ཚེ་སྲོག་གིས་མཉམ་འབྲེལ་རྒྱལ་ཚོཊ་འབོད་པ།

ཟླ་འདིའི་ཚེས་ ༢༡ ཉིན་གྱི་ཕྱི་དྲོའི་ཆུ་ཚོད་ ༦ ཐོག ངྷ་ས་ཟློས་གར་ཚོགས་ཁང་དུ་བོད་རྒྱལ་ཡོངས་མང་གཙོ་ཚོགས་པའི་གོ་སྒྲིག་འོག རྒྱ་ནག་གཞུང་གིས་དཔང་རྟགས་དང་ཁུངས་སྐྱེལ་སོགས་གཞི་རྩ་གང་ཡང་མེད་པའི་ཐོག་ནས་རང་ལུས་མེར་བསྲེགས་དང་འབྲེལ་བ་ཡོད་པའི་ཉེས་འཛུགས་ཐོག རྔ་པ་ཀིརྟི་དགོན་གྱི་གྲྭ་བློ་བཟང་དཀོན་མཆོག་དང་རྔ་པ་ཁུལ་མཛོད་དགེ་རྫོང་གི་སྒྲོལ་མ་སྐྱབས་གཉིས་སྲོག་ཐོག་ཏུ་གཏོང་རྒྱུ་ཡིན་པ་གསལ་བསྒྲགས་བྱས་པ་དེ་དྲང་བདེན་མིན་པ་གསལ་སྟོན་ཆེད། ༼ ཚེ་སྲོག་གིས་མཉམ་འབྲེལ་རྒྱལ་ཚོགས་ལ་འབོད་པ།༽ཞེས་པའི་དགོང་ཚོགས་དང་མཚན་རྟགས་བསྡུ་རུབ་ཀྱི་ལས་འགུལ་ཞིག་སྤེལ་ཡོད་འདུག

རྨེའུ་དཀོན་རྒྱམ་ལགས་ཀྱིས་གོང་གསལ་གནས་ཚུལ་ཞིབ་ཕྲ་བཏང་འབྱོར་ནང་། ལས་འགུལ་དེའི་སྐུ་མགྲོན་གཙོ་བོ་བཀའ་ཟུར་ཀིརྟི་རིན་པོ་ཆེ་མཆོག་དང་དམིགས་བསལ་སྐུ་མགྲོན་ངྷ་ས་ས་གནས་བདེ་དོན་བསོད་ནམས་རྡོ་རྗེ། གཞན། ངྷ་སའི་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་དང་སེར་སྐྱ་མི་མང་བཅས་མཉམ་ཞུགས་གནང་ཐོག བོད་ཀྱི་རྒྱལ་ཡོངས་མང་གཙོ་ཚོགས་པའི་ཚོགས་གཙོ་དགེ་ལེགས་འཇམ་དབྱངས་ལགས་ཀྱིས་དབྱིན་ཡིག་དང་དྲུང་ཆེ་སེར་སྨད་བློ་དགའ་ལགས་ཀྱིས་བོད་ཡིག་ཐོག་བསྒྲགས་གཏམ་སྤེལ་ཡོད་འདུག

བསྒྲགས་གཏམ་ནང་། “རྒྱ་ནག་གཞུང་གིས་དཔང་རྟགས་དང་ཁུངས་སྐྱེལ་སོགས་གཞི་རྩ་གང་ཡང་མེད་པའི་ཐོག་ནས་རང་ལུས་མེར་བསྲེགས་དང་འབྲེལ་བ་ཡོད་པར་བཙན་དབང་གིས་བརྗོད་དེ་རྔ་བ་ཀིརྟི་དགོན་གྱི་གྲྭ་བློ་བཟང་དཀོན་མཆོག་དང་རྔ་པ་ཁུལ་མཛོད་དགེ་རྫོང་གི་སྒྲོལ་མ་སྐྱབས་གཉིས་སྲོག་ཐོག་ཏུ་གཏོང་རྒྱུ་ཁྱབ་བསྒྲགས་བྱས་ཟིན་པ་ནི། རྒྱལ་སྤྱིའི་ཁྲིམས་དང་། དྲང་བདེན། གཞི་རྩའི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་དུ་བཏང་བ་ཞིག་ཡིན་པ་མ་ཟད། རྒྱལ་ཁབ་ཅིག་གི་ཁྲིམས་ལུགས་དེ་དྲང་བདེན་དང་མིའི་ཐོབ་ཐང་སྲུང་སྐྱོབ་བྱེད་རྒྱུ་ལས་ལྡོག་སྟེ། དྲང་བདེན་མིན་པ་དང་། མི་མང་གི་ཐོབ་ཐང་བརྩི་འཇོག་མེད་པ། སྒེར་གཅོད་པའི་དུས་རབས་ཤིག་ཡིན་པའི་དཔང་རྟགས་ཡིན”ཞེས་བཀོད་ཡོད་འདུག

དེའི་རྗེས་སྐུ་མགྲོན་གཙོ་བོ་མཆོག་གིས། ” བོད་ནང་ནས་ད་ལྟའི་བར་དུ་མི་ ༡༢༠ ཡིས་རང་སྲེག་གི་ཞི་རྒོལ་བྱས་པའི་རྒྱུ་མཚན་ནི། རྒྱ་ནག་གཞུང་གིས་ལོ་དྲུག་ཅུ་ལྷག་གི་རིང་བོད་དང་བོད་མིའི་ཐོག་ལ་དྲང་བདེན་མ་ཡིན་པའི་སྲིད་བྱུས་ཤིག་ལག་བསྟར་བྱས་པ་དེར་བོད་མིའི་གདུང་ལེན་མ་ཐུབ་པས་ཐོག་ནས་བྱུང་བ་རེད། རྒྱ་ནག་གཞུང་གིས་དྲང་བདེན་མ་ཡིན་པའི་ཆབ་སྲིད་ཀྱིས་ལས་འགུལ་སྤེལ་བ་དེར་བསྐྱར་ཞིབ་མ་བྱས་པའི་ཐོག་ནས་ད་དུང་རིག་འཚོ་མ་ཟིན་པ་དང་། བཟའ་ཚང་གི་གནས་ཚུལ་ཡིན་པ་སོགས་གང་སྡུག་སྡུག གང་ངན་ངན་གྱིས་རྒྱུ་རྐྱེན་གཞན་ལ་ཁ་གཡར་བ་མ་ཟད། འབྲེལ་ཡོད་སྤུན་མཆེད་དང་ཉེ་རིང་། ཨ་ཁུ་ཨ་ཞང་སོགས་འབྲེལ་ཡོད་ཚང་མ་འཛིན་བཟུང་བྱས་ཏེ་སྲོག་ཁྲིམས་བཅད་པ་སོགས་ཀྱི་གནས་ཚུལ་བྱུང་བ་རེད” ཅེས་དང་། ཁོང་གིས་མུ་མཐུད་དོན། “ ད་ལྟའི་རྒྱ་གཞུང་གིས་བོད་པའི་ཐོག་ཁྲིམས་བཅས་པ་དང་ཁྲིམས་ལག་ལེན་བསྟར་བ་དེ་ཚོ་རྒྱལ་སྤྱིའི་ཁྲིམས་དང་མི་མཐུན་པ་མ་ཟད། རྒྱ་གཞུང་ཁོ་རང་ཚོས་བཟོས་པའི་ཁྲིམས་དང་ཡང་འགལ་ཡོད། བོད་མིའི་ཚེ་སྲོག་རྩེད་མོ་རྩེ་སྤྱད་བྱེད་ཀྱིན་ཡོད་པ་རེད། དེ་ནི་ཁོ་རང་ཚོས་བཙན་དབང་འོག་ཏུ་བསྡུ་ཐབས་ཁོ་ན་རེད། དཔེར་ན། རྒྱ་ནག་གི་སྤྱི་དངུལ་ལྐོག་ཟ་བྱེད་མཁན་པའོ་ཞི་ལེ་སོགས་ཁོ་རང་ཚོའི་མགོ་ཁྲིད་ཚོ་ལ་ཁྲིམས་ཐག་བཅད་པ་དེ་དྲང་པོ་མ་བྱུང་བ་རྒྱ་ནག་ཁོ་རང་ཚོའི་ནང་ནས་བཤད་ཡོང་གི་ཡོད” ཅེས་གསུངས་འདུག

བཀའ་ཟུར་ཀིརྟི་རིན་པོ་ཆེ་མཆོག་གིས་ཉེ་ལམ་༧གོང་ས་མཆོག་ཐུགས་ཕན་གྱི་གནས་ཚུལ་ཞིག་བྱུང་བའི་ཐོག་གསུངས་དོན། “ དེ་རིང་གི་གོ་སྐབས་འདི་འཇུས་ནས་ཞུ་འདོད་པ་གཅིག་ནི། ཚོགས་ཁང་འདིའི་ནང་གསར་འགོད་པ་དང་ངྷ་རམ་ས་ལའི་ཚོགས་པ་ཁག་གི་ཚོགས་མི་སོགས་ ལུང་པ་དང་ས་གནས་མང་པོ་ཞིག་གི་འཐུས་མི་འཛོམས་བསྡད་པ་ཞིག་རེད། ཉེ་ཆར་དམངས་གཙོའི་དུས་ཆེན་གྱི་ཉིན་༧གོང་ས་མཆོག་གིས་ཁོང་ལ་ཐུགས་ཕམ་བྱུང་བ་དང་དེའི་འབྲས་བུ་ག་རེ་བྱུང་མིན་སྐོར། བོད་གཞུང་གི་ལས་བྱེད་གནད་ཡོད་མང་པོ་ཞིག་ལ་ཕོ་བྲང་ནང་དུ་བཀའ་སློབ་ཅིག་གནང་ཡོད། དེ་ཚང་མས་ཤེས་ཀྱི་ཡོད་དུས། མི་མང་ལ་ཚོར་སྣང་ག་འདྲ་ཞིག་བྱུང་ཡོད་དམ། དངོས་གནས་བྱས་ན་ང་རང་ཚོས་ཟས་ཆུ་གཉིས་བྲལ་བྱེད་དགོས་པའི་དུས་ཚོད་ཅིག་ལ་སླེབས་ཚར་བ་རེད། ཁ་སང་དེ་རིང་སྤྱི་འཐུས་རྣམ་པ་ཚོས་ཀྱང་ཆུ་ཚོད་ནས་ཆུ་ཚོད་མུ་མཐུད་ནས་གནད་ དོན་དེའི་ཐོག་བགྲོ་གླེང་གནང་བཞིན་པ་རེད། ངས་འདི་ནས་དྲན་སྐུལ་ཙམ་ཞུ་འདོད་པ་ནི། ༸རྒྱལ་དབང་སྐུ་ཕྲེང་བཅུ་གསུམ་པས་ཆུ་སྤྲེལ་ཞལ་གདམས་གནང་པའི་ཐོག་བོད་མི་ཚོའི་ངོས་ནས་འཕྲལ་མར་ཚ་ཚ་འུར་འུར་གྱི་ལས་འགུལ་དེ་འདྲ་སྤེལ་མ་ཐུབ་པའི་དབང་གིས་ད་ལྟའི་བོད་པའི་གནས་བབ་འདི་བྱུང་བ་རེད” ཅེས་དང་།

ཁོང་གིས་མུ་མཐུད་དུ། “ རྒྱལ་དབང་སྐུ་ཕྲེང་བཅུ་བཞི་པས་བཀའ་སློབ་ཞལ་གདམས་ཀྱི་ཐོག་ནས་ཐུགས་ཕམ་བྱུང་ བའི་ལོ་རྒྱུས་ཤིག་ཆགས་ཡོད། དེ་ནི་དུས་ཚོད་ཐུང་ཐུང་ཞིག་དང་བཙན་བྱོལ་ནང་གཅིག་པུ་མིན་པར་བོད་ནང་ནས་ཀྱང་ ནང་ཁུལ་གསོད་རེས་བྱས་པ་སོགས་རྒྱུ་རྐྱེན་སྣ་ཚོགས་ཤིག་ལ་བརྟེན་ནས་ཐུགས་ཕམ་བྱུང་བསྡད་པ་ཞིག་རེད། འཐུས་ཤོར་སྔ་རྗེས་མང་པོ་ཕྱིན་ཡོད་པ་རེད། གང་ལྟར་༸སྐྱབས་མགོན་རིན་པོ་ཆེ་དགོངས་ཚོམ་དྭངས་གསལ་ཡོང་བ་ཞིག་བྱེད་དགོས་པ་དེ་ང་ཚོའི་ལས་འགན་གཡོལ་ཐབས་མེད་པ་ཞིག་རེད། ༸སྐྱབས་མགོན་རིན་པོ་ཆེས་དམངས་གཙོ་གནང་བ་དང་། ང་ཚོས་ཀྱང་དམངས་གཙོ་དེར་བདག་པོ་རྒྱབ་ཐུབ་པ་བྱེད་དགོས། བཀའ་ཤག་དང་སྤྱི་འཐུས་བདམས་པ་ཙམ་གྱིས་དམངས་གཙོའི་ལས་འགན་གྲུབ་པ་ཞིག་མ་རེད། གཞུང་ལ་མི་མང་གིས་སྐུལ་འདེད་བྱེད་དགོས་ཀྱི་ཡོད། ཚོགས་པ་ཁག་ཡིན་ནའང་དམངས་གཙོའི་འགན་ཁུར་བའི་ཐོག་ནས་ཚོགས་འདུ་སྣ་ཚོགས་བསྐོངས་ཏེ་ཉིན་དང་མཚན་མཐུད་ནས་ཅིག་བྱེད་དགོས་པའི་དུས་ལ་བབ་ཡོད། བརྟན་བཞུགས་ཕུལ་བ་དེ་རྟེན་འབྲེལ་ཙམ་གྱི་ཐོག་ནས་ཡག་པོ་རེད་དེ་གཙོ་བོ་ལག་ལེན་གྱི་ཐོག་ནས་གོམ་པ་རྒྱག་དགོས་ཀྱི་འདུག ང་ཚོས་དམངས་གཙོ་དེ་ངོ་ཤེས་པ་བྱེད་དགོས་ཀྱི་འདུག ད་ལྟའང་དམངས་གཙོའི་འགྲོ་སྟངས་ཡག་པོ་ཆགས་མི་འདུག  ཁ་ནས་གང་བྱུང་མང་བྱུང་བཤད་ཆོག་པ་དེ་དམངས་གཙོའི་རང་དབང་མ་རེད། རྒྱ་ནག་གི་མི་མང་དེ་གཞུང་གི་ཆེད་དུ་ཡིན་ཡང་། ང་ཚོ་ནི་དེ་འདྲ་མིན་པར་མི་མང་གི་ཆེད་དུ་གཞུང་བཙུགས་བཞག་པ་ཞིག་རེད། ང་རང་གཞུང་གི་ལས་བྱེད་པ་མིན་པར་མི་དཀྱུས་མ་ཞིག་གི་ཐོག་ནས་དྲན་སྐུལ་ཙམ་ཞུས་ པ་ཡིན” ཞེས་གསུངས་འདུག

ལས་འགུལ་དེའི་མཇུག་ཏུ་མྱ་ངན་གྱི་སྙན་ངག་གྱེར་འདོན་དང་གཞས་པ་གཞས་མ་ཁག་ཅིག་གིས་གླུ་གཞས་བཅས་བཏང་རྗེས། རྨེའུ་དཀོན་རྒྱམ་ལགས་ཀྱིས་ཐུགས་རྗེ་ཞུའི་གཏམ་བཤད་གནང་ཡོད་འདུག