དེ་རིང་བྱང་ཀོ་རི་ཡའི་རྒྱལ་སར་དེ་སྔའི་དབུ་ཁྲིད་ཀིམ་ཇོན་ཨེལ་སྐུ་གྲོངས་ཏེ་ལོ་གཉིས་འཁོར་བར་རྗེས་དྲན་མྱ་ངན་གྱི་མཛད་སྒོ་ཞིག་ཡོད་འདུག
དེ་རིང་བྱང་ཀོ་རི་ཡའི་རྒྱལ་སར་ཀོ་རི་ཡའི་མགོ་ཁྲིད་ཀིམ་ཇོང་ཨན་(Kim Jong-un)དང་མཐོ་རིམ་དཔོན་ཚོ་གཙོས་མང་ཚོགས་སྟོང་ཕྲག་མང་པོས་དེ་སྔའི་བྱང་ཀོ་རི་ཡའི་མགོ་ཁྲིད་ཀིམ་ཇོང་ཨེལ་(Kim Jong-il)འདས་གྲོངས་ཕྱིན་ཏེ་ལོ་གཉིས་འཁོར་བར་རྗེས་དྲན་མཛད་སྒོ་ཚོགས་ཡོད་ཅིང་། ཀིམ་ཇོང་ཨེལ་གྱི་བུ་ཆེ་བ་ཀིམ་ཇོང་ནམ་(Kim Jong-nam)བྱང་ཀོ་རི་ཡའི་དམག་སྤྱི་ཆེན་མོར་བསྐོ་བཞག་བྱས་ཡོད་འདུག
ཐེངས་འདིར་ད་ལྟའི་ཀོ་རི་ཡའི་མགོ་ཁྲིད་ཀིམ་ཇོང་ཨན་གྱི་ཨ་ནེ་ཀིམ་ཡོང་ཧེ་ (Kim Kyung-Kee)ཁོ་མོའི་གཅེན་པོའི་རྗེས་དྲན་མཛད་སྒོར་ཞུགས་མེད་ཅིང་། དེ་ནི་སྲིད་གཞུང་གིས་ཁོང་མོའི་ཁྱོ་ག་དམར་གསོད་བྱས་པས་ཡིན་པར་ངོས་འཛིན་བྱེད་ཀྱི་ཡོད། ཟླ་འདིའི་ཚེས་ ༨ ཉིན་བྱང་ཀོ་རི་ཡའི་དམར་ཤོག་ངལ་རྩོལ་སྲིད་དོན་ཚོགས་ཆེན་སྐབས། བྱང་ཀོ་རི་ཡའི་དམག་སྤྱི་ཆེན་མོ་ཆཱིང་སོན་ཐེག་(ChangSongThaek)ཡི་གོ་གནས་བླངས་ཡོད་པ་མ་ཟད། ངལ་རྩོལ་དམར་ཤོག་ཚོགས་པའི་ཚོགས་མི་ལས་ཕྱིར་འཕུད་བཏང་སྟེ་ཚེས་ ༡༢ ཉིན་བྱང་ཀོ་རི་ཡའི་དམག་དོན་ཁྲིམས་ཁང་གིས་ཁོ་རང་གིས་དབང་ཤུགས་སྒེར་གཅོད་དང་། སྲིད་གཞུང་མགོ་རྟིང་སློག་པའི་ལྐོག་གཡོ་བྱས་པའི་ཉེས་མིང་འོག་སྲོག་ཁྲིམས་བཅད་དེ་དམར་གསོད་བཏང་ཡོད།
ཆཱིང་སོན་ཐེག་ནི་ད་ལྟའི་བྱང་ཀོ་རི་ཡའི་མགོ་ཁྲིད་ཀྱི་ཨ་ཁུ་ཡིན་ཞིང་། ༢༠༡༡ ལོར་བྱང་ཀོ་རི་ཡའི་མགོ་ཁྲིད་ཀིམ་ཇོང་ཨེལ་ལ་སྙིང་ནད་བྱུང་སྟེ་འདས་གྲོངས་སུ་ཕྱིན་རྗེས། བྱང་ཀོ་རི་ཡའི་མཐོ་རིམ་དཔོན་རིགས་ཁྲོད་མགོ་ཁྲིད་སུ་འཇོག་མིན་གྱི་གནས་སྟངས་ཛ་དྲག་ཆགས་སྐབས། ཆཱིང་སོན་ཐེག་གི་རྒྱབ་སྐྱོར་རོགས་འོག་ཀིམ་ཇོང་ཨན་བྱང་ཀོ་རི་ཡའི་མགོ་ཁྲིད་ལ་སྡོད་ཐུབ་པ་བྱུང་ཡོད་འདུག
སྲིད་དོན་དབྱེ་ཞིབ་པ་ཚོས་ཐེངས་འདིར་བྱང་ཀི་རི་ཡའི་མགོ་ཁྲིད་ཀིམ་ཇོང་ཨན་གྱིས་རང་གི་ཨ་ཁུ་སྲོག་ཐོག་ཏུ་གཏོང་སྟངས་དེ་ནི། སྔོན་མ་ཧེའེ་ཊི་ལིར་(Hilter)དང་སི་ཌ་ལིན(Stalin)། མའོ་ཙི་ཏུང་གསུམ་གྱིས་རང་གི་དབང་ཆ་ས་བརྟེན་ཡོང་ཆེད་སོ་སོའི་དམག་དཔོན་དང་དྲུང་ཡིག་སོགས་དམར་གསོད་བཏང་བའི་སྲིད་བྱུས་དེ་ལག་ལེན་བསྟར་པ་ཞིག་ཡིན་པར་ངོས་འཛིན་བྱེད་ཀྱི་ཡོད་འདུག
མཉམ་འབྲེལ་རྒྱལ་ཚོགས་ཀྱི་དྲུང་ཆེ་གཙོས་ནུབ་ཕྱོགས་རྒྱལ་ཁབ་ཁག་གི་མགོ་ཁྲིད་ཚོས་བྱང་ཀོ་རི་ཡའི་སྲིད་གཞུང་ལ་སྐྱོན་བརྗོད་ཤུགས་ཆེན་བྱེད་ཀྱི་ཡོད་པ་དང་། བྱང་ཀོ་རི་ཡས་ད་ལྟའི་བྱེད་སྟངས་ལ་གཞིག་ན། མ་འོངས་པར་ལྷོ་ཀོ་རི་ཡར་དུས་ཚོད་ངེས་མེད་ཀྱི་འཇབ་རྒོལ་བྱེད་སྲིད་པར་ཚོད་དཔག་བྱེད་ཀྱི་ཡོད་པ་དང་། ལྷོ་ཀོ་རི་ཡའི་སྲིད་འཛིན་བྷར་ཁུ་( Park Genu-Hye) ཡིས་ཀྱང་རྒྱལ་ཁབ་བདེ་འཇགས་དཔོན་རིགས་ཚོ་བསྐོངས་ཏེ། བྱང་ཀོ་རི་ཡས་ཆིང་སོང་ཐེག་དང་ཁོ་རང་གི་འབྲེལ་ཡོད་དཔོན་རིགས་ཕྱིར་འཕུད་དང་དམར་གསོད་བྱེད་སྟངས་དེས་གོ་སྐབས་ལ་བསྟུན་ཏེ་ལྷོ་ཀོ་རི་ཡར་དམག་འཁྲུག་སློང་སྲིད་སྟབས། རྒྱལ་ཁབ་སྲུང་སྐྱོབ་ཐད་དོ་སྣང་ཆེན་པོ་བྱེད་དགོས་པའི་བཀའ་བཏང་ཡོད་འདུག
གསར་འགོད་པ། ལྷ་སྐྱབས་རྒྱལ།
བོད་ཀྱི་དུས་བབ་ཚང་ལ་རེ་སྐུལ་ཞུ་རྒྱུར་བྱང་ཀོ་རི་ཡ་དང་ལྷོ་ཀོ་རི་ཡ་སོགས་སྐོར་གྱི་གནས་ཚུལ་མང་ཙམ་ཤེས་འདོད་འདུག་པས་འདིའི་སྐོར་ལ་གནས་ཚུལ་ཞིབ་ཚགས་དང་གཏིང་ཟབ་མོས་འགོད་རོགས། གང་ཡིན་ཟེར་ན་དེང་སྐབས་ལྷོ་བྱང་ཀོ་རི་ཡ་རྒྱ་ནག་དང་ཇར་པན། ཨ་རི་སོགས་ཀྱི་ལག་ཆ་གལ་ཆེན་ཞིག་ཆགས་ཡོད་པ་རེད། ལྷག་པར་དུ་བྱང་ཀོ་རི་ཡ་དེ་དམར་ཤོག་རྒྱལ་ཁབ་ཡིན་པའི་སྟེང་ལ་རྒྱ་ནག་གི་ཨབ་ཕྲུག་ཅིག་ཀྱང་ཆགས་ཡདོ་པ་རེད།