བོད་པ་ཚོ་ཕྱུག་པོ་ཆགས་རྒྱུར་ཧ་ཅང་དགའ་བོ་འདུག་ཟེར།

འཇར་མན་པ་སེམས་ཁམས་སློབ་གསོ་ཁྱད་ལས་པ་སྐུ་ཞབས་ཨོར་རྒྱན་ཤཱར་ཌི་( Jurgen Manshardt)ལགས་ཀྱིས་ལོ་ངོ་ ༣༠ ལྷག་རིང་བོད་ཡིག་དང་བོད་པའི་ནང་ཆོས་སློབ་གཉེར་བྱས་ཡོད་ཅིང་། དེང་སང་འཇར་མན་རྒྱལ་ས་སྦར་ལིན་ནང་ནང་ཆོས་དཔེ་དེབ་རྩོམ་སྒྲིག་དང་སྐད་བསྒྱུར། སེམས་ཁམས་སློབ་གསོ་བཅས་ཀྱི་ཐོག་ཕྱག་ལས་གནང་གི་ཡོད་སྟབས་གསར་འགོད་པའི་ཁོང་དང་གླེང་མོལ་བྱས་ཡོད།

    སྐུ་ཞབས་ཨོར་རྒྱན་ཤཱར་ཌི་ལཊ་ཀྱིས་ཁོ་རང་གི་མི་ཚེའི་ལོ་རྒྱུས་ངོ་སྤྲོད་གནང་དོན། “ ང་སྐྱེས་ས་འཇར་མན་གྱི་གྲོང་ཁྱེར་ཧམ་བྷོ་གྷི་(Humburg) ནང་རེད། ང་རང་ཆུང་དུས་ཉི་ཧོང་ནང་དར་བའི་ནང་ཆོས་ཀྱི་དེབ་འགའ་རེ་ཀློག་མྱོང་ཡོད། ༡༩༧༩ ལོ་ཙམ་ནས་བོད་པའི་ནང་ཆོས་ལ་དོ་སྣང་བྱུང་སོང་། ང་རང་སྐྱེས་སའི་གྲོང་ཁྱེར་དེའི་ནང་དགེ་ལུཊ་པའི་ཆོས་ཚོགས་ཞིག་ཡོད་པ་རེད། དེར་ནང་ཆོས་སློབ་སྦྱོང་དང་སྒོམ་རྒྱག་སྟངས་ཐོག་ཉམས་ལེན་ཏོག་ཙམ་བྱས་མྱོང་ཡོད། ཧམ་བྷོ་གྷིའི་མཐོ་སློབ་ནང་ནུབ་ཕྱོཊ་མཚན་ཉིད་རིག་པ་དང་བོད་སྐད་བོད་ཡིག་ཐོག་སློབ་སྦྱོང་བྱས་པ་ཡིན། ༡༩༩༢ ལོར་འཇར་མན་ནང་རྟེན་གཞི་བྱས་པའི་དགེ་ལུཊ་པའི་ཆོས་ཚོཊ་ (Tibet Center Humburg) ནང་གྲྭ་བ་བྱས་ཤིང་། རྗེས་སུ་རྒྱ་གར་ནང་ཡོང་སྟེ་ནང་ཆོས་སློབ་སྦྱོང་དང་སུ་ཇཱ་སློབ་གྲྭར་སེམས་ནད་གསོ་ཐབས་ཐོག་ཟབ་སྦྱོང་སོཊ་སྤྲོད་ཀྱི་ཡོད” ཅེས་བརྗོད་བྱུང་།

    སུ་ཇཱ་སློབ་གྲྭའི་ནང་སེམས་ཁམས་སློབ་གསོའི་ཟབ་སྦྱོང་གནང་བའི་སྐོར་དྲིས་པར་ཁོང་གིས། “སྤྱིར་བཏང་ང་རང་སྒོམ་རིམ་ནས་སེམས་ལ་སྟངས་འཛིན་ཇི་ལྟར་བྱེད་མིན་ཐོག་དམིགས་བསལ་དོ་སྣང་ཡོད། ངས་སྔོན་མ་ནས་ནང་ཆོས་དང་ནུབ་ཕྱོགས་ཀྱི་སེམས་ཁམས་རིག་པ་ཟུང་འབྲེལ་ཐོག་སེམས་ནད་གསོ་ཐབས་ཐོག་ཉམས་ཞིབ་བྱེད་ཀྱིན་ཡོད། རྗེས་སུ་རྒྱལ་སྤྱིའི་བོད་དོན་ལས་འགུལ་ཁང་གི་ལས་འཆར་འོག་ང་ལ་སུ་ཇཱ་བོད་ཁྱིམ་སློབ་གྲྭའི་ནང་སེམས་ནད་གསོ་ཐབས་ཐོག་ཟབ་སྦྱོང་སྤྲོད་ཐུབ་མིན་སྐད་ཆ་དྲིས་སོང་། ལས་ཀ་དེར་ངས་ངོས་ལེན་བྱས་ཏེ་སུ་ཇཱ་སློབ་གྲྭའི་དགེ་རྒན་དང་སློབ་ཕྲུག ཁྱིམ་ཚང་གི་ཨ་མ་ཚོར་བདུན་ཕྲག་གཅིག་རིང་ཟབ་སྦྱོང་དང་། ལྷག་པར་སེམས་ཀྱི་དཀའ་ངལ་ཡོད་པའི་སློབ་ཕྲུག་ཚོར་རོགས་རམ་བྱས་པ་ཡིན། དེའི་རྗེས་ནས་བཟུང་ང་ལོ་རེར་ཐེངས་གཉིས་རེ་སུ་ཇཱ་སློབ་གྲྭ་གཙོས་བོད་ཁྱིམ་སློབ་གྲྭ་ཁག་ཏུ་འགྲོ་བཞིན་ཡོད” ཅེས་བརྗོད་བྱུང་།

    བོད་པའི་ཆབ་སྲིད་སྐོར་ནས་གླེང་མོལ་བྱས་སྐབས་ཁོང་གིས། “ ༡༩༨༩ ལོར་ལྷ་སའི་དོན་རྐྱེན་བྱུང་རྗེས་ང་དང་གྲོགས་པོ་ཁ་ཤས་ཀྱིས་གྲོང་ཁྱེར་ཧན་བྷོ་གྷི་གཙོས་གྲོང་ཁྱེར་ཁ་ཤས་ནང་འཇར་མན་བོད་དོན་རོགས་སྐྱོར་ཚོགས་པ་ (Tibet Initiative Deutschland) བཙུགས་པ་ཡིན། བོད་དོན་ཁྱབ་བསྒྲགས་དང་རོགས་དངུལ་འཚོལ་སྒྲུབ་བྱས་པ་ཡིན། ང་རང་གྲྭ་བ་བྱས་རྗེས་ནང་ཆོས་དང་ཆབ་སྲིད་གཉིས་མཉམ་དུ་འགྲོ་ཐབས་མེད་སྟབས། བོད་དོན་ཆབ་སྲིད་སྐོར་ལ་ལས་ཀ་བྱེད་རྒྱུ་མཚམས་འཇོག་བྱས་ཀྱང་། ལོ་འགའི་སྔོན་འཇར་མན་ནང་གི་རྒྱལ་སྤྱིའི་བོད་དོན་ལས་འགུལ་ཁང་གི་ལས་བྱེད་ཚོས་ང་ལ་འབྲེལ་བ་བྱས་ཏེ་བོད་དོན་ལས་ཀ་མང་པོ་ཞིག་བྱེད་དགོས་བྱུང་སོང” ཞེས་བརྗོད་སོང་།

    བོད་དོན་འཐབ་རྩོད་ཐོག་ལྟ་ཚུལ་གང་འདྲ་ཡོད་མེད་དྲིས་པར། “ངས་བསམ་ན་བོད་པར་བསྐྱར་དུ་རང་བཙན་རག་རྒྱུ་དཀའ་ལས་ཁག་པོ་རེད་བསམ་གྱི་འདུག གང་ཡིན་ཟེར་ན། རྒྱ་ནག་ཕྱོགས་གང་ཐད་ནས་ཡག་པོ་ཆགས་ཡོང་གི་ཡོད་པ་རེད། འཛམ་གླིང་ཐོག་ནས་རྒྱ་ནག་དང་མཉམ་འབྲེལ་ཤུགས་ཆེ་རུ་འགྲོ་བཞིན་ཡོད་པ་རེད། འབྱུང་འགྱུར་ལོ་ཉི་ཤུའི་ནང་ཕྱི་དངོས་པོའི་འཕོ་འགྱུར་དང་བསྟུན་ཏེ་བོད་པའི་འཐབ་རྩོད་ཀྱི་སེམས་ཤུགས་སོབ་སོབ་འདྲ་བོ་ཆགས་རྒྱུའི་ཉེན་ཁ་མཐོང་གི་འདུག དོན་དག་གཉིས་པ། རྒྱ་ནག་དམར་ཤོག་གིས་བོད་ལ་བཙན་འཛུལ་བྱས་པ་ནས་བཟུང་རྒྱ་རིགས་ས་ཡ་མང་པོ་བོད་ནང་གནས་སྤོར་བྱས་ཡོད་པ་རེད། ཕྱི་རྒྱལ་ཁག་ཏུ་ཡོད་པའི་རྒྱ་རིགས་བོད་དོན་ལ་རོགས་པ་བྱེད་མཁན་ཚོས་ཀྱང་བོད་དང་རྒྱ་གཉིས་ཁ་ཁ་བྱེད་རྒྱུར་འདོད་པ་ཡོད་པ་མ་རེད། གལ་སྲིད་རྒྱ་ནག་དམངས་གཙོར་གྱུར་ཡང་། བོད་ནང་གི་མི་འབོར་མང་ཤོས་རྒྱ་རིགས་ཆགས་ཡོད། ཁོང་ཚོ་ཕྱིར་ལོག་གི་མ་རེད། ང་རང་གི་བསམ་ཚུལ་བྱས་ན། རྒྱ་ནག་ལ་འགྱུར་བ་ཞིག་ཏན་ཏན་འགྲོ་གི་རེད། གོ་སྐབས་དེ་དང་བསྟུན་ཏེ་རིམ་བཞིན་བོད་པའི་དཀའ་ངལ་དེ་ཡང་སེལ་རྒྱུའི་རེ་བ་ཡོད་པ་རེད་བསམ་གྱི་འདུག བོད་པ་ཚོས་གོ་སྐབས་ཡག་པོ་ཞིག་སླེབས་སྐབས་གྲ་སྒྲིག་ཡག་པོ་དགོས་པ་རེད” ཅེས་བརྗོད་བྱུང་།

    ཁོང་ཐོག་མ་གྲྭ་བ་བྱས་པ་དང་རྗེས་སུ་གྲྭ་བ་ལོག་པ་བཅས་ཀྱི་སྐོར་དྲིས་པར། “ ཐོག་མ་ངས་ནང་ཆོས་སློབ་གཉེར་དང་ཉམས་ལེན་ཡག་པོ་ཞིག་བྱེད་ཨེ་ཐུབ་ན་བསམ་ནས་གྲྭ་བ་བྱས་པ་ཡིན། ལོ་ལྔ་ཙམ་རིང་གྲྭ་བ་ཡག་པོ་བྱས་ཏེ་བསྡད་ཀྱང་གྲོང་ཁྱེར་ཧམ་བྷོ་གྷིའི་ནང་གྲྭ་ཆས་གྱོན་ནས་སོང་ན་མི་བདེ་བ་དང་། ནང་ཆོས་གཏིང་ཟབ་པོ་ཞིག་སློབ་སྦྱོང་བྱེད་པའི་གོ་སྐབས་ཤིག་རག་གི་མི་འདུག དེ་ནས་ངས་ཆོས་ཚོགས་ཀྱི་དགེ་བཤེས་ངག་དབང་ཐུབ་བསྟན་ལགས་སུ་ཞུས་ཏེ། ང་རང་ངྷ་ས་རིགས་ལམ་སློབ་གཉེར་ཁང་ངམ་སེ་ར་དགོན་པ་ལྟ་བུའི་ནང་ཆོས་ཉམས་ལེན་བྱེད་དུ་འགྲོ་འདོད་འདུག་ཅེས་ཞུས་པ་ཡིན། རྗེས་སུ་ང་རྒྱ་གར་རྡོ་རྗེ་གདན་དུ་ཡོང་སྟེ་ནང་ཆོས་སློབ་སྦྱོང་དང་མཉམ་དུ་ཁུ་ནུའི་བླ་མས་མཛད་པའི་བྱང་ཆུབ་སེམས་འགྲེལ་འཇར་མན་སྐད་ཡིག་ནང་བསྒྱུར་བ་དང་། ཁོང་གི་མཛད་རྣམ་གྱི་དེབ་ཅིག་བྲིས་པ་ཡིན།དེ་ནས་རིམ་བཞིན་ང་རང་གི་ཐག་གཅོད་ལྟར་བལ་ཡུལ་ནང་གི་བླ་མ་ཞིག་ལ་སྡོམ་པ་ཕུལ་རྗེས། བོད་རིགས་བུད་མེད་ཀརྨ་སྒྲོལ་མ་དང་མཉམ་དུ་ཆང་ས་བརྒྱབ་སྟེ་ད་ལྟ་བུ་གཅིག་སྐྱེས་ཡོད” ཅེས་གད་མོ་དགོད་བཞིན་བརྗོད་བྱུང་།

    བོད་མི་ཚོར་འབྲེལ་འདྲིས་ཡུན་རིང་བྱས་པའི་བརྒྱུད་རིམ་ཁྲོད་བོད་མི་ཚོ་གང་འདྲ་ཞིག་ལ་མཐོང་སོང་། “ ང་སྡོད་ས་རྒྱལ་ས་སྦར་ལིན་ནང་བོད་པ་གང་ལ་གང་འཚམ་ཞིག་ཡོད་པ་རེད། ངས་སྐད་ཆ་དྲང་མོར་བཤད་ན། བོད་པ་ཚོ་ཕྱུག་པོ་ཆཊ་རྒྱུར་ཧ་ཅང་དགའ་བོ་འདུག ལས་ཀར་ཡང་གདམ་གསེས་ཆེན་པོ་བྱེད་ཀྱི་འདུག སེམས་ནང་གི་གནས་ཚུལ་ཕྱིར་མི་སྟོན་པར་འདྲ་ཆཊ་པོ་བྱེད་རྒྱུར་དགའ་བོ་འདུག དེས་སོ་སོར་གྱོང་རག་གི་རེད་དྲན་གྱི་འདུག” ཅེས་བརྗོད་སོང་།

གསར་འགོད་པ། ལྷ་སྐྱབས་རྒྱལ།

བོད་ཀྱི་དུས་བབ་ཚགས་པར་ལས་འདིར་བཀོད།