བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༡༢ སྟེང་གི་རྩོམ་སྒྲིག་པའི་གཏམ།
ཉེ་ལམ་བོད་ཀྱི་སྲིད་བྱུས་ཉམས་ཞིབ་ཁང་གིས་བོད་མིའི་འཐབ་རྩོད་དང་གསར་འགྱུར་བརྒྱུད་ལམ་ཞེས་པའི་བརྗོད་གཞིའི་ཐོག་གཏམ་བཤད་སྤེལ་དགོས་པའི་རེ་སྐུལ་གནང་བྱུང་། བརྗོད་གཞི་འདི་གལ་ཆེན་པོ་དང་རྒྱ་ཆེན་པོ་ཞིག་ཡིན་སྟབས། ངས་མགོ་བརྗོད་འདིའི་འོག་ནས་བོད་པའི་གསར་ལམ་གྱི་ལས་འགན་འཕར་མ་ཞེས་པ་ཞིག་བདམས་པ་ཡིན། བོད་པའི་གསར་འགོད་པ་ཚོར་གསར་འགོད་པ་གཞན་ལས་ལྷག་གི་ལས་འགན་འཕར་མ་ཞིག་ཡོད་ལ། གཞུང་ཚོགས་སྒེར་གསུམ་གྱིས་དེ་ལ་འབབ་པའི་དབང་ཚད་འཐོལ་པ་དང་མཐུན་འགྱུར་འདང་ངེས་ཞུ་དགོས། བོད་པའི་གསར་ལམ་གྱིས་བོད་ནང་གི་གནས་ཚུལ་དྲང་བདེན་ཕྱོགས་ལྷུང་མེད་པར་དུས་ཐོག་ལ་ཁྱབ་སྤེལ་བྱེད་དགོས་པ་སྨོས་ཀྱང་ཅི་དགོས། ད་དུང་བཙན་བྱོལ་སྤྱི་ཚོགས་ནང་གི་ཁྲིམས་དཔོན་གཞན་པའི་གཞན་པ་དེའི་འགན་ཡང་འཁྱེར་དགོས།
དམངས་གཙོའི་སྤྱི་ཚོགས་ནང་ཁྲིམས་བཟོ་ལྷན་ཚོགས་དང་ཁྲིམས་ལུགས་དབང་འཛིན། འཛིན་སྐྱོང་སོགས་ལ་དམངས་གཙོའི་ཀ་བ་གསུམ་ཟེར་ཞིང་། དེའི་སྟེང་གསར་འགྱུར་བརྒྱུད་ལམ་བསྣན་ཏེ་དམངས་གཙོའི་ཀ་བ་བཞི་ཞེས་འབོད་སྲོལ་ཡོད། རྒྱལ་ཁབ་གཞན་གྱི་འོག་ཏུ་ལག་བསྟར་བྱེད་ཀྱིན་པའི་དམངས་གཙོ་དེ་རི་མགོའི་དམངས་གཙོ་ཡིན། དམངས་གཙོའི་ཆ་ལག་ཚང་དུ་ཆུགས་ཀྱང་ནུས་པ་ཆ་ཚང་འཛོམས་ཐབས་མེད། འཛིན་སྐྱོང་དང་ཁྲིམས་ལུགས་དབང་འཛིན་གཉིས་ཀྱི་སྒལ་ཚིགས་དེ་ལས་ཀྱང་གཉོམ་སྟབས། གསར་འགྱུར་བརྒྱུད་ལམ་གྱི་གཞོཊ་འདེགས་ལ་བརྟེན་ཏེ་ནུས་པ་འདོན་དགོས་པ་ངྷ་རམ་ས་ལའི་སྒྲིག་འཛུགས་དང་བོད་པའི་བརྒྱུད་ལམ་ཁག་གི་འབྲེལ་འདྲིས་ལས་རྟོགས་ཐུབ།
གལ་སྲིད་མི་སྒེར་རམ་ཚོགས་སྡེ་གཉིས་ཁ་མཆུར་ཐུག་པ་དང་། ཡང་ན་རྐུ་འཕྲོག་ལྐོག་ཟ་སོགས་ཀྱི་གནས་ཚུལ་བྱུང་སྐབས། ཉེས་ཅན་ཚོས་ཡ་རབས་བཟང་སྤྱོད་ལ་འགན་འཁུར་དགོས་པ་དང་། ཁྲིམས་དཔོན་ཚོས་ཀྱང་ཁྲིམས་གཞིའི་རྩ་ཚིག་དང་ཁ་བརྡ་སློབ་གསོ་མཉམ་དུ་ལག་བསྟར་བྱེད་དགོས། གལ་སྲིད་ཉེས་ཅན་གྱིས་བཟང་སྤྱོད་དོར་ན་ཉེས་ཅན་གང་དེའི་ཐོབ་ཐང་ཁག་མེད་པ་བཟོས་ཏེ། ཉེན་རྟོག་པ་བཏང་སྟེ་འཛིན་བཟུང་བྱེད་པའི་ཚབ་ཏུ་གསར་འགོད་པ་བཏང་སྟེ་སྤྱི་ཚོཊ་ལ་ཉེས་ཆད་གཅོད་དུ་འཇུག་རྒྱུ་ལས་ཐབས་གཞན་མེད། མདོར་ན། ཁྲིམས་ལུཊ་དབང་འཛིན་ལ་གསར་འགྱུར་བརྒྱུད་ལམ་གྱི་གཞོགས་འདེགས་མཁོ་ཞིང་གསར་འགྱུར་བརྒྱུད་ལམ་ལ་འཛིན་སྐྱོང་གི་མཐུན་འགྱུར་མཁོ།
བོད་པའི་གསར་འགོད་པ་ཚོས་བོད་ནང་གི་ཛ་དྲག་གནས་ཚུལ་རྣམས་དུས་ཐོག་ལ་རྒྱལ་སྤྱིའི་སྡིངས་ཆར་སྐྱེལ་ཐུབ་དགོས་ཤིང་། བཙན་བྱོལ་བོད་པའི་སྤྱི་ཚོགས་ནང་གི་གཞུང་ཚོགས་སྒེར་གསུམ་གྱི་གནས་ཚུལ་ཐབས་རྡུགས་དག་ཀྱང་དྲོད་རླངས་མ་ཡལ་བར་འཐེར་འདོན་བྱེད་ཐུབ་དགོས། རྒྱ་ནག་གཞུང་གིས་སྡང་ཟུག་བྱེད་ས་གནས་ཚུལ་ཕྱིར་གཏོང་བྱེད་མཁན་བོད་མི་ཚོ་ཡིན་ལ་བཙན་བྱོལ་ནང་གི་ཆེན་པོ་མཐོན་པོ་དག་གི་སྣང་བར་མི་འགྲོ་བའང་བོད་པའི་གསར་འགོད་པ་དག་ཡིན། ང་ཚོས་དགྲ་དགའ་གཉེན་སྡུག་ཟེར་བ་དང་གཞན་དབང་སྟབས་བསྟུན་ཟེར་བ་སོགས་ཀྱི་གཟུངས་སྔགས་གཉན་པོ་དེ་དག་སྐྱོར་ཏེ་མི་ཚེ་སྐྱེལ་ཐབས་དང་ཉི་མ་འཕུད་ཐབས་བྱས་བསྡད་ན། འཕྲལ་འཕྲལ་ལ་འགྲིག་འགྲིག་འདྲ་ཆགས་ཡོང་སྲིད་ཀྱང་། ཕུགས་ལ་སྤྱི་ཚོགས་རུལ་ནས་བོད་དོན་ཕོངས་ཀྱི་ཡོད་པའི་དཀྱེལ་ཡངས་ཀྱི་བློ་མིག་ཕྱེ་དགོས།
![Because of high altitudes in the Himalayas, difficult terrain and often poor weather, the Kailash Manasarovar pilgrimage if one of the most challenging in the world [File: Purnima Shrestha/Reuters]](https://tibettimes.net/wp-content/uploads/2026/05/Screen-Shot-2026-05-14-at-5.25.22-PM-360x180.png)
