སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། ཟླ་འདིའི་ཕྱི་ཚེས་ ༨ ནས་ ༩ བར་གྱི་ཉིན་གཉིས་རིང་ཕྱི་གླིང་བོན་མཐུན་འབྲེལ་ལྷན་ཚོགས་ཀྱི་ཚོགས་འདུ་ཐེངས་དང་པོ་ཨ་རིའི་ཤར་ཕྱོགས་སུ་ཡོད་པའི་བོན་ཚོགས་ལིག་མིན་རྐྱས་གོ་སྒྲིག་དང་མཐུན་སྦྱོར་འོག་ཚོགས་ཡོད་འདུག་ལ།ཚོགས་ཐོག་ཏུ་༸སྐྱབས་རྗེ་སྨན་རིའི་དཔོན་སློབ་ཡང་སྟོན་འཕྲིན་ལས་ཉི་མ་རིན་པོ་ཆེ་མཆོག་དང་།༸དཔལ་ལྡན་ཁྲི་བརྟན་ནོར་བུ་རྩེའི་མཁན་པོ་ལུང་རྟོགས་བསྟན་པ་གཡུང་དྲུང་མཆོག་གིས་གཙོས། དགེ་བཤེས་བསྟན་འཛིན་དབང་རྒྱལ་དང་། བླ་ཁྲི་མཁན་པོ་དགེ་བཤེས་ཉི་མ་གྲགས་པ། ཌོར་ཐང་མཁན་པོ་བསྟན་འཛིན་དར་རྒྱས། དགེ་བཤེས་གཡུང་དྲུང་བློ་གསལ། དགེ་བཤེས་བསྟན་འཛིན་ཡང་སྟོན། དགེ་བཤེས་བྱ་འཕུར་ལྷུན་གྲུབ་རྒྱ་མཚོ། བླ་མ་ཁྱིམ་གསར། ལྷ་རྗེ་ཉི་མ་བསམ་འཕེལ་བཅས་ལྷན་འཛོམས་ཀྱིས་ནུབ་ཕྱོགས་སོགས་སུ་གཡུང་དྲུང་བོན་གྱི་བསྟན་པ་འཛིན་སྐྱོང་སྤེལ་གསུམ་གྱི་ནུས་པ་སྔར་ལས་དར་སྤེལ་གཏོང་ཐབས་སྐོར་ལ་གཙོ་བོ་དོན་ཚན་ལྔའི་ཐོག་གྲོས་བསྡུར་དང་། ལྷན་ཚོགས་ཀྱི་སློབ་སྟོན་པ་དང་རྒྱུན་ལས་གསར་འདེམས་བཅས་གནང་ཡོད་པ་མ་ཟད། ཚོགས་ཐེངས་གཉིས་པ་ཕྱི་ལོ་ ༢༠༡༤ ལོའི་ཟླ་བ་ ༩ ཚེས་ ༡༧ ནས་ ༢༠ བར་ཨ་རིའི་ནུབ་ཕྱོགས་ཀྱི་གྲོང་ཁྱེར་སེན་ཧྥི་རན་སི་ཀོ་ (San Francisco) ཉེ་ཁུལ་གྱི་རྒྱལ་གཤེན་བོན་ཚོགས་སུ་འཚོགས་གཏན་ཁེལ་ཡོད་འདུག
ཐེངས་འདིའི་ཚོགས་འདུའི་གྲོས་གཞི་ཁག་ལས་དང་པོ།༸ཞྭ་དཀར་བསྟན་པའི་གཙུག་རྒྱན་༸སྐྱབས་རྗེ་སྨན་རིའི་ཁྲི་འཛིན་ལུང་རྟོགས་བསྟན་པའི་ཉི་མ་རིན་པོ་ཆེ་མཆོག་དང་། གསང་གསུམ་བོན་གྱི་མཛོད་འཛིན་༸སྐྱབས་རྗེ་སྨན་རིའི་ཡོངས་འཛིན་སློབ་དཔོན་བསྟན་འཛིན་རྣམ་དག་རིན་པོ་ཆེ་རྣམ་གཉིས་ཀྱི་ཐུགས་རྗེའི་བཀའ་དྲིན་ལ་བརྟེན་ནས་གཡུང་དྲུང་བོན་གྱི་བསྟན་པ་འདི་ཉིད་འཛམ་གླིང་ཤར་ནུབ་ཀྱི་ཕྱོགས་ཀུན་ཏུ་ལོ་ནས་ལོར་མི་རྣམས་ཀྱིས་དོ་སྣང་བྱེད་ཡུལ་དུ་གྱུར་བ་ནི་བརྗོད་མི་དགོས་ཤིང། ལྷག་པར་དུ་དུས་རབས་ཉེར་གཅིག་པའི་སྐབས་འདིར་ནུབ་ཕྱོགས་སྤྱི་ཚོགས་ཀྱི་ཁྲོད་དུའང་མི་རྣམས་ཀྱིས་དོ་སྣང་ཆེན་པོ་བྱེད་ཡུལ་ཞིག་ཏུ་གྱུར་ཡོད། རྒྱུ་མཚན་འདི་དག་ལ་བརྟེན་ནས། འཛམ་གླིང་ཤར་ནུབ་ཀྱི་ཕྱོགས་ཀུན་ཏུ་བོན་གྱི་དགེ་བཤེས་བླ་སྤྲུལ་མང་པོ་ཞིག་གིས་བོན་ཁྲིད་དང་བོན་ཚོགས་འདུས་སྡེ་སོགས་ཀྱི་ཡོ་ལང་ཇེ་མང་ནས་ཇེ་མང་དུ་འཕེལ་བཞིན་ཡོད། དེར་བརྟེན་སྤྱི་ཚོགས་གསར་པ་ཞིག་དང་སྐད་ཡིག་རིག་གཞུང་མི་འདྲ་བ་ཞིག་གི་སྤྱི་ཚོགས་སུ་དགེ་རྒན་དང་བོན་ཚོགས་ཀྱི་དབུ་ཁྲིད་རྣམས་པ་ཚོས་བོན་བསྟན་ངོ་སྤྲོད་བྱེད་ཕྱོགས་ཇི་དགེ་དང། དེ་བཞིན་ནུབ་ཕྱོགས་སུ་ཡོད་པའི་གཡུང་དྲུང་བོན་གྱི་བོན་ཚོགས་ཁག་གི་དབུ་ཁྲིད་དགེ་རྒན་རྣམས་པ་ཕན་ཚུན་ཐུགས་མཐུན་དམ་གཙང་ཡིན་པ་སྨྲོས་མ་དགོས་མོད། འོན་ཀྱང་སྐབས་རེར་ཐུགས་གཡེང་དང་གཞན་གྱི་ཟེར་སྒྲོས་ཀྱི་དབང་གིས་བླ་མ་ནང་ཕན་ཚུན་དང་དེ་བཞིན་སློབ་མ་ནང་ཁུལ་དབར་ལ་ཐུགས་དོགས་དང་དམ་སེལ་སོགས་འབྱུང་སྲིད་པས་སྔོན་ཚུད་ནས་ཕན་ཚུན་ཀུན་གྱིས་བསྟན་པ་དང་འགྲོ་བའི་དོན་ལ་དགོངས་པ་རྒྱ་ཆེར་བཞེས་རྒྱུ་ཤིན་ཏུ་ནས་གལ་ཆེ་བ་ཡིན་པ་མ་ཟད། གཞན་ཡང་བླ་སྤྲུལ་དགེ་བཤེས་ཁག་ཕན་ཚུན་གདན་ཞུས་ཀྱིས་སློབ་ཚོགས་ནང་ཁུལ་དུ་བོན་ཁྲིད་ཀྱི་འབྲེལ་འཇོག་གནང་སྟེ་སློབ་མ་ནང་ཁུལ་ཡང་ཐུགས་མཐུན་དམ་གཙང་དང་འབྲེལ་བ་སྔར་ལས་ཟབ་ཏུ་གཏོང་རྒྱུ།
གཉིས་པ། ཕྱི་གླིང་དུ་གནས་བཞུགས་བོན་ཚོགས་རྣམས་ལ་སྤྱི་རྒྱུགས་ཞལ་འདོན་རྒྱས་འབྲིང་བསྡུས་གསུམ་དུ་ཕྱེས་ཏེ་བཀོད་བསྒྲིག་བྱ་རྒྱུ་དང། 
དེ་དག་ཕྱི་ཡི་སྐད་ཡིག་ཏུ་ཕབ་བསྒྱུར་དང་ཞལ་འདོན་གྱི་གདངས་དབྱངས་སོགས་གཅིག་གྱུར་ཡོང་ཆེད་དུ་འོད་སྡེར་ (CD) ལྷན་སྦྱར་གྱིས་གཡུང་དྲུང་བོན་ཚོགས་ཀུན་ཏུ་འགྲེམས་སྤེལ་བྱ་རྒྱུ། གཞན་ཡང་སྟོན་པ་སངས་རྒྱས་མཆོག་དང་རྗེ་མཉམ་མེད་ཆེན་པོའིི་དུས་ཆེན་སྐབས་འབྲེལ་ཡོད་བོན་ཚོགས་ནང་ཁུལ་ཤིས་ཚིག་འབུལ་རེས་དང་། སྐབས་བསྟུན་དུས་ཆེན་གྱི་ངོ་སྤྲོད་སྟབས་བདེ་ཞིག་གོ་སྒྲིག་གིས་སློབ་ཚོགས་དང་བོན་གྱི་ལྷ་སྡེ་དགའ་ཉེ་ཁག་ལ་མཛད་རྣམ་བསྡུས་པ་རེ་དབྱིན་ཡིག་སོགས་ཕྱི་ཡི་སྐད་ཡིག་ཏུ་བསྒྱུར་ཏེ་འགྲེམས་སྤེལ་གནང་བ་དང་འབྲེལ་དགེ་སྐུལ་གནད་སྨིན་འབྱུང་ཐབས་ལ་འབད་རྒྱུ།
གསུམ་པ། མ་འོངས་པར་ཚོགས་སྡེ་འདི་བརྒྱུད་དེ་བོད་དང་ཧི་མ་ལ་ཡའི་རི་རྒྱུད་གཙོས་པའི་བོན་པོ་རྣམས་ལ་སྐབས་བསྟུན་རོགས་འདེགས་གང་ནུས་གནང་ཐབས་དང་། གཞན་ཡང་ཕྱི་རྒྱལ་ཁུལ་དུ་གསར་དུ་འབྱོར་བའི་བོན་པོ་རྣམས་ལ་བོན་ཚོགས་ཁག་དང་འབྲེལ་ཡོད་ནས་ལྷག་བསམ་ཟོལ་མེད་ཐོག་རྒྱུས་མངའི་ལམ་སྟོན་དང་མཐུན་སྦྱོར་གང་ཐུབ་གནང་གལ། མ་ཟད་ས་གནས་སོ་སོའི་བོན་ཚོགས་ཁག་ནས་ཐུགས་འགན་རྐང་བཞེས་ཀྱིས་ནུབ་ཕྱོགས་ཁྲོད་བོན་པོ་གང་ཡོད་ལ་འབྲེལ་ལམ་གནང་གལ་ཆེ་ཁར་དེ་དག་གི་འབྲེལ་ཡུལ་ཁ་བྱང་སོགས་བསྡུ་རུབ་ཀྱིས་དུས་ནས་དུས་སུ་འབྲེལ་ལམ་གནང་ཐབས་གནང་རྒྱུ།
བཞི་པ། སྤྱིར་གཡུང་དྲུང་བོན་གྱི་སྔར་སྲོལ་ཉམས་མེད་རྒྱུན་སྐྱོང་གནང་རྒྱུ་གཙོར་བཟུང་དང་། དེ་བཞིན་བསྟན་པ་སྤེལ་བར་འབད་རྒྱུ་ལྷོད་མེད་གནང་རྒྱུ་ནི་སྨོས་མེད་ཀྱི་ལས་འགན་ལགས་ཤིང་། ཡུལ་དུས་དང་བསྟུན་༸སྟོན་པ་སངས་རྒྱས་ཀྱིས་ཀྱང་གདུལ་བྱ་སོ་སོར་བོན་གྱི་སྒོ་མོ་བརྒྱད་ཁྲི་བཞི་སྟོང་གསུངས་ཡོད་པས་དུས་རབས་ཉེར་གཅིག་པའི་ནང་ཕྱི་རྒྱལ་ཡུལ་གྲུ་ཁག་ཏུ་བོན་ཁྲིད་གནང་རྒྱུར་སློབ་མའི་གོ་སྟོབས་དང་དགོས་པ་རྒྱུ་མཚན་ལ་བརྟེན་མཐའ་གཉིས་སུ་མ་ལྷུང་བ་གནང་རྒྱུ་དང་། སྲོལ་རྒྱུན་དང་དེང་རབས་ཀྱི་ཁྲིད་སྲོལ་གང་ཡིན་སློབ་མ་རྣམས་ལ་ངོ་སྤྲོད་གསལ་བཤད་གནང་རྒྱུ་གལ་ཆེ། བོན་ཁྲིད་གནང་སྐབས་ཀྱང་ཚིག་སྦྱོར་བེད་སྤྱོད་ཐད་དགོངས་པ་ཆེར་བཞེས་ཀྱིས་གལ་ཆེའི་ཐ་སྙད་ཁག་གང་ཐུབ་བོད་སྐད་དམ་ཡང་ན་ཞང་ཞུང་གི་ཐ་སྙད། དེ་མིན་དབྱིན་སྐད་སོགས་སྐད་རིགས་གཞན་གྱི་ཐ་སྙད་གང་འགབ་བཀོལ་ཐབས་གནང་སྟེ་ལེགས་སྦྱར་གྱི་ཐ་སྙད་བེད་སྤྱོད་གང་ཉུང་ཉུང་གནང་ཐབས་བྱ་རྒྱུ་བཅས་ཡིན་འདུག
གསར་འགོད་པ། དོན་གོ
བོན་པོ་ཞེས་པའི་ཐ་སྙད་ཀྱི་སྐོར་བསམ་ཚུལ་འགའ་ཞིག་གླེང་བ།
སྤྱིར་བོན་པོ་ཞེས་པའི་ཐ་སྙད་འདི་ནི། ལོ་ངོ་ཉིས་སྟོང་གི་གོང་ནས་བྱུང་བའི་བརྡ་ཆད་ཅིག་ཡིན་པ་མ་ཟད། དོན་གྱི་འཇུག་ཡུལ་ཡང་ཤིན་ཏུ་ནས་ཁྱབ་ཆེ་བ་ཞིག་ཡིན་པར་མངོན་སུམ་གྱིས་གྲུབ་སྟེ། ཡ་ཐོག་བོད་ཀྱི་རིག་གནས་སྤྱི་དང་། བྱེ་བྲག་ཏུ་ཆོས་ལུགས་ཡོད་ཚོད་ཀྱི་ཐ་སྙད་ཅིག་ཡིན། འོན་ཀྱང་དེ་སྔོན་མཁས་པའི་གོ་ས་ལ་ཤི་འཐམ་རོ་འཐམ་བྱེད་མཁན་རྣམས་ཀྱང་བོན་པོ་ཞེས་པའི་ཐ་སྙད་འདི་ནི། ཡ་ཐོག་བོད་ཀྱི་རིག་གནས་སྤྱི་དང་། བྱེ་བྲག་ཏུ་སྲོང་བཙན་ཡན་གྱི་བོད་ཀྱི་ཆོས་ལུགས་སྤྱིའི་ཐ་སྙད་ལ་མི་སེམས་པར། ཉི་མ་དང་ཟླ་བ་སོགས་ལ་ལྷ་རུ་འཁྲུལ་ཏེ་དམར་མཆོད་བྱེད་མཁན་གྱི་བརྡོལ་བོན་དང་། ལྷ་དབང་ཕྱུག་ཆེན་པོའི་རྗེས་སུ་འབྲངས་པའི་ཁྱབ་བོན་དང་། གཞི་ལམ་འབྲས་གསུམ་གྱི་རྣམ་བཞག་ཡོངས་རྫོགས་ལྡན་པའི་གཡུང་དྲུང་བོན་གྱི་ཐ་སྙད་ཡིན་ལུགས་སོགས་བཤད་དེ། མི་ཚེ་རྫོགས་བ་མ་གཏོགས་དོན་ལ་གནས་པའི་འགྲེལ་བཤད་རྒྱག་མཁན་གཅིག་རྐྱང་བྱུང་བར་མི་འདུག་མོད། སྤྱིར་མི་སུམ་ཅུ་ལ་སེམས་པ་སུམ་ཅུ་དང་། མཛོ་སུམ་ཅུ་ལ་རྭ་ཅོ་དྲུག་ཅུ་ཡོད་ཅེས་དཔེར་ལྟར། དེ་ཤོད་དང་འདི་མ་བཤད་ཅེས་པའི་ས་མཚམས་མེད་སྟབས། གང་ཟག་སོ་སོའི་ཞལ་གྱི་མཆུ་སྒྲོས་བར་ནས་དབུགས་དམ་ལྷོད་ཇི་ཙམ་གཏོང་མིན་དང་། མཆུ་གཉིས་དང་ལྕེ་རྩེ་ཇི་ཙམ་གཡོ་མིན་ལ་རང་དབང་ཡོད་པས་ན། གནད་ལ་མ་ཁེལ་པའི་བཤད་ཚུལ་འདི་དག་བྱུང་བ་ཡིན་པར་སོམ་ཉི་ཅི་ཡོད།
དེའི་ཕྱིར་བོན་པོ་ཞེས་ཐ་སྙད་འདི་ནི། དེང་སང་འུ་ཚོས་བཀོལ་སྤྱོད་བྱེད་བཞིན་པའི་ཆོས་ལུགས་ཞེས་པའི་ཐ་སྙད་འདི་དང་ཅི་མཚུངས་ཡིན། དཔེར་ན། དེང་སང་ཆོས་ལུགས་ཞེས་པའི་ཐ་སྙད་འདིའི་ཁྱབ་ཁོངས་སུ། ཁ་ཆེ་དང་། ཡེ་ཤུ། ཧིན་འདུ། ནང་པ་བཅས་ཚུད་ཡོད་པ་བཞིན་དུ། དེ་སྔོན་བོད་ཀྱི་རྒྱལ་ཕྲན་སིལ་མ་བཅུ་གཉིས་སམ་བཞི་བཅུའི་མས་ནས་མགོ་བཟུང་སྟེ། གནམ་གྱི་ཁྲི་སྲོང་བཙན་ཡན་ཆད་ཀྱི་ཆོས་ལུགས་སྤྱིའི་ཐ་སྙད་ཅིག་ཡིན་པར་གྲུབ་སྟེ། དཔེར་ན་ཤར་ནུབ་གཉིས་སུ་རྩོམ་རིག་ཅེས་པ་འདི་ཡང་། སྔར་རིག་གནས་སྤྱི་ཁོག་ཙམ་ལ་གོ་བ་མ་གཏོགས། ད་ཆར་བཀོལ་བྱེད་བཞིན་པའི་རྩོམ་རིག་དོན་ལ་མི་འཇུག་པ་དང། དེ་བཞིན་སྒྱུ་རྩལ་ཞེས་པའི་ཐ་སྙད་འདི་ཡང་སྒྱུ་རྩལ་སྟོན་བྱེད་ཀྱི་ཐབས་ལམ་ལ་མ་གཏོགས་སྒྱུ་རྩལ་གྱི་དོན་ལ་འཇུག་པ་མིན། དེ་ནས་ཕྱིས་སུ་དུས་རབས་བཅུ་བཞི་པ་དང་བཅོ་བརྒྱད་པའི་ནང་ནས་མགོ་བཟུང་སྟེ། རྩོམ་རིག་ཅེས་པའི་ཐ་སྙད་འདིའི་འཇུག་ཡུལ་འཕོ་འགྱུར་ཕྱིན་ནས་ད་ཆར་རྩོམ་རིག་གི་དོན་ལ་འཇུག་པ་དང་། སྒྱུ་རྩལ་ཞེས་པ་ཡང་རྗེས་སུ་སྒྱུ་རྩལ་གྱི་དོན་ལ་འཇུག་པ་བཞིན་དུ། བོན་པོ་ཞེས་པའི་ཐ་སྙད་འདི་ཡང་། གཡུང་དྲུང་བོན་ཙམ་གྱི་ཐ་སྙད་ཉིད་ལ་འགྱུར་བ་ཡིན་པས། བཙན་པོ་སྲོང་བཙན་དང་། མངའ་བདག་ཁྲི་སྲོང་། ཁྲི་རལ་པ་རྣམས་ཀྱིས་དེ་སྔོན་མེས་པོའི་ཆོས་ལུགས་ཅི་ཐུབ་བསྣུབས་ནས། རྒྱ་གར་གྱི་ཆོས་ལུགས་གསར་པ་ཤཱཀྱ་རིང་ལུགས་པའི་ཐེག་པ་ཆེ་ཆུང་སྔགས་དང་བཅས་པ་བོད་ལ་ནང་འདྲེན་བྱས་ཏེ་དར་འཕེལ་བཏང་བ་དང་། སྔར་བོན་པོ་ཞེས་པའི་བརྡ་ཆད་འདིའི་ཁྱབ་ཁོངས་སུ་གནས་པའི་ཆོས་ལུགས་ཡོངས་རྫོགས་བསྣུབས་ཏེ། མཐར་གཤེན་རབ་མེས་བོ་ཆེའི་རིང་ལུགས་ཙམ་གྱི་མ་གཏོགས་ཐམས་ཅད་རྩད་ནས་ཕམ་པར་བྱས་པ་དང་། མ་ཟད་གཤེན་རབ་མེ་བོ་ཆེའི་རིང་ལུགས་འཛིན་པའི་གཡུང་དྲུང་ཅེས་པ་འདི་ཉིད་མ་བསྣུབས་དགོས་དོན་དང་། ཆོས་ལུགས་གཞན་རྣམས་བསྣུབས་དགོས་པ་སོགས་ནི། རྩ་བའི་གྲུབ་མཐའ་དང་གཞུང་ལུགས་གཏིང་ཟབ་མོ་ཡོད་པའི་ཆོས་ལུགས་དེ་ལ། ཅུང་ཟད་ཀྱིས་གཅེས་སྤྲས་བྱས་ཁུལ་བགྱིས་ཏེ་མ་བསྣུབས་པ་དང་། གཞུང་ལུགས་མེད་པའི་ལུགས་སྲོལ་ཙམ་ལ་ཞེན་ནས་སྡོད་མཁན་དེ་དག་རྩ་མེད་དུ་བཟོས་པ་ཡིན་པར་སྣང།
དེས་ན་བོན་པོ་ཞེས་པའི་ཐ་སྙད་འདིའི་ཁྱབ་ཁོངས་སུ་གཏོགས་པའི་ཆོས་ལུགས་ཕལ་མོ་ཆེ་ནུབ་ཚར་དུས། བོན་ཞེས་པའི་ཐ་སྙད་འདིའི་དབང་ཆ་ཡོངས་རྫོགས་གཡུང་དྲུང་བོན་ལ་རག་པ་དང་། མ་ཟད་རྗེས་སུ་གཡུང་དྲུང་བོན་གྱིས་དེ་སྔོན་གཞུང་ལུགས་དང་གྲུབ་མཐའ་མེད་མཁན་ཆོས་ལུགས་ཡོངས་རྫོགས་ཐ་སྙད་འདིའི་ཁྱབ་ཁོངས་སུ་ཕུད་ནས། ཡ་ཐོག་གི་སྐབས་སུ་བརྡོལ་བོན་གྱི་ཆོས་ལུགས་མེད་ལུགས་དང་། ཁྱབ་བོན་གྱི་ཆོས་ལུགས་མེད་ལུགས་སོགས་བཤད་དེ། ཐ་སྙད་འདིའི་དབང་ཆ་བདག་བཟུང་དང་། ཆོས་ལུགས་ཙམ་གྱི་སྐད་དོད་བོན་པོ་ཞེས་པའི་ཐ་སྙད་འདིའི་སྐྱོན་དང་། ཉེས་པའི་ཆ་སོགས་ཇི་ཡོད་རྣམས་གཙང་སེལ་བྱེད་ཀྱིན་ཡོད།
དེ་ནས་བོན་པོའི་རྗེས་འབྲངས་ཕྱི་རབས་པ་རྣམས་ཀྱི་སྣང་ངོར་ཡ་ཐོག་གི་སྐབས་སུ་ཆོས་ལུགས་ཞེས་པའི་སྐད་དོད་ལ། བོན་པོ་ཡིན་པར་མ་གོ་ནས་བརྡོལ་བོན་དང་། ཁྱབ་བོན་གཉིས་ཀ་བོན་པོའི་གྲལ་ནང་མཐར་བསྐྲད་བཏང་བ་དང་། དེ་ནི་ཁོང་ཚོའི་བསམ་པར་སྟོན་པ་གཤེན་རབ་ལས་ཆད་པའི་བོན་པོའི་བརྒྱུད་པ་མཐའ་དག་བརྡོལ་བོན་དང་། ཁྱབ་བོན་གཉིས་ཀྱིས་དམའ་འབེབས་པར་བསམས་ཏེ། སྲོང་བཙན་ཡན་ཆད་ཀྱི་སྐབས་སུའང་གཡུང་དྲུང་བོན་ཞེས་པ་མ་གཏོགས། གཞན་བརྡོལ་བོན་དང་ཁྱབ་བོན་སོགས་མེད་ཅེས་བཤད་པ་ཡིན། དེའི་ཕྱིར་བོན་པོ་ཞེས་པའི་ཐ་སྙད་འདི་ནི་བོད་གདོད་མོའི་ཆོས་ལུགས་སྤྱི་ལ་ཁྱབ་པའི་བརྡ་ཆད་ཡིན་ཡང་། ད་ཆར་གཤེན་རབ་མེས་བོ་ཆེའི་རྗེས་སུ་འབྲངས་པའི་གཡུང་དྲུང་བོན་ཙམ་གྱི་ཐ་སྙད་ཁོ་ན་ལ་འགྱུར་བར་སྣང་ཞིང། དེ་ནི་དུས་ཚོད་འཕེལ་འགྲིབ་ཀྱི་དབང་གིས་སྤྱི་སྒྲ་བྱེ་བྲག་ལ་འཇུག་པའི་ཐ་སྙད་ཀྱི་གཤིས་སུ་གྲུབ་པར་སེམས་སོ།
འདི་དང་ཅི་མཚུངས་སུ་ཡིན་པའི་དུས་ཚོད་འཕེལ་འགྲིབ་དབང་གིས་ཐ་སྙད་ལ་འགྱུར་ལྡོག་འགྲོ་བ་ཤིན་ཏུ་ནས་མང་སྟེ། ད་ཆར་ཆབ་སྲིད་ཀྱི་དབང་ཆ་སྒེར་འཛིན་པ་རྣམས་ལ། བོད་པས་དམར་ཕྱོགས་ཞེས་པའི་མིང་འབོད་ཅེས་ཡོད་པ་བཞིན་ནོ། འོན་ཀྱང་དབང་ཆ་སྒེར་འཛིན་ཡིན་ཚད་ལ་དམར་ཕྱོགས་ཡིན་མི་དགོས་ཏེ། སྔར་ཨེ་ཊ་ལིའི་འགོ་འཛིན་པ་མ་སི་ལིང་ཉིད་ཀྱི་ཆབ་སྲིད་ལམ་ལུགས་དེ་ཕག་ཤིན་རྫིན་གྱི་རིང་ལུགས་ཡིན་པ་མ་ཟད། དབང་ཆ་སྒེར་འཛིན་དང་། རྡུག་རྩུབ་ཀྱི་ལམ་ལུགས་འདི་ལྟ་བུ་དེ་སྔོན་སའི་གོ་ལར་བྱུང་མྱོང་མེད་པ་དང་། འཇར་མུ་ནེའི་མགོ་འཛིན་པ་ཧི་ཊི་ལའི་ཆབ་སྲིད་ཀྱི་ལམ་ལུགས་ནག་རྫི་ཡིན་པ་དང་། དེའི་དབང་ཆ་ཇི་ལྟར་ཡིན་མིན་ཇེའུ་ཤེའི་མི་རིགས་ཀྱི་མནར་གཅོད་ལ་བལྟ་ཆོག་པ་དང་། འཇར་པན་གནམ་འོག་གོང་མའི་ཆབ་སྲིད་ཀྱི་ལམ་ལུགས་ཅི་འདྲ་ཡོད་མེད། འཇར་པན་གྱི་དམག་མི་དང་། འགོ་བྱེད་རྣམས་ཀྱིས་ནོར་འཁྲུལ་ཤོར་ཚེ་རང་ཤི་བརྒྱབ་དགོས་པ་སོགས་ལ་བལྟས་ན་ཤེས་ནུས་པ་དང་། ཨུ་རུ་སུའི་འགོ་འཛིན་པ་ལི་ཉིད་ཀྱི་ཆབ་སྲིད་ལམ་ལུགས་དེ་དམར་ཕྱོགས་ཡིན་པ་དང་། དེའི་བྱ་སྤྱོད་དང་མནར་གཅོད་ཇི་ལྟར་ཡོད་མེད། ད་ལྟ་འུ་ཚོས་ཤེས་བཞིན་པ་ཡིན་པར་མ་ཟད། འདི་དག་གི་ཆབ་སྲིད་ལམ་ལུགས་དེ་དབང་ཆ་སྒེར་འཛིན་ཡིན་པར་མཚུངས་ཀྱང་། ད་དུང་ངོ་བོ་དང་བྱེད་ལས་མང་པོའི་ས་ནས་ཁྱད་པར་ཆེ་ཞིང་། ད་ཆར་དེ་རྣམས་ནུབ་སྟེ་དབང་ཆ་སྒེར་འཛིན་པའི་ཐ་སྙད་འདི་ཉིད་དམར་ཕྱོགས་རང་ལ་འཇགས་པ་བཞིན་དུ། དུས་ཚོད་འཕེལ་འགྲིབ་ཀྱི་དབང་གིས་མིང་དང་ཐ་སྙད་བརྡ་ཆད་སོགས་ལ་འགྱུར་ལྡོག་འགྲོ་བ་ཧ་ཅང་མང་ལ། དེ་བཞིན་འབྱུང་འགྱུར་ཆོས་ལུགས་ཕལ་མོ་ཆེ་ནུབ་ནས། ཆོས་ལུགས་ཞེས་པའི་ཐ་སྙད་འདི་ཡང་ཡེ་ཤུ་དང་། ཁ་ཆེ་གང་རུང་གི་མིང་ལ་འགྱུར་བར་སོམ་ཉི་མི་དགོས་པ་དང། མ་ཟད་བོད་བརྒྱུད་ནང་དོན་གྱི་གྲུབ་མཐའ་ས་སྐྱ། བཀའ་བརྒྱུད། ཇོ་ནང་བཅས་རིམ་གྱིས་ནུབ་སྟེ། བོད་བརྒྱུད་ནང་དོན་ཞེས་པའི་ཐ་སྙད་འདི་ཡང་། ཅུང་ཕྱི་ཙམ་དུ་ལྷག་ཁུལ་བྱེད་པའི་ཆོས་བརྒྱུད་བྱེ་བྲག་རྙིང་མ་དང་། དགེ་ལུགས་གང་རུང་གི་མིང་ལ་འགྱུར་བར་བཤད་དུ་ཅི་དགོས།
འདབ་པ་ཚེ་དབང་མགོན་པོས།