བོད་མིའི་སྒྲིག་འཛུཊ་ཀྱི་བོད་དོན་དཀའ་རྙོག་སེལ་ཐབས་གནང་ཕྱོཊ་ལ་གུས་བརྩི་ཞུ་བཞིན་ཡོད།

དེ་རིང་སྔ་དྲོར་བོད་ཀྱི་གཞོན་ནུ་ལྷན་ཚོགས་དབུ་བརྙེས་པའི་དུས་དྲན་མཛད་སྒོའི་སྟེང་། གཞོན་ནུས་ཚོགས་གཙོ་ལགས་ཀྱིས་འདས་པའི་ལོ་ངོ་བཅུ་ཕྲག་རིང་། གཞོན་ལྷན་དབུས་རྒྱུན་ནང་ཁུལ་མཐུན་ལམ་དང་ཕྱག་ལས་གནང་ཕྱོགས་ཀྱིས་བོད་དོན་འཐབ་རྩོད་ཀྱི་ནུས་པ་ཉམས་ཞན་དང་། ༧གོང་ས་མཆོག་ཐུགས་ཕམ་ཡོང་གཞིའི་གནས་ཚུལ་བྱུང་བ་ནི། བོད་སྤྱི་པའི་ཕམ་ཉེས་ཤིག་དང་བོད་དོན་འཐབ་རྩོད་ཀྱི་གྱོང་གུན་ཞིག་ཆགས་ཡོད་ཟེར།  

དེ་རིང་སྔ་དྲོའི་ཆུ་ཚོད་ ༡༡ པའི་སྟེང་ངྷ་ས་བོད་ཀྱི་ཟློས་གར་ཚོགས་པའི་རྩེད་ཐང་དུ། བོད་ཀྱི་གཞོན་ནུ་ལྷན་ཚོགས་དབུ་བརྙེས་ནས་ལོ་ ༤༤ འཁོར་བའི་དུས་དྲན་མཛད་སྒོ་ཞིག་ཚོགས་སོང་ལ། མཛད་སྒོའི་སྐུ་མགྲོན་གཙོ་བོར་ཧི་མ་ཅལ་མངའ་སྡེའི་ཡུལ་སྐོར་སྤྲོ་འཆམ་བློན་ཆེན་ཟུར་བ་སྐུ་ཞབས་བེ་ཇེ་སིན་ (Vijay Singh Mankotia) མཆོག་གཙོས། དབུས་གཞོན་ནུའི་ཚོགས་གཙོ་བསྟན་འཛིན་འཇིགས་མེད་ལཊ་དང་བདེ་ལེགས་སྨན་ཁང་གི་འགན་འཛིན་སྤྱི་འཐུས་ཟླ་བ་ཕུན་སྐྱིད་ལཊ། གཞོན་ནུའི་རྒྱུན་ལས་ཟུར་བ། དེ་བཞིན། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་དང་མི་མང་བཅས་མི་ ༢༠༠ ཡས་མས་ལྷན་འཛོམས་ཐོག བོད་དོན་ཆེ་སྐུ་གཤེགས་དཔའ་བོ་རྣམས་ལ་མྱ་ངན་གུས་འདུད་དང་། བོད་རྒྱལ་ཁབ་ཆེན་པོའི་རྒྱལ་གླུ་གྱེར་འདོན་སོགས་གནང་རྗེས། སྐུ་མགྲོན་གཙོ་བོ་མཆོག་གིས་དེ་རིང་ཞོགས་པར་རྒྱང་རྒྱུགས་འགྲན་བསྡུར་ཁྲོད་བྱ་དགའ་ཐོབ་མཁན་བུ་ ༥ དང་། བུ་མོ་ ༥ བཅས་སོ་སོར་ཧིན་སྒོར་ ༡༠༠༠༠ ནས་ ༡༠༠༠ བར་གྱི་བྱ་དགའ་གནང་སོང་།

མཛད་སྒོ་དབུ་འཛུགས་ཐོག་ས་གནས་གཞོན་ནུའི་རྒྱུན་ལས་བསྟན་འཛིན་བརྩོན་འགྲུས་ལགས་ཀྱིས། སྔོན་ཆད་གཞོན་ནུ་དབུ་བརྙེས་པའི་དུས་དྲན་སྲུང་གཙིའི་སྐབས། བོད་ཕྲུག་ཁྱིམ་སྡེའི་སློབ་མ་གཙོས་གཞོན་ནུའི་ཚོགས་མི་མིན་པའི་བོད་མི་ཧ་ཅང་མང་པོ་འཛོམས་སྲོལ་ཡོད་ཀྱང་། གཞུང་གི་ཆབ་སྲིད་ལངས་ཕྱོགས་དང་ཕྱག་ལས་གནང་སྟངས་ལ་འགྱུར་བ་ཕྱིན་པ་དང་། མང་ཚོགས་ཀྱི་དགོངས་པ་བཞེས་སྟངས་ཤིག་གི་དབང་གིས་ཐེངས་འདིར་མི་མང་པོ་ཞིག་འཛོམས་ཐུབ་མེད་པ། ད་ལྟ་ངྷ་ས་ས་གནས་གཞོན་ནུར་རྒྱུན་ལས་ ༤  ལས་མེད་པ་མ་ཟད་ཚོགས་གཙོའང་མེད་པའི་གནས་སྟངས་ཆགས་ཡོད་པ། མ་འོངས་པར་ཡང་གཞོན་ནུར་དཀའ་ངལ་རིམ་པར་འཕྲད་ངེས་ཡིན་ཡང་། གནས་སྟངས་གང་ལ་འཕྲད་ཀྱང་མུ་མཐུད་གདོང་ལེན་བྱ་རྒྱུའི་ཆོད་སེམས་བརྟན་པོ་ཡོད་ཚུལ་བརྗོད་སོང་། ཁོང་གིས་མུ་མཐུད་དུ་གཞོན་ནུའི་དམིགས་ཡུལ་གཙོ་བོ་༸གོང་ས་མཆོག་གི་བཀའ་གསུང་ཅི་སྒྲུབ་ཞུ་རྒྱུ་དེ་ཡིན་ཡང་། སྤྱི་ཚོགས་ནང་མི་ཁག་ཅིག་གིས་གཞོན་ནུའི་དམིགས་ཡུལ་ལ་འགལ་ཟླ་ཡིན་ཚུལ་བཤད་པ་དེ་ནོར་འཁྲུལ་ཞིག་ཡིན་པ་དང་། རྒྱ་གུང་ཁྲན་ལ་ཁ་གཏད་ལྕོག་རྒྱུ་དང་། བོད་པ་རང་གི་སྤྱི་ཚོགས་ཀྱི་ལས་དོན་གང་ཞིག་ཡིན་ཡང་། ༧གོང་ས་མཆོག་གི་དགོངས་གཞི་སྒྲུབ་ཀྱི་ཡོད་ཤག་གི་ཀུན་སློང་ཐོག་ནས་ཕྱག་ལས་གནང་གི་ཡོད་ཀྱང་། ཆབ་སྲིད་དམིགས་ཡུལ་གྱི་ཐོག་ནས་ང་ཚོས་སྔོན་མ་ནས་རང་བཙན་རྩོད་ཀྱི་ཡོད་པ་བཞིན་མུ་མཐུད་རང་བཙན་ལངས་ཕྱོགས་ལ་འགྱུར་བ་རྩ་བ་ཉིད་ནས་མེད་སྐོར་སོགས་བརྗོད་བྱུང་།

གཞོན་ནུའི་ཚོགས་གཙོ་བསྟན་འཛིན་འཇིགས་མེད་ལགས་ཀྱིས་ཐེངས་འདིའི་དུས་དྲན་དང་འབྲེལ་བའི་བསྒྲགས་གཏམ་སྒྲོགས་སྦྱང་གནང་དོན། འདས་པའི་ལོ་ངོ་བཅུ་ཕྲག་གཅིག་ཙམ་གྱི་རིང་དུས་འགྱུར་དང་ཕྱི་ནང་གི་རྒྱུ་རྐྱེན། དེ་བཞིན་གཞོན་ལྷན་དབུས་རྒྱུན་ནང་ཁུལ་གྱི་མཐུན་ལམ་དང་ཕྱག་ལས་གནང་ཕྱོགས་ཕྲན་བུ་ལ་བརྟེན་ནས་རིམ་པས་གཞོན་ནུའི་སྒྲིག་འཛུགས་ཀྱི་གནས་བབས་ལ་དོ་ཕོག་དང་ཕྱོགས་མཚུངས་བོད་དོན་འཐབ་རྩོད་ཀྱི་ནུས་པ་ཡང་ཉམས་ཞན་དུ་སོང་ཡོད། དེ་བས་ཀྱང་ཆེས་བློ་ཕམ་པ་ཞིག་ནི་རང་ཅག་བོད་འབངས་ལྷ་མི་ཀུན་གྱི་འདི་ཕྱི་གཉིས་ཀྱི་སྐྱབས་གནས་དམ་པ་༧གོང་ས་སྐྱབས་མགོན་ཆེན་པོ་མཆོག་ཐུགས་ཕམ་ཡོང་གཞིའི་གནད་དོན་ཡང་བྱུང་ཡོད། གནད་དོན་འདི་ནི་སྒྲིག་འཛུགས་བྱེ་བྲག་པ་ཞིག་གི་ཕམ་ཉེས་མ་ཡིན་པར་བོད་སྤྱི་པའི་ཕམ་ཉེས་ཤིག་དང་། བོད་དོན་འཐབ་རྩོད་ཀྱི་གྱོང་གུན་ཞིག རང་ཅག་གངས་ཅན་ལྷ་མི་ཀུན་གྱི་སྐྱོ་གནས། ལྷག་བསམ་ཅན་གྱི་གཞོན་ལྷན་ཚོགས་མི་ཀུན་གྱི་བློ་ཡུལ་ལ་གཤོང་དཀའ་བའི་བློ་འགྱོད་ཅིག་ཡིན་སྟབས། སྐབས་ ༡༥ པའི་གཞོན་ལྷན་ཚོགས་ཆེན་གྱི་ངོས་ནས་དང་། སྐབས་ ༡༥ པའི་དབུས་རྒྱུན་ངོས་ནས་ཀྱང་གཞོན་ལྷན་སྒྲིག་འཛུགས་ཀྱིས་༧མགོན་པོ་མཆོག་ལ་ཐུགས་ཕམ་བྱུང་གཞིའི་མ་ཤེས་རྨོངས་པའི་དབང་གིས་ལས་ངན་བསགས་ཡོད་པར་གདུང་ཤུགས་དྲག་པོའི་ངང་འགྱོད་བཤགས་བཟོད་གསོལ་དང་། སླད་མར་ཡང་འདི་རིགས་མི་འབྱུང་བའི་ཁས་ལེན་དམ་བཅའ་གཙང་མ་ཞུས་ཏེ་༧གོང་ས་མཆོག་ལྷ་དགོངས་གསལ་དྭངས་ཡོང་བའི་མཚན་འཁོད་ཞུ་སྙན་ཕུལ་ཡོད། ཅེས་བསྒྲགས་སོང་།

བསྒྲགས་གཏམ་ནང་མུ་མཐུད་དོན། སྤྱི་ཚོགས་ནང་༧གོང་ས་མཆོག་གི་བཀའ་དགོངས་ཇི་བཞིན་མ་རྟོགས་པའི་དབང་གིས་ལབ་གླེང་སྣ་ཚོགས་དང་དགོངས་ཚུལ་སྣ་ཚོགས་ཞིག་བྱུང་ནས་རང་བཙན་གྱི་དམིགས་ཡུལ་བཟུང་བ་འདི་༧གོང་ས་མཆོག་ཐུགས་ཕམ་ཡོང་གཞིར་ངོས་འཛིན་བྱས་པ་ཡང་བྱུང་ཡོད། གནད་དོན་དེར་སྐབས་༡༥པའི་ཚོགས་ཆེན་ཐོག་ཏུ་དཔལ་ལྡན་དགའ་ལྡན་ཕོ་བྲང་ཡིག་ཚང་གི་སྐུ་ཚབ་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག་གིས་ཡང་དག་པའི་མང་གཙོའི་ལམ་སྲོལ་ནང་ཆབ་སྲིད་ཀྱི་ལྟ་གྲུབ་འདྲ་མིན་བྱུང་རྒྱུ་དེ་གཞི་རིམ་གྱི་ཐོབ་ཐང་དང་ལས་འགན་གཉིས་ཀ་ཆགས་ཀྱི་ཡོད་རེད་ཅེས་དང་། སྐྱབས་མགོན་རིན་པོ་ཆེས་ག་དུས་ཡིན་ན་ཡང་གཞོན་ནུ་ལྷན་ཚོགས་ཀྱིས་རང་བཙན་གྱི་ལངས་ཕྱོགས་བཟུང་ན་འགྲིག་གི་མ་རེད། གཞོན་ནུ་ལྷན་ཚོགས་ཀྱི་རང་བཙན་གྱི་ལངས་ཕྱོགས་ལ་འགྱུར་བ་གཏོང་དགོས་རེད་ཟེར་ནས་ནམ་ཡང་བཀའ་གནང་ཡོད་མ་རེད། མ་འོངས་པར་ཡང་བཀའ་གནང་གི་མ་རེད། ཅེས་དང་། ལྷག་པར་དུ་ཉེ་ཆར་བཀའ་བློན་ཁྲི་ཟུར་མཆོག་གིས། དབུ་མའི་ལམ་མི་མང་ལས་འགུལ་ཁང་གི་འགན་འཛིན་ལྷན་ཚོགས་སྐབས་སུ་ “དབུ་མའི་ལམ་གྱི་སྲིད་ཇུས་ལ་མོས་མཐུན་དང་རྒྱབ་སྐྱོར་མི་གནང་མཁན་ཚོར། རྒྱལ་བ་རིན་པོ་ཆེའི་བཀའ་སྒྲུབ་ཀྱི་ཡོད་མ་རེད། རྒྱལ་བ་རིན་པོ་ཆེའི་བཀའ་དང་འགལ་གྱི་ཡོད་རེད་གསུངས་པ་དེ། དངོས་ཡོད་གནས་ཚུལ་དང་མཐུན་པ་ཞིག་རྩ་བ་ནས་ཆགས་ཀྱི་ཡོད་མ་རེད། ཅེས་དང་། ད་དུང་ཁོང་གིས་ “དབུ་མའི་ལམ་གྱི་སྲིད་ཇུས་ལ་རྒྱབ་སྐྱོར་བྱེད་མཁན་ཡིན་ན་ཡང་འདྲ། རང་བཙན་མངོན་འདོད་ཁུར་མཁན་ཡིན་ན་ཡང་འདྲ། སུ་ཡིན་ན་ཡང་ད་ལྟའི་རྒྱ་ནག་མི་མང་སྤྱི་མཐུན་རྒྱལ་ཁབ་ནས་བོད་ཀྱི་ནང་ལ་སྲིད་ཇུས་སྐྱོང་སྟངས་དེ་འགྲིག་གི་མི་འདུག དེར་འགྱུར་བ་གཏོང་དགོས་ཀྱི་འདུག་ཟེར་བ་དེ་གཅིག་གྱུར་རང་རེད། གང་ལྟར་ད་ལྟའི་གནས་བབས་འདིར་འདོད་པ་མ་ཁེངས་པ་ཞིག་དང་། ད་ལྟའི་གནས་བབས་དེར་འགྱུར་བ་གཏོང་དགོས་པ་དེ་ཕྱོགས་གཉིས་ཀའི་མངོན་འདོད་རེད། དེར་བརྟེན་ཕྱོགས་གཉིས་ཀས་ག་རེ་འདོད་ཀྱི་ཡོད་ཟེར་ན། ད་ལྟ་བོད་ཆོལ་ཁ་གསུམ་གྱི་མང་ཚོགས་ཀྱི་མྱང་བཞིན་པའི་སྡུག་བསྔལ་དེ་དག་སེལ་ཐབས་དང་། བོད་ལ་དགོས་ངེས་ཀྱི་རང་དབང་ཡོང་རྒྱུའི་མངོན་འདོད་དེ་གཅིག་པ་རེད། དེ་གཉིས་ཀའི་བསྒྲུབ་བྱ་དེ་ག་རེ་རེད་ཟེར་ན། བོད་རིགས་མང་ཚོགས་ཀྱི་བདེ་དོན་དེ་རེད། བོད་པའི་བདེ་དོན་ལ་དམིགས་པ་དེ་ཁྱད་པར་མེད་པ་ཞིག་རེད། རྒྱ་གར་གྱི་རང་བཙན་རྩོད་པའི་སྐབས་སུ་ཡང་རྒྱ་གར་གྱི་དབུ་ཁྲིད་རྣམ་པ་ཚོའི་ནང་དགོངས་པ་བཞེས་ཚུལ་གཉིས་པོ་དེ་གསལ་པོ་ཞེ་དྲག་རེད། བདག་ཉིད་ཆེན་པོ་གྷན་དྷིས་ག་དུས་ཡིན་ན་ཡང་རང་སྐྱོང་གི་བཀའ་མོལ་མ་གཏོགས་རང་བཙན་གྱི་བཀའ་མོལ་གནང་གི་ཡོད་མ་རེད། ནེ་རོའོ་ཡིས་མཚོན་པས་དབུ་ཁྲིད་གཞན་པ་དེ་དག་གིས་རང་བཙན་གྱི་བཀའ་མོལ་མ་གཏོགས་རང་སྐྱོང་གི་བཀའ་མོལ་གནང་གི་ཡོད་མ་རེད” ཅེས་དཔེ་མཚོན་དང་བཅས་པའི་ཐོག་ནས་གསལ་བཤད་གནང་ཡོད་པ་སོགས་ལས་བོད་ཀྱི་གཞོན་ནུ་ལྷན་ཚོགས་ནས་རང་བཙན་གྱི་དམིགས་ཡུལ་བཟུང་བ་དེ་༧གོང་ས་མཆོག་ཐུགས་ཕམ་ཡོང་གཞི་དང་། ༧གོང་ས་མཆོག་གི་བཀའ་དང་འགལ་གྱི་ཡོད་པ་ཞིག་ཆགས་མེད་པ་གསལ་པོར་བསྟན་ཡོད་པས་དེ་འབྲེལ་གྱི་བཀའ་སློབ་དགོངས་དོན་ཁག་གཞོན་ལྷན་ཚོགས་མི་ཀུན་དང་། རྒྱལ་གཅེས་མི་མང་ཡོངས་ནས་མཁྱེན་རྟོགས་ཀྱིས་བོད་རིགས་ནང་ཁུལ་ལང་ཕྱོགས་ཀྱིས་རྐྱེན་པས་འགལ་ཟླ་དང་སྤྱི་ཚོགས་ཁག་གཉིས་སུ་གྱེས་དགོས་དོན་ནམ་ཡང་མེད། ཅེས་སོགས་བཀོད་འདུག

བསྒྲགས་གཏམ་གྱི་མཇུག་ཏུ། “ གཞན་ཡང་གོ་སྐབས་འདི་བརྒྱུད་ནས་ཞུ་རྒྱུར།  བོད་མིའི་སྒྲིག་འཛུགས་ནས་བོད་མི་རིགས་ཀྱི་བདེ་སྐྱིད་དང་རང་དབང་། ལྷག་པར་བོད་མིའི་སྐད་ཡིག་རིག་གཞུང་དང་བཅས་པ་མྱུར་སྐྱོབས་ཀྱི་དགོངས་གཞིའི་ཐོག་ནས་བོད་ཀྱི་དཀའ་རྙོག་སེལ་ཐབས་ཀྱི་འབད་བརྩོན་གནང་བཞིན་ཡོད་པར་བོད་ཀྱི་གཞོན་ནུ་ལྷན་ཚོགས་ཀྱི་ངོས་ནས་བཅོས་མིན་གྱི་གུས་བརྩི་ཞུ་བཞིན་ཡོད་པ་གསལ་སྟོན་བྱ་རྒྱུ་དང་ཆབས་གཅིག  བོད་རྒྱལ་ཁབ་དང་མི་རིགས་ཀྱི་བདེ་དོན་དང་རང་དབང་ཆེད་དུ་རང་ལུས་མེར་བསྲེག་གཏོང་མཁན་གྱི་རྒྱལ་གཅེས་དཔའ་བོ་དཔའ་མོ་ཡོངས་ཀྱི་སྙིང་སྟོབས་དང་མཛད་རྗེས་ལ་གུས་བརྩི་ཚད་མེད་ཞུ་རྒྱུ་དང་།  སེམས་ཅན་གཞན་སུ་གཅིག་ལ་ཡང་འཚེ་བ་མེད་པར་རང་ཉིད་ཁོ་ནིའི་ལུས་སྲོག་མི་རིགས་ཤིག་གི་རང་དབང་དང་བདེ་སྐྱིད་ཀྱི་ཆེད་དུ་མེ་རུ་སྒྲོན་པའི་འཐབ་རྩོད་ཀྱི་ལས་འགུལ་འདི་ནི་འཚེ་མེད་ཞི་བའི་བོད་ཀྱི་བདེན་དོན་འཐབ་རྩོད་ཀྱི་ལོ་རྒྱུས་ནང་བླ་ན་མེད་པའི་མཛད་རྗེས་ཤིག་དང་འགྲན་ཟླ་མེད་པའི་སྙིང་སྟོབས་ཤིག་ལ་ངོས་འཛིན་ཞུ་བཞིན་ཡོད་པ་གསལ་སྟོན་བྱ་རྒྱུ་ཡིན” ཞེས་བཀོད་འདུག

མཇུག་ཏུ་སྐུ་མགྲོན་གཙོ་བོ་སྐུ་ཞབས་བེ་ཇེ་སིན་གྱིས། “ ལོ་ངོ་ ༤༤ རིང་བོད་ཀྱི་འཐབ་རྩོད་ལས་འགུལ་མགོ་བརྩམས་ཐུབ་པ་ཧ་ཅང་བློ་སྟོབས་ཆེན་པོ་དང་མུ་མཐུད་ལས་འགུལ་སྤེལ་རྒྱུ་གལ་ཆེན་པོ་རེད། སྤྱི་ཚོགས་ནང་ལྟ་བ་ལངས་ཕྱོགས་འདྲ་མིན་ཡོང་སྲིད་པ་ཞིག་རེད། ཡིན་ནའང་མཐར་ཐུག་གི་མངོན་འདོད་སྒྲུབ་པར་ལངས་ཕྱོགས་ལ་ཁྱད་པར་གང་ཡང་མེད། བོད་པའི་མངོན་འདོད་སྟེ་བོད་པར་རང་དབང་འཐོབ་རྒྱུར་ཐག་རིང་པོ་མི་འགོར་བར་ངས་ཡིད་ཆེས་བྱེད་ཀྱི་ཡོད། རྒྱ་གར་མི་རིགས་ས་ཡ་མང་པོས་ཁྱེད་རང་ཚོའི་རང་དབང་འཐབ་རྩོད་ཐོག་མངོན་གསལ་གྱིས་རྒྱབ་སྐྱོར་མེད་ཀྱང་ཁོང་ཚོས་སེམས་ཁུར་བྱེད་ཀྱི་ཡོད་པ་རེད། ད་ལྟའི་བར་བོད་ནང་དུ་བོད་མིའི་རང་དབང་གི་ཆེད་བོད་མི་༡༢༡ གིས་རང་ལུས་མེར་བསྲེགས་གནང་ཡང་རྒྱལ་སྤྱིའི་ཚོགས་སྡེ་ཁག་གིས་རྣམ་འགྱུར་གང་ཡང་སྟོན་གྱི་མེད་པ་ནི་སྐྱུག་བྲོ་བའི་བྱེད་སྟངས་ཤིག་ཆགས་ཡོད། རྒྱ་གར་རང་བཙན་འཐབ་རྩོད་ནང་ལངས་ཕྱོགས་འདྲ་མིན་ཡོད། དེ་ལྟར་བོད་མི་ཚོས་ཀྱང་ལངས་ཕྱོགས་འདྲ་མིན་ཐོག་རང་དབང་འཐབ་རྩོད་བྱེད་དགོས” ཞེས་གསུང་སོང་། 

གསར་འགོད་པ། ལྷ་སྐྱབས་རྒྱལ།