དེ་རིང་འཕྲོད་བསྟེན་ལས་ཁུངས་ཀྱིས་གཞིས་ཆགས་ཁག་གི་འཕྲོད་བསྟེན་ལས་བྱེད་ཚོར་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞིའི་སྐོར་གྱི་ཟབ་སྦྱོང་ཞིག་སྤྲད་དེ་ལས་གཞི་འདི་ཧ་ཅང་གལ་ཆེན་ཞིག་ཡིན་སྟབས་འབྲེལ་ཡོད་ཚོས་གང་ཐུབ་ཅི་ནུས་ཀྱིས་ཤུགས་བསྐྱོན་རོགས་ཞེས་བཀའ་གནང་སོང་།
དེ་རིང་སྔ་དྲོའི་ཆུ་ཚོད་ ༩།༠༠ པའི་ཐོག བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་འོག ས་གནས་གཞིས་ཆགས་ཁག་གི་སྨན་ཁང་གི་འགན་འཛིན་རྣམ་པ་དང་འབྲེལ་ཡོད་ལས་བྱེད་བཅས་ལ་ཉིན་ ༣ རིང་གི་བཙན་བྱོལ་བོད་མིའི་སྨན་བཅོས་ལྟ་སྐྱོང་སྦྱོང་བརྡར་ཟབ་སྦྱོང་ཞིག་དབུ་འཛུགས་གནང་ཡོད་པ་དང་། མཛད་སྒོའི་ཐོག་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་དང་འཕྲོད་བསྟེན་དྲུང་ཆེ་ཤོ་ཟུར་བསོད་ནམས་ཆོས་འཕེལ་ལགས། དྲུང་འཕར་སྦྲ་གཉིས་ཚེ་རྒྱལ་ལགས་བཅས་ཕེབས་འདུག་ལ། ཟབ་སྦྱོང་སྟེང་རྒྱ་གར་ནང་ལོགས་ཀྱི་བོད་མིའི་གཞིས་ཆགས་ཁག་ ༢༥ ནས་འབྲེལ་ཡོད་ལས་བྱེད་ ༣༡ ཙམ་མཉམ་ཞུགས་གནང་འདུག
འཕྲོད་བསྟེན་བཀའ་བློན་མཆོག་གིས་ཟབ་སྦྱོང་དབུ་འབྱེད་ཀྱི་གསུང་བཤད་གནང་དོན། “ སྨན་བཅོས་ལྟ་སྐྱོང་ལས་གཞི་འདི་ང་ཚོས་མང་ཚོགས་ལ་སྨན་བཅོས་ཐད་དཔལ་འབྱོར་གྱི་མཐུན་རྐྱེན་སྦྱོར་ཆེད་དབུ་འཛུགས་བྱས་པ་ཞིག་ཡིན་ལ། འཕྲོད་བསྟེན་ལས་ཁུངས་ཀྱི་ལས་གཞི་གལ་འགངས་ཆེ་བ་ལྔའི་ནང་གི་གལ་ཆེ་ཤོས་ཤིག་ལ་ངོས་འཛིན་བྱེད་ཀྱིན་ཡོད། དང་ཐོག་ང་ཚོས་སྨན་བཅོས་ལྟ་སྐྱོང་ལས་གཞིའི་འཆར་གཞི་སྒྲིག་སྐབས། མི་ཁྲི་ ༢ ཀྱི་དམིགས་ཚད་བཟུང་སྟེ་ལས་གཞི་གཏན་འབེབས་བྱས་ཡོད་ཀྱང་། ད་སྔ་མི་ཁྲི་ ༡ ལྷག་ལས་བྱུང་མེད་སྟབས། ཐོག་མའི་དམིགས་ཚད་མ་ལོངས་བ་དེས་ལས་གཞི་འདི་གནས་དང་མི་གནས་ལ་གཏན་གཏན་ཁྱད་པར་ཞིག་བཟོ་ཡི་ཡོད་པ་རེད། དེ་ཚང་མས་མཁྱེན་དགོས་པ་ཧ་ཅང་གལ་ཆེན་པོ་རེད། ང་ཚོས་ལས་ཀ་ག་རེ་བྱས་ཀྱང་དམིགས་ཡུལ་ངེས་ཅན་ཞིག་འཛིན་རྒྱུ་གལ་ཆེན་པོ་འདུག ང་ཚོས་མི་ཁྲི་ ༥ ཡི་དམིགས་ཚད་བཟུང་བ་ཡིན་ན་ཕལ་ཆེར་ཁྲི་ ༢ བསླེབ་པའི་རེ་བ་ཡོད་པ་རེད། དམིགས་ཚད་ཁྲི་ ༢ བཟུང་ན་ཁྲི་ ༡ ལས་བསླེབས་ཐུབ་མེད་པར་བརྟེན། ཚང་མས་སོ་སོའི་ས་གནས་གཞིས་ཆགས་ཁག་གི་མི་འབོར་གྱི་བརྒྱ་ཆ་ ༥༠ སྨན་བཅོས་ལྟ་སྐྱོང་ནང་བསླེབ་ཐུབ་པར་འབད་བརྩོན་གནང་རོགས། ས་གནས་མི་མང་ལ་ལས་གཞིའི་འགྲོ་གྲོན་དང་ཁེ་ཕན་སོགས་ཕྱི་གསལ་ནང་གསལ་བྱས་ཏེ་འགྲེལ་བཤད་རྒྱག་རྒྱུ་དང་། འདུ་འཛོམས་སར་སྦྱར་ཡིག་སྦྱོར་བ་དང་གསར་ཁང་བརྒྱུད་ནས་ཁྱབ་བསྒྲགས་མང་ཙམ་བྱེད་རྒྱུ་ཧ་ཅང་གལ་ཆེན་པོ་རེད། ད་བར་དུ་ང་ཚོས་ཚོགས་ཁང་ནང་འཕྲོད་བསྟེན་གོ་རྟོགས་སྤེལ་བ་རེད། ད་ནས་བཟུང་ཁྱིམ་ཚང་རེ་རེའི་ནང་ཕྱིན་ཏེ་འཕྲོད་བསྟེན་སྐོར་འགྲེལ་བཤད་རྒྱག་དགོས་ཀྱི་འདུག”ཅེས་གསུངས་བ་དང་འབྲེལ། བོད་མིའི་འདུས་སྡོད་ཁུལ་དུ་མ་དང་བྱིས་པའི་འཕྲོད་བསྟེན། འགོས་ནད་མ་ཡིན་པའི་ནད་རིགས་སྔོན་འགོག་སོགས་ལ་གོ་རྟོགས་གོང་འཕེལ་གྱི་ལས་འགུལ་མང་པོ་སྤེལ་དགོས་སྐོར་དང་། དེ་བཞིན་སྨན་བཅོས་ལྟ་སྐྱོང་གི་ལས་གཞིའི་ནང་འཛུལ་ཞུགས་གནང་མཁན་ཚོས་བཟང་སྤྱོད་དང་སྤྱི་སེམས་ལྡན་པའི་ཐོག་ནས་ཆ་ཤས་ལེན་དགོས་སྐོར་སོགས་གསུངས་སོང་།
དེ་རྗེས་འཕྲོད་བསྟེན་དྲུང་ཆེ་བསོད་ནམས་ཆོས་འཕེལ་ལགས་ཀྱིས་བཙན་བྱོལ་བོད་མིའི་འཕྲོད་བསྟེན་གནས་སྟངས་སྐོར་གསུང་སྐབས། བོད་ནང་འཕྲོད་བསྟེན་སྐོར་གྱི་གོ་རྟོགས་སྤེལ་བ་སྐོན་པོ་ཡིན་ཡང་ཁོར་ཡུག་དང་གནམ་གཤིས་སོགས་ཀྱིས་ནད་རིགས་རང་བཞིན་གྱིས་ཉུང་ཉུང་ཡིན་ཡང་། ཕྱི་ལོ་ ༡༩༥༩ ལོར་བོད་མི་མང་པོ་རྒྱ་གར་ཚ་བའི་ལུང་པར་བཙན་བྱོལ་དུ་བསླེབས་རྗེས། གནམ་གཤིས་སོགས་ཀྱིས་བོད་མི་མང་པོ་རྐྱེན་འདས་སུ་གྱུར་བར་བརྟེན། གཞི་ནས་བོད་མི་ཚོར་གཙང་སྦྲ་འཕྲོད་བསྟེན་གལ་ཆེན་པོ་ཡིན་པའི་ཚོར་སྣང་བསླེབས་ཡོད་སྐོར་དང་། སྔོན་ཆད་བཙན་བྱོལ་བོད་མིའི་སྤྱི་ཚོགས་ནང་གློ་ནད་(TB)ཕོག་པའི་གྲངས་འབོར་ཞེ་དྲག་མང་པོ་ཡོད་ཀྱང་། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་སྨན་བཅོས་དང་འཕྲོད་བསྟེན་སྐོར་གྱི་གོ་རྟོགས་གོང་འཕེལ་གཏོང་བའི་ལས་འགུལ་མང་དུ་སྤེལ་བ་བརྒྱུད། དེང་སང་གློ་ནད་ཕོག་པ་སྔོན་ཆད་དང་བསྡུར་ན་ཉུང་དུ་ཕྱིན་ཡོད་མོད། མི་མང་ལ་གོ་རྟོགས་མུ་མཐུད་སྤེལ་མ་ཐུབ་པ་ཡིན་ན། དེང་སང་བོད་མིའི་སྤྱི་ཚོགས་ནང་(MTI TB)ནད་པ་མང་པོ་འབྱུང་བཞིན་ཡོད་པ་དང་། ལྷག་པར་དུ་གཞོན་སྐྱེས་ཚོའི་ནང་དུ་ན་ཚ་དེ་མང་པོ་སླེབ་ཀྱིན་ཡོད་སྟབས། འཕྲོད་བསྟེན་གོ་རྟོགས་ལས་འགུལ་དང་དཔལ་འབྱོར་གྱི་མཐུན་རྐྱེན་ཙམ་མིན་པར་དོ་བདག་རང་ངོས་ནས་རྒྱུན་ལྡན་གྱི་བྱ་སྤྱོད་དང་བཟའ་བཏུང་ལ་དོ་ཁུར་གནང་དགོས་སྐོར་དང་། དེང་སང་འཛམ་གླིང་རང་བཞིན་གྱི་ནད་རིགས་སྣ་ཚོགས་འགོས་ཁྱབ་ཏུ་འགྲོ་བཞིན་ཡོད་པ་ལྟར། བོད་མིའི་སྤྱི་ཚོགས་ནང་ནད་རིགས་སྣ་ཚོགས་སླེབ་ཀྱིན་ཡོད་སྟབས། དེ་རིགས་ལ་སྐབས་འཕྲལ་བོད་མིའི་སྒྲིག་འཛུགས་དང་ས་གནས་འབྲེལ་ཡོད་ཚོས་མི་མང་ནང་གོ་རྟོགས་ལས་འགུལ་སྤེལ་རྒྱུ་གལ་ཆེན་ཡིན་སྐོར་སོགས་གསུངས་སོང་།
ཐེངས་འདིའི་ཟབ་སྦྱོང་སྐབས་རྒྱ་གར་གྱི་སྨན་བཅོས་ལྟ་སྐྱོང་ཚོགས་པ་(Micro Insurance Academy )ཡི་ལམ་སྟོན་འོག ཚོགས་པ་དེའི་ཁྱད་ལས་པ་ཞིག་ཆེད་གཏོང་གིས་སྨན་བཅོས་ལྟ་སྐྱོང་ལས་གཞིའི་ནང་ཚོགས་མི་འཛུལ་ཞུགས་བྱེད་ཐབས་སྐོར་ལམ་སྟོན་གནང་རྒྱུ་དང་། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་སྨན་བཅོས་ལྟ་སྐྱོང་སྡེ་ཚན་གྱི་འགན་འཛིན་དང་འབྲེལ་ཡོད་ལས་བྱེད། དེ་བཞིན་སྨན་བཅོས་ཞུ་ལེན་གྱི་ཡིག་ཆ་ཚང་དགོས་རིགས་ཀྱི་འབྲེལ་ཡོད་ལས་བྱེད་སོགས་ནས། ཁྱབ་ཁོངས་ཚོགས་ཞུགས་པ་ཚོར་སྨན་བཅོས་ལྟ་སྐྱོང་གནང་ཕྱོགས་ལམ་སྟོན་དང་དོགས་གཞིའི་རིགས་གོ་བསྡུར་གནང་རྒྱུ་ཡིན་འདུག
གསར་འགོད་པ། པདྨ་མཚོ།
གླང་དར་ལགས། རྦེད་དེ་ཕམ་ཉེས་སུ་མ་ཕྱིན་པར་ཨུ་ཚིགས་གནང་དགོས་ངེས་ཤིག་ཡིན་ཅིས་མ་མཁྱེན་པ་ཡིན་ནམ། ང་སྡོད་སའི་རྒྱལ་ཁབ་འདིར་ནད་པ་སྨན་རིན་གྱི་དཀའ་ངལ་རྩ་བ་ནས་འཕྲད་ཀྱི་མི་འདུག
བོད་མི་སོ་སོའི་ངོས་ནས་བསམ་བློ་འདི་འདྲ་གཏོང་དགོས། ད་ཆ་སྒོར་རྡོག་འགའ་སྤྲོད་དགོས་ཀྱང། རང་ཉིད་ཐང་ཐང་ཡིན་པས་སྐྱོན་མེད་ལ། མ་འོང་བར་ཅིག་ན་ཚེ་དཀའ་ངལ་གང་ཡང་མེད་པའི་ཁེ་ལ་ཐུགས་བསམ་བཞེས་དགོས། མ་ཟད་རང་ཉིད་མ་ན་ཡང་ན་མཁན་ཚོ་ལ་ཕན་ཙང། དགེ་བའི་བྱ་བ་ཡིན་པ་ངོ་ཤེས་པ་བྱེད་དགོས།
འཕྲོད་བསྟེན་ལས་ཁུངས་ཀྱི་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞི་ཟེར་བ་འདིར་ཕམ་ཉེས་འགྲོ་བཞིན་ཡོད་བཞིན་དུ་ཨུ་ཚུགས་བསྐྱོན་དོན་ག་རེ་ཡིན་ནམ།