སྐུ་ངོ་ལགས། བོད་ཡིག་ཅིག་སྦྱོངས་དང་།

ཨ་འདུས་མིག་ཆུ།

བསིལ་ལྡན་ས་ལའི་སྨན་ལྗོངས་ཆགས་ནས་ཅུང་མ་འགོར་བར་ང་ཚོའི་ཐོག་མའི་མེས་པོ་དག་བྱུང་ཞིང་། མེས་པོ་དག་གིས་དཀའ་སྤྱད་དང་སྡུག་རུས་ལ་བརྟེན་ནས་མི་རིགས་འདི་ལ་འཚོ་གནས་ཀྱི་གོ་སྐལ་བྱུང་བ་རེད་ལ། མ་ཟད་འདི་དག་གི་ངལ་ཞིང་རྩོལ་བའི་འཚོ་ཚིས་ཀྱི་སྐྱིད་སྡུག་ཁྲོད་ཕན་ཚུན་ལ་གོ་བརྡ་འཕྲོད་པའི་མ་སྐད་དེ་ཉིད་རྙེད་པ་ཡིན་པས། སྐུ་ངོ་ལགས། བོད་ཡིག་ཅིག་སྦྱོངས་དང་། 

མེས་པོ་སྲོང་བཙན་སྒམ་པོར་ཕྱོགས་བཞིའི་རྒྱལ་ཁམས་ལ་དཔུང་གིས་སྟོབས་བསྐྱེད་ཅིང་དགྲ་མགོ་ཟིལ་གྱིས་གནོན་པའི་གཟི་བརྗིད་ཡོད་ཀྱང་། མི་རིགས་ཤིག་ལ་རང་ཉིད་ཀྱི་བླ་སྲོག་མཚོན་པའི་སྐད་ཡིག་མེད་ན་ངོ་ཚའི་གནས་སམ་སྲིད་འབྱོར་རིག་གསུམ་ཡང་དག་ཅིག་སྐྱོང་མི་ཐུབ་པའི་དགོངས་པ་འཁྲུངས་པ་བཞིན་སྐབས་དེར་གསེར་གྱི་རྫོངས་པ་མང་པོ་དང་བཅས་སློབ་དཔོན་ཐོན་མི་སམ་བྷོ་ཊ་འཕགས་ཡུལ་དུ་ཡི་གེ་བསླབ་པར་བཏང་བ་ཡིན་པས། སྐུ་ངོ་ལགས། བོད་ཡིག་ཅིག་སྦྱོངས་དང་།

བློན་ཆེན་ཐོན་མིས་རྒྱལ་པོའི་བཀའ་གཙུགས་སྙིང་ལ་བཅངས་ཤིང་། མི་རིགས་ཀྱི་རྨོངས་པ་ཡོངས་སུ་བསལ་ཕྱིར་དཀའ་སྡུག་གི་ལོ་ཟླ་མང་པོ་བརྒྱུད་ཅིང་། འཚོ་ཚིས་ཀྱི་སྡུག་བསྔལ་གང་མང་མྱངས་ནས་ས་གནམ་ལས་ངོ་ཤེས་མེད་ས་ཞིག་ན། གཞན་གྱི་ཡི་གེ་བསླབས་ཤིང་རང་གི་རྣམ་དཔྱོད་སྤྱད་སྤྱད་མཐར། མི་རིགས་ཀྱི་བླ་སྲོག་དང་རིག་གནས་ཀྱི་གཞི་རྟེན་འདི་གསར་བཟོ་མཛད་པ་ཡིན་པས། སྐུ་ངོ་ལགས། བོད་ཡིག་ཅིག་སྦྱོངས་དང་།

ཆོས་རྒྱལ་ཁྲི་སྲོང་ལྡེའུ་བཙན་གྱིས་གཞན་གྱི་མཁས་པ་གདན་དྲངས་ཤིང་། རང་གི་མི་རིགས་ཀྱི་ཁྱེའུ་བློ་རྣོ་བ་དག་ལ་རང་གཞན་གྱི་སྐད་ཡིག་སྦྱངས་པའི་སྲོལ་བཙུགས་ཏེ། ༼ སྒྲ་སྒྱུར་ལོ་ཙཱ་གླིང་༽གསར་འཛུགས་ཀྱིས་མི་རིགས་འདི་ནམ་ཡང་གཞན་ལ་ངོ་གནོང་མི་དགོས་པའི་རིག་གནས་སྣ་མང་ཅན་ གྱི་རྒྱལ་ཁབ་ཅིག་གི་ངོ་བར་བསྐྱེད་རྒྱུར་ཤུགས་བརྒྱབ་པ་ཡིན་པས། སྐུ་ངོ་ལགས། བོད་ཡིག་ཅིག་སྦྱོངས་དང་།

མེས་པོ་ཁྲི་རལ་པས་མི་རིགས་ཀྱི་སྐད་ཡིག་འདི་ཡང་དག་ཅིག་དང་གཙང་མ་ཞིག་ཡོང་བའམ་ཡང་ན་ཕྱི་རབས་བོད་མི་དག་གི་སླད་དུ་བཀས་བཅད་རིམ་པ་གསུམ་མཛད་དེ། མི་རིགས་ཀྱི་སྐད་ཡིག་འདི་འཐུས་སྒོ་ཆེ་ཚང་དང་། སྤུས་ཇེ་ལེགས་སུ་བཏང་ནས་ཤུལ་བཞག་གི་ནོར་བུ་ཞིག་ང་ཚོ་བགོ་སྐལ་དུ་བཞག་པ་ཡིན་པས། སྐུ་ངོ་ལགས། བོད་ཡིག་ཅིག་སྦྱོངས་དང་།

མེས་པོ་འུ་དམ་བཙན་པོ་སྐུ་གྲོངས་ཏེ་གསེར་ནག་གི་རི་བོའི་ཕྲེང་བ་བརྒྱུད་པ་ལྟ་བུའི་བཙན་པོའི་མངའ་ཐང་དུམ་སེ་བཅད་རྗེས། བོད་སིལ་བུར་འཐོར་བའི་ཡ་ང་བའི་ལོ་རྒྱུས་དེ་བྱུང་ན་ཡང་། སྐབས་དེར་ནམ་མཁའི་སྐར་ཚོགས་ཀྱིས་ས་གཞི་ཁེབས་པ་དང་མཚུངས་པའི་མཁས་པ་གང་མང་ཞིག་གིས་བོད་སྐད་ཡིག་གི་སྟེང་ནས་རྟེན་འབྲེལ་དང་། འཚེ་མེད་བརྗོད་བྱ་བྱས་པའི་གཞུང་ལུགས་བརྩམས་ཤིང་། སྙན་འགྱུར་ཕུན་སུམ་ཚོགས་པའི་སྙན་ངག་རིག་གནས་མཛད་དེ། ས་ཆེན་པོ་འདིར་བླ་མེད་ཀྱི་རྐང་རྗེས་ཆེན་པོ་ཞིག་བཞག་ཡོད་པས། སྐུ་ངོ་ལགས། བོད་ཡིག་ཅིག་སྦྱོངས་དང་།

སྤྱིར་བཏང་གི་ཚད་ཐུབ་ཀྱི་མི་རིགས་ཤིག་ཡིན་མིན་ནི། མི་རིགས་དེའི་ངོ་བོ་མཚོན་པའི་སྐད་ཡིག་ཡོད་མེད་ལ་རག་ལས་ན། བོད་པ་ཡང་དེ་ལས་མ་འདས་ཕྱིར། ང་ཚོའི་མི་རིགས་འདི་སྔོན་བྱོན་ཡབ་མེས་ཚོའི་བཀའ་དྲིན་གྱིས་ང་རང་ཚོ་རང་ཉིད་ལ་དབང་བའི་འཐུས་ཚང་གི་སྐད་ཅིག་ཡོད་ལགས་པས། སྐུ་ངོ་ལགས། བོད་ཡིག་ཅིག་སྦྱོངས་དང་།

མི་ཞིག་ལ་མཚོན་ན་རང་ཉིད་འཚོ་གནས་ཐུབ་མིན་ནི་ཁ་ལ་བཟའ་རྒྱུ་ཞིག་ཡོད་མེད་ལ་ཐུག་ཡོད་མོད། མི་རིགས་ཤིག་ལ་མཚོན་ན། མི་རིགས་དེ་ཡུན་གནས་ཐུབ་མིན་གྱི་བླ་སྲོག་ལྟ་བུ་ནི་མི་རིགས་དེའི་སྐད་ཡིག་ཉིད་ལགས་ཤིང་། རིག་གཞུང་གི་གཞི་རྟེན་འབའ་ཞིག་ཀྱང་སྐད་ཡིག་ཉིད་ལགས་པས། སྐུ་ངོ་ལགས། བོད་ཡིག་ཅིག་སྦྱོངས་དང་།

སྔར་རང་ཉིད་ཀྱིས་བོད་ཡིག་མ་སྦྱངས་པའམ་རང་ཉིད་ཀྱིས་བོད་ཡིག་མི་ཤེས་པ་རྒྱུ་མཚན་དུ་བྱས་ནས། བོད་ཀྱི་སྐད་ཡིག་རིག་གནས་དང་བཅས་པ་དུས་རབས་ཀྱི་གད་སྙིགས་ཤིག་དང་།  དགོས་མེད་ཀྱི་ཅ་ལག་ཅིག་ལ་མ་གཟིགས་དང་། འདི་ནི་མི་རིགས་ཀྱི་འདས་ཟིན་གྱི་ལོ་རྒྱུས་གསལ་བའི་མེ་ལོང་དེ་ཡིན་ལ། འབྱུང་འགྱུར་གྱི་མི་རབས་གང་མང་ཞིག་འཚོ་གནས་ཐུབ་པའི་བླ་སྲོག་ཉིད་ལགས་པས། སྐུ་ངོ་ལགས། བོད་ཡིག་ཅིག་སྦྱོངས།

སྐད་ཡིག་གང་འདྲ་ཞིག་ཡིན་རུང་སྤྱི་ཚོགས་ལ་ཕན་བདེ་བསྐྲུན་པ་དང་མི་སྒེར་གྱི་འཚོ་གནས་ལ་ཕན་པའི་བྱེད་པོ་ཞིག་བཟོ་དགོས་ན། སྐད་ཡིག་དེ་བཀོལ་སྤྱོད་ཀྱི་ཁོར་ཡུག་ཅིག་དགོས་ལ། སྐད་ཡིག་དེའི་རིན་ཐང་ལ་བཅངས་པའི་འདུ་ཤེས་ལྷད་མེད་ཅིག་དགོས་པ་ལགས་ན། སྐུ་ངོ་ལགས། བོད་ཡིག་ཅིག་སྦྱོངས་དང་།

མི་རིགས་ཤིག་ཚུགས་ཐུབ་ཏུ་ལངས་དགོས་ན། ནམ་ཡང་རང་ཉིད་ཀྱི་སྐད་ཡིག་ལ་བརྟེན་ནས་ལངས་དགོས་ཏེ། འཇར་པན་རྒྱལ་ཁབ་ཀྱང་ཐོག་མར་གཞན་གྱི་སྐད་ཡིག་གིས་ཡར་ལངས་འདོད་བྱས་མོད། མཐའ་མར་རང་ཉིད་ཀྱི་མ་སྐད་ལ་མ་བརྟེན་པར་སྔོན་དུ་ཐོན་པའི་སྐབས་མེད་པ་ཤེས་རྗེས་རང་སྐད་ལ་བརྟེན་པ་རེད་ལ། དེ་ནི་ལོས་ཡིན་ཀྱང་སྙམ་སྟེ། རང་ཉིད་ཀྱི་མ་རྩ་གང་ཡོད་པ་དེ་ཕར་གཡུགས་ནས་གཞན་གྱིས་བདག་གིར་བཞེས་པའི་ཅ་དངོས་ཤིག་རང་ཉིད་ལ་ཐོབ་འདོད་སྐྱེས་པ་ནི་ལྐུག་པའི་ལས་ཤིག་ལས་མ་འདས་པས། སྐུ་ངོ་ལགས། བོད་ཡིག་ཅིག་སྦྱོངས་དང་།

སྐུ་ངོ་ལགས། དུས་ནམ་ཡིན་ཡང་བོད་ཡིག་ལ་ལྟ་ཚུལ་ཡག་པོ་ཞིག་འཛིན་རོགས། བོད་ཡིག་བཀོལ་སྤྱོད་ཀྱི་ཁོར་ཡུག་རྒྱ་ཇེ་ཆེར་གཏོང་རོགས། དེ་ལྟར་མ་བྱས་པར་རང་ཉིད་ཀྱི་ཚོར་སྣང་ཙམ་པོའི་རྗེས་སུ་འབྲང་ན། འུ་ཚོའི་མི་རིགས་འདི་མེ་འདས་གསོད་མི་དགོས་ཏེ། མེ་མདས་བསད་ན་མི་རེ་རེ་ལས་གསོད་མི་ཐུབ་མོད། སྐད་ཡིག་བཀོལ་སྤྱོད་མེད་པར་བཟོས་པས་ནི། མི་རིགས་བསྡེབས་ཀྱིས་གསོད་པས་སོ། །