དུས་ཚོད་ངེས་མེད་ཀྱི་ཟས་བཅད་ལས་འགུལ།

བོད་རིགས་གཞོན་སྐྱེས་ལས་འགུལ་བ་ཤེས་རབ་ཚེ་རྡོར་ལགས་ཀྱིས་ལྡི་ལི་ཇན་ཏར་མན་ཏར་ས་གནས་སུ་དུས་ཚོད་ངེས་མེད་ཀྱི་ཟས་བཅད་ངོ་རྒོལ་གནང་སྟེ། དེ་རིང་ཉིན་གཉིས་པ་འགྲོ་བཞིན་ཡོད་འདུག

ཁ་སང་ཕྱི་ཚེས་ ༢༤ ཉིན་གྱི་སྔ་དྲོའི་ཆུ་ཚོད་ ༡༠ ཐོག ལྡི་ལིར་གནས་སྡོད་བོད་རིགས་གཞོན་སྐྱེས་ལས་འགུལ་བ་ཤེས་རབ་ཚེ་རྡོར་ལགས་ཀྱིས། འཛམ་གླིང་མཉམ་འབྲེལ་རྒྱལ་ཚོགས་དང་རྒྱལ་སྤྱིའི་ཚོགས་སྡེ་ཁག་ལ་བོད་ནང་གི་འགྲོ་བ་མིའི་ཐོབ་ཐང་གནས་སྟངས་ལ་གཟིགས་རྟོག་གནང་རྒྱུའི་འབོད་སྐུལ་ཞུ་ཆེད། རྒྱལ་ས་ལྡི་ལིའི་ཇན་ཏར་མན་ཏར་(Jantar Mantar) ས་གནས་སུ་དུས་ཚོད་ངེས་མེད་ཀྱི་ཟས་བཅད་ངོ་རྒོལ་ལས་འགུལ་ཞིག་མགོ་འཛུགས་གནང་ཡོད་པ་དང་། དེ་རིང་ཟས་བཅད་ངོ་རྒོལ་གྱི་ཉིན་གཉིས་པ་འགྲོ་བཞིན་ཡོད་འདུག

འདིའི་ཐད་གསར་འགོད་པས་ཁ་པར་བརྒྱུད་ཤེས་རབ་ཚེ་རྡོར་ལགས་སུ་བཅར་འདྲི་བྱས་པར། ཁོང་གིས་ཐེངས་འདིར་ཇན་ཏར་མན་ཏར་ས་གནས་སུ་ཟས་བཅད་ངོ་རྒོལ་མགོ་འཛུགས་གནང་དོན། ཁ་སང་ཕྱི་ཚེས་ ༢༤ ཉིན་མཉམ་འབྲེལ་རྒྱལ་ཚོགས་རྩ་ཁྲིམས་གཏན་འབེབས་བྱས་པའི་ཉིན་མོ་ཡིན་པ་དང་། རྒྱལ་ཚོགས་སྒྲིག་འཛུགས་ཀྱི་ངོས་ནས་རྩ་ཁྲིམས་ནང་འགྲོ་བ་མིའི་རང་དབང་ཐོབ་ཐང་ལ་སྲུང་སྐྱོབ་བྱ་རྒྱུའི་གཏན་འབེབས་བྱས་ཡོད་ཀྱང་། ད་ལྟའི་བར་བོད་ནང་རྒྱལ་གཅེས་དཔའ་བོ་དཔའ་མོ་ ༡༢༡ རང་ལུས་མེར་བསྲེཊ་དང་། རྒྱ་ནག་གཞུང་གིས་བོད་མི་ཚོར་གང་བྱུང་འཛིན་བཟུང་བཙོན་འཇུག་དང་ཁྲིམས་ཆད་བྱེད་ཀྱིན་པའི་ཐད་རྒྱལ་ཚོགས་དང་རྒྱལ་སྤྱིའི་སྲིད་གཞུང་ཁག ཚོགས་པ་དང་མི་སྒེར་བཅས་ཀྱིས་ནུས་པ་ཐོན་པའི་རོགས་རམ་དང་གདུང་སེམས་མཉམ་སྐྱེད་བྱས་མེད་སྟབས། རྒྱལ་ཚོགས་གཙོས་པའི་རྒྱལ་སྤྱིའི་ཚོགས་སྡེ་ཁག་གིས་བོད་ནང་གི་འགྲོ་བ་མིའི་ཐོབ་ཐང་དང་ཆོས་ལུགས། ཁོར་ཡུག་བཅས་ཕྱོགས་ཡོངས་ལ་གཟིགས་རྟོག་གནང་རྒྱུའི་དྲན་གསོ་བྱ་ཆེད་དང་། མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་གི་འགན་འཛིན་མཆོག་བོད་ནང་ཕེབས་ཏེ་དངོས་ཡོད་གནས་སྟངས་ལ་རྟོག་ཞིབ་གནང་དགོས་པའི་འབོད་སྐུལ་གནང་ཆེད་ཡིན་སྐོར་ངོ་སྤྲོད་གནང་བྱུང་།

ཁོང་ལ་ཐེངས་འདིའི་ལས་འགུལ་ཐད་རྒྱ་གར་གཞུང་ནས་བཀག་འགོག་གནང་ཡོད་མེད་དྲིས་པར། “ དེའི་ཐད་ཉེ་ཆར་ངས་རྒྱ་གར་གཞུང་ལ་ཇན་ཏར་མན་ཏར་ས་གནས་སུ་དུས་ཚོད་ངེས་མེད་ཀྱི་ཟས་བཅད་ངོ་རྒོལ་གནང་རྒྱུའི་སྙན་ཞུ་ཕུལ་ཡོད་ཀྱང་། ཁོང་ཚོས་ང་ལ་ཉིན་གཅིག་མ་གཏོགས་དུས་ཚོད་ངེས་མེད་ཀྱི་ཟས་བཅད་ངོ་རྒོལ་གནང་ཆོག་གི་མ་རེད་ཅེས་ཆོག་མཆན་སྤྲད་མ་སོང་ལ། ཁ་སང་སྔ་དྲོ་ཉེན་རྟོག་པས་ཉིན་གཅིག་གི་ཟས་བཅད་གནང་རྒྱུའི་མཚན་རྟགས་བཀོད་དགོས་ཚུལ་སོགས་ཀྱི་རྙོག་གྲ་ལབ་སོང་མོད། དེ་རིང་དམིགས་བསལ་རྙོག་གྲ་ལབ་མཁན་བྱུང་མ་སོང་། གལ་སྲིད། རྙོག་གྲ་བཤད་མཁན་མ་བྱུང་བ་ཡིན་ན་ངས་མུ་མཐུད་ཟས་བཅད་ངོ་རྒོལ་གནང་འཆར་ཡོད། ” ཅེས་བརྗོད་བྱུང་།