དེ་རིང་དགོང་དྲོར་དགུ་བཅུ་གསུམ་ལས་འགུལ་ཚོགས་པའི་སྐབས་དྲུག་པའི་རྒྱུན་ལས་གསར་འདེམས་དང་ཚོགས་གཙོ་བསྐོ་བཞག་གནང་སོང་།
དེ་རིང་ཕྱི་དྲོར་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་ཆེན་མཇུག་བསྡོམས་དང་བསྟུན་ཏེ། སྐབས་དྲུག་པའི་རྒྱུན་ལས་ ༡༥ གསར་འདེམས་གནང་ཡོད་པ་དང་། དེ་དག་ལས་ས་རཱ་མཐོ་སློབ་ཀྱི་དགེ་རྒན་པ་སངས་ཚེ་རིང་ལགས་ཚོགས་གཙོར་འོས་ཐོན་བྱུང་སྟེ། རྒྱུན་ལས་གསར་པ་ཚོས་༧གོང་ས་མཆོག་གི་སྐུ་པར་མདུན་དུ་དམ་འབུལ་ཞུས་སོང་། གཞན། ཚོགས་གཞོན་དང་དྲུང་ཆེ་སོགས་སང་ཉིན་རྒྱུན་ལས་གསར་པ་ནང་ཁུལ་ནས་བསྐོ་བཞག་བྱ་འཆར་ཡོད་འདུག
སྐབས་དེར་ཚོགས་གཙོ་གསར་པ་པ་སངས་ཚེ་རིང་ལགས་ཀྱིས་རྩིས་ལེན་གཏམ་བཤད་གནང་བའི་ནང་། དམ་བཅའ་ཕུལ་བ་ལྟར་མ་འོངས་ལས་ཡུན་ལོ་གསུམ་གྱི་རིང་ཚོགས་པའི་ལངས་ཕྱོགས་དང་སྒྲིག་གཞིར་མ་འགལ་བའི་ཐོག གང་ཐུབ་ཅི་ཐུབ་ཀྱིས་བོད་མིའི་མངོན་འདོད་དང་གྲོས་ཆོད་ཁག་འགྲུབ་ཐབས་གནང་རྒྱུ་ཡིན་སྐོར་དང་། མ་འོངས་པར་རྒྱུན་ལས་ཚོས་ལས་ཀའི་བརྒྱུད་རིམ་ཁྲོད་ནས་ནོར་འཁྲུལ་ཤོར་སྲིད་སྟབས། སྐབས་དེར་ཚོགས་མི་ཚོའི་ངོས་ནས་ཐད་ཀར་བསམ་ཚུལ་འདོན་དགོས་པའི་རེ་སྐུལ་བཅས་གནང་སོང་།
ཐེངས་འདིར་བདམས་ཐོན་བྱུང་བའི་རྒྱུན་ལས་དག་ནི། བློ་བཟང་དཔལ་ལྡན་ལ་འོས་གྲངས་ ༩༡ དང་། ལྷ་ཆབ་སྤྱིན་པར་འོས་ ༧༧། བློ་བཟང་རྒྱ་མཚོར་འོས་ ༧༦། འཇམ་དབྱངས་སྤྱིན་པ་ལ་འོས་ ༦༨ ། ལྷ་རྒྱལ་རི་རྣམ་རྒྱལ་སྒྲོན་དཀར་ལ་འོས་ ༦༦ ། ཏྲེ་ཧོར་བསྟན་འཛིན་རྣམ་རྒྱལ་ལ་འོས་ ༥༨། ཀུན་མཁྱེན་ལ་འོས་ ༥༢ ། པ་སངས་ཚེ་རིང་ལ་འོས་ ༥༡ ། རྒྱལ་མཚན་ལ་འོས་ ༥༠ ། བསོད་ནམས་རྡོ་རྗེར་འོས་ ༥༠ ། འཇམ་དཔལ་ཤེས་རབ་ལ་འོས་ ༤༩ ། རྨེའུ་དཀོན་རྒྱམ་ལ་འོས་ ༤༨ ། ཡེ་ཤེས་ལ་འོས་ ༤༦ ། བཟོད་པར་འོས་ ༤༦ ། ཚེ་རིང་བསམ་གྲུབ་ལ་འོས་ ༤༤ བཅས་ཐོབ་འདུག
ཐེངས་འདིའི་ཚོགས་ཆེན་སྟེང་། བོད་ཀྱི་དགུ་བཅུ་གསུམ་ལས་འགུལ་ཚོགས་པའི་དེ་སྔོན་གྱི་རང་བཙན་ལངས་ཕྱོགས་དབུ་མའི་ལམ་དུ་བསྒྱུར་ཡོད་ལ། དེ་བཞིན། ས་གནས་རྒྱུན་ལས་གསར་འཛུགས་གནང་རྒྱུ་དང་། བོད་དོན་ལས་འགུལ་དང་༧གོང་ས་མཆོག་གི་སྐུ་ཕྱྭའི་ཐོག་སྔར་ལས་ལྷག་པའི་ལས་འགུལ་ཤུགས་ཆེན་སྤེལ་རྒྱུ་བཅས་ལ་གྲོས་ཆོད་བཞག་ཡོད་འདུག
གསར་འགོད་པ། པདྨ་མཚོ།
ཚོགས་གཙོ་ལགས། ལས་དོན་རྣམས་ལམ་འགྲོ་ཡོང་བ་དང་གཞིས་བྱེས་གཉིས་ཀྱི་ཆབ་བཙོན་རྣམས་བློ་ཕམ་མི་འབྱུང་བའི་བྱ་བ་ཞིག་གནང་རོགས།
ད་ཡིན་ན་དགུ་བཅུ་གསུམ་ཚོགས་པ་ལ་ཡིད་ཆེས་དང་རེ་བ་རྩ་བ་ནས་མེད་ཨ།
སྔོན་ཆད་བོད་ཀྱི་གཞོན་ནུ་ལྷན་ཚོགས་ཕུད་དེ་མིན་བཙན་བྱོལ་སྤྱི་ཚོགས་ནང་ནས་དགུ་བཅུ་གསུམ་གྱི་ཚོགས་པ་དེ་ལ་ཤེས་ལྡན་མི་མང་ཚོས་རེ་བ་བཅོལ་ཡུལ་ཆགས་ཡོད། འདི་ལོ་ན་ངན་ཞིག་གིས་རྐྱེན་པས་ཚོགས་པའི་ལྟ་གྲུབ་གྱི་སྲོག་དབུག་ཆད་ཀྱང་། ཚོགས་གཞོན་ཀླུ་མཁར་འཇམ་སྨན་ཁང་ནང་ནས་ཁོ་རང་སྲོག་འགོ་ཐོན་ཙམ་བྱུང་སྟེ། དགུ་བཅུ་གསུམ་ལས་འགུལ་ཚོགས་པ་ལ་ནད་ངན་ཇི་ལྟར་ཁྱབ་ཅིང་མཐའ་མ་ནད་དེ་ལས་གྲོལ་ཐབས་མེད་པའི་གནད་འགག་དང་བྱུང་རྩ་གསལ་བསྒྲགས་ཤིག་གནང་ཐུབ་ཙམ་བྱུང་བ་དེ་དངོས་ཡོད་རེད། ད་ནི་དགུ་བཅུ་གསུམ་མ་ཚད་བཅུ་བཞི་བཅོ་ལྔ་ག་ཚོད་ཡོད་ཀྱང་བོད་མི་རིགས་ལ་ཕན་པ་ཞིག་ཡོང་རེ་ནམ་ཡང་མེད།
བཀྲིས་བདེ་ལེགས།
འདས་པའི་ལོ་ཤས་རིང་ཚོགས་ཟུར་ངག་དབང་འོད་འབར་གྱིས་དགུ་བཅུ་གསུམ་ལུས་ལ་གྱོན་ཞིང་ངག་ལ་འཁྱེར་ནས་སློང་མོ་རྒྱག་བསམ་པའི་རྨི་ལམ་གཏོང་ཡང་། ད་ནི་ཁོང་གི་རེ་བ་རློག་སོང་།ཡིན་ན་ཡང་རྡ་སའི་ལྕགས་ཀྱི་གྲྭ་བ་དེ་ཚོ་སྐབས་འཚོལ་ལ་བྱང་ཆུབ་རྐྱེན་འཛུལ་ས་ཞིག་ཡོད་ངེས།
ལྷ་རྒྱ་རི་རྣམ་རྒྱལ་སྒྲོལ་དཀར་ཆབ་སྲིད་བཙོན་པ་ཇི་ལྟར་ཆགས་པ་རེད། ཡང་ན་དགུ་བཅུ་བསུམ་གྱི་ཚོགས་མི་ཡིན་ན་ཆབ་སྲིད་བཙོན་ཟུར་ཡིན་མི་དགོས་པ་ཨེ་རེད།
ངོ་མ་ཡ་མཚན་རེད། བོད་མིག་མཐོང་མ་མྱོང་བའི་ལྷ་རྒྱ་རི་རྣམ་རྒྱལ་སྒྲོལ་དཀར་རྒྱུན་ལས་ནང་དུ་བླུག་མཁན་གྱི་བཙོན་པ་དེ་ཚོར་ཆབ་སྲིད་གོ་རྟོགས་ཕྲན་བུ་ཙམ་ཡང་མེད་པ་ཟུར་བལྟས་ལེབ་མཐོང་རེད། བོད་ནང་དུ་རྒྱའི་བཙོན་འོག་ཏུ་ལྷག་པའི་ཆབ་སྲིད་བཙོན་པ་ངོ་མ་རྣམས་ཀྱི་དཀའ་སྡུག བོད་མིག་མཐོང་མ་མྱོང་བའི་མི་ཞིག་གི་འབྲེལ་བརྗོད་བྱས་ན་ངོ་རེ་ཚ། བཙན་འབྱོར་ནང་དུ་ཡོད་པའི་་གསར་འབྱོར་བཙོན་རྫུན་རྣམས་ཀྱི་ཐོབ་ཆ་རྩོད་མ་ཚར་བ་རྣམས། གཞུང་དང་༸གོང་ས་མཆོག་ཟམ་གདོང་རིན་པོ་ཆེ་སོགས་ལ་མཚན་སྨད་ཞུ་འཕྲོས་རྣམས་ཞུ་རོགས་ལ་མོས་ཕན་ཐོག་ངེས་རེད། ལྷག་པར་དུ་བཙོན་རྫུན་རྣམས་རྒྱ་གར་མི་སེར་གྱི་ཐོབ་ཆ་བླངས་ཏེ་བོད་མིིའ་མི་ཁུངས་ནས་མེད་པ་བཟོ་ཡས་ལ་མོ་ཧ་ཅང་ཡག ཆབ་སྲིད་བཙོན་པ་ངོ་རྣམས་རྒྱ་དམར་གི་དམར་གསོད་དང་བཙོན་ཁང་ནང་དཀའ་སྡུག་འོག་ཏུ་གནས་ཡོད། ད་ལྟ་རྒྱ་གར་དུ་འབྱོར་བའི་བཙོན་པ་རེ་ཟུང་ལས་མང་ཆེ་བ་བཙོན་པ་རྫུན་མ་ཁ་ལས་མིག་ཆེ་བ་བལྟ་མཁན་ཀྱང་རེད། གལ་སྲིད་ནམ་ཞིག་བོད་གཞུང་ནས་ཁོ་ཚོ་ཕྱི་རྒྱལ་གཏང་མ་ཐུབ་ན་བོད་གཞུང་མེད་པར་བཟོ་མི་ཡང་ཐོབ་ཐང་རྩོད་རྒྱུར་དགའ་བའི་བཙོན་རྫུན་དེ་རྣམས་རེད། དཔེར་ན་ཚོགས་ཆེན་སྐབས་སུ་ལག་འཛིང་བྱེད་སྟངས་དང་གཅིག ནམ་རྒྱུན་གཞུང་གི་མ་འགྲིག་པ་དང་།མ་བྱུང་པ། མ་རག་སོགས་གླེང་མི་བཙོན་རྫུན་དེ་རྣམས་ཡིན་པ་རྡ་ས་ནས་འོན་ལྐུགས་ཞིག་ཡིན་ཡང་མ་ཤེས་པ་ཡོད་མ་རེད།
ལྷ་རྒྱལ་རི་རྣམ་རྒྱལ་སྒྲོན་དཀར་རྒྱ་གར་མི་སེར་ཡིན་དུས་ཆབ་སྲིད་བཙོན་པ་ག་འདྲ་ཆགས་པ་རེད་དམ།
ས་གནས་ཁག་ཏུ་ཡོངས་ཁྱབ་བྱུང་གསལ་ལ། དགུ་བཅུ་གསུམ་གྱི་ཚོགས་ཆེན་སྐབས་སུ་ལུང་དང་རིག་པ་རྒྱབ་ཏུ་བསྐྱུར་ཏེ་བཙོན་ཟུར་གསར་པ་རེ་ཟུང་གིས་རང་ཉིད་ཀྱི་ལྟ་བ་རྒྱུན་གནས་ཡོང་ཆེད་བཙོན་ཟུར་རྙིང་པ་རྒད་པོ་ཞིག་ལ་རྐུབ་སྟེགས་ཞུས་ཏེ་ལག་འཛིང་བྱས་པ་སོགས་སྔར་གཞུང་འབྲེལ་མ་ཡིན་པའི་ཚོགས་སྡེ་གང་ལའང་བྱུང་མ་མྱོང་བའི་གསར་གཏོད་ཀྱི་ཚོགས་ཆེན་ཞིག་ཚོགས་འདུག བོད་ཞེན་ཅན་མང་པོ་ཞིག་གི་སེམས་འཕྲལ་ནི་ཚོགས་ཆེན་སྐབས་སུ་བསད་རེས་གཏང་མི་ཡོང་ང་བསམ་པ་དེ་རེད། དེའི་ཐོག་བཀུར་འོས་གསར་འགོད་ཚོས་དོ་སྣང་གནང་ཏེ་གསར་སྤེལ་བྱུང་ན་ཅི་མི་ལེགས།
༡༩༩༣ལོར་དགུ་བཅུ་གསུམ་གསར་འཛུགས་སྐབས་ལྟ་བ་དབུ་མའི་ལམ་རེད། དེ་ནས་༢༠༠༠ལོར་རང་བཙན་ལྟ་བར་ཤར་སྐྱོད་གནང་ཡོད། ད་རེས་དབུ་མའི་ལམ་ལ་འགྲོ་སྟངས་ལ་ལྟོས་ན་ཚོགས་པ་འདིར་རང་ཚུགས་མེད་པ་གསལ་བོ་རེད། ལྷག་པར་ཚོགས་ཟུར་ངག་དབང་འོད་འབར་དང་ཐུབ་བསྟན་ཡར་འཕེལ་གཉིས་ཀྱིས་ཐབས་ཇུས་འོག་རང་བཙན་གཡུག་ནས་དབུ་མའི་ལམ་ལ་འགྲོ་རུ་བཅུག་ཐུབ་ཡང་། ཁོ་གཉིས་སླར་ཡང་རྐུབ་ཀྱོག་མ་རག་པ་དེ་གང་འདྲ་ཡིན་ནམ།
རྒྱུན་ལས་གསར་བ་རྣམ་པས་ལས་འགན་གསར་བ་ལེགས་སྒྲུབ་ཐུབ་པའི་རྟེན་འབྲེལ་ཞུ།
ལྟ་བ་དབུ་མ་དང་སྤྱོད་པ་ཞི་བ་གཉིས་ནི་དེང་གི་བོད་མི་རིགས་ཀྱི་དམག་འཐབ་སྲིད་བྱུས་ཡང་དག་པ་དེ་ཡིན། རིམ་བཞིན་ཚོགས་པ་ཚང་མ་ཁུ་ཚུར་གཅིག་སྒྲིལ་ཡོང་བའི་རེ་བ་ཡོད།ཐེངས་འདིར་ཚོགས་ཆེན་རྒྱལ་ཁའི་ངང་ནས་གྲོལ་ལོ་ཟེར་བ་དེ་དོན་གྱིས་ཆགས་འདུག་པས་ཚང་མར་བཀྲ་ཤིས་བདེ་ལེགས་ཞུ།