཡིན་པའི་དངོས་ཡོད་གནས་ཚུལ་ལ་བསྙོན་འཛུགས་བྱས་པ་དང་། དོན་གྲུབ་ལྷ་དར་དང་ཀརྨ་རྒྱ་མཚོས་༸གོང་ས་མཆོག་ནས་མི་མང་གིས་འོས་འདེམས་བྱས་པའི་དབུ་ཁྲིད་ལ་སྲིད་དབང་རྩིས་སྤྲོད་གནང་ནས། དགའ་ལྡན་ཕོ་བྲང་གིས་སྲིད་དབང་བསྐྱང་རྒྱུའི་མཚམས་བཞག་གནང་མཛད་སྐབས། “རྒྱལ་བ་རིན་པོ་ཆེས་བོད་གཞུང་བསྡུ་གསོག་བརྒྱབས་སོང་།“ ཟེར་བ་སོགས། ༸གོང་ས་མཆོག་ལ་གཞི་མེད་བསྙོན་འཛུགས་བྱས་པར་བརྟེན་གོང་གསལ་གནད་དོན་བྱུང་བར་སེམས།
རང་བཙན་ལ་ཁས་ཆེ་བ་འདི་དག་ཕལ་ཆེ་བ། རང་ཉིད་ཀྱི་ལྟོ་གོས་ལ་སེམས་ཁྲལ་མེད་པ་དང་། རང་གི་བུ་ཕྲུག་དང་ཁྱིམ་གཞིས་ཕྱི་རྒྱལ་དུ་རྟེན་གཞི་བྱས་པ། རང་ཉིད་ལ་རྒྱལ་ཁབ་གཞན་གྱི་མི་སེར་ལག་ཁྱེར་ཡོད་པ་སོགས་ལ་བརྟེན། བོད་དོན་བདེན་མཐའ་སེལ་ཐབས་ལ་དུས་ཡུན་ག་ཚོད་འགོར་ཡང་ཁྱད་པར་གཏན་ནས་མེད་པས། ཁོང་ཚོས་རང་བཙན་གྱི་ཁ་གཡང་སྒྲོག་པར་སྔ་ཕྱིའི་བསམ་བློ་གང་ཡང་གཏོང་དགོས་མེད། གལ་ཏེ་འབྱུང་འགྱུར་ལོ་ ༣༠༠ འམ་ ༤༠༠ ནང་བོད་རང་བཙན་མ་ཐོབ་ཀྱང་ཁོང་ཚོའི་བུ་ཕྲུག་ལ་དཀའ་ངལ་མི་འཕྲད་པ་སྔོན་དཔག་ཐུབ་ཡོད། འོན་ཀྱང་བོད་ནང་གི་གཞིས་ལུས་རྒྱ་ཆེ་མི་མང་དང་། བཙན་བྱོལ་དུ་སུད་འཚོང་གི་འཚོ་བའི་ལས་ལ་བརྟེན་པའི་ཉམས་ཆུང་གཞིས་ཆགས་མི་མང་འདི་དག་གི་འཕྲལ་ཕུགས་ལ་བསམ་ཚེ། ང་ཚོས་དངོས་ཡོད་གནས་ཚུལ་དང་མཐུན་པའི་ལམ་ཞིག་འདེམས་དགོས་པ་ལས། སྣང་བ་སྐྱིད་པོའི་ཁ་གཡང་སྒྲོག་དུས་ཤིག་ག་ལ་ཡིན། ལྷག་པར་དུ་༸གོང་ས་མཆོག་སྐུ་འཚོ་བཞུགས་མེད་པའི་དུས་སྐབས་ཤིག་ཤར་ཚེ། བོད་ཀྱི་བདེན་མཐའ་ཟེར་བ་དང་བོད་མི་རིགས་ཀྱི་མངོན་འདོད་ཟེར་བའི་གནས་སྟངས་གང་འདྲ་ཞིག་ལ་སླེབས་མིན་ང་ཚོས་ཚོད་དཔག་བྱེད་ཐུབ་པ་ཞིག་རེད། ཕྱི་ཟླ་ ༩ པའི་ཚེས་ ༢ ཉིན་སྲི་ཞུ་བར་བཀའ་སློབ་ཕེབས་སྐབས། ༸གོང་ས་མཆོག་དགོངས་ལོ་ ༩༠ ལྷག་ཀྱང་ཞུགས་མིན་དང་། བོད་པར་མཇལ་ཁ་གནང་བ་ལས་ཨིན་ཇི་དང་ལ་དྭགས་པ་སོགས་ལ་མཇལ་ཁ་གནང་ན་ལེགས་པོ་ཡོད་ཚུལ་སོགས། ང་རང་ཚོའི་དམ་ཚིག་རྩད་ནས་ཉམས་པའི་བཀའ་སློབ་ཕེམས་དོན་ལ་བསམ་གཞིགས་ནན་ཏན་ཞིག་མ་བྱས་ཚེ། ནམ་ཞིག་འགྱོད་པའི་གླིང་ལ་སྐྱེལ་དུས་འཕྱིས་དྲགས་པ་རེད།
དེར་བརྟེན་ང་ཚོས་ཤེས་པ་རྣལ་དུ་ཕབ་ནས་བདེན་རྫུན་ལ་དབྱེ་འབྱེད་དང་། གཞིས་ལུས་རྒྱ་ཆེའི་མི་མང་གི་བཀའ་སྡུག་ལ་སེམས་འཁུར། བོད་མི་རིགས་ཀྱི་འཕྲལ་ཕུགས་ཀྱི་ཁེ་ཕན་ལ་བསམ་གཞིགས་བཅས་བྱས་ཏེ། ༸གོང་ས་མཆོག་སྐུ་འཚོ་བཞུགས་འདི་རང་དུ་རང་ཡུལ་དུ་ཕྱིར་ལོག་བྱེད་པའི་ཐབས་ལ་འབད་དགོས་ཤིན་ཏུ་ནས་གལ་ཆེའོ། །
༼དུས་བབ་ཚང་གི་མང་གཙོ་འགན་འཁུར་གཙོ་བོ་བྱེད་མདོག་མདོག་གི་ངས་མཆན་མི་འགོད་པ་ཅི་ཡིན་ནམ།༽
ཞང་བློན་ལགས་ཀྱིས་དངོས་གནས་གནད་ལ་ཁེལ་བ། ཁ་གསལ་བ་དང་གོ་བདེ་བ། དག་ཡིག་དང་བརྗོད་བྱ་སོགས་གང་སྤྱིའི་ཐད་ནས་དུས་ཚོད་བཏང་གོ་ཆོད་པས་རྩོམ་ཞིག་སྤེལ་འདུག་པས་དགའ་བསུ་དང་ཡིད་རང་ཞུ། ངས་ཚོད་དཔག་བྱས་ན་ཁྱེད་ནི་ཡང་ན་སྲི་ཞུ་བ་རྙིང་པ་ཞིག་རེད་དེ་མིན་ན་གསར་འབྱོར་བ་རྙིང་བ་ཞིག་ཏན་ཏན་རེད། མ་གཞི་ནས་རྩོམ་སྤུས་དག་དེ་འདྲར་བདག་པོ་མེད་པར་སྨྱུག་མིང་འོག་གབ་དགོས་བྱུང་བ་དངོས་ནས་སེམས་སྐྱོ་དགོས་པའི་གནས་ཚུལ་ཞིག་རེད། གཅིག་བྱས་ན་བཙན་བྱོལ་སྤྱི་ཚོགས་ཀྱི་སྨྲ་བརྗོད་རང་དབང་ལ་འགན་འཁུར་བ་ཚོར་སྨྲ་བརྗོད་ཀྱི་ཁོར་ཡུག་སྤུས་ཚད་དང་མི་མང་གི་ཤེས་ཚད་ཡང་དེ་ནས་གསལ་སྟོན་ཐུབ། བརྗོད་དོན་གཙོ་བོ་ནི་རེ་ཞིག་ངས་བསམ་གནོ་བཏང་སྐབས་ཉིད་ནས་ལོ་རྒྱུས་ཀྱི་གནད་དོན་གསེལ་འགྲེལ་བདེན་རྒྱབ་བདེན་གནོན་བྱེད་སྟངས་དེ་གངས་རིས་ཁ་ཕྱོགས་གཅིག་རང་ནས་གཅེར་བལྟས་བྱས་ནས་སྐད་བརྒྱབ་པ་ལྟ་བུ་ཞིག་ཏུ་མཐོང་སོང་།།
ཁྱེད་ཀྱིས་གླེང་པའི་གནད་དོན་དེར་ང་ཕྱོགས་ལུས་ནས་བལྟས་ན། དབུ་མ་ནི་༸གོང་ས་མཆོག་གིས་སྟོན་གནང་མཛད་པའི་སྲིད་བྱུས་ཤིག་ཡིན་ལ་༸སྐུ་མདུན་ནས་ཀྱང་རང་ཉིད་འཚོ་བཞུགས་རིང་ལ་དབུ་མའི་ལམ་གྱི་སྲིད་བྱུས་ལ་འགྱུར་བ་མེད་ཅེས་བཀའ་སློབ་དུ་མ་ཕེབས་ཡོད། བོད་མིའི་ནང་༸གོང་ས་མཆོག་ལ་དད་མོས་ཇི་ཙམ་ཡོད་པ་ནི་ཚང་མས་མཁྱེན་གསལ་རེད། ཤེས་ནས་དད་པ་ཐོབ་མཁན་ཡོད་ལ་ཆོས་ལུགས་ཀྱིས་རྨོངས་པས་དད་པ་འཐོབ་པ་ཡང་ཡོད། དེ་འདྲའི་གནས་སྟངས་ཤིག་གི་འོག་ཤུགས་ནས་གཞུང་ཕྱོགས་ཀྱི་སྲིད་བྱུས་ལ་འགྱུར་བ་ཞིག་བཏང་དགོས་ཚེ་༸གོང་ས་མཆོག་དགོངས་གཞི་ལ་རང་བཞིན་མ་བསྟུན་རང་བསྟུན་ཞིག་ཆགས་ཡོད། གནས་སྟངས་དེ་འདྲའི་དབང་གི་ཀརྨ་ཆོས་འཕེལ་ལགས་ཀྱིས་༸གོང་ས་མཆོག་གི་ཐུགས་ཕུགས་སུ་རང་བཙན་གྱི་འདོད་པ་ཞིག་མེད་དམ་མཉམ་པའི་ཚོད་དཔག་དེ་བྱས་པ་མིན་ནམ་བསམ། །
ཁོང་གིས་ལུས་འདྲེན་པའི་འཕྲིན་སྐུལ་དེ་དག་སྔོན་མ་གཞུང་གི་སྲིད་བྱུས་རང་བཙན་ཡིན་པའི་སྐབས་མཛད་པའི་འཕྲིན་སྐུལ་རྐྱང་ཡིན་དུས། ཡང་ན་སྐབས་དེ་དུས་སྲུང་མ་དབུ་བསྐོར་བཏང་བ་མིན་འགྲོ མ་གཞི་སྐུ་སྒེར་ཡིག་ཚང་གི་ཡིག་ལན་ནང་སྲུང་མ་གཙོ་བྱེད་རྣམས་འཕྲིན་སྐུལ་ལུངས་འདྲེན་བྱེད་པ་དེ་ཚོར་འགྲེལ་བཤད་བརྒྱབ་རྒྱུའི་ཚབ་ཏུ་དགའ་གདོང་འཕྲིན་སྐུལ་གྱི་ཚིག་དབུ་མ་ཅན་གཅིག་པུ་དེ་འཁྱེར་ཡོང་དོན་གང་རེད། བོད་མིའི་ནང་གནས་ཆུང་ལས་དགའ་གདོང་གི་འཕྲིན་སྐུལ་ཤེས་མཁན་དང་འདོན་མཁན་ནི་ཉིན་མོའི་ནང་སྐར་མ་ལྟ་བུ་རེད་ལ་དེང་ཡས་དགའ་གདོང་ཁ་དྲག་གི་མེད་པ། བྱས་ཙང་འཕྲིན་སྐུལ་གྱི་ལུང་དེ་དག་འགྲེལ་བཤད་༸སྐྱབས་མགོན་རིན་པོ་ཆེ་རང་གིས་མ་གཏོགས་གཞན་སུས་ཀྱང་ཚིག་འགྲེལ་རྒྱབ་ནས་གསེལ་འགྲེལ་ཐུབ་ཐབས་མེད་པ་རེད།
ཁྱེད་ཀྱི་བོད་ཕྲུག་སྐོར་དེ་ལ་ངས་བསམ་གཞིགས་ཤིག་བྱས་ཡོད། ཁོས་བཀོས་པའི་དྲི་བ་སྔ་ཕྱི་གཉིས་ཀ་བང་སྒྲིག་ནས་འཆར་གཞི་དང་ལྡན་པ་ཞིག་མཐོང་སོང་། མ་གཞི་ནས་ས་གནས་ཀྱི་མིར་སྐད་ཆ་དྲིས་སྐབས་ཕྲུག་གུ་ཅང་ཡིན་བཟོ་མིན་འདུག ཝར་ན་སློབ་ཐོན་པ་ཞིག་རེད་བཞག་ལ་ཨ་ཆེ་དང་བུ་ཕྲུག་ཡང་འདུག སྤྱིར་ཨ་རིར་མི་རྒན་སློབ་ཕྲུག་ལོ་ན་བརྒྱ་བཅུ་གསོན་པ་ཡང་ཡོད་པས་བོད་ཕྲུག་ཅེས་པའི་ཕྲུ་གུའི་ཐ་སྙད་ལ་བསྙད་ནས་ཤེས་པ་བརྣལ་ལ་མ་ཁེལ་ཕྲུ་གུ་ན་མ་གསོན་པ་དེ་འདྲ་ཞིག་རེད་མིན་འདུག ཁོས་དྲི་བ་གཉིས་པ་དེར་གཅིག་ཉོན་དང་། ཆོས་ལུགས་སྤྱི་འཐུས་མི་སྐྱ་ཡོང་མི་ཆོག་པ་ག་རེ་ཡོད་རེད། བོད་ཀྱི་ཆོས་ལུགས་ཀྱི་བསྟན་བདག་ཚང་མ་སེར་མོག་ཞིག་མིན་པ་ཤེས་གསལ་རེད་པ། དེ་འདྲ་ཡིན་དུས་ཁོས་དྲི་བ་དེ་ཚོའི་འོག་ལ་བཀོད་བྱུས་བྱེད་མཁན་ཞིག་ཏན་ཏན་ཡོད་བཟོ་འདུག་ལ་ཡང་ན་ངན་བྱུས་ཤིག་རང་ངོས་ནས་མེད་འགྲོ་སྙམ་པ་བྱུང་།
དེ་མིན་གནད་དོན་མང་པོ་འདུག་པས་ཞུ་མཚམས་བྱེད། མ་གཞི་ནས་བོད་མི་ས་ཡ་དྲུག་གི་༸སྐྱབས་མགོན་རིན་པོ་ཆེར་དེ་ལྟར་དད་མོས་བྱེད་སྐབས་མི་ཕལ་བ་རྐང་པ་བཞིས་སྐད་ཆ་ཤོད་བཏང་གི་ཁོང་གི་སྐུ་ཚེར་གནོད་ཀྱི་འདུག་ཟེར་བའི་གཏམ་དེ་ཚོ་ང་ཚོ་བོད་པ་ནང་ཁུལ་གྱི་སྐད་ཆ་རེད་མ་གཏོགས་ཕྱི་ལ་བཤད་རྒྱུའི་སྐད་ཆ་ཞིག་མ་རེད། དེ་ཕྱིར་གཞུང་ཞབས་ཀྱི་བཀའ་སློབ་དེ་དག་ཕྱིར་བསྒྲགས་བྱས་མེད་ལ་ཁྱེད་ཀྱིས་ཀྱང་བྱེད་ཐབས་བྲལ་བས་གོང་གསལ་ལུང་འདྲེན་གྱི་ཚོམ་བུ་དེ་དག་ལ་དངོས་ཡོད་ཀྱི་བདེན་སྤངས་ཇི་ཙམ་ཡོད་མེད་ངལ་གསོ་རེད། སླད་ནས་ཚུར་རིའི་ཕྱོགས་ནས་ཀྱང་སྐབས་རེ་བལྟས་ན་བདེན་པ་མི་འདྲ་བ་ཡོད་སྲིད་པ་ཞིག་ཡིན་པས་ཉེ་ཆར་ཕྱི་རྒྱལ་གསུངས་ཆོས་སྐབས་སྐྱབས་མགོན་རིན་པོ་ཆེས་དེ་དོན་གྱི་གསུངས་དེ་དག་ལ་གསན་རྒྱུ་ཨེ་བྱུང་ཞང་བློན་ལགས།
་་་་་ ལྷག་པར་དུ་༸གོང་ས་མཆོག་སྐུ་འཚོ་བཞུགས་མེད་པའི་དུས་སྐབས་ཤིག་ཤར་ཚེ། བོད་ཀྱི་བདེན་མཐའ་ཟེར་བ་དང་བོད་མི་རིགས་ཀྱི་མངོན་འདོད་ཟེར་བའི་གནས་སྟངས་གང་འདྲ་ཞིག་ལ་སླེབས་མིན་ང་ཚོས་ཚོད་དཔག་བྱེད་ཐུབ་པ་ཞིག་རེད།
ཕྱི་ཟླ་ ༩ པའི་ཚེས་ ༢ ཉིན་སྲི་ཞུ་བར་བཀའ་སློབ་ཕེབས་སྐབས། ༸གོང་ས་མཆོག་དགོངས་ལོ་ ༩༠ ལྷག་ཀྱང་ཞུགས་མིན་དང་། བོད་པར་མཇལ་ཁ་གནང་བ་ལས་ཨིན་ཇི་དང་ལ་དྭགས་པ་སོགས་ལ་མཇལ་ཁ་གནང་ན་ལེགས་པོ་ཡོད་ཚུལ་སོགས།
ང་རང་ཚོའི་དམ་ཚིག་རྩད་ནས་ཉམས་པའི་བཀའ་སློབ་ཕེམས་དོན་ལ་བསམ་གཞིགས་ནན་ཏན་ཞིག་མ་བྱས་ཚེ། ནམ་ཞིག་འགྱོད་པའི་གླིང་ལ་སྐྱེལ་དུས་འཕྱིས་དྲགས་པ་རེད། ་་་་་ཟེར།
མཆན་བ་སུ་ཡིན་ཀྱང། བསམ་བློ་ཡག་པོ་བཏང་དེ་བཤད་ན། གཟུ་བོར་བཤད་དགོས་པས་དེ་ལ་བརྩོན་གནང་བྱེད་པར་རེ་བ་ཞུ།
ཀར་བཟི་བ་ན་རེ། ད་ལྟའི་བར་སྐྱབས་མགོན་མཆོག་གིས་དབང་བཟུང་ཡོད་པ་དང། ད་ཆ་དབང་འཛིན་ལས་ཡོངས་དུ་དགོངས་པ་ཞུས་ཟིན་སྟབས། རང་གི་སེམས་ཀྱི འདོད་པ་ངོ་མ་དེ་ཞུ་རྒྱུ་ཡིན་ཞེས་དང། སྐད་ལྟའི་གནས་སྐབས་འདིར་སྐྱབས་མགོན་རིན་པོ་ཆེའི་དགོངས་པའི་ནང་རང་བཙན་ལ་བསྙེགས་ཐབས་སུ་། ཕྱིའི་རྣམ་པར་དབུ་ལམ་ལ་བརྩོན་གནང་གི་ཡོད་པའི་སྒྲུབ་བྱེད་དུ་ལོང་དྲེང་བ་ཞིག་ཡིན་པ་གསལ་བོར་ཤེས་ཐུབ་དགོས་སོ།
འདི་གླེང་རིན་མི་འདུག གཡུག་ན་ཡག ཀར་ཆོས་ལ་རྙོག་གླེང་དགོས་པ་རེད། མ་གཞི་ནས་དབུ་མའི་ལམ་གྱི་ཡར་སྔོན་ཡིན་པས། ད་ལྟའི་དགོངས་གཞི་གང་ཡིན་མཚོན་ན་གང་ལ་འགྲིག
་་་་་་ གཞན་ཡང་། ཀརྨ་ཆོས་འཕེལ་གྱི་ལོག་བཤད་དང་འགྲེལ་བ་མེད་ཀྱང་འདིར་སྐབས་བབ་ཀྱི་གནད་དོན་གཞན་ཞིག་གླེང་ན། ཕྱི་ལོ་ ༢༠༡༣ ཟླ་ ༩ པའི་ཚེས་ ༢ ཉིན་སྲི་ཞུའི་ལས་བྱེད་ལ་བཀའ་སློབ་ཕེབས་སྐབས། ལྷ་བཟང་ཚེ་རིང་དང་། འཇམ་དབྱངས་ནོར་བུ། དོན་གྲུབ་ལྷ་དར། ཀརྨ་རྒྱ་མཚོ་བཅས་ཀྱི་མིང་འདོན་གནང་འདུག ལྷ་བཟང་ཚེ་རིང་དང་འཇམ་དབྱངས་ནོར་བུས་འཆར་སྣང་ཁྲོད་བོད་རང་བཙན་གླེང་བ་ཙམ་ལས། བོད་དོན་བདེན་མཐའ་སེལ་ཐབས་ཐོག་ཕན་འབྲས་སོན་པའི་བྱ་བ་སྣ་གཅིག་བསྒྲུབས་མེད་པ་དང་། དེ་ལས་ཟློག་སྟེ་དབུ་མའི་ལམ་ནི་༸གོང་ས་མཆོག་གི་དགོངས་གཞི་ཙམ་ལ་ངོས་འཛིན་པ་ལས། དེ་ནི་བོད་མི་མང་གི་མངོན་འདོད་དང་གྲོས་ཚོགས་ཀྱིས་ཁྲིམས་སུ་བཅས་པའི་སྲིད་བྱུས་ཤིག་ཡིན་པའི་དངོས་ཡོད་གནས་ཚུལ་ལ་བསྙོན་འཛུགས་བྱས་པ་དང་།
དོན་གྲུབ་ལྷ་དར་དང་ཀརྨ་རྒྱ་མཚོས་༸གོང་ས་མཆོག་ནས་མི་མང་གིས་འོས་འདེམས་བྱས་པའི་དབུ་ཁྲིད་ལ་སྲིད་དབང་རྩིས་སྤྲོད་གནང་ནས། དགའ་ལྡན་ཕོ་བྲང་གིས་སྲིད་དབང་བསྐྱང་རྒྱུའི་མཚམས་བཞག་གནང་མཛད་སྐབས། “རྒྱལ་བ་རིན་པོ་ཆེས་བོད་གཞུང་བསྡུ་གསོག་བརྒྱབས་སོང་།” ཟེར་བ་སོགས། ༸གོང་ས་མཆོག་ལ་གཞི་མེད་བསྙོན་འཛུགས་བྱས་པར་བརྟེན་གོང་གསལ་གནད་དོན་བྱུང་བར་སེམས། ་་་་་་་
ད་ལྟའི་བཤད་སྟངས་ལྟར་ན། ༡༩༧༤ལོའི་ཡར་སྔོན་གོང་ས་མཆོག་གི་ལངས་ཕྱོགས་རང་བཙན་ཡིན་པ་དང་། ཚོགས་ཟུར་ཀརྨ་ཆོས་འཕེལ་ལགས་ཀྱིས་དྲངས་པའི་རྩོམ་དེ་རིགས་ཀྱང་ལོ་རབས་དྲུག་ཅུ་དང་བདུན་ཅུའི་དུས་འགོར་སྤེལ་བ་ཞིག་ཡིན་པས། འགལ་བ་ཆེར་མེད་པར་སྣང་། གལ་སྲིད་དེ་ལས་ལྡོག་ན། དྲི་བ་མང་པོ་སྐེབས་ཀྱི་རེད། དཔེར་ན། སྟག་བྲག་རིན་པོ་ཆེ་ཡིས་གོང་ས་མཆོག་ལ་སྲིད་འགན་རྩིས་སྤྲོད་སྐབས། བོད་ནི་རྒྱ་ནག་གི་ཆ་ཤས་སུ་གྱུར་ཡོད་དམ་མེད། སྲིད་འགན་བཞེས་སྐབས། དབྱིན་གཞུང་སོགས་ཀྱི་སྐུ་ཚབ་ངོ་བཅར་བྱེད་དོན་ཅི།