རྒྱ་ནག་ནང་འབར་གས་དོན་རྐྱེན་བྱུང་།

ཁ་སང་སྔ་དྲོར་ཧྲན་ཞི་ཞིང་ཆེན་ཐའེ་ཡཱན་གྲོང་ཁྱེར་ཡེན་ཙི་ཁྲོམ་གཞུང་དུ་འབར་གས་དོན་རྐྱེན་བྱུང་སྟེ། མི་གཅིག་རྐྱེན་འདས་དང་ཉུང་མཐར་མི་ ༨ ལ་རྨས་སྐྱོན་ཕོག་ཡོད་འདུག

ཁ་སང་སྔ་དྲོའི་རྒྱ་ནག་གི་ཆུ་ཚད་ ༧།༤༠ ཡས་མས་ལ། རྒྱ་ནག་ཧྲན་ཞི་ཞིང་ཆེན་ཐའེ་ཡཱན་གྲོང་ཁྱེར་ཞིང་ཆེན་ཨུ་ཡོན་ལྷན་ཁང་གི་སྒོར་འབར་རྫས་ ༨ ཙམ་བསྟུད་མར་གས་ཐོར་བྱུང་སྟེ། མི་ ༡ རྐྱེན་ལམ་དུ་ཕྱིན་ཡོད་པ་དང་གཞན་མི་ ༨ ལ་རྨས་སྐྱོན་ཕོག་ཡོད་འདུག ཞིང་ཆེན་ཨུ་ཡོན་ལྷན་ཁང་ལས་ཁུངས་མདུན་གྱི་རླངས་འཁོར་ ༢༠ ལྷག་ལ་ཆག་སྐྱོན་བཟོས་ཡོད་འདུག དོན་རྐྱེན་བྱུང་མ་ཐག་ཡུལ་དངོས་སུ་དམག་མི་མང་པོ་འགྲེམས་འཇོག་གིས་དམ་དྲག་བྱས་ཡོད་ཅིང་། གནས་ཚུལ་དེའི་སྐོར་དྲ་ལམ་ཁག་ཏུ་ཐོན་པ་ནག་གསུབ་བཏང་ཡོད་འདུག

གསར་ལམ་ཁག་ཏུ་གནས་ཚུལ་འཐོན་པར། ཉིན་དེར་ཉེས་ཅན་གྱིས་འབར་རྫས་ཁྱོན་ ༩ བཞག་ཡོད་ཀྱང་ ༡ གས་ཐོར་བྱུང་མེད་ཅིང་། ཉེན་རྟོག་ཕྱོགས་ནས་དོགས་ཡོད་ཉེས་ཅན་ཞིག་འཛིན་བཟུང་བྱས་ཡོད་སྐོར་བརྗོད་འདུག གནད་དོན་དབྱེ་ཞིབ་པ་ཚོས། ཐེངས་འདིའི་འབར་གས་དོན་རྐྱེན་དེ་རྒྱ་ནག་དབུས་ལྟ་ཞིབ་ཚོགས་པ་ཧྲན་ཞི་ཞིང་ཆེན་དུ་ཡོང་སྟེ་ལས་ཀར་རྟོག་ཞིབ་བྱེད་བཞིན་པ་དང་། དམར་ཤོག་ཚོགས་པའི་སྐབས་བཅོ་བརྒྱད་པའི་གྲོས་ཚོགས་ཐེངས་གསུམ་པ་འཚོགས་པར་ཉིན་ ༣ ལས་མེད་པའི་དུས་ཚོད་ཅིག་ལ་འཁེལ་ཡོད་པ་བཅས་ལ་གཞིགས་ན། རྒྱ་གཞུང་གིས་མི་མང་ལ་དྲག་གནོན་དང་མགོ་སྐོར་གྱི་བྱེད་ཐབས་ལག་བསྟར་བྱེད་བཞིན་པར་ངོ་རྒོལ་དང་ཉེན་བརྡ་བཏང་བ་ཙམ་ལས། ཤི་རྨས་ཀྱི་དོན་རྐྱེན་བཟོ་འདོད་མེད་པ་དང་། གནས་ཚུལ་འདིས་རིམ་པ་ཁག་གི་དཔོན་རིགས་ཚོར་འཇིགས་སྣང་ངེས་ཅན་ཐེབས་ཡོད་ལུགས་རྗོད་ཀྱིན་འདུག  

ད་ལོའི་ཕྱི་ཟླ་ ༦ ཚེས་ ༧ ཉིན་རྒྱ་ནག་ཧྥོའུ་ཅན་ཞིང་ཆེན་ཞཱ་མེན་དུ་འབར་གས་དོན་རྐྱེན་བྱུང་སྟེ། མི་ ༤༧ རྐྱེན་འདས་དང་མི་ ༣༤ ལ་རྨས་སྐྱོན་བཟོས་ཡོད་པ་དང་། ཕྱི་ཟླ་ ༧ ཚེས་ ༢༠ ཉིན་པེ་ཅིན་རྒྱལ་སྤྱིའི་གནམ་ཐང་དུ་འབར་གས་བྱུང་སྟེ་མི་ ༢ ལ་རྨས་སྐྱོན་བཟོས་ཡོད། དེ་བཞིན། ཟླ་ ༩ ཚེས་ ༩ ཉིན་ཀཱོང་ཞི་ཞིང་ཆེན་ཀེ་ལིན་ལིན་ཀྲུའུ་རྫོང་གི་སློབ་ཆུང་ཞིག་གི་སྒོ་ཁར་འབར་གས་བྱུང་སྟེ། མི་ ༢ རྐྱེན་འདས་དང་མི་ ༤༥ ལ་རྨས་ཕོག ཕྱི་ཟླ་ ༡༠ པའི་ཚེས་ ༢༨ ཉིན་གནམ་བདེ་སྒོ་མོའི་མདུན་དུ་རླངས་འཁོར་ཞིག་ལ་འབར་གས་དོན་རྐྱེན་བྱུང་སྟེ་མི་ ༥ འདས་གྲོངས་དང་། མི་ ༤༠ ཙམ་ལ་རྨས་སྐྱོན་ཕོག་པ་སོགས་རྒྱ་ནག་ནང་གཏོར་རྒོལ་དོན་རྐྱེན་བསྟུད་མར་འབྱུང་བཞིན་ཡོད་འདུག